କଦାଚିତ୍ କାଳିନ୍ଦୀ ତଟ ବିପିନ ସଙ୍ଗୀତକରବୋ

ମୁଦାଭୀରୀ ନାରୀବଦନ କମଳାସ୍ୱାଦମଧୂପଃ ।

ରମାସମ୍ଭୁ ବ୍ରହ୍ମା ମରପତି ଗଣେଶାର୍ଚ୍ଚିତପଦୋ

ଜଗନ୍ନାଥ ସ୍ଵାମୀ ନୟନପଥଗାମୀ ଭବତୁ ମେ ।

ଅର୍ଥ:- କେବେ କେବେ ଥରେ ଯମୁନା କୂଳରେ ଉପବନ ମାନଙ୍କରେ ସଙ୍ଗୀତ ର ମଧୁର ମୂର୍ଚ୍ଛନା ତୋଳି - ଠିକ୍ ସେପରି ଭ୍ରମରଟିଏ ପ୍ରସ୍ପୁଟିତ ପଦ୍ମ ର ମଧୂପାନ କରେ, ସେହିପରି ଯିଏ ଗୋପାଙ୍ଗନା ମାନଙ୍କର ମୁଖରବିନ୍ଦର ଲାସ୍ୟ ଓ ଦିବ୍ୟାନନ୍ଦର ମଧୁ କୁ ଗ୍ରହଣ କରୁଥିଲେ - ଲକ୍ଷ୍ମୀ, ଶିବ, ବ୍ରହ୍ମା, ଇନ୍ଦ୍ର ଓ ଗଣପତି ଆଦି ପ୍ରମୁଖ ଦେବଗଣ ଯାହାଙ୍କର ପଦ ଯୁଗଳ ରେ ପ୍ରଣନ୍ତି ଜଣାନ୍ତି - ସେହି ପ୍ରଭୁ ଜଗନ୍ନାଥ ମୋର ଦୃଷ୍ଟିପଥାରୂଢ଼ ହୁଅନ୍ତୁ ଓ ମୋ ଅନ୍ତର୍ଚକ୍ଷୁ ରେ ବିମ୍ବିତ ହୁଅନ୍ତୁ।

ପବିତ୍ର ଉତ୍କଳ ଭୂମି ଭାରତ ତଥା ପୃଥିବୀ ମାନଚିତ୍ର ରେ ବିଶ୍ଵ ର ସବୁଠୁ ବଡ଼ ପର୍ବ ରଥ ଯାତ୍ରା ସୁପରିଚିତ ଓ ଚିରବନ୍ଦିତ। ମହାପ୍ରଭୁ ଜଗନ୍ନାଥ କେବଳ ଓଡ଼ିଶାର ଜାତୀୟ ଦେବତା ନୁହନ୍ତି,ସେ ଭାରତର ରାଷ୍ଟ୍ର ଦେବତା ଓ ନିଖିଳ ବିଶ୍ୱର ବିଶ୍ଵଦେବତା। ଜଗତକୁ ଆପଣେଇଛନ୍ତି ନିଜ ବାହୁରେ ଓ ଶ୍ରୀ ଜଗନ୍ନାଥ ନାମର ସାର୍ଥକତା ର ପ୍ରତିପାଦନ କରୁଛନ୍ତି। ଓଡ଼ିଶାର ମୁଖ୍ୟ ଯାତ୍ରା ରୂପେ ପୁରୀ ର ରଥ ଯାତ୍ରା ବିଶ୍ଵ ପ୍ରସିଦ୍ଧ। ଏହି ଯାତ୍ରା ଆଷାଢ଼ ଶୁକ୍ଳ ଦ୍ୱିତୀୟା ତିଥିରେ ପାଳନ ହୁଏ । ଏହି ଯାତ୍ରା ଘୋଷ ଯାତ୍ରା, ମହାବେଦୀ ,ମହୋତ୍ସବ, ପତିତପାବନ ଯାତ୍ରା, ଉତ୍ତରାଭିମୁଖୀ ଯାତ୍ରା, ନବଦିନଯାତ୍ରା, ଦଶବତା ଯାତ୍ରା, ଗୁଣ୍ଡିଚା ମହୋତ୍ସବ ଓ ଆଡ଼ପ ମଣ୍ଡପ ନାମରେ ବିଭିନ୍ନ ଶାସ୍ତ୍ର ଓ ପୁରାଣ ରେ ବର୍ଣ୍ଣିତ।

ପୁରୀ ରଥ ଯାତ୍ରା: ଏକ -:ମହାନ୍ ପରମ୍ପରା:- (Puri Ratha Yatra: A great tradition)

ବିଶ୍ଵ ବନ୍ଦିତ ଏଇ ଘୋଷ ଯାତ୍ରା ଭକ୍ତମାନଙ୍କ ଅଭୟପ୍ରଦ ଦାରୁଦିଅଁଙ୍କ ବକ୍ଷ ରେ ଧାରଣ କରି ପୁରୁଷୋତ୍ତମ କ୍ଷେତ୍ର ପାଲଟେ ଭୂସ୍ବର୍ଗ।