ପ୍ରାରମ୍ଭିକ -

ସଂସାରର ପ୍ରତ୍ୟେକ ଜୀବ ଜନ୍ମ ଠାରୁ ମୃତ୍ୟୁ ମଧ୍ୟରେ ବୃଦ୍ଧି ହୋଇଥାଏ ଓ ବିକଶିତ ହୋଇଥାଏ। ବୃଦ୍ଧି , ବିକାଶ ଓ ପ୍ରଜନନ ହେଉଛି ପ୍ରତ୍ୟେକ ଜୀବ ର ପ୍ରମୁଖ ବୈଶିଷ୍ଟ୍ୟ। ଏସବୁ ପାଇଁ ଜୀବ ଖାଦ୍ୟ ଗ୍ରହଣ କରିଥାଏ। ଜୀବ କାର୍ଯ୍ୟ କରିବା ନିମନ୍ତେ ଶକ୍ତି ଆବଶ୍ୟକ କରିଥାଏ ଏବଂ ଏହି ଶକ୍ତି କୁ ସେ ଖାଦ୍ୟ ରୁ ହିଁ ପାଇଥାଏ। ଖାଦ୍ୟ ଜୀବନର ସମସ୍ତ ମୌଳିକ ଆବଶ୍ୟକତା କୁ ପୂରଣ କରିଥାଏ। ଖାଦ୍ୟ ହିଁ ହୋଇଥାଏ ଜୀବନଧାରଣ ର ପ୍ରଧାନ ଉତ୍ସ।

ଆମେ ଯାହା ଖାଦ୍ୟ ଖାଆନ୍ତି ତାହା ଏକ ପ୍ରକାର ର ହୋଇନ ଥାଏ। ଭିନ୍ନ ଭିନ୍ନ କିସମର ଖାଦ୍ୟ ଆମେ ଗ୍ରହଣ କରନ୍ତି। ଭାତ ,ରୁଟି ,ଡାଲି ,ବିଭିନ୍ନ ପନିପରିବା ,ବିଭିନ୍ନ ଫଳ ,ଅଣ୍ଡା ,ମାଛ ,ମାଂସ ଓ କ୍ଷୀର ରୁ ପ୍ରସ୍ତୁତ ଖାଦ୍ୟ ଇତ୍ୟାଦି କୁ ଆମେ ଖାଦ୍ୟ ଭାବେ ଗ୍ରହଣ କରିଥାଉ।

ପ୍ରତ୍ୟେକ ଖାଦ୍ୟ ପଦାର୍ଥ ର ଉପାଦାନ ମଧ୍ୟ ଭିନ୍ନ ଭିନ୍ନ ହୋଇଥାଏ। କେତେକ ଖାଦ୍ୟ ପଦାର୍ଥ ଉଦ୍ଭିଦ ଠାରୁ ମିଳୁଥିବା ବେଳେ କେତେକ ଖାଦ୍ୟ ପଦାର୍ଥ ପ୍ରାଣୀ ଙ୍କ ଠାରୁ ମିଳିଥାଏ। ଖାଦ୍ୟ କୁ ଆଧାର କରି ପ୍ରାଣୀ ଜଗତ କୁ ତିନି ଗୋଟି ବିଭାଗ ରେ ବିଭାଜନ କରାଯାଇଅଛି ଯଥା ଶାକାହାରୀ, ମାଂସାହାରୀ ଓ ସର୍ବାହାରୀ।

ଯେଉଁ ପ୍ରାଣୀ ମାନେ ଖାଦ୍ୟ ନିମନ୍ତେ ଉଦ୍ଭିଦ ମାନଙ୍କ ଉପରେ ନିର୍ଭର କରିଥାନ୍ତି ସେମାନଙ୍କୁ ଶାକାହାରୀ ପ୍ରାଣୀ କୁହାଯାଏ। ଯେଉଁ ପ୍ରାଣୀମାନେ ଖାଦ୍ୟ ନିମନ୍ତେ ଅନ୍ୟ ପ୍ରାଣୀ ଙ୍କ ଉପରେ ନିର୍ଭର କରିଥାନ୍ତି ସେମାନଙ୍କୁ ମାଂସାହାରୀ ପ୍ରାଣୀ ଓ ଯେଉଁମାନେ ଖାଦ୍ୟ ପାଇଁ ଉଭୟ ପ୍ରାଣୀ ଓ ଉଦ୍ଭିଦ ଉପରେ ନିର୍ଭର କରିଥାନ୍ତି ସେମାନଙ୍କୁ ସର୍ବାହାରୀ ପ୍ରାଣୀ କୁହାଯାଏ।

ଖାଦ୍ୟ ର ଆବଶ୍ୟକତା -

ଆମେ ପ୍ରତିଦିନ ଭିନ୍ନ ଭିନ୍ନ ଖାଦ୍ୟ ଖାଇଥାଉ। ଭାତ ସହ ଆମେ ଡାଲି , ତରକାରୀ, ଭଜା ଆଦି ଖାଇଥାଉ । ଏହାର କାରଣ କଣ ? ପ୍ରତ୍ୟେକ ଖାଦ୍ୟରେ ସମାନ ପୋଷକ ନଥାଏ। ଆମ ଶରୀର ର ବୃଦ୍ଧି ରେ କିମ୍ବା ଶରୀର ବିକାଶ ରେ ଭିନ୍ନ ଭିନ୍ନ ପୋଷକ ର ଆବଶ୍ୟକତା ଥାଏ ଯାହା ଭିନ୍ନ ଭିନ୍ନ ଖାଦ୍ୟ ପଦାର୍ଥ ରୁ ମିଳିଥାଏ। ତେଣୁ ଆମେ ଏକ ପ୍ରକାର ଖାଦ୍ୟ ନ ଖାଇ ଭିନ୍ନ ଭିନ୍ନ ପ୍ରକାରର ଖାଇଥାଉ। ପୋଷକ ଦୃଷ୍ଟିରୁ ଖାଦ୍ୟ କୁ ଭିନ୍ନ ଭିନ୍ନ ବିଭାଜନ ରଜ ବିଭାଜିତ କରାଯାଇଅଛି। ଯଥା- ଚାଉଳ , ଚିନି ,ଗୁଡ ,ଆଳୁ ,ମାଣ୍ଡିଆ ,ମକା ,କନ୍ଦମୂଳ ଇତ୍ୟାଦି ମିଠା ଜାତୀୟ ଖାଦ୍ୟ ପଦାର୍ଥ ରୁ ଶ୍ବେତସାର ଜାତୀୟ ଖାଦ୍ୟ ମିଳିଥାଏ। ଏହା ଶରୀରରେ ଶକ୍ତି ଯୋଗାଇଥାଏ , ଚର୍ବି ଆକାରରେ ଜମା ହୋଇ ରହିଥାଏ ଯାହା ଆବଶ୍ୟକ ସମୟରେ ଶକ୍ତି ଯୋଗାଇ ଥାଏ। ସେହିପରି ଡାଲି ,ଛତୁ ,ମାଛ , ମାଂସ ଓ ଅଣ୍ଡା ରେ ପୁଷ୍ଟିସାର ଜାତୀୟ ଖାଦ୍ୟ ମିଳିଥାଏ । ଏହା ଶରୀର ବୃଦ୍ଧି ରେ ସାହାଯ୍ୟ କରେ ,ମରିଯାଇଥିବା କୋଷ ସ୍ଥାନ ରେ ନୂତନ କୋଷ ସୃଷ୍ଟି କରିବାରେ ସହାୟକ ହୋଇଥାଏ।ତେଲ ,ଘିଅ ,କ୍ଷୀର ରୁ ସ୍ନେହସାର ଜାତୀୟ ଖାଦ୍ୟ ମିଳିଥାଏ। ଏହା ଶରୀର କୁ ଚିକ୍କଣ ରଖିବାରେ ସାହାଯ୍ୟ କରିଥାଏ ଏବଂ କାର୍ଯ୍ୟ କରିବାକୁ ଶକ୍ତି ମଧ୍ୟ ଯୋଗାଇ ଥାଏ।

ତେଣୁ ଆମେ କହିପାରିବା ଯେ ଶରୀର ବୃଦ୍ଧି ରେ , ରୋଗ ପ୍ରତିରୋଧକ ଶକ୍ତି ସୃଷ୍ଟି କରିବାରେ ଖାଦ୍ୟ ର ଆବଶ୍ୟକତା ଓ ଗୁରୁତ୍ବ ଯଥେଷ୍ଟ ରହିଛି।

ଡାଏଟ୍ ବା ଖାଦ୍ୟର ନିୟନ୍ତ୍ରଣ -

ଉପରୋକ୍ତ ଆଲୋଚନା ରୁ ଆମେ ଜାଣିଲେ ଯେ ଖାଦ୍ୟର ଯଥେଷ୍ଟ ଗୁରୁତ୍ବ ରହିଛି। ମଣିଷ ଶରୀର ର ବିକାଶ ନିମନ୍ତେ ଖାଦ୍ୟ ଏକ ଅତ୍ୟାବଶ୍ୟକ ପଦାର୍ଥ। କେତେକ ଖାଦ୍ୟ ପଦାର୍ଥ କୁ ଆମେ କଞ୍ଚା ଖାଇଥାଉ ଓ କେତେକ କୁ ଆମେ ରୋଷେଇ କରି ଖାଇଥାଉ। ହେଲେ ସବୁ ଖାଦ୍ୟ ପଦାର୍ଥ ଆମ ଶରୀର ପାଇଁ ହିତକର ହୋଇନଥାଏ। ତେଣୁ ଶରୀର ପାଇଁ ହିତ ଓ ଅହିତ କୁ ଦୃଷ୍ଟିରେ ରଖି ଖାଦ୍ୟ ସେଵନ କରିବା ଜରୁରୀ ଅଟେ। ଖାଦ୍ୟରେ ଥିବା ପୋଷକ ହିଁ ଆମ ଶରୀର କୁ ଶକ୍ତି ଯୋଗାଇଥାଏ।ଅତିତ ରେ ଆଦିମ ମଣିଷ ଖାଦ୍ୟ ଅନ୍ୱେଷଣ କରି ଯାହା ପାଉଥିଲା ଖାଉଥିଲା । ମାତ୍ର ଆଜିର ମଣିଷ ନିଜ ମନ ମୁତାବକ ଭିନ୍ନ ଭିନ୍ନ ବ୍ୟଞ୍ଜନ ପ୍ରସ୍ତୁତି କରି ସେଵନ କରୁଅଛି। କ୍ଷୀର ରେ ଭିନ୍ନ ଭିନ୍ନ ପୋଷକ ସମାନ ପରିମାଣ ରେ ରହିଥାଏ। ଶିଶୁ ଟିଏ ଜନ୍ମ ପରେ କ୍ଷୀର କୁ ହିଁ ସେବନ କରିଥାଏ। ତା ଶରୀରର ସମସ୍ତ ଆବଶ୍ୟକ କୁ ସେ କେବଳ କ୍ଷୀର ରୁ ହିଁ ପୂରଣ କରିଥାଏ। ଖାଦ୍ୟ ଅଭାବରେ, ଅତ୍ୟଧିକ ଖାଦ୍ୟ ଗ୍ରହଣ ଓ ବିଷାକ୍ତ ଖାଦ୍ୟ ସେଵନ‌ ଯୋଗୁଁ ଶରୀର ରେ ଭିନ୍ନ ଭିନ୍ନ ରୋଗ ସୃଷ୍ଟି ହୋଇଥାଏ ।ଅତ୍ୟଧିକ ଖାଦ୍ୟ ଗ୍ରହଣ କରିବା ଦ୍ବାରା ଶରୀର‌ରେ ଭିନ୍ନ ଭିନ୍ନ ରୋଗ ଦେଖା ଦେଇଥାଏ। ଶରୀର ରେ ଆବଶ୍ୟକ ଠାରୁ ଅଧିକ ଫୁଲି ଯିବା , ମଧୁମେୟ ରୋଗ, ମସ୍ତିଷ୍କ ଆଘାତ , ଗଣ୍ଠି ରୋଗ ଓ ହୃଦଘାତ ଭଳି ସମସ୍ୟା ଦେଖାଯାଇଥାଏ। ଏହି କାରଣ ପାଇଁ ଖାଦ୍ୟ ରେ ନିୟନ୍ତ୍ରଣ କରିବା ସହ ଶାରୀରିକ ପରିଶ୍ରମ କରିବା ମଧ୍ୟ ଆବଶ୍ୟକ ହୋଇଥାଏ।ଶରୀରର ଉଚ୍ଚତା ଓ ଓଜନ କୁ ମଧ୍ୟ ନିୟନ୍ତ୍ରଣ କରିବା ଜରୁରୀ ଅଟେ।ଏହା ପାଇଁ ଫଳ ,ପନିପରିବା ,ଓ ପର୍ଯ୍ୟାପ୍ତ ପରିମାଣରେ ପାଣି ପିଇବା ଆବଶ୍ୟକ ଓ ତନ୍ତୁ ଜାତୀୟ ଖାଦ୍ୟ ଖାଇବା ଜରୁରୀ ଅଟେ।କୌଣସି ଶାରୀରିକ ବିକାର ଥିଲେ ବିଶେଷଜ୍ଞଙ୍କ ପରାମର୍ଶ ଅନୁସାରେ ଖାଦ୍ୟ ତାଲିକା ପ୍ରସ୍ତୁତ କରିବା ଜରୁରୀ ହୋଇଥାଏ। ସଠିକ୍ ପରିମାଣରେ ଖାଦ୍ୟ ସେଵନ, ଉପଯୁକ୍ତ ବିଶ୍ରାମ , ଶାରୀରିକ ବ୍ୟାୟାମ ଓ ମାନସିକ ଚାପ ମୁକ୍ତ ରହିବା ଦ୍ବାରା ଆମେ ଆମ ଶରୀରକୁ ସୁସ୍ଥ ରଖି ପାରିବା।

ଏକ ସୁସ୍ଥ ଖାଦ୍ୟ ହିଁ ମଣିଷ ଶରୀର ର ସ୍ୱାସ୍ଥ୍ୟର ଉନ୍ନତି ଏବଂ ରକ୍ଷଣାବେକ୍ଷଣ କରିପାରିବ। ଉତ୍ତମ ସ୍ୱାସ୍ଥ୍ୟ ହିଁ ମଣିଷକୁ ମାନସିକ ଏବଂ ଶାରୀରିକ ସ୍ତରରେ ସୁଦୃଢ କରିପାରିବ । ଡାଏଟ୍ ମାଧ୍ୟମରେ ଶରୀରକୁ ସୁସ୍ଥ ରଖିପାରିବା ଏବଂ ଅହିତ କର ଖାଦ୍ୟ ପଦାର୍ଥ ରୁ ସୃଷ୍ଟ ରୋଗ ଠାରୁ ଶରୀର କୁ ସୁରକ୍ଷା ଦେଇପାରିବା।

ଶାକାହାରୀ ମାନଙ୍କ ପାଇଁ ଆହାର ଯୋଜନା-

ଜଣେ ଗ୍ରାମର ଚାଷୀ ହେଉ ଅବା ଜଣେ ଉଚ୍ଚ ପଦସ୍ତ ଅଧିକାରୀ ହେଉ, ପ୍ରତ୍ୟେକ ନିଜ ନିଜ କ୍ଷେତ୍ରରେ ପରିଶ୍ରମ କରିଥାନ୍ତି। ତେଣୁ ଏହି ପରିଶ୍ରମ ନିମନ୍ତେ ସୁସ୍ଥ ରହିବା ଅନିବାର୍ଯ୍ୟ ହୋଇଥାଏ। ଅନେକ ଖାଦ୍ୟ ରହିଛି ଯାହା ଆମ ଶରୀରରେ ରୋଗ ସୃଷ୍ଟି କରିଥାଏ ବା ଶରୀରରେ କୁ ପ୍ରଭାବ ପକାଇଥାଏ। ଏହା ଦ୍ବାରା ଆମେ ଦୁର୍ବଳ ହୋଇ ପରିଶ୍ରମ କରି ପାରନ୍ତି ନାହିଁ। ତେଣୁ ଖାଦ୍ୟ ସେବନ ରେ ସଚେତନ ହେବା ଅତ୍ୟନ୍ତ ଜରୁରୀ ଅଟେ। ଶରୀରକୁ ସୁସ୍ଥ ରଖିବାକୁ ହେଲେ ସର୍ବ ପ୍ରଥମେ ଫାଷ୍ଟ ଫୁଡ‌୍ ପରିତ୍ୟାଗ କରିବା ଆବଶ୍ୟକ। ଏହା ବ୍ୟତୀତ ଚିନି,ଗ୍ଲୁକୋଜ,ମହୁ,ମିଠା ,କ୍ରିମ୍ ବିସ୍କୁଟ ,ଆଇସ୍କ୍ରିମ,କେକ୍ ,ଚକୋଲେଟ୍, ଜାମ, ଜେଲି,ଥଣ୍ଡା ପାନୀୟ, ଲହୁଣୀ ,କ୍ଷୀରରୁ ପ୍ରସ୍ତୁତ କ୍ରିମ୍ , ପନିର,ନଡ଼ିଆ ,ବାଦାମ, ଅଣ୍ଡା କେଶର,ଆମ୍ବ ,ଆପଲ୍ ,ପନିପରିବା ,ଆଳୁ ଓ ମିଠା ଆଳୁ ଭଳି ଖାଦ୍ୟ ଗୁଡିକୁ ନିୟମିତ ଭାବେ ଖାଇବା ଅନୁଚିତ୍।

ସମୟ ଅନୁଯାୟୀ ଆହାର ଯୋଜନା -

୭.୩୦ - କ୍ଷୀର ରେ ପ୍ରସ୍ତୁତ ବିନା ଚିନି ଚାହା ଏବଂ ତାହା ସହ ଗହମ ପେଶା ଅଟାରୁ ପ୍ରସ୍ତୁତ ରୁଟି।

୧୦.୩୦- ୩ ଖଣ୍ଡ ବିସ୍କୁଟ

୧୨.୦୦ - ମଧ୍ୟାହ୍ନ ଭୋଜନ ରେ 1½ କପ୍ ରନ୍ଧା ଭାତ, ½ କପ୍ ଡାଲି ,1 କପ୍ ଫ୍ରାଏଡ୍ ପନିପରିବା ,¼ କପ୍ ପ୍ୟାନ-ଫ୍ରାଏଡ୍ ମାଛ (ହିଲସା, ରୋହୁ, କାଟଲା) / ଚିକେନ୍ ,2 ଚାମଚ ଚଟଣୀ |

୩.୩୦ - ଗୋଟିଏ ଆପଲ୍‌

୭.୩୦ - ରାତ୍ରୀ ଭୋଜନ ରେ ½ କପ୍ ରନ୍ଧା ଚାଉଳ ,ଗୋଟିଏ ରୁଟି ,1 କପ୍ ଫ୍ରାଏଡ୍ ପନିପରିବା |

୯.୦୦ - 1 କପ୍ କ୍ଷୀର

ଅନ୍ୟାନ୍ୟ ଗୁରୁତ୍ବପୂର୍ଣ୍ଣ ସୂଚନା -

- ଅଧିକ ଖାଇବା ପରିବର୍ତ୍ତେ ବହୁବାର ଅଳ୍ପ ଅଳ୍ପ ଖାଇବା ଉଚିତ୍।

- ଧଳା ଚାଉଳ ବଦଳରେ ବାଦାମୀ ଚାଉଳ ବ୍ୟବହାର କରିବା ଜରୁରୀ ।

- ଚାଉଳ ବଦଳରେ ବିଭିନ୍ନ ପ୍ରକାରର ଶସ୍ୟ ବ୍ୟବହାର କରାଯାଇପାରିବ ଯେପରିକି ଗହମ, ଓଟସ୍, ବାର୍ଲି ଏବଂ ଅନ୍ୟାନ୍ୟ ମିଲେଟ୍ |

- ରାନ୍ଧିବା ପୂର୍ବରୁ ଚାଉଳକୁ ଅନେକ ଥର ଧୋଇବା ଅନୁଚିତ୍ ହୋଇଥାଏ ଏବଂ ଭାତ ରାନ୍ଧିବା ବେଳେ ଅଧିକ ପେଜ ନିଷ୍କାସନ କରିବା ଅନୁଚିତ୍ ହୋଇଥାଏ।

- ଅଳ୍ପ ତେଲରେ ଭାଜିବା ପ୍ରକ୍ରିୟା ସଂପାଦନ କରିବା ଉଚିତ୍।

- ପ୍ରତ୍ୟେକ ଖାଦ୍ୟ ସହିତ କଞ୍ଚା ପନିପରିବା ଯେପରିକି ପିଆଜ, ଟମାଟୋ ଏବଂ କ୍ୟାପସିକମ୍ ଅନ୍ତର୍ଭୂକ୍ତ କରିବା ଆବଶ୍ୟକ।

- ଲୁଣର ବ୍ୟବହାରକୁ ହ୍ରାସ କରିବା ଜରୁରୀ।

- ସିଗାରେଟ୍ ଓ ଧୂମ୍ରପାନ କୁ ପରିତ୍ୟାଗ କରିବା ଉଚିତ୍।

ଶେଷକଥା -

ଓଜନ କମାଇବା ନିମନ୍ତେ ଖାଦ୍ୟ ର ନିୟନ୍ତ୍ରଣ ଆବଶ୍ଯକ ହୋଇଥାଏ। କିନ୍ତୁ ତା ସହ ବ୍ୟାୟାମ୍ ର ମଧ୍ୟ ଯଥେଷ୍ଟ ଗୁରୁତ୍ବ ରହିଅଛି। ପ୍ରାତଃ ବିଛଣା ତ୍ୟାଗ ,ଉଚିତ୍ ସମୟରେ ଶୌଚ ,ବ୍ୟାୟାମ୍ ଓ ପ୍ରାଣାୟାମ କରିବା , ଉପଯୁକ୍ତ ସମୟାନୁସାରେ ଖାଦ୍ୟ ସେବନ ,ଠିକ୍ ସମୟରେ ଶୋଇବା , ଫାଷ୍ଟ ଫୁଡ‌୍ କୁ ପ୍ରତ୍ୟାଖ୍ୟାନ କରିବା, ନିଶାଦ୍ରବ୍ୟ ଠାରୁ ଦୂରେଇ ରହିବା ଇତ୍ୟାଦି ନିୟମିତ ଭାବେ ପାଳନ କଲେ କେବଳ ଓଜନ କମି ନ ଥାଏ ବରଂ ଅନେକ ରୋଗ ଠାରୁ ଶରୀର ସୁରକ୍ଷିତ ରହିଥାଏ।

ପ୍ରସ୍ତୁତି - ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ଓଜନ କମେଇବା ପାଇଁ ଭାରତୀୟ ଶାକାହାରୀ ଆହାର ଯୋଜନା | Indian vegetarian diet plan for weight loss

ଉପଯୁକ୍ତ ଆହାର ଯୋଜନା ମାଧ୍ୟମରେ ଶରୀର କୁ ସୁସ୍ଥ ଓ ରୋଗ ମୁକ୍ତ ରଖିପାରିବେ।