ଭାଷା କେବଳ ଭାବର ବାହକ ନୁହେଁ, ସଂସ୍କୃତିର ପରିଚାୟକ ମଧ୍ୟ। ଓଡ଼ିଶାର ଭାଷା ଓଡ଼ିଆ ଓ ସଂସ୍କୃତି ଜଗନ୍ନାଥ ସଂସ୍କୃତି। ଗୋଟିଏ ଅଞ୍ଚଳର ଭୌଗଳିକ ସ୍ଥିତିକୁ ନେଇ ସଂସ୍କୃତି ଗଠିତ ହୋଇଥାଏ। "ସଂସ୍କାରୟତେ ଇତି ସଂସ୍କୃତି" ଯାହା ଜନଜୀବନକୁ ପରିମାର୍ଜିତ କରେ ତାହା ହିଁ ସଂସ୍କୃତି। ଓଡ଼ିଶାର ଭାଷା ଓ ସଂସ୍କୃତି ଏ ଦୃଷ୍ଟିରୁ ବିଚାର୍ଯ୍ୟ। ଭାଷା ଓ ସଂସ୍କୃତି ଏକ ମାନବ ସଭ୍ୟତା-ଜାତି ତଥା ଅଂଚଳ ଅଧିବାସୀଙ୍କୁ ପ୍ରତିନିଧିତ୍ଵ କରେ। କେବଳ ଓଡିଶା ନୁହେଁ, ଯେକୌଣସି ଭୂ-ଖଣ୍ଡରେ ବସବାସ କରୁଥିବା ମାନବ ଗୋଷ୍ଠୀକୁ ପରିଚୟ ପ୍ରଦାନ କରେ ସେଠାକାର ସ୍ଥାନୀୟ ଭାଷା ଓ ସଂସ୍କୃତି। କେବଳ ସେତିକି ନୁହେଁ, ସେହି ନିର୍ଦ୍ଦିଷ୍ଟ ଭୂଖଣ୍ଡର ଆବହମାନ କାଳରୁ ପ୍ରଚଳିତ ଜୀବନଶୈଳୀ ମଧ୍ୟ ଏହାରି ମାଧ୍ୟମରେ ଜାଣିହୁଏ। ସୁତରାଂ ପ୍ରତ୍ୟେକ ଭାଷା ଓ ସଂସ୍କୃତିକୁ ସୁରକ୍ଷା ଦେବା ପ୍ରତ୍ୟେକ ସଭ୍ୟମଣିଷର ପ୍ରଥମ ଓ ପ୍ରଧାନ କର୍ତ୍ତବ୍ୟ।

ସୁରକ୍ଷା ଦେବାର ପ୍ରକୃତ ଅର୍ଥ ହେଲା କାହାକୁ ବିପଦ ମୁକ୍ତ କରି ବଞ୍ଚାଇବାକୁ ଉଦ୍ୟମ କରିବା।ଆମର ମାତୃଭାଷା ସଂପର୍କରେ ସ୍ବଭାବ କବି ଗଙ୍ଗାଧର ମେହେର କହିଛନ୍ତି "ମାତୃଭୂମି ମାତୃ ଭାଷାରେ ମମତା ଯା ହୃଦେ ଜନମି ନାହିଁ ତାକୁ ଯଦି ଜ୍ଞାନୀ ଗଣରେ ଗଣିବା ଅଜ୍ଞାନ ରହିବେ କାହିଁ?" ଏହା କବିଙ୍କ "ମାତୃଭୂମି "କବିତାର ଏକ ବହୁ ଜନପ୍ରିୟ ଉକ୍ତି। ଏ ଉକ୍ତି କବିତାଟିର ଶେଷ ଅଂଶ। କବିତାର ଆରମ୍ଭରୁ ଦିବ୍ୟ ଦ୍ରଷ୍ଟା କବି ମଣିଷର ବାଳକ ଅବସ୍ଥାରୁ ଆରମ୍ଭ କରି କ୍ରମଶଃ ବୃଦ୍ଧି ପାଇ ତା’ର ପରିସୀମାକୁ ବ୍ୟାପ୍ତ ଆତ୍ମଜ୍ଞାନରେ ପ୍ରକାଶ କରିଛନ୍ତି ଓ କହିଛନ୍ତି "ଜ୍ଞାନ ବଳେ ଯେବେ ଜାଣେ ସମସ୍ତଙ୍କ ଜନକ ଜଗତପତି, ସହୋଦର ଜ୍ଞାନ କରେ ଅବନୀର ମାନବ ସମାଜ ପ୍ରତି।"କବିଙ୍କ ଏ ସନାତନ ଚେତନା ମୂଳକ ଉକ୍ତିରେ ମାନବୀୟ ମୂଲ୍ୟବୋଧର ଗୁରୁତ୍ୱ ଉପଲବ୍ଧ। ସଂପ୍ରତି ଓଡ଼ିଆ ଭାଷା ସାହିତ୍ୟର ଗୌରବମୟ ଭବିଷ୍ୟତ ପାଇଁ ନିଶ୍ଚୟ ପ୍ରୟାସ କରିବା । ମାତ୍ର ଯୁଦ୍ଧ, ସଂଘର୍ଷ ଅପେକ୍ଷା ଆତ୍ମସମୀକ୍ଷା ଓ ସ୍ଵ-ଅନୁଶୀଳନ ବଳରେ ଆତ୍ମସମ୍ମାନକୁ ସୁରକ୍ଷା ଦେବା। ଓଡ଼ିଆ ଭାଷାକୁ ଉନ୍ନତ କରି ବିଶ୍ଵ କ୍ଷେତ୍ରକୁ ପହଞ୍ଚାଇବାର ସୁବର୍ଣ୍ଣ କାଳ ଉପନୀତ,ପ୍ରାଜ୍ଞ ବଳରେ, ମହୋଦଧିର ଉଦାର ହୃଦୟ ଓ ବସୁଧୈବ କୁଟୁମ୍ବକମ୍ ର ମେଦିନୀ ଦୃଷ୍ଟି ନେଇ ଶାସ୍ତ୍ରୀୟ ମାନ୍ୟତା ପ୍ରାପ୍ତ ଓଡ଼ିଆ ଭାଷାକୁ ବିଶ୍ଵାଭିମୁଖୀ କରିବାକୁ ପ୍ରତିଶ୍ରୁତିବଦ୍ଧ ହେବା।

ଜୟ ଜଗନ୍ନାଥ

ଓଡ଼ିଶା ରାଜ୍ୟ ମୁକ୍ତ ବିଶ୍ୱବିଦ୍ୟାଳୟ, ମୁଖ୍ୟ କାର୍ଯ୍ୟାଳୟ, ସମ୍ବଲପୁର

ବିଭାଗୀୟ ମୁଖ୍ୟ (ଓଡ଼ିଆ)

କୁଲିତାପଡ଼ା,ମୋଦିପଡ଼ା

ସମ୍ବଲପୁର

ପିନ୍ କୋଡ଼-୭୬୮୦୦୨

ଯୋଗାଯୋଗ -୭୯୭୮୮୬୪୬୧୨

ଓଡ଼ିଆ ଭାଷାର ସୁରକ୍ଷା Odia Bhashara Surakhya ****************

ଡ. ସଂଗୀତା ନାଏକ ପୁରୋହିତ Dr Sangita Naik Purohit ***************