(

ବିନୋଦ ନାୟକଙ୍କ କାବ୍ୟ ଦୃଷ୍ଟି ପ୍ରସରି ଯାଇଛି ଗାଁ ମାଟିରୁ ବିଦେଶ ପର୍ଯ୍ୟନ୍ତ । ମଣିଷ ସବୁବେଳେ ସଂଶୟୀ । ଦ୍ଵନ୍ଦ୍ବ ସବୁ ମଣିଷର ସହଜାତ । ଏଥିରୁ ନିବୃତ୍ତ ହୁଏତ ସିଦ୍ଧ ସାଧକ ହୋଇପାରେ । ମାତ୍ର କବି ନୁହେଁ, କବିର ଲେଖନୀ କେତେବେଳେ ଗାଁ ମାଟିର ମୋହରେ 'ଗ୍ରାମପଥ' ଲେଖିଛି ତ ଆଉ କେତେବେଳେ ଅତିଷ୍ଠ ହୋଇ ଧାଇଁ ଯାଇଛି ମାଡାଗାସ୍କାରର ବର୍ଷା ଭିଜା ଲବଙ୍ଗ କ୍ଷେତକୁ ତ କେତେବେଳେ ଅଷ୍ଟ୍ରେଲିଆର ମରୁପ୍ରାନ୍ତରକୁ କିମ୍ବା ସୁମେରୁର ଏସ୍କ୍ଇମୋ କୁଟୀରକୁ ବା ଯାଯାବର ର ବେଦୁଇନ୍‌ ଦେଶକୁ । ଜୀବନ ଜୀଇଁବା ବେଳକୁ ଆମେ କ୍ରମାନ୍ୱୟରେ ବାଲ୍ୟ, କୌଶର, ଯୌବନ, ଜରା ଅବସ୍ଥାରେ ଉପନୀତ ହେଉ, ସ୍ଵୀକାର କରିବାକୁ ପଡ଼ିବ ଯେ ଏ ଅବସ୍ଥା ସହିତ ଅନୁଭୂତି ଓ ପ୍ରତିକ୍ରିୟାର ରୂପ ମଧ୍ଯ ବଦଳିଯାଏ । କବି ମଣିଷ ପାଇଁ ମଧ୍ୟ ଏହା ନିରାଟ ସତ । ବୟସ ଅନୁପାତରେ ଦୃଷ୍ଟିଭଙ୍ଗୀ ନିଶ୍ଚିତ ରୂପେ ପରିବର୍ତ୍ତନଶୀଳ । କବି ବିନୋଦ ନାୟକଙ୍କ କ୍ଷେତ୍ରରେ ମଧ୍ୟ ଏହା ସତ । ସାମଗ୍ରିକ ଭାବେ ତାଙ୍କ ସୃଷ୍ଟି ସମୂହକୁ ବିିଚାର କଲେ ଆମେ ଦେଖିବା ପ୍ରଥମ ପର୍ଯ୍ୟାୟ କବି ଜଣେ ପ୍ରତିଷ୍ଠିତ କବି ହେବା ପାଇଁ ସମସାମୟିକ କ୍ଷେତ୍ରରେ ନାମ ଉପାର୍ଜନ କରି ସାରିଥିବା କିଛି ବିଶିଷ୍ଟ କବିଙ୍କ କାବ୍ୟ ଚେତନାର ସମକକ୍ଷ ଚେତନା, ନିଜ ସୃଷ୍ଟିରେ ରୂପ ଦେବାର ଚେଷ୍ଟା କରିଛନ୍ତି ଓ ଧରା ପଡ଼ିଛନ୍ତି ଜଣେ ଆହରଣ ଓ ଅନୁସରଣ ପ୍ରିୟ କବି ଭାବେ ସମାଲୋଚକମାନଙ୍କ ତୀକ୍ଷ୍ଣ ଦୃଷ୍ଟିରେ । ୧୯୩୪(ବିଦାୟ ବିପ୍ଲବ)ର କବି ଜଣେ ଚଉଦ ବର୍ଷର ବାଳକ । ସେ ଜୀବନ ଯୁଦ୍ଧର ଆହ୍ୱାନ ଶୁଣି ବିଚଳିତ ହୋଇ କବିତାକୁ ପରିତ୍ୟାଗ କରି ବାସ୍ତବତାକୁ ଗ୍ରହଣ କରିବା ପାଇଁ ଆଗ୍ରହୀ । ମାତ୍ର ପରେ ୧୯୩୯ ବେଳକୁ ସେ କମର କଷିଥିବା ୧୪ ବର୍ଷର କିଶୋରଟି 'ପରାଜୟ'ର ଗ୍ଲାନିରେ ମଳିନ ହୋଇଯାଇଛି । ତଥାପି 'ପରାଜୟକୁ ଉତ୍ସାହର ନବୀନ ଅର୍ଚ୍ଚନା' ଭାବେ ସେ ବର୍ଣ୍ଣନା କରିଛନ୍ତି । କବିଙ୍କ ଭାଷାରେ :-

"ହାୟ ମୋ କବିତା,

ନିଭୃତର ସହରେ ଆପଶାର ଚିର ପରିଚିତା

ତୁମର ସେ ବଳି ଦେଇ କରିବି ମୁଁ ଦୂରେ ଅଭିଯାନ,

ଜୀବନର ଉପକୂଳେ ରଣେ ଆଜି ଆସିଛି ଆହ୍ୱାନ୍‌ ।"

୧୯୩୩ର 'ଅଶ୍ରୁର ଅର୍ଘ୍ୟ'ରେ ସେ ତାଙ୍କ ନାୟିକାକୁ ନିଜର ମୃତ୍ୟୁ ପରେ ତାଙ୍କ ଚିତା ଭସ୍ମରେ ଅଶ୍ରୁର ଅର୍ଘ୍ୟ ଢାଳିଦି ଦେବା ପାଇଁ ଅନୁରୋଧ କରିଛନ୍ତି ଜଣେ ସାର୍ଥକ ରୋମାଣ୍ଟିକ କବି ଭାବେ ।

୧୯୩୩ ରେ ମୃତ୍ୟୁ, ୧୯୩୪ରେ ଜୀବନର ଅଭିଯାନ୍ ଓ ୧୯୩୯ରେ ପରାଜୟ । ତଥାପି ନଦୀନ ଉତ୍ସାହରେ ଏ କବି ମାନସ ଗତିଶୀଳ ଏହା ଲକ୍ଷ୍ୟ କରିବାର ଯୋଗ୍ୟ ।

'ଗ୍ରାମପଥ'ର କବି ଜୀବନର ଅନ୍ତିମ ସତ୍ୟକୁ ଉପଲବ୍ଧି କରିଛନ୍ତି । ଜୀବନ ଶୈଶବ, କୈଶୋର, ଯୌବନ, ଜରା ପ୍ରାପ୍ତି ପରେ ଲଭି ଥାଏ ପଞ୍ଚମ ଅବସ୍ଥାକୁ । ତେଣୁ ପୃଥିବୀ ସାରା ଘୁରି ବୁଲିଥିବା କବିଙ୍କ ମନ ଫେରି ଆସିଛି ଗାଁ ମାଟିକୁ ଏହା ଏକ ସାର୍ଥକ ସୃଷ୍ଟି ।

ଓଡ଼ିଶା ରାଜ୍ୟ ମୁକ୍ତ ବିଶ୍ୱବିଦ୍ୟାଳୟ, ମୁଖ୍ୟ କାର୍ଯ୍ୟାଳୟ, ସମ୍ବଲପୁର

ବିଭାଗୀୟ ମୁଖ୍ୟ (ଓଡ଼ିଆ)

କୁଲିତାପଡ଼ା,ମୋଦିପଡ଼ା

ସମ୍ବଲପୁର

ପିନ୍ କୋଡ଼-୭୬୮୦୦୨

ଯୋଗାଯୋଗ -୭୯୭୮୮୬୪୬୧୨

ପରିଣତି କାବ୍ୟ ମାନସର ସ୍ଫୁରଣ 'ଗ୍ରାମପଥ' Parinati Kavya Manasara sphoorana 'Gramapatha'

ଶ୍ରୀମତୀ ଡକ୍ଟର ସଙ୍ଗୀତା ନାଏକ ପୁରୋହିତ Dr Sangita Naik Purohit