କାଲି ତଥା ୪ ଜୁନ୍ ୨୦୨୪ ରେ ବାହାରିଛି ବହୁ ପ୍ରତିକ୍ଷୀତ ୨୦୨୪ ର ନିର୍ବାଚନ ର ଫଳାଫଳ। ଯାହା ଖାଲି ଅନେକଙ୍କ ଜୀଵନ ନୁହେଁ ଦେଶ ଓ ରାଜ୍ୟ ର ଭବିଷ୍ୟତ ନିର୍ଦ୍ଧାରଣ କରିବ। ପ୍ରଥମେ ତ ଗଣତାନ୍ତ୍ରିକ ପଦ୍ଧତିରେ ନିର୍ବାଚିତ ସମସ୍ତ ଲୋକ ପ୍ରତିନିଧି ଙ୍କୁ ମୋର ହାର୍ଦ୍ଦିକ ଅଭିନନ୍ଦନ ଆଶା କରୁଛି ଯେଉଁ ଭରଷା ଆଶାରେ ଓଡ଼ିଶାର ଲୋକ ମାନେ ତାଙ୍କୁ ଭୋଟ ଦେଇଛନ୍ତି ତାହା ସେମାନେ ରକ୍ଷା କରିବେ।

ଦୀର୍ଘ ୨୪-୨୫ ବର୍ଷ ପରେ କାଲି ଓଡ଼ିଶା ରାଜନୀତି ର ଦିଗ ପରିବର୍ତ୍ତନ ହୋଇଛି। ବିଜୁ ଜନତା ଦଳର ଗଡ଼ ଭାବେ ଜଣା ଯାଉଥିବା ଓଡ଼ିଶା ମାଟି ରେ ପ୍ରଥମ ଥର ପାଇଁ ଭାରତୀୟ ଜନତା ପାର୍ଟି ପ୍ରଥମ ଥର ପାଇଁ ସରକାର ଗଠନ କରିବାକୁ ଯାଉଛି ତାହା ବି ନିଜେ ସଂଖ୍ୟା ଗରିଷ୍ଠତା ହାସଲ କରି ଓ ବିନା ଗଠବନ୍ଧନ ରେ। ଯଦିଓ ମୁଁ କୌଣସି ରାଜନୀତି ବିଶେଷଜ୍ଞ ନୁହେଁ କି ଉଭୟ ବୟସ ଓ ଅଭିଜ୍ଞତା ରେ ରାଜନୀତି କୁ ଖୁବ୍ କମ୍ ଜାଣିଛି ତଥାପି କିଛି ଆଲୋଚନା ଓଡ଼ିଶାରେ ଏହି ବିଜେପି ତଥା ଭାରତୀୟ ଜନତା ପାର୍ଟିର ଅପ୍ରତ୍ୟାଶିତ ସଫଳତା ପଛରେ କାରଣ କଣ ହେଇପାରେ? ମୋଦୀ ଲହର ରେ ମୋଦୀଙ୍କ ଲୋକ ପ୍ରିୟତା ନା ଆଉ କିଛି ?

ପ୍ରଥମେ ଏହି ପ୍ରଶ୍ନ ପଚାରିବାକୁ ଯାଉଛି ଯେଉଁ ପରିବର୍ତ୍ତନ ଓଡ଼ିଶା ରାଜନୀତି ରେ ହୋଇଛି ତାହାର କଣ ନିହାତି ଆବଶ୍ୟକତା ଥିଲା? ତେବେ ଉତ୍ତର ଆସିବ ହଁ ନିହାତି ଭାବରେ ଆବଶ୍ୟକ ଥିଲା। ପାଖାପାଖି ୨୫ ବର୍ଷ ସରକାର କିଛି କମ୍ ସମୟ ନୁହେଁ ତେବେ ପରିବର୍ତ୍ତନ ଓ ଅନ୍ୟ କୁ ପାଞ୍ଚ ବର୍ଷ ସୁଯୋଗ ଦେବା ହିଁ ବୁଦ୍ଧିମତା ର ପରିଚୟ। ଯେମିତି ମାର୍କ ତ୍ୱେନ୍ ମତ ଦେଇଥିଲେ "ରାଜନେତା ହେଉଛନ୍ତି ଅନ୍ତଃବସ୍ତ୍ର ଭଳି, ତାଙ୍କୁ ଉଚିତ୍ ସମୟରେ ବଦଳେଇ ଦେବା ଆବଶ୍ୟକ ସମାନ କାରଣ ପାଇଁ।"

ତେବେ ଭାରତୀୟ ଜନତା ପାର୍ଟି ର ଜିତିବାର ଅନେକ ଛୋଟ ବଡ଼ କାରଣ ଅଛି ଆମେ କିଛି ମୁଖ୍ୟ କାରଣ ଉପରେ ଆଖି ପକେଇବା।

୧) ଓଡ଼ିଶାର ଲୋକ ମାନେ ଏକ ପରିବର୍ତ୍ତନ ଚାହୁଁଥିଲେ ନିଜ ରାଜନୀତିକ ବାତାବରଣ ରେ। କାହିଁକି ନା ଦୀର୍ଘ ୨୪ ବର୍ଷ ର ଶାସନ ତାହା ବି କହିବାକୁ ଗଲେ ବିନା ବିପକ୍ଷ ରେ ତେଣୁ ଲୋକ ମାନେ ଅନେକ ଦିନ ରୁ ପରିବର୍ତ୍ତନ କୁ ଚାହୁଁଥିଲେ ଆଉ ଗଣତନ୍ତ୍ର ରେ ତ ଲୋକ ମାନେ ହିଁ ରାଜା ସମୟ ମିଳିଲା ସେ ମତ ଦେଇ ବଦଳେଇ ଦେଲେ। ଯଦି ଏ ପାଞ୍ଚ ବର୍ଷ ରେ ବିଜେପି ବି କାମ ନକରିବ ହୁଏତ ଆରଥରକୁ ଓଡ଼ିଶା ବାସି ତାଙ୍କୁ ବି ବଦଳେଇ ଦେବେ। ଉଭୟ କେନ୍ଦ୍ର ଓ ରାଜ୍ୟ ରେ ଲୋକଙ୍କ ର ଅପ୍ରତ୍ୟାଶିତ ଭୋଟ ପ୍ରମାଣ କରିଦେଇଛି ଲୋକ ମାନେ ହିଁ ସର୍ବେ ସର୍ବା ସେ ହିଁ ନିଷ୍ପତି ନେବେ କିଏ ରହିବ କିଏ ନାହିଁ।

୨) ଦ୍ଵିତୀୟ ରେ ଦେଖିବା ବିଜେପି କାର୍ଯ୍ୟକର୍ତ୍ତା ଙ୍କ ପ୍ରୟାସ ଓ ମିଷ୍ଟର ଭି କେ ପାଣ୍ଡିଆନ ଙ୍କ ବିରୋଧରେ ଜନ ଅସନ୍ତୋଷ। ବିଜେପି ନେତା ମାନଙ୍କ ଠାରୁ ଅଧିକ ଶ୍ରେୟ ଯିବ ବିଜେପି ର ତୃଣ ମୂଳ ର କର୍ମକର୍ତ୍ତା ମାନଙ୍କ ପାଖକୁ। ଆଇଟି ସେଲ୍ ଠୁ ଆରମ୍ଭ କରି ତୃଣ ମୂଳ ରେ କାମ କରୁଥିବା କର୍ମକର୍ତ୍ତା ମାନେ ହିଁ ଲୋକଙ୍କୁ ଶାସକ ଦଳ ଠାରୁ ମନ ପରିବର୍ତ୍ତନ କରିବାକୁ ବାଧ୍ୟ କରିଥିଲେ। ଆଉ ଲୋକଙ୍କ ପାଖରେ ପରିବର୍ତ୍ତନ ର ହାୱା ଦେଖି ବିଜେପି ନେତୃତ୍ୱ ମାନେ ଯେଉଁ ମାନେ ଆଗରୁ ନିଜ ହାର ମାନିଯାଇ ଚୁପ୍ ରହିଥିଲେ ସେମାନେ ବି ନିଜ କାମ ରେ ତ୍ୱରଣ ଆଣିଥିଲେ ।

ହେଲେ ଏହିଥର ପ୍ରୟାସ ଯେପରି ଭାବରେ ବିରୋଧୀ ଦଳ ଭାବରେ ଭାରତୀୟ ଜନତା ପାର୍ଟି କରୁଥିଲେ ଏଥିରେ ସନ୍ଦେହ ନଥିଲା ଯେ ସେମାନେ ଭଲ ପ୍ରଦର୍ଶନ କରିବେ କିନ୍ତୁ ହୁଏତ ସମସ୍ତଙ୍କ ମନରେ ଥିଲା ସେମାନେ ୨୦୨୯ ରେ ସରକାର ଗଢ଼ି ପାରନ୍ତି ହେଲେ ଏଥିରେ ଇନ୍ଧନ ଯୋଗାଇ ଏହାକୁ ଜଲଦି କରିଦେବା ପଛରେ ୫ଟି ଅଧ୍ୟକ୍ଷ ଭିକେ ପାଣ୍ଡିଆନ ଙ୍କ ବିରୋଧ ରେ ଯେଉଁ ଅସ୍ତ୍ର ପ୍ରୟୋଗ କରାଯାଇଥିଲା ତାହା ସଠିକ୍ ଭାବରେ କାର୍ଯ୍ୟ କଲା। ସିଏ ତାମିଲ - ଓଡ଼ିଆ ପ୍ରସଙ୍ଗ ହେଉ କି ଜଗନ୍ନାଥ ପ୍ରଭୁଙ୍କ ପ୍ରସଙ୍ଗ ହେଉ ଅବା ଓଡ଼ିଆ ସ୍ୱାଭିମାନ ଅସ୍ମିତା କଥା ହେଉ ଅବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଙ୍କୁ ନିୟନ୍ତ୍ରଣ କରିବା ଏମିତି ବିଭିନ୍ନ ପ୍ରସଙ୍ଗ ଯୋଗୁଁ ମୁଖ୍ୟତଃ ଲୋକ ଏମିତି ଏକ ନିଷ୍ପତି ନେଇ ଏକ ପରିବର୍ତ୍ତନ କରି ଦେଖେଇଦେଲେ ।

୩) ତୃତୀୟ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରଭାବ ଓ ଭାରତୀୟ ଜନତା ପାର୍ଟି ନେତୃବୃନ୍ଦ ଙ୍କ କାର୍ଯ୍ୟ। ଯଦି ମୋତେ ପ୍ରଶ୍ନ କରାଯାଏ କଣ ଓଡ଼ିଶାରେ ବିଜେପି ର ବିଜୟ ପଛରେ କେବଳ ନରେନ୍ଦ୍ର ମୋଦି ଙ୍କ ର ଲୋକପ୍ରିୟତା ଅଛି ତେବେ ଉତ୍ତର ଆସିବ ନାହିଁ ବିଲକୁଲ ନାହିଁ ଯଦି ମୋଦୀଙ୍କ ଲୋକପ୍ରିୟତା ପାଇଁ ହୋଇଥାନ୍ତା ତେବେ ୨୦୧୪ ରେ ଯେବେ ମୋଦୀ ଲହର ଆସିଥିଲା ସେବେ ପରିବର୍ତ୍ତନ ହୋଇ ଥାଆନ୍ତା ଅଥବା ୨୦୧୯ ରେ ମୋଦୀ ସୁନାମି ଆସିଥିଲା ସେତେବେଳେ ପରିବର୍ତ୍ତନ ହୋଇ ପାରିଥାନ୍ତା। କିନ୍ତୁ ସେମିତି ହେଲାନି। ତେବେ କଣ ବିଜେପି ବିଜୟ ରେ ମୋଦୀ ଜି ଙ୍କ ଲୋକ ପ୍ରିୟତା ର ଯୋଗଦାନ ନାହିଁ ? ହିଁ ଅଛି ବହୁତ୍ ପରିମାଣ ରେ ଅଛି। ଆଜି ଯଦି ଲୋକ ମାନଙ୍କର ଭାରତୀୟ ଜନତା ପାର୍ଟି ଉପରେ ବିଶ୍ୱାସ ଓ ଭରସା ଆସିଛି ତାହା କେବଳ ହିଁ କେବଳ ନରେନ୍ଦ୍ର ମୋଦୀ ଙ୍କ ପାଇଁ ନହେଲେ କିଛି ବି ହୋଇ ଯାଇଥିଲେ ଓଡ଼ିଶାରେ ପରିବର୍ତ୍ତନ ଏତେ ଶୀଘ୍ର ଆସି ନଥାନ୍ତା। ଶେଷ ସମୟ କୁ ନିଜେ ବାରମ୍ବାର ଓଡ଼ିଶା ଆସିବା ସହ କେନ୍ଦ୍ର ମନ୍ତ୍ରୀ ମାନଙ୍କୁ ଯେମିତି ଗସ୍ତ ରେ ଓଡ଼ିଶା ଆଣିଲେ ତାହା ଲୋକଙ୍କୁ ଆହୁରି ମତ ପରିବର୍ତ୍ତନ ରେ ସାହାଯ୍ୟ କରିପାରେ।

ଏବେ ଆସିବା ଆମ ଓଡ଼ିଶା ର ଭାରତୀୟ ଜନତା ପାର୍ଟି ର ମୁଖ୍ୟ ନେତା ମାନଙ୍କ ପାଖକୁ। ଟିକେ ଡେରି ରେ ଉଠିଲେ କିନ୍ତୁ ବହୁତ୍ ଭଲ ରେ ଲାଗିଥିଲେ ଏଥର ନିର୍ବାଚନ ପାଇଁ। ସମସ୍ତେ ପ୍ରୟାସ କରିଛନ୍ତି ନିଜ ନିଜର କ୍ଷମତା ହିସାବରେ ଭଲ କରିବାକୁ। ବିଜେଡି ଓ ବିଜେପି ମେଣ୍ଟ ବିପକ୍ଷ ରେ ରାଜ୍ୟ ବିଜେପି ରହି ସେମାନେ ନିଜର ମାନ ରକ୍ଷା କରିଛନ୍ତି।

ଶେଷ ରେ ଏତିକି କହିବି ଲୋକମାନେ ଯେଉଁ ଆଶା ଭରସା ରେ ଭୋଟ ଦେଇଛନ୍ତି ତାହାକୁ ପୁରା କରିବାର ଦାୟିତ୍ବ ଏବେ ନୂଆ ସରକାର ହାତରେ। ସେମାନଙ୍କ ଉପରେ ଓଡ଼ିଶାବାସୀ ଙ୍କ ର ଅଧିକ ଆଶା ରହିବା ସ୍ଵାଭାବିକ ଓ ସେମାନଙ୍କୁ ପ୍ରତି ନିଷ୍ପତି ଓ ଯୋଜନା ରେ ପୂର୍ବ ସରକାର ସହ ତୁଳନା କରାଯିବ। ଏଥର ଯଦି ସେମାନେ ନିଜର ମାନିଫେଷ୍ଟୋ ପୁରା କରି ଲୋକଙ୍କୁ ଖୁସି କରିବେ ତେବେ ଲୋକ ମାନଙ୍କ ନିର୍ଣ୍ଣୟ ସାର୍ଥକ ହେବ ନହେଲେ ପୁଣି ଥରେ ପରିବର୍ତ୍ତନ ହେବା ପାଞ୍ଚ ବର୍ଷ ପରେ କିଛି ଆଶ୍ଚର୍ଯ୍ୟ ଲାଗିବାନି।

ଧନ୍ୟବାଦ। ଆଶା କରେ ଆପଣ ନିଜ ନିଜର ମତାମତ କମେଣ୍ଟ ମାଧ୍ୟମରେ ଦେଇ ପାରିବେ।

BJP in Odisha

BJD in Odisha

Odisha election and Odisha politics

ଓଡ଼ିଶାରେ ବିଜେପି- ମୋଦୀ ଲହର ନା ଆଉକିଛି? ଏକ ବିଶ୍ଳେଷଣ

BJP in Odisha - a small analysis