ଓଡ଼ିଆ ଭାଗବତ ଭାଗ - ୨୪

ଏକ ଦୁଇ ବା ତିନି ପଦ

କେ ଚାରି ପଦ କେ ଅପଦ।

କେ ବହୁପଦ ଆଦି ଯେତେ

ଏମନ୍ତେ ଦେହୀ ଛନ୍ତି ଯେତେ।

ତା ମଧ୍ୟେ ମନୁଷ୍ୟ ଶରୀର

ଜାଣ ଅତ୍ୟନ୍ତ ପ୍ରିୟ ମୋର।

ଯେଣୁ ବିବେକ ବଳେ ପୁଣି

ଏ ଦେହେ ମୋତେ ପରିମାଣି।

ଇଶ୍ଵର ଅଛି ସର୍ବଭୂତେ

ଏ ଅନୁମାନ କରେ ଚିତ୍ତେ।

( ଅତିବଡ଼ି ଜଗନ୍ନାଥ ଦାସଙ୍କ ଓଡ଼ିଆ ଭାଗବତ,

ଏକାଦଶ ସ୍କନ୍ଧ, ଅଷ୍ଟମ ଅଧ୍ୟାୟ )

ପ୍ରସଙ୍ଗ - ଭଗବାନଙ୍କର ମଣିଷ ଶରୀର ପ୍ରିୟ ହେବାର କାରଣ

ଅର୍ଥ - ଶ୍ରୀ ଭଗବାନ କହିଲେ,ହେ ଉଦ୍ଧବ ! ଏ ସଂସାରରେ ଯେତେ ଏକପଦ,ଦୁଇପଦ,ତିନିପଦ,ଚାରିପଦ ଓ ବହୁପଦ ବିଶିଷ୍ଟ ପ୍ରାଣୀ ଏବଂ ପଦ ବିହୀନ ପ୍ରାଣୀ ଅଛନ୍ତି ତା ମଧ୍ୟରେ ମନୁଷ୍ୟ ଶରୀର ମୋର ସବୁଠାରୁ ପ୍ରିୟ ଅଟେ।କାରଣ କେବଳ ମଣିଷ ନିଜର ବିବେକ ବଳରେ କୁପଥଗାମୀ ନହୋଇ ଶରୀର ମାଧ୍ୟମରେ ସାଧନା କରି ଏହି ଶରୀର ଭିତରେ ମୋତେ ଉପଲବ୍ଧି କରିଥାଏ ଯାହାକି ଆଉ କୈାଣସି ପ୍ରକାର ଶରୀରରେ ସମ୍ଭବ ନୁହେଁ।କେବଳ ସେତିକି ନୁହେଁ,ଏ ସଂସାରରେ ଯେତେ ପ୍ରାଣୀ ଅଛନ୍ତି ସମସ୍ତଙ୍କ ଭିତରେ ଯେ ଇଶ୍ଵରଙ୍କ ସତ୍ତା ବିଦ୍ୟମାନ ଏକଥା କେବଳ ମଣିଷ ହିଁ ଅନୁଭବ କରିପାରେ।

ସଂକ୍ଷିପ୍ତ ଭାବାର୍ଥ - ଅନେକ ଜନ୍ମର ସଞ୍ଚିତ ପୁଣ୍ୟ ବଳରୁ ଏହି ମଣିଷ ଶରୀର ମିଳିଛି ଯାହାକି ଭଗବାନଙ୍କର ସବୁଠାରୁ ପ୍ରିୟ କାରଣ ଏହାରି ମାଧ୍ୟମରେ ବିବେକାନୁମୋଦିତ କର୍ମ କରି ମଣିଷ ସବୁ ପ୍ରାଣୀଙ୍କ ଭିତରେ ଇଶ୍ଵରଙ୍କ ସତ୍ତା ଅନୁଭବ କରି ପାରିଥାଏ ଯାହାକି ଅନ୍ୟ କୈାଣସି ଶରୀର ମାଧ୍ୟମରେ ସମ୍ଭବ ନୁହେଁ। କିନ୍ତୁ ଲୋଭ,ମୋହ,କାମ,କ୍ରୋଧ,ମଦ ଓ ମାତ୍ସର୍ଯ୍ୟ ଦ୍ଵାରା କବଳିତ ହେବା ଫଳରେ ବିବେକାନୁମୋଦିତ କର୍ମ ନକରି ମଣିଷ ପଥଭ୍ରଷ୍ଟ ହୋଇଥାଏ ଓ ଏ ଶରୀରକୁ ଇଶ୍ଵର ଚିନ୍ତନ ଓ ଭଗବତ୍ ସାଧନା କାର୍ଯ୍ୟରେ ବିନିଯୋଗ କରିପାରେ ନାହିଁ।ଇଶ୍ଵର ଚିନ୍ତନ ଓ ଭକ୍ତି ରସାଣିତ ଭଗବତ୍ ସାଧନା ବିନା ସେ ବିଭୁ କୃପା ଲାଭ କରି ପାରେନାହିଁ ଏବଂ ଏହି ଶରୀର ମାଧ୍ୟମରେ ଇଶ୍ଵରଙ୍କ ସତ୍ତା ଉପଲବ୍ଧି କରି ପାରେନାହିଁ।ଯେଉଁ କାରଣ ପାଇଁ ମଣିଷ ଶରୀର ଭଗବାନଙ୍କର ଅତି ପ୍ରିୟ ସେହି ଉଦ୍ଦେଶ୍ୟରେ ଏହି ଶରୀରକୁ ବିନିଯୋଗ ନ କରିବାରୁ ମଣିଷ ମୁକ୍ତିର ଦ୍ଵାରଦେଶରୁ ଫେରି ପୁନରାୟ ଜନ୍ମ ମୃତ୍ୟୁ ବନ୍ଧନରେ ପଡେ।ତେଣୁ ବିବେକାନୁମୋଦିତ କର୍ମକରି ଭଗବତ ସାଧନା ମାଧ୍ୟମରେ ଏହି ଶରୀରରେ ଇଶ୍ଵରଙ୍କ ସତ୍ତା ଅନୁଭବ କରି ପାରିଲେ ଭଗବାନଙ୍କର ମଣିଷ ଶରୀର ସୃଷ୍ଟି କରିବାର ମହତ୍ ଉଦ୍ଦେଶ୍ୟ ସଫଳ ହୋଇପାରିବ।