ହାତଲେଖା କଳା ଏବଂ ପରମ୍ପରାକୁ ଉତ୍ସାହିତ କରିବା ପାଇଁ ପ୍ରତିବର୍ଷ ସେପ୍ଟେମ୍ବର ୧ ତାରିଖରେ ଚିଠି ଲେଖା ଦିବସ ରୁପେ ପାଳନ କରାଯାଏ ।

ଆଜିକାଲି ମୋବାଇଲ୍ ଫୋନ୍ ଓ ଇଣ୍ଟରନେଟ୍ରର ଯୁଗ। ଏକ ସେକେଣ୍ଡରେ ଖବର ପଠାଯାଏ, ଭିଡିଓ କଲ୍ ରେ କଥା ହୋଯାଏ। ଏତେ ଶୀଘ୍ରତା ଭିତରେ ଆମେ ଏକ ଜିନିଷ ହରାଇ ଦେଇଛେ – ସେହି ଜିନିଷଟି ହେଉଛି ହାତେ ଲିଖା ଚିଠି ବା ପତ୍ର। ପତ୍ର ଲିଖନ ଦିବସ ଆସିଛି ଆମକୁ ମନେ ପାଡିବାକୁ ଯେ ଏହି ସୁନ୍ଦର ପରମ୍ପରା ଯେବେ ଚାଲିଗଲା, ତାହା ହୋଇଯିବ ଏକ ବଡ କ୍ଷତି।

ପତ୍ର କାହିଁକି ଏତେ ଗୁରୁତ୍ୱପୂର୍ଣ୍ଣ?

ପତ୍ର କେବଳ ଖବର ଦେବା ନୁହେଁ। ଏହା ହେଉଛି ଭାବର ଏକ ସୁନ୍ଦର ଉପହାର। ଯେତେବେଳେ ଆମେ ଏକ ପତ୍ର ଲେଖୁ, ଆମେ ତା ପାଇଁ ସମୟ କାଢୁ, ଚିନ୍ତା କରୁ କି କଣ ଲେଖିବୁ। ଏହି ସମୟ ଓ ପରିଶ୍ରମ ଦେଖାଏ ଯେ ଆମେ ସେହି ବ୍ୟକ୍ତିକୁ କେତେ ଭଲପାଉ। ଏକ ପତ୍ରରେ ଥାଏ ଆମର ହାତର ଛାପ, ଆମର ଭାବନା, ଆମର ଯତ୍ନ। ଏହା ଏକ ଟେକ୍ସଟ୍ ମେସେଜ୍ ଭଳି ଶୀଘ୍ର ନହେଇପାରେ, କିନ୍ତୁ ଏହାର ଏକ ନିଜସ୍ୱ ମହତ୍ତ୍ୱ ଅଛି।

ପତ୍ର ହେଉଛି ସ୍ମୃତିର ଭଣ୍ଡାର:

ଆଜି ଯାଏଁ ବହୁ ଲୋକ ତାଙ୍କ ପୁରୁଣା ପତ୍ରଗୁଡିକୁ ସଂରକ୍ଷିତ କରି ରଖିଛନ୍ତି। ଏହି ପତ୍ରଗୁଡିକୁ ତନ ତନ ପଢିଲେ ମନେ ପଡେ ପୁରୁଣା ସମୟ, ପୁରୁଣା ଭାବନା। ଏହା ଏକ ଡାଏରୀ ପରି, ଯାହା ଆମର ଜୀବନର କାହାଣୀକୁ ବଖାଣି ଥାଏ। ଇମେଲ୍ କିମ୍ବା ମେସେଜ୍ ସବୁ ସମୟ ଆଗେଇ ଚାଲିଯାଏ, କିନ୍ତୁ ଏକ ପତ୍ର ରହିଯାଏ ଚିରସ୍ମରଣୀୟ ହୋଇ।

ପତ୍ର ଲେଖିବାର ଆନନ୍ଦ:

ପତ୍ର ଲେଖିବା ଏକ ଆନନ୍ଦଦାୟକ ଅନୁଭୂତି। ଏକ କାଗଜ ଓ କଲମ ନିଅ, ଆଉ ଲେଖିବାକୁ ଆରମ୍ଭ କର ତୁମର ମନର ଭାବନାକୁ। ତୁମେ ଯେଉଁ ବ୍ୟକ୍ତିକୁ ପତ୍ରଟି ଲେଖୁଛ, ତାଙ୍କୁ ଭାବି ଭାବି ଲେଖ। ଏହା ତୁମର ମନକୁ ଶାନ୍ତ କରିବ, ଭାବନାକୁ ଗୋଟାଇବ। ଆଉ ଯେତେବେଳେ ତୁମେ ତାଙ୍କ ଠାରୁ ଉତ୍ତର ପାଇବ, ସେହି ଆନନ୍ଦଟି ଅନ୍ୟ କିଛିରେ ନାହିଁ।

ପତ୍ର ଲିଖନ ଦିବସର ଲକ୍ଷ୍ୟ:

ପତ୍ର ଲିଖନ ଦିବସର ମୁଖ୍ୟ ଲକ୍ଷ୍ୟ ହେଉଛି ଏହି ସୁନ୍ଦର ପରମ୍ପରାକୁ ଫେରାଇ ଆଣିବା। ଆମେ ସମସ୍ତେ ଏହି ଦିବସରେ ପ୍ରତିଜ୍ଞା ନେଇପାରିବା ଯେ ଆମେ ଆମର ପରିବାର, ବନ୍ଧୁ ଓ ପ୍ରିୟଜନଙ୍କୁ ନିୟମିତ ଭାବରେ ପତ୍ର ଲେଖିବା। ବିଶେଷ କରି ଯେଉଁମାନେ ଆମଠାରୁ ଦୂରରେ ରହନ୍ତି, ସେମାନଙ୍କୁ ଏକ ପତ୍ର ଲେଖିବା ମାଧ୍ୟମରେ ଆମେ ଆମର ଭାବନା ପଠାଇପାରିବା।

କିଭଳି ଲେଖିବେ ଏକ ପତ୍ର?

ପତ୍ର ଲେଖିବା ବହୁତ ସହଜ। ଆବଶ୍ୟକ କେବଳ ଏକ କାଗଜ, ଏକ କଲମ ଓ ଏକ ଭାବନା। ତୁମେ ଲେଖିପାର ତୁମର ଦିନକୁ କିଭଳି କଟେଇଲ, କିଛି ମଜାର ଘଟଣା, କିଛି ଚିନ୍ତା, କିଛି ସ୍ୱପ୍ନ। ତୁମେ ତାଙ୍କୁ ପଚାରିପାର କେମିତି ଅଛନ୍ତି, କଣ କରୁଛନ୍ତି। ମୁଖ୍ୟ କଥା ହେଉଛି, ତୁମର ଭାବନାକୁ ଖୋଲା ଭାବେ ଲେଖ।

ପତ୍ର ଲିଖନ ଦିବସ ଆମକୁ ଏକ ସୁନ୍ଦର ଅତୀତକୁ ଫେରିବାର ସୁଯୋଗ ଦେଇଥାଏ। ଏହା ଆମକୁ ମନେ ପାଡିଥାଏ ଯେ ଜୀବନ କେବଳ ଶୀଘ୍ରତା ଓ ବ୍ୟସ୍ତତାରେ ନାହିଁ, ବରଂ ଧୀରେ ଧୀରେ ଭାବନାକୁ ଜୀବନ୍ତ ରଖିବାରେ ମଧ୍ୟ। ଆସ, ଆମେ ସମସ୍ତେ ମିଶି ଏହି ସୁନ୍ଦର ପରମ୍ପରାକୁ ଜୀବିତ ରଖିବା। ଏକଥା ମନେ ରଖିବା ଯେ ଏକ ଛୋଟ ପତ୍ର ମଧ୍ୟ କୌଣସି ବ୍ୟକ୍ତିର ଦିନଟିକୁ ଉଜ୍ଜ୍ୱଳ କରିଦେଇପାରେ। ଏହା ହେଉଛି ଭାବର ସୁଗନ୍ଧ, ଯାହାକି ସମୟର ସହିତ କେବେ ଫିକା ହୋଇଯାଏ ନାହିଁ।

ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ

ପତ୍ର ଲିଖନ ଦିବସ: ଭାବର ସୁଗନ୍ଧିତ ସଂସ୍କୃତିର ପୁନରୁଦ୍ଧାର

ପତ୍ର ଲିଖନ ଦିବସ: ଭାବର ସୁଗନ୍ଧିତ ସଂସ୍କୃତିର ପୁନରୁଦ୍ଧାର