ଥକା ମନ ଆଉ ପ୍ରେମ କରେନିରେ ପ୍ରେମତ ଜହର ଭରା,

ଭୁଲିଗଲୁ କି ତୁ ହୃଦୟ ବିକଳେ ହୋଇଥିଲୁ ଦରମରା ll୧ll

ମିଛ ଏ ଦୁନିଆ ମିଛ ଏ ସଂସାର ମିଛ ମିଠା ମିଠା କଥା,

ହୃଦୟ ଦେଇକି ହୃଦୟ ଭାଙ୍ଗିବା ପ୍ରେମ ପରମ୍ପରା ପ୍ରଥା ll୨ll

କାହିଁକି ରେ ଅଶ୍ରୁ ବହିଯାଉ ଅଛୁ ନୟନକୁ ଦେଇ କଷ୍ଟ,

ଆଜିକାଲି ପ୍ରେମ ନୁହେଁରେ ପବିତ୍ର ସର୍ବେ ଏଠି ପଥଭ୍ରଷ୍ଟ ll୩ll

କର୍ଣ୍ଣ ! କାହିଁପାଇଁ ଆଜି ବି ଶୁଣୁଛୁ ସେ ମିଠା ଗଳ୍ପ ଛଳନା,

ସୁଖର ନିର୍ଣ୍ଣାଦ ଆସିବ ରେ ଶୀଘ୍ର ଖୁସିର ନାହିଁ କଳନା ll୪ll

କାହିଁକି ଏ ହାତ ଆଜି ଯାଏଁ ମନେ ରଖିଅଛୁ ତାର ଛୁଆଁ,

ଜଳାଇଦେଇକି ଚାଲିଗଲା ଯିଏ ତୋ ହୃଦୟରେ ନିଆଁ ll୫ll

ଓଠ ଆଜି ଖୋଜେ ସେ କୋମଳ ସ୍ପର୍ଶ ପ୍ରଥମ ପ୍ରେମ ଚୁମ୍ବନ,

ଖୋଜିବା ହୃଦୟ କାନ୍ଦୁଚି ରେ ଆଜି ତୀବ୍ର ହେଲାଣି ସ୍ପନ୍ଦନ ll୬ll

ବୁକୁଫଟା କୋହ ସତ୍ୟପ୍ରେମ ମୋହ କିଏ ରେ ପାରୁଛ ଦେଖି,

ଚାଲିଗଲା ସିଏ ପ୍ରେମର ନାମରେ ହୃଦୟରେ କାଳୀ ମାଖି ll୭ll

ଚିତ୍କାରୁଚି କଣ୍ଠ ଶୁଣିବାକୁ ଆଜି ପାଖରେ କେହିତ ନାହିଁ,

ଶୁଣିବା ତ ଅତି ଦୂର ହୋଇଗଲା ପାଣି ଟୋପେ ମିଳେ ନାହିଁ ll୮ll

ମନର ରାଇଜେ ଘରଟିଏ ତୋଳି ଚାଲିଗଲୁ କରି ଏକା,

ତଥାପି ହୃଦୟ ତୋତେ ଖୋଜିବୁଲେ ତିଳେ ମାତ୍ର ନାହିଁ ଶଙ୍କା ll୯ll

ଅସ୍ଥିର ହୁଏ ମୁଁ ସତେ ଯେହ୍ନେ ବହ୍ନି ଜଳୁଥାଏ ଦପଦପ,

ପ୍ରଜ୍ବଳିତ ନିଆଁ ଲିଭିଯିବ ଦିନେ ଲାଗି ପ୍ରେମ ଅଭିଶାପ ll୧୦ll

ଏକାନ୍ତ ନିଶିରେ ତୁ ମନେ ପଡୁ ଶଶୀରେ ଦିଶେ ତୋ ମୁଖ,

ତୁ ଚାଲିଗଲୁ ଲୋ ସୁଖ ସବୁ ନେଇ ଛାଡିଦେଇଗଲୁ ଦୁଃଖ ll୧୧ll

ଏମିତି ନିଆଁ ରେ ଜଳୁଛି ମୋ ମନ ଦେଖି ଦେଖାଇ ପାରେନା,

ହୃଦୟରୁ ତୋର କଲୁ ବିତାଡିତ ଥିଲୁ ଦିନେ ମୋର ସୁନା ll୧୨ll

ପ୍ରେମ ରାଇଜରେ ପ୍ରେମହରା ଆଜି ହୋଇଗଲି ଦେବାଳିଆ,

ଏମିତି ଉଠାଇ ଫିଙ୍ଗିଦେଲା ମତେ ସତେ ଯେ ମୁଁ ଅଳିଆ ll୧୩ll

ଦୁନିଆ ଆଗରେ ପରାଜିତ ହେଲି ଅଜୟ ରହିଲ ତୁମେ,

ତଥାପି ମୋ ମନେ ଆଜି ବି ସପନେ ରହିଅଛେ ମିଶି ଆମେ ll୧୪ll

ଆଜି ବି ଏ ମନ ଦେଖଇ ସପନ ଖୋଜଇ ପ୍ରେମର ରାହା,

ଜାଣିଅଛି ଏଠି କଣ୍ଟକିତ ରାସ୍ତା କେହି କରିବେନି ଆହା ll୧୫ll

କବିତା ଲେଖିଣ ବୁଝାଏ ମନକୁ କାନ୍ଦେନାରେ ମୋ ହୃଦୟ,

ପ୍ରେମ ତାର ତିଳେ ନଥିଲା ତୋ ପାଇଁ ହୋଇଗଲା ସେ ନିର୍ଦୟ ll୧୬ll

ଯାଆରେ ମନ ତୁ ଭାସି ବୁଲୁଥାଆ ବୁଝାଇ ଦେ ତୋ ମନ,

କାଲି ଯିଏ ଥିଲା ତୋହରି ମନରେ ଆଜି ସେ ଆଉ କା ଧନ ll୧୭ll

ପ୍ରେମିକର କୋହ