ହାତ ଠାରି ଡାକୁଛି ଆମ ସାତକୋଶିଆ ଆ…

ମହାନଦୀର ନୀଳ ଜଳରାଶିର କୁଳୁକୁଳୁ ନାଦ ସାଙ୍ଗକୁ ଦୁଇ ପାର୍ଶ୍ଵରେ ଗଗନଚୁମ୍ବି ପର୍ବତମାଳା। ଗଣ୍ଡରେ ବିରଳ ଘଡ଼ିଆଳ ସାଙ୍ଗକୁ ବହିରାଗତ ପକ୍ଷୀଙ୍କ କିଚିରି ମିଚିରି ଶବ୍ଦରେ ପ୍ରକମ୍ପିତ ହୋଇ ଉଠେ ସାତକୋଶିଆ। ଅପରୂପ ଶୋଭାରାଜି ବହନ କରିଥିବା ପ୍ରକୃତିରାଣୀ ସାତକୋଶିଆ ସବୁବେଳେ ପ୍ରକୃତିପ୍ରେମୀଙ୍କୁ ଆକର୍ଷିତ କରିଛି ତା' କୋଳକୁ । ସାତକୋଶିଆର ପ୍ରାକୃତିକ ସୌନ୍ଦର୍ଯ୍ୟ, ସବୁଜ ପରିବେଶ, ବୃକ୍ଷଲତା, ପଶୁପକ୍ଷୀ ସହ ବିରଳ ଘଡ଼ିଆଳ ଓ ମଗର ଆଦିଙ୍କୁ ଦେଖୁ ସହ ଏଠାକାର ଅନନ୍ୟ ବିବିଧତାକୁ ଉପଭୋଗ କରିବା ପାଇଁ ପ୍ରତିବର୍ଷ ଦେଶବିଦେଶରୁ ପ୍ରକୃତିପ୍ରେମୀ ତଥା ପର୍ଯ୍ୟଟକଙ୍କ ସୁଅ ଛୁଟୁଛି ଅନୁଗୋଳ ଜିଲାକୁ। ଯିଏ ସାତକୋଶିଆର ସୌନ୍ଦର୍ଯ୍ୟ ପ୍ରେମରେ ଥରେ ପଡ଼ିଛି, ସେ ବାରମ୍ବାର ‘ ସାତକୋଶିଆ କୋଳରେ ନିଜକୁ ହଜାଇ ଦେବାକୁ ଇଚ୍ଛା କରିଛି ।

ପ୍ରସ୍ତୁତି: ଦିବ୍ୟଶାନ୍ତନୁ ନାଥ

ଅନୁଗୋଳ ଜିଲାର ସାତକୋଶିଆ ଅଭୟାରଣ୍ୟ। ଏହାର ପରିଧି ପ୍ରାୟ ୭କୋଶ ପର୍ଯ୍ୟନ୍ତ ପରିବ୍ୟାପ୍ତ । ସାତକୋଶ ପର୍ଯ୍ୟନ୍ତ ମହାନଦୀ ଏକ ସଂକୀର୍ଣ୍ଣ ପଥ ଦେଇ ଅନ୍ତସଇଳା ହୋଇ ଗତିକରିଛି। ଦୀର୍ଘ ୨୩କି.ମି. ଧରି ମହାନଦୀର ଅବବାହିକା ରେ ଘଞ୍ଚ ଅରଣ୍ୟ ସାଙ୍ଗକୁ ଜୈବ ବିବିଧତାରେ ପରିପୂର୍ଣ୍ଣ ସବୁଜ ଜଙ୍ଗଲ। ମହାନଦୀର ଉଭୟ ପାର୍ଶ୍ଵରେ ରହିଥିବା ଛୋଟବଡ଼ ପର୍ବତମାଳା , ବିରଳ ଘଡ଼ିଆଳ କୁମ୍ଭୀର ସାଙ୍ଗକୁ ଘଞ୍ଚଜଙ୍ଗଲ,ଜୈବ ବିବଧତା,ଝରଣା, ନାଳ, ପାହାଡ଼,ବିଭିନ୍ନ ଜାତିର ଜୀବଜନ୍ତୁ ତଥା ଏହି ଅଞ୍ଚଳର ଆଦିବାସୀଙ୍କ ପାରମ୍ପରିକ ନୃତ୍ୟ ପର୍ଯ୍ୟଟକଙ୍କୁ ଏଠାକୁ ଆର୍କଷିତ କରିଥାଏ । ଏହି ଅଞ୍ଚଳର ଅଭୟାରଣ୍ୟ ବ୍ୟାଘ୍ର ସଂରକ୍ଷଣ ଅଞ୍ଚଳ ଭାବେ ସରକାରୀ ମାନ୍ୟତା ପାଇଛି। ଏଠାକାର ଏକ ସ୍ୱତନ୍ତ୍ର ସ୍ଥାନ ହେଉଛି ଟିକର ପଡା। ଟିକରପଡ଼ାର ସାତକୋଶିଆ ଗଣ୍ଡରେ ବିରଳ ପ୍ରଜାତିର ଘଡ଼ିଆଳ କୁମ୍ଭୀର ଓ ମଗର ପ୍ରଜାତିର କୁମ୍ଭୀର ଦେଖ୍ବାକୁ ମିଳେ।ଏବଂ ଶୀତର ଆଗମନରେ ରଙ୍ଗୀନ ହୋଇ ଉଠେ। ଏଥି ମଧ୍ୟରୁ ଇଣ୍ଡିଆନ ସ୍କିମର ପକ୍ଷୀକୁ ଦେଖିବାକୁ ବହୁ ପର୍ଯ୍ୟଟକଙ୍କର ବେସ ଭିଡ଼ ଜମିଥାଏ। ଅନ୍ୟପକ୍ଷେ ପର୍ଯ୍ୟଟକମାନେ ହାତୀ,ବାଘ,ହରିଣ,ମୟୁର,ବାହା,ଗୟଳ, କୁଟୁରା ଆଦି ବନ୍ୟପ୍ରାଣୀ ଚଳପ୍ରଚଳ କରୁଥିବା ଦେଖୁପାରିବେ ଓ ଜଙ୍ଗଲୀ ଜୀବନର ମଜା ଭରପୁର ଉଠାଇ ପାରିବେ।

କିଭଳି ଯିବେ……

ଭୁବନେଶ୍ବରଠାରୁ ଏଠାକୁ ଆସିବାକୁ ହେଲେ ଟ୍ରେନ୍‌ଯୋଗେ ଅନୁଗୋଳ ରେଳଷ୍ଟେଶନରେ ପହଞ୍ଚି ସେଠାରୁ ମୋଟର ଗାଡ଼ିରେ ଯାଇହେବ । ସଡ଼କପଥରେ ଆସିବାକୁ ହେଲେ ୫୫ନମ୍ବର ଜାତୀୟ ରାଜପଥରେ ଢେଙ୍କାନାଳ ଦେଇ ଅନୁଗୋଳ ଆସିପାରିବେ କିମ୍ବା ଆଠଗଡ଼ ଦେଇ ଅନୁଗୋଳ ଆସିଲେ ଏଠାରୁ ଟିକରପଡ଼ା ପ୍ରାୟ ୬୫କି.ମି. ଦୂର ପଡ଼ିବ। ଅନୁଗୋଳରୁ ବନ୍ତଳା ଛକ ଓ କରତପଟା ଛକ ଦେଇ ପମ୍ପାସର ନିକଟରେ ଥିବା ପ୍ରବେଶ ପଥ ଦେଇ ଅଭୟାରଣ୍ୟ ମଧ୍ୟରେ ପ୍ରବେଶ କରିପାରିବେ। ନତୁବା ଭୁବନେଶ୍ୱରରୁ ଯଦି କେହି ପୁରୁଣା କଟକ ସମ୍ବଲପୁର ରାସ୍ତାରେ ଆଠଗଡ଼ ଦେଇ ଆସନ୍ତି। ତେବେ ସେ ଆଠଗଡ, ମହିଧରପୁର ଓ ପରେ ବନ୍ତଳା ଛକରୁ ବାମ ପାର୍ଶ୍ୱକୁ ଗଲେ କରତପଟା ଦେଇ ଅଭୟାରଣ୍ୟ ମଧ୍ୟରେ ପ୍ରବେଶ କରିହେବ।

ଏଠାକୁ ଆସୁଥିବା ଭାରତୀୟ ପର୍ଯ୍ୟଟକ ଓ ବିଦେଶୀ ପର୍ଯ୍ୟଟକଙ୍କ ପାଇଁ ସ୍ଵତନ୍ତ୍ର ଦେୟ ଶୁଳ୍କର ବ୍ୟବସ୍ଥା ରହିଛି ଏବଂ ସ୍କୁଲ ପିଲାଙ୍କ ପାଇଁ ମଧ୍ୟ ଟିକେଟ କାଟିବାକୁ ପଡ଼ିଥାଏ । ଏଠାରେ ବୁଲୁଥିବା ସମୟରେ ଜଙ୍ଗଲ ଜୀବଜନ୍ତୁ ଓ ବୃକ୍ଷଲତା ସୁରକ୍ଷା ପ୍ରତି ସତର୍କ ରହିବାକୁ କଟକଣା ରହିଛି। ପର୍ଯ୍ୟଟକମାନଙ୍କ ପାଇଁ ଦେଶୀଘର, ବାଉଁଶଘର,ତମ୍ବୁଘର ରହିଛି। ସ୍ଥାନୀୟ ଗ୍ରାମବାସୀ ଓ ଜଙ୍ଗଲ ପରିଚାଳନା ନୀତିରେ ଏହାର ସାମଗ୍ରିକ ବିକାଶ ପାଇଁ ଉଦ୍ୟମ କରାଯାଉଛି। ରାଜ୍ୟ ପର୍ଯ୍ୟଟନ ବିଭାଗ ଓ ସାତକୋଶିଆ ପର୍ଯ୍ୟଟନ ବିକାଶ ପକ୍ଷରୁ ସ୍ଥାନୀୟ ଗ୍ରାମବାସୀଙ୍କ ଦ୍ବାରା ଅତିଥିଗୃହର ବ୍ୟବସ୍ଥା ରହିଛି।

ପୁରୁଣାକୋଟ୍ ଠାରେ ପର୍ଯ୍ୟଟକ ମାନଙ୍କ ପାଇଁ ୨ଟି କଟେଜ। ଛୁଟକେଇ ନେଚର କ୍ୟାମ୍ପରେ ୫ଟି ସୁଇଚ କଟନ ଟେଣ୍ଟଘର, ୫ଟି ଶୀତତାପ ନିୟନ୍ତ୍ରଣ କଟେଜ ନିର୍ମାଣ ହୋଇଛି। ଗୋଟିଏ ସୁଇଚ କଟନ ଟେଣ୍ଟ ନିମନ୍ତେ ୩୨୦୦ ରୁ ୩୩୦୦ଟଙ୍କା ଦେୟ ଦେବାକୁ ପଡ଼ିଥାଏ । ମେଘାଳୟ ବାଉଁଶଘରେ ରହିବାକୁ ୨ଜଣଙ୍କୁ ୩୦୦୦ ଟଙ୍କା ଦେବାକୁ ପଡ଼େ। ଟିକରପଡ଼ା ପରିବେଶ ପର୍ଯ୍ୟଟନ ସମିତି ମହାନଦୀ କୂଳରେ ୧୨ଟି ସୁଇଚ କଟନ ଟେଣ୍ଟ ରହିଛି। ପ୍ରତ୍ୟେକ ଟେଣ୍ଟରେ ୨ଜଣ ରହିବା ପାଇଁ ୩୩ଶହ ଟଙ୍କା ଦେୟ ଦେବାକୁ ପଡ଼େ ଇକୋ ଟୁରିଜମ୍ ସୋସାଇଟି ନେଚର କ୍ୟାମ୍ପରେ ୨ଟିଗୃହ ରହିଛି। ଗୋଟିଏ ଗୃହରେ ୨ଟି ପରିବାର ରହିପାରିବେ । ଜଗନ୍ନାଥପୁର ତରଭାଠାରେ ୧୨ଟି ସୁଇଚ କଟନ ଟେଣ୍ଟ ରହିଛି।

ଏଥିସହିତ ସ୍ବତନ୍ତ୍ର ଘର ପାଇଁ ସ୍ଵତନ୍ତ୍ର ଦେୟ ଦେବାକୁ ପଡ଼େ । କୋଠଭୂଇଁ ପଞ୍ଚାୟତର ବାଘମୁଣ୍ଡା ଠାରେ ୫ ଟି ଏସି କଟେଜ ରହିଛି। ନରସିଂହପୁରର କମଳାଡ଼ିହଠାରେ ନେଚରକ୍ୟାମ ଗୃହ ରହିଛି। ସାତକୋଶିଆରେ ପର୍ଯ୍ୟଟକଙ୍କୁ ବୁଲେଇବା ଏବଂ ସେହି ସ୍ଥାନ ସମ୍ପର୍କରେ ବିଭିନ୍ନ ଜଣାଅଜଣା କଥା ଜଣାଇବା ପାଇଁ ଗାଇଡ୍ ରହିଛନ୍ତି। ସେମାନେ ପର୍ଯ୍ୟଟକଙ୍କଠାରୁ ଏଥିପାଇଁ ପାରିଶ୍ରମିକ ପାଇଥାନ୍ତି। ଏହି

କ୍ୟାମ୍ପର ସଦସ୍ୟମାନେ ଜଣେ ଜଣେ ଗାଇଡ୍‌ମ୍ୟାନ ଭାବେ କାର୍ଯ୍ୟକରିଥାନ୍ତି। ସକାଳ,ମଧ୍ୟାନ୍ନ, ସନ୍ଧ୍ୟା ଓ ରାତିରେ ଅତିଥିମାନଙ୍କ ପାଇଁ ରୁଚି ଅନୁଯାୟୀ ନିୟମ ମୁତାବକ ଆମିଷ ଓ ନିରାମିଷ ଖାଦ୍ୟର ବ୍ୟବସ୍ଥା କରାଯାଇଥାଏ। ଚା,କଫି,ଜଳଖୁଆ ବ୍ୟବସ୍ଥା କରାଯାଇଥାଏ । ପର୍ଯ୍ୟଟକମାନେ ପ୍ରାୟ ୨କି.ମି. ଜଙ୍ଗଲ ପାହାଡ଼ରେ ବୁଲିବେ, ପରେ ସାତକୋଶିଆ ଗଣ୍ଡରେ ନୌକାବିହାର ବେଳେ ଘଡ଼ିଆଳ କୁମ୍ଭୀର ଦେଖୁବାର ନଜିର ରହିଛି। ଅତିଥିମାନେ ଇଚ୍ଛାକଲେ ସ୍ବତନ୍ତ୍ର ଭାବେ ସ୍ଥାନୀୟ ପାରମ୍ପରିକ ନୃତ୍ୟ ଦେଖୁ ମନୋରଞ୍ଜନ କରିପାରିବେ।

କିନ୍ତୁ ପରିବେଶ ସୁରକ୍ଷା ପ୍ରତି ନଜର ଦେବାକୁ ହୋଇଥାଏ।

ଗାଁ ଲୋକଙ୍କ ରୋଜଗାର :

ପ୍ରାକୃତିକ ପର୍ଯ୍ୟଟନସ୍ଥଳୀ ନିକଟରେ ଥିବା ଗ୍ରାମବାସୀ ନିଜଅଞ୍ଚଳର ପର୍ଯ୍ୟଟନସ୍ଥଳୀ ବିଷୟରେ ଅନେକ କିଛି ତଥ୍ୟ ଜାଣିଥିବାରୁ ସେଠାକୁ ଆସୁଥିବା ପର୍ଯ୍ୟଟକମାନଙ୍କୁ ସେହିସ୍ଥାନ ବିଷୟରେ ବିଭିନ୍ନ ସୂଚନା ଦେଇଥାନ୍ତି । ଏଥିପାଇଁ କେହିକେହି ପରିବେଶ ପର୍ଯ୍ୟଟନ ସମ୍ପର୍କରେ ତାଲିମ ପାଇଥାନ୍ତି । ଏହା ଦ୍ବାରା ସ୍ଥାନୀୟ ବାସିନ୍ଦାଙ୍କୁ ରୋଜଗାର ମିଳିଥାଏ । ପର୍ଯ୍ୟଟକମାନଙ୍କୁ ଆତିଥ୍ୟରେ ରହିବା, ଖାଇବା, ବୁଲିବା ଆଦି ସୁବିଧା କରାଇ ଦେବା ଏହି ପରିବେଶ ପର୍ଯ୍ୟଟନରେ ହୋଇଥାଏ । ଗାଇଡମାନେ ଏହି ପରିବେଶ ବିଭବ ସମ୍ପର୍କିତ ବିଭିନ୍ନ ଫଟୋଚିତ୍ର ପ୍ରଦର୍ଶନ ଓ ବିକ୍ର କରିଥାନ୍ତି । ଗାଁର ଲୋକମାନେ ନିଜଅଞ୍ଚଳର କୁଟିର ଶିଳ୍ପ ପ୍ରସ୍ତୁତ ସାମଗ୍ରୀକୁ ମଧ୍ୟ ବିକ୍ରି କରିଥାନ୍ତି।

ଅଡିଥୁଙ୍କୁ ସେବା ସଘାନ : ପରିବେଶ ପର୍ଯ୍ୟଟନ କ୍ଷେତ୍ର ବୁଲିଆସୁଥିବା

ଅନେକପର୍ଯ୍ୟଟକ ସ୍ଥାନୀୟ ଖାଦ୍ୟ ଭୋଜନ କରିବାକୁଇଚ୍ଛା କରିଥାନ୍ତି । ଏଥିପାଇଁ ପୂର୍ବ ପ୍ରସ୍ତୁତି ଅନୁଯାୟୀ ଉକ୍ତ ସ୍ଥାନର ଗାଇଡ୍‌ମାନେ ବିଭିନ୍ନ ଦେଶୀଖାଦ୍ୟ ପ୍ରସ୍ତୁତ କରିଥାନ୍ତି । କେହି କେହି ମାଟିପାତ୍ରରେ, ମାଟିଚୁଲିରେ ରୋଷେଇ କରିଥାନ୍ତି । ଏପରି କି କେତେକ ପର୍ଯ୍ୟଟକ ଗାଇଡ୍‌ଙ୍କ ସହ ମିଶି ନିଜେ ରୋଷେଇ ମଧ୍ୟ କରିଥାନ୍ତି, ଯାହାକି ଗ୍ରାମୀଣ ପରିବେଶକୁ ଆପଣେଇ ନିଆରା ଅନୁଭବ କରନ୍ତି । ଏଥିପାଇଁ ପର୍ଯ୍ୟଟକଙ୍କୁ ଆବଶ୍ୟକ ଅର୍ଥ ଦେବାକୁ ପଡ଼ିଥାଏ।

ଚଳିତ ବର୍ଷର ନୂଆ ଭେଟ ଜଙ୍ଗଲ ସାଫରି:-

ଚଳିତ ବର୍ଷରୁ ସାତକୋଶିଆରେ ଆରମ୍ଭ ହୋଇଛି ପର୍ଯ୍ୟଟକ ମାନଙ୍କ ପାଇଁ ଜଙ୍ଗଲ ସଫାରି। ଏଠାକୁ ବୁଲି ଆସୁଥିବା ପର୍ଯ୍ୟଟକ ମାନଙ୍କୁ ଏହି ସଫାରି ମାଧ୍ୟମରେ ସାତକୋଶିଆର ପ୍ରାକୃତିକ ସୌନ୍ଦର୍ଯ୍ୟ ସହ ଅତି ନିକଟରୁ ଜଙ୍ଗଲୀ ଜନ୍ତୁ ମାନଙ୍କୁ ଦେଖିବାର ସୁଯୋଗ ମିଳିଥାଏ। ପ୍ରକୃତି ନିବାସ ଗୁଡିକରେ ବୁକିଂ କରି ରହୁଥିବା ପର୍ଯ୍ୟଟକ ମାନେ ସନ୍ଧ୍ୟା ଓ ସକାଳ ସମୟରେ ଏହି ମଜା ଉଠାଇ ପାରିବେ। ବନବିଭାଗ ପକ୍ଷରୁ ସ୍ୱତନ୍ତ୍ର ସଫାରି ଗାଡିର ବ୍ୟବସ୍ଥା କରାଯାଇଛି। ଜଙ୍ଗଲ ମଧ୍ୟରେ ସଫାରିକୁ ନେଇ ଦୁଇଟି ରୁଟ କରାଯାଇଛି। ତରଭା ଠାରୁ ବାଘମୁଣ୍ଡା ପର୍ଯ୍ୟନ୍ତ ରାସ୍ତା ଓ ପୁରୁଣାକୋଟରୁ ଛୋଟକେଇ ପର୍ଯ୍ୟନ୍ତ ରାସ୍ତାରେ ସଫାରି ଗାଡି ବୁଲୁଥିବା ବେଳେ କୁଟୁରା, ହରିଣ, ବାର୍ହା, ଗୟଳ, ସମ୍ବର ଆଦି ଜନ୍ତୁ ଦେଖିବାକୁ ମିଳୁଥିବା ଏଠାକୁ ଆସୁଥିବା ପର୍ଯ୍ୟଟକ କହିଛନ୍ତି।

ପର୍ଯ୍ୟଟକଙ୍କ ପ୍ରଥମ ପସନ୍ଦ ବାଲୁକା ଶଯ୍ୟା :

ଆସୁଥିବା ପର୍ଯ୍ୟଟକମାନେ ଚିତ୍ତବିନୋଦନ ପାଇଁ ପାନ୍ଥନିବାସ, ଶୀତତାପ ଗୃହ, ତାରକା ହୋଟେଲରେ ରହିବାକୁ ପସନ୍ଦ କରିଥାନ୍ତି । ମାତ୍ର ପରିବେଶ ପର୍ଯ୍ୟଟନ ସ୍ଥଳ ବୁଲି ଆସୁଥିବା ପର୍ଯ୍ୟଟକମାନଙ୍କ ମଧ୍ୟରୁ କେହିକେହି ପ୍ରାକୃତିକ ଜଙ୍ଗଲ ପରିବେଶର ଗଛ ତଳେ କିମ୍ବା ବାଉଁଶଘରେ କିମ୍ବା ଜଳ ପରିବେଶରେ ରହିଥିବା ଡଙ୍ଗା ଉପରେ ବିଶ୍ରାମ ନେଇ ଚିତ୍ତବିନୋଦନ ପାଇଁ ଇଚ୍ଛା କରିଥାନ୍ତି । ଏପରି କି ମହାନଦୀର କୂଳରେ ବିସ୍ତୀର୍ଣ୍ଣ ବାଲୁକା ଶଯ୍ୟାରେ ଲୋକେ ସମୟ କାଟିବାକୁ ବହୁତ ପସନ୍ଦ କରିଥାନ୍ତି । ପର୍ଯ୍ୟଟକମାନଙ୍କୁ ଆକୃଷ୍ଟ କରିବା ପାଇଁ ବିଭିନ୍ନ ଫୁଲଗଛ, ଔଷଧୀୟ ଉଦ୍ୟାନ, ଛୋଟଛୋଟ ଚାଳଘର କାନ୍ଥରେ ସୁନ୍ଦର ସୁନ୍ଦର ଝୋଟି ଚିତା କରାଯାଇଥାଏ।

ଛୋଟ ଛୁଆଙ୍କୁ ଆକୃଷ୍ଟ କରୁଛି ମିନି ପାର୍କ:

ପର୍ଯ୍ୟଟନ କ୍ଷେତ୍ରରେ ଆଉ ପାଦେ ଆଗେଇବାକୁ ଯାଇ ସାତକୋଶିଆ ବନବିଭାଗ ଟିକରପଡା ଠାରେ ଏକ ମିନି ପାର୍କ ନିର୍ମାଣ କରିଛି। ଯେଉଁଥିରେ ଛୋଟ ବାଳକ ଠାରୁ ବୟବୃଦ୍ଧଙ୍କୁ ଆକର୍ଷିତ କରିଲା ଭଳି ସମସ୍ତ ଉପକରଣ ଗୁଡିକ ରଖାଯାଇଛି। ଚକ୍ରି ଦୋଳି, ଖସଡ଼ା ଦୋଳି, କ୍ୟାନପି, ରୋପ ୱେ ଆଦି ସମସ୍ତ ଉପକରଣ ଲୋକଙ୍କୁ ହେସ ଖୁସି ପ୍ରଦାନ କରୁଛି।

ଗ୍ରାମୀଣ କଳାସଂସ୍କୃତି :

ଏହିପରି ପ୍ରାକୃତିକ ପର୍ଯ୍ୟଟନସ୍ଥଳଗୁଡ଼ିକରେ ସେଠାର ସ୍ଥାନୀୟ ବ୍ୟକ୍ତି ସେହି ଅଞ୍ଚଳର ବିଭିନ୍ନ କଳାକୃତିକୁ ପ୍ରଦର୍ଶନ କରିଥାନ୍ତି । ଅତିଥିମାନଙ୍କ ମନୋରଞ୍ଜନ ପାଇଁ ଅଞ୍ଚଳବାସୀଙ୍କ ଉଦ୍ୟମରେ ବିଭିନ୍ନ ନାଚଗୀତର ଆସର ଜମିଥାଏ। ଏପରି ଲୋକକଳା ଉତ୍ସବର ଆୟୋଜନ ଗାଁର ସ୍ଵତନ୍ତ୍ର ପରିଚୟ ପ୍ରଦାନ କରିଥାଏ । ସ୍ଥାନୀୟ ଅଞ୍ଚଳର ହସ୍ତଶିଳ୍ପ ସାମଗ୍ରୀ ପ୍ରଦର୍ଶନ ଓ ବିକ୍ରି କରାଯାଇଥାଏ। ଏହାଦ୍ବାରା ସ୍ଥାନୀୟ

ଗ୍ରାମବାସୀ ଉପକୃତ ହୋଇଥାନ୍ତି। ଏପରିକି ଅନେକ ଅତିଥ ଜଙ୍ଗଲର ପାଦଚଲା ରାସ୍ତାରେ ଗାଇଙ୍କ ସହିତ ବୁଲିଥାନ୍ତି । ପାହାଡ଼ ଚଢ଼ାକୁ ବି ଉପଭୋଗ କରିଥାନ୍ତି। ଜଳଭାଗରେ ଦେଶୀଡ଼ଙ୍ଗାରେ ଲାଇଫ୍‌ ଜ୍ୟାକେଟ ସହ ବୁଲିବାର ସୁବ୍ୟସ୍ଥା ରହିଛି।

ପରିବେଶ ସୁରକ୍ଷା:

ପରିବେଶ ପର୍ଯ୍ୟଟନସ୍ଥଳ ବୁଲିଆସୁଥିବା ଅନେକ ସ୍କୁଲ କଲେଜ ଛାତ୍ରୀଛାତ୍ରଙ୍କ ପାଇଁ ଏପରି ସ୍ଥାନଗୁଡ଼ିକରେ ପ୍ରତ୍ୟକ୍ଷ ଭାବେ ପରିବେଶକୁ ଅନୁଭବ କରିବା ସହିତ ଏଠାରେ ପରିବେଶ ସୁରକ୍ଷା ସମ୍ପର୍କିତ ବିଭିନ୍ନ ଜନସଚେତନତା କର୍ମଶାଳା କରାଯାଇଥାଏ। ଏପରି ପ୍ରାକୃତିକ କ୍ୟାମ୍ପରେ ପ୍ରକୃତିର ସୁରକ୍ଷାକୁ ନେଇ ବିଶେଷଜ୍ଞମାନେ ଯୋଗଦେଇଥାନ୍ତି ।

ବର୍ଷକ ବାରମାସ ସାତକୋଶିଆ ତଥା ଟିକରପଡା ଠାରେ ଲୋକଙ୍କ ଭିଡ଼ ରହୁଥିବା ବେଳେ ମୁଖ୍ୟତଃ ନଭେମ୍ବର ମାସରୁ ଫେବ୍ରୁଆରୀ ମାସ ଶେଷ ପର୍ଯ୍ୟନ୍ତ ପର୍ଯ୍ୟଟକଙ୍କ ବେସ ଭିଡ଼ ଜମିଥାଏ। ଓଡ଼ିଶାର ବିଭିନ୍ନ ପ୍ରାନ୍ତରୁ ଲୋକେ ପ୍ରକୃତିକୁ ଉପଭୋଗ କରିବାକୁ ଆସୁଥିବା ବେଳେ ବିଶେଷ ସ୍ଥଳରେ ପଶ୍ଚିମବଙ୍ଗରୁ ୭୫ପ୍ରତିଶତ ପର୍ଯ୍ୟଟକ ଆସିଥାନ୍ତି। ଯେଉଁମାନେ ଏହି ଏଠିକାର ପରିବେଶ ଓ ପ୍ରକୃତି କୁ ଅତିନିକଟରେ ଦେଖିଛନ୍ତି। ସେମାନେ ନିଜର ସ୍ମୃତିର ମାନସପଟରୁ ଏହାକୁ କେବେ ହେଲେ ହେଁ ଭୁଲି ପାରିବେ ନାହିଁ।

ଓଡ଼ିଶାର ଭୁସ୍ୱର୍ଗ ସାତକୋଶିଆ !

ପାଦ ଥାପିଲେ ଭୁଲିଯିବେ ଜୀବନର ସମସ୍ତ ଦୁଃଖ କଷ୍ଟ