ପ୍ରେମ ତୋର ଚଞ୍ଚଳାଅଙ୍କାବଙ୍କା ନଈ
ପ୍ରତି ଦିନ ଉତ୍ଫୁଲିତ୍ ହୁଏ ତତେ ଚାହିଁ

ପଣ କରେ ଲଙ୍ଘିବି କେବେ ମୁଁ ସଜାଗ ହୋଇ
ହେଲେ ସମୁଦ୍ର ପରି ଗର୍ଜନ କରୁ ତୁ ଜୁଆରିଆ ହୋଇ

ଦିନେ ସାହସ କରି ଲମ୍ପ ମାରିଲି ଯାଇ
ଉଛୁଳା ନଦୀ ତୁ ବୁଡ଼େଇ ଦେଲୁ ମତେ କାହିଁ

ଅକ୍ଲାନ୍ତ ପରିଶ୍ରମ ପରେ ଭଉଁରୀ ରେ ମୁହିଁ
ସତ ଚେଷ୍ଟା ମୋ ବିଫଳ ହେଲା ,ଆଗକୁ ମୁଁ ଯାଏ ନାହିଁ

ହାଲିଆ ହେଲି ମୁଁ, କଳ, ବଳ, କୌଶଳ କାମ ଦେଲା ନାହିଁ
ଦୟା ପାଇ ତୁ , ଫେରେଇ ଦେଲୁ ମତେ କୂଳ କୁ ନେଇ

ଖରସ୍ରୋତା ହେଲେ ପାଣି ତା ମଧୁର ଭାଇ
ଉଚ୍ଛୁଳା ନଦୀ ସେ ଶସ୍ୟ ଶ୍ୟାମଳ କରେ ମନ ଟାଙ୍ଗରା ଭୂଇଁ

ପହଁରିବା ଛାଡ଼ି, ଡଙ୍ଗା ନେଇ ଉତୁରିଲି ନାଉରିଆ ହୋଇ
ବରଷା ଦିନ ର ସେ ବନ୍ୟା ବିପଦ ସଙ୍କୁଳ ନଈ

ମୋ କାତ ଆହୁଲା କୁ ଗ୍ରାସ କରିଦେଲା ସେହି
ଡଙ୍ଗା ରୁ ପଡ଼ି ଗଣ୍ଡ ମଝିରେ ଫସିଲି ଯାଇ

ଜୀବନ ମରଣ ସମୟ ସେ, ଦୃଶ୍ୟମାନ ହେଲା ଜୁଇ
ଦୁଇ ହାତ ଟେକି ଦେଲି, କାନ୍ଦି ମୁଁ କଇଁ କଇଁ

ଶତ ପରୀକ୍ଷା ପରେ, ଚକ୍ଷୁ ରୋଦନ ରେ ନେଲା ସେ ଆପଣେଇ
ସୁନା ପିଲା ପରି କୂଳେ ଲଗେଇଲା, କେତେଯେ ଯାତନା ଦେଇ

ତା ପ୍ରେମ ଜୁଆରେ ଉବୁଟୁବୁ ମୁଁ କୂଳ ରେ ଥାଇ
ମନ ଯେତେ ଖବର ଦେଲେ ବି, ସାହସ କରେନି ନାଉରିଆ ହେବା ପାଇଁ

ହୃଦୟ ମୋ ତା ପରଶେ, ରହିଛି ସବୁଜିମା ପୂର୍ଣ୍ଣ ହୋଇ
ଯେତେ କଷଣ ଆସିଲେ , ଧୋଇ, ପଟୁ ମାଡି ଯାଏ ସେହି

ଲୋଡା ନାହିଁ ମୋର ଖାରା ସମୁଦ୍ର,
ତା ଛୁଆଁ ରେ ମୁଁ ରହିଛି ଉର୍ବର ହେଇ

ଖରସ୍ରୋତା ମୋ ଦୁଃଖ ଅପସରି ନିଏ, ମଧୁର ରାଗିଣୀ ହୋଇ।
ଜନମ ଜନମ ର ସମ୍ପର୍କ ଆମର, ରହିଛି ନିବିଡ ହେଇ।

🖊️ସଞ୍ଜୟ

ପ୍ରେମ ତୋର ଅଙ୍କାବଙ୍କା ନଈ

ପ୍ରେମିକ ର ପରୀକ୍ଷା