ବିଭିନ୍ନ ଦେଶ ଏବଂ ଆମ ଦେଶ ଭାରତରେ ମଧ୍ୟ କେଉଁ କାଳରୁ ଝିଅ ମାନଙ୍କୁ ଏହା ଶିକ୍ଷା ଦିଆଯାଉଛି ଯେ ଋତୁସ୍ରାବ ସମୟରେ ସେମାନେ ଅଶୁଦ୍ଧ ଏବଂ ତାଙ୍କ ଶରୀର ଅପବିତ୍ର। ମନ୍ଦିର କୁ ପ୍ରବେଶ , ଠାକୁରଙ୍କ ପୂଜା , ରୋଷେଇ ଶାଳରେ ପାଦ ରଖିବା , ପୁରୁଷ ମାନଙ୍କ ସହ କଥା ହେବା, ଘରୁ ବାହାରିବା କିମ୍ବା କହିବାକୁ ଗଲେ ପ୍ରତ୍ୟେକ କାର୍ଯ୍ୟରେ ନାରୀ ଓ ଝିଅ ମାନଙ୍କ ପାଇଁ ଏହି ସମୟରେ ବାଧା ସୃଷ୍ଟି କରାଯାଏ।

ଋତୁସ୍ରାବ ବିଷୟରେ ଆଲୋଚନା କରିବା, ବିଶେଷ କରି ପୁରୁଷ ମାନଙ୍କ ସହ ମନା ଥାଏ । ଋତୁସ୍ରାବ କୁ ଲୋକେ ସାମାଜିକ ସ୍ତରରେ ବର୍ଜିତ କରି ଆସିଛନ୍ତି ଏବଂ ଏହା କୁ କଳଙ୍କ ର ଆଖ୍ୟା ମଧ୍ୟ କିଛି ଲୋକ ଦେଇଛନ୍ତି।

ହେଲେ ଆମ ରାଜ୍ୟ ଓଡ଼ିଶାରେ କଥା କିଛି ଅଲଗା ! ଏଠି ଲୋକେ ଋତୁସ୍ରାବ ବେଳେ ମହିଳାଙ୍କୁ ଦେବୀ ପରି ମାନି ବର୍ଷକୁ ଥରେ ରଜ ପର୍ବ ପାଳନ କରନ୍ତି। 'ରଜ' ଶବ୍ଦ ଟି ସଂସ୍କୃତ ଶବ୍ଦ 'ରଜସ୍ଵଳା' ରୁ ଆସିଅଛି, ଯାହା ଋତୁସ୍ରାବ ହେଉଥିବା ମହିଳା କୁ ବର୍ଣନା କରେ । ରଜ ପର୍ବ ର ତିନି ଦିନ ଭୂଦେବୀ କିମ୍ବା ଶ୍ରୀ ଜଗନ୍ନାଥଙ୍କ ପତ୍ନୀ ମହାଲକ୍ଷ୍ମୀଙ୍କର ଋତୁସ୍ରାବ ର ସମୟ ବୋଲି ମାନ୍ୟତା ରହିଚି। ଋତୁସ୍ରାବ ସମୟରେ ପ୍ରାୟତଃ ନାରୀ ଓ ଝିଅ ମାନଙ୍କୁ (ବିଭିନ୍ନ ଅଞ୍ଚଳରେ), ଆଚାର ଛୁଇଁବା ପାଇଁ ମନା ଥାଏ, ଏହା ଭାବି ଯେ ସେମାନଙ୍କ ଛୁଆଁ ରେ ଆଚାର ଖରାପ ହୋଇଯିବ; ରୋଷେଇ କରିବା, ମନ୍ଦିର କୁ ଯିବା , ଘରୁ ବାହାରିବା ଇତ୍ୟାଦି କାମ କରିବା ମନା ଥାଏ କାରଣ ଲୋକଙ୍କ ମାନ୍ୟତା ଅନୁସାରେ ସେହି ସମୟରେ ନାରୀ ମାନେ ଅପବିତ୍ର, ଯାହା କି ମୁଁ ପୂର୍ବରୁ ବର୍ଣ୍ଣନା କରିଛି । ହେଲେ ଆମର ଅନନ୍ୟ ରଜ ପର୍ବ ଏହି ସତ୍ୟତା କୁ ସମାଜର ଦୃଷ୍ଟି କୁ ଆଣିଥାଏ ଯେ , ଋତୁସ୍ରାବ ସମୟରେ ହଉଥିବା ନାରୀର ଶରୀର କଷ୍ଟ ଯୋଗୁଁ ଏହି ପରି ନାନା କାର୍ଯ୍ୟ କରିବା କୁ ମନା କରାଯାଇଥାଏ ଏବଂ ନାରୀ କୁ ଅପବିତ୍ର ବୋଲି ମନେ କରିବା ହେଉଛି କେବଳ ଗୋଟାଏ ନିମ୍ନ ମାନସିକତା। କିଛି ସୂତ୍ରରୁ ଏହା ମଧ୍ୟ ଜଣାପଡ଼ିଛି ଯେ, ପୂର୍ବ କାଳରେ ନାରୀ ମାନେ ସୂର୍ଯ୍ୟ ଉଦୟ ପୂର୍ବରୁ ନିତ୍ୟକର୍ମ ସାରି ଗାଁ ଦାଣ୍ଡରେ ଥିବା ମନ୍ଦିରକୁ ଯାଉଥିଲେ, ସେହି ସମୟରେ ହିଂସ୍ର ଜନ୍ତୁ ମାନେ ମଧ୍ୟ ଆଖ ପାଖ ଅରଣ୍ୟ ରେ ଥାନ୍ତି , ତେଣୁ କରି ଏହା ଭୟ ଥିଲା ଯେ ଋତୁସ୍ରାବ ସମୟରେ ନାରୀ ମାନେ ମନ୍ଦିର ଗଲେ,ରକ୍ତର ଗନ୍ଧରେ ଆକର୍ଷିତ ହୋଇହିଂସ୍ର ଜନ୍ତୁ ମାନେ ତାଙ୍କ ଉପରେ ଆକ୍ରମଣ କରିପାରନ୍ତି, ଏହି ଯୋଗୁଁ ଋତୁସ୍ରାବ ସମୟରେ ନାରୀମାନଙ୍କୁ ମନ୍ଦିର କୁ ଯିବାପାଇଁ ମନା କରାଯାଉଥିଲା ଏବଂ ସେହି ପ୍ରଥା ଟି ଏବେ ମଧ୍ୟ ରହିଚି।

ଋତୁସ୍ରାବ କୁ ସାମାଜିକ ସ୍ତରରେ ବର୍ଜିତ କରି ନାରୀ ମାନଙ୍କର ସାମାଜିକ ସ୍ତରକୁ ନିମ୍ନତମ କରିବାରୁ ନାବାଳିକା ମାନଙ୍କର ମାନସିକ ଅବନ୍ନତି ହୋଇଥାଏ। ପାରିବାରିକ ସ୍ତରରେ ମଧ୍ୟ ଋତୁସ୍ରାବ କୁ ଲୁକ୍କାୟିତ ରଖିବାରୁ ନାବାଳିକା ମାନଙ୍କ ମଧ୍ୟରେ ବିଭିନ୍ନ ପ୍ରଶ୍ନ ଉଠେ ଏବଂ ସେମାନେ ଏହି ପ୍ରାକୃତିକ ପ୍ରକ୍ରିୟା କୁ ଲଜ୍ଜାଜନକ ବୋଲି ମନେ କରନ୍ତି।

ଗ୍ରାମାଞ୍ଚଳରେ କଥାରେ ଅଛି ଯେ ଇନ୍ଦ୍ର ଦେବତା ନିଜ ଗୁରୁଙ୍କୁ ହତ୍ୟା କରି ଯେଉଁ ପାପ କରିଥିଲେ, ନାରୀ ମାନେ ସେହି ପାପର ଅଧା ଭାଗୀଦାର ହୋଇଥିବାରୁ, ପ୍ରତିମାସରେ ତାଙ୍କର ଋତୁସ୍ରାବ ହୋଇଥାଏ,ତେଣୁକରି ସେହି ସମୟରେ ନାରୀ ମାନଙ୍କୁ ଅପବିତ୍ର ବୋଲି ଲୋକେ ମାନିଥାନ୍ତି ଏବଂ ଏପରି ଲୋକବାଣୀ ଗୁଡ଼ିକ ନାରୀ ମାନଙ୍କୁ ଅଧିକ ଭୟଭୀତ କରାଇଥାଏ।

ଋତୁସ୍ରାବ ବିଷୟରେ କଥା ହେବା ବହୁ ଲୋକଙ୍କ ପାଇଁ ଲଜ୍ଜାବୋଧକ, ହେଲେ ଏହି ରଜ ପର୍ବ ଜନସାଧାରଣ ସମ୍ମୁଖରେ ଋତୁସ୍ରାବ କୁ ଗୋଟାଏ ସାଧାରଣ କଥା ର ଆଖ୍ୟା ଦେଇଛି। ସବୁ କାଳ୍ପନିକ ମାନ୍ୟତା ଏବଂ ଲୋକବାଣୀ କୁ ଭୁଲ ପ୍ରମାଣିତ କରି ନାରୀ ମାନଙ୍କୁ ଋତୁସ୍ରାବ ଲଜ୍ଜା ଓ ଅପମାନ ରୁ ମୁକ୍ତ କରି, ସମାଜରେ ଗୋଟେ ଉଚ୍ଚ ସ୍ଥାନ ଦେଇଛି ରଜପର୍ବ। ନିଶ୍ଚିତ ଭାବରେ ଋତୁସ୍ରାବ ବିଷୟରେ ଥିବା କୁତ୍ସିତ ଭାବନା ଗୁଡିକୁ ଭଙ୍ଗ କରି ଆସିଛି ଏହି ରଜ ମହୋତ୍ସବ!

ରଜ ପର୍ବ ଓ ମାସିକ ଋତୁସ୍ରାବ ବିଷୟରେ କୁତ୍ସିତ ଭାବନା

ବିଷୟ: ରଜ ପର୍ବ ମାସିକ ଋତୁସ୍ରାବ ବିଷୟରେ ଥିବା କୁତ୍ସିତ ଭାବନାକୁ କିପରି ଭାଙ୍ଗେ। Breaking a taboo-Raja festival