ଆମ ପୃଥିବୀରେ ପ୍ରତ୍ୟେକ ସଜୀବ ର ଜନ୍ମ ପଛରେ କିଛି ନା କିଛି ଉଦ୍ଦେଶ୍ୟ ଲୁଚି ରହିଥାଏ | ତେବେ ଏକ ସମାଜ ଗଠନରେ ନାରୀ ଏବଂ ପୁରୁଷ ଉଭୟଙ୍କର ସମାନ ଦାୟିତ୍ଵ ରହିଥାଏ | ତେଣୁ ପ୍ରକୃତି ମଧ୍ୟ ନାରୀ ଓ ପୁରୁଷର ସନୁତୁଳନ କୁ ଲକ୍ଷ୍ୟ କରି ହିଁ ଜନ୍ମର ହାର ଗଠନ କରିଥାଏ | ତେବେ ଛୋଟ ବେଳୁ ନାରିଟି ଭାଇ ମାନଙ୍କ ଭିତରେ ରହି ସଂଯମତା ରକ୍ଷା କରିବା ଏବଂ ଭଲପାଇବା ବାଣ୍ଟିବାରେ ଲାଗିଥାଏ | ପୁଣି ବଡ଼ ହେଲେ ପରିବାର ଗଠନ ତଥା ସଂପର୍କ ଗଠନରେ ମହିଳା ମାନଙ୍କ ଗୁରୁତ୍ୱପୂର୍ଣ୍ଣ ଅବଦାନ ଥାଏ |

ଅନେକ ସମୟରେ ଚିନ୍ତା କଲେ ହୃଦୟଙ୍ଗମ ହୁଏ ଯେ ସମାଜ ପାଇଁ ଆମର ଅନେକ ଦାୟିତ୍ୱ ରହିଛି, ଯାହା ଏବେ ବି ପୁରା କରିବା ବାକି ଅଛି | ସମାଜ ଠାରୁ ଗ୍ରହଣ କରିଥିବା ସମସ୍ତ ସୁବିଧା, ସୁଯୋଗ, ଜ୍ଞାନ ସମ୍ମାନ ଆଦି ସମସ୍ତ ଅନୁଭୂତି କୁ ସୁଧ ମୂଳ ସହ ଆମକୁ ଫେରାଇବାକୁ ପଡ଼ିବ । ତାହା କେବଳ ଏକ ସୁନାଗରିକ ହୋଇ କର୍ତ୍ତବ୍ୟ ପୁରା କଲେ ହିଁ ପୁରଣ ହେବ। ଏହାର ଅର୍ଥ କେବଳ ଉଚ୍ଚ ପଦବୀ ଧାରୀ ହୋଇ ଆମେ ଯେ ସମାଜ ଗଠନରେ ଭାଗୀଦାର ହେବା, ତାହା ଜରୁରୀ ନୁହେଁ ବରଂ ସାଧାରଣ ଜନତା ହିସାବରେ ନିଜର ପ୍ରତ୍ୟେକ ଦାଇତ୍ୱକୁ ସୁଚାରୁ ରୂପେ ତୁଲାଇବା ଦ୍ଵାରା ମଧ୍ୟ ଆମେ ସମାଜ କଲ୍ୟାଣରେ ଭାଗୀଦାର ହୋଇ ପାରିବୁ | ପୁଣି ନାରୀ ହିସାବରେ ଆମର ପ୍ରଥମ କର୍ତ୍ତବ୍ୟ ହେଉଚି ନିଜ ଆତ୍ମ ବିଶ୍ୱାସ ଏବଂ ନିଜ ଆତ୍ମ ସମ୍ମାନ କୁ ଦୃଢ଼ କରିବା | ଏହା ଦ୍ଵାରା ଆମେ ପ୍ରତ୍ୟେକ କାମ ଅନ୍ୟ ଉପରେ ନିର୍ଭର ହେବାରୁ ବଞ୍ଚିତ ହୋଇ ପାରିବା ଏବଂ ଏହା ବ୍ୟତୀତ ପରିବାର ତଥା ସମାଜରେ ଆସୁଥିବା ଅନେକ ସମସ୍ୟାକୁ ସାମ୍ନା କରି ପାରିବା |

ପୁରାତନ କାଳରୁ ହିଁ ଆମ ଭାରତରେ ଅନେକ ନାରୀ ମାନଙ୍କର ଗାରିମା ଏବଂ ଅବଦାନ ବିଷୟରେ ଆମେ ପଢ଼ି ଆସୁଛୁ | ତେବେ ଆଜିର ଯୁବପିଢି ଏଥିରୁ ପଛକୁ ହଟିବା ଆଦୌ ସୋଭାନୀୟ ନୁହେଁ | ଉଚିତ୍ ବୟସରୁ ଶିକ୍ଷା ଗ୍ରହଣ ପୁଣି ସୁରକ୍ଷା ନିମନ୍ତେ ବିଭିନ୍ନ ଆତ୍ମରକ୍ଷା ଜନିତ ଶିକ୍ଷା ଗ୍ରହଣ କରିବା ଜରୁରୀ | ପରିବାରରେ କିପରି ଦିନ ଚର୍ଯ୍ୟା କରିବା, ପୁଣି ସମାଜରେ କିପରି ମୁଣ୍ଡ ଟେକି ବାଟ ଚାଲିବା, ସେସବୁ ର ଶିକ୍ଷା ଗ୍ରହଣ କରିବା ଜରୁରୀ | ତେବେ ଏହି ସବୁ ଶିକ୍ଷା ଆମକୁ ବିଭିନ୍ନ କର୍ମ ପାଇଁ ଯୋଗ୍ୟ ବାନିବା ପାଇଁ ଗ୍ରହଣ କରିବା ଉଚିତ୍ |

ଜଣେ ଗୃହିଣୀ ହୋଇଥିଲେ ଆମର କର୍ତ୍ତବ୍ୟ ହେଉଚି ପରିବାର ଗଠନ | ପରିବାର ରେ ଥିବା ସମସ୍ତ ସଦସ୍ୟ ମାନକୁ ଉଚିତ୍ ଶିକ୍ଷା ଓ ସଂସ୍କାର ଦବା ଯାହା ଦ୍ଵାରା ସେମାନେ ସମାଜ ଉନ୍ନତିର ଆଗେଇ ପାରିବେ | ନିଜ ପିଲା ମାନଙ୍କୁ ପ୍ରଥମରୁ ହିଁ ଗୋଟେ ଭଲ ମଣିଷ ବନିବାର ଶିକ୍ଷା ଦବା ଉଚିତ୍ ଯାହାଦ୍ଵାରା ସେମାନେ ସମାଜର ଭବିଷ୍ୟତ କୁ ଉନ୍ନତ କରିପାରିବେ | ପୁଣି କର୍ମଜୀବୀ ହୋଇଥିଲେ ଆମର କର୍ମ କ୍ଷେତ୍ର ରେ ବିନା ଛନ୍ଦ କପଟରେ ନିଜ କାମ ତୁଲାଇବା ଏବଂ ସମାଜ ଗଠନ ମୂଳକ କାମରେ ପୁରୁଷଙ୍କ ସମତୁଲ ବିଭିନ୍ନ ଦାଇତ୍ୱ ତୁଲାଇବା |

ନାରୀ ଓ ପୁରୁଷ ଙ୍କ ଭିତରେ କିଏ ଆଗରେ କିମ୍ବା କିଏ ପଛରେ ଅଛି ତାହା ଏବେର ସମାଜରେ ଏକ ଚର୍ଚ୍ଚାର ବିଷୟ ପାଲଟି ଯାଇଛି | ଏହା ଦ୍ଵାରା ଆମେ ମାନେ ଆମର ମୂଳ ଲକ୍ଷ୍ୟ ଯାହାକି ସମାଜ ଗଠନ ଏବଂ ସମାଜର ଉନ୍ନତି, ସେ ବିଷୟ ପ୍ରତି ଧ୍ୟାନ ନଦେଇ ବିଭିନ୍ନ ଛୋଟ ରାଜନୀତିରେ ନିଜର ସମସ୍ତ ଅର୍ଥ, ସମୟ ଏବଂ ଶକ୍ତି ବ୍ୟୟ କରିବାରେ ଲାଗିଛୁ | ତେବେ ନାରୀ ଟିଏ ଯେ ସମାଜର ଗୋଟିଏ ଗୁରୁତ୍ୱପୂର୍ଣ୍ଣ ଅଙ୍ଗ ତାହାକୁ ସହୃଦୟେ ଗ୍ରହଣ କରି ସମସ୍ତ କ୍ଷେତ୍ରରେ ନିଜର ବୁଦ୍ଧି ବିବେକ ଏବଂ ଜ୍ଞାନର ବିନିଯୋଗ କରିବା ଉଚିତ୍ ଯାହା ଦ୍ଵାରା ଆମର ଭବିଷ୍ୟତ ଉନ୍ନତ ହେବାରେ ସହଯୋଗୀ ହେଇ ପାରିବ |

ଏହା ବ୍ୟତୀତ ନାରୀ ଭିତରର ଥିବା ଶକ୍ତି ସ୍ୱରୂପ କୁ ଜାଗ୍ରତ କରିବାର କଳା ମଧ୍ୟ ଆମ ନାରୀ ମାନଙ୍କୁ ଶିଖିବା ଉଚିତ୍ | ଯାହା ଦ୍ଵାରା ନିଜ ଉପରେ କିମ୍ବା ଅନ୍ୟ ମାନଙ୍କ ଉପରେ ହେଉଥିବା ଅନ୍ୟାୟ ଏବଂ ଅତ୍ୟାଚାର ବିରୋଧରେ ଲଢ଼ିବା ପାଇଁ ମଧ୍ୟ ଆଗେଇ ଆସିବା ଉଚିତ | ଏହି ସବୁ କର୍ତ୍ତବ୍ୟ ପାଳନ ହେଲେହିଁ ସମାଜର ଉପଯୁକ୍ତ ଉନ୍ନତି ହେବ |

ସୁସ୍ମିତା ଜେନା

ବିଶାଖାପାଟଣା

My social responsibility as a woman

ନାରୀ ହିସାବରେ ମୋର ସାମାଜିକ ଦାୟିତ୍ଵ