ପୃଷ୍ଠଭୂମି -

*************

ଭାରତ ବକ୍ଷରେ ସ୍ୱର୍ଗର ଶ୍ରୀକ୍ଷେତ୍ର,

ସୌନ୍ଦର୍ଯ୍ୟ ଦର୍ଶନେ ଭରିଯାଏ ନେତ୍ର,

ପ୍ରଷ୍ପୁଟିତ ହୁଏ ଧାର୍ମିକ କମଳ,

ପୁଣ୍ୟଭୂମି ମୋର ପଵିତ୍ର ଉତ୍କଳ।

ଦର୍ଶନ ଆଦର୍ଶ ମହାନ ଏହାର,

ବ୍ୟାଖ୍ୟା ବର୍ଣ୍ଣନା ର ଅସୀମ ଭଣ୍ଡାର,

କଳ୍ପନା ଜଳ୍ପନା ଯାର ଚମତ୍କାର,

ଉତ୍କଳୀୟ ଶ୍ରେଷ୍ଠ ସମଗ୍ର ବିଶ୍ୱର।

ଉତ୍କୃଷ୍ଟ କଳାର ଉତ୍କଳ ପ୍ରଦେଶ,

ଝରେ ଏଠି ସଦା ବିରତ୍ୱ ପିୟୁଷ,

ସ୍ବାଭିମାନ ଦେଶ ଏକତା ପ୍ରତୀକ,

ଶାନ୍ତିପ୍ରିୟ ସିଏ କୋମଳ ମସ୍ତିଷ୍କ।

ଧର୍ମ ସଂସ୍କୃତି ରେ ଵିଶ୍ୱ ଶ୍ରେଷ୍ଠ ସିଏ,

ପରମ୍ପରା ଏଠି ପ୍ରମାଣ ଦର୍ଶାଏ,

ଵିଶ୍ୱପତି ଯିଏ ବିଶ୍ୱକୁ ଚଲାଏ,

ଉତ୍କଳ ରେ ରହି ଛାୟା କୁ ମେଲାଏ।

ମଧୁ ଗୋପବନ୍ଧୁ ଫକୀର ମୋହନ,

ଭକ୍ତ କାନ୍ତ କବିବର ଜନ୍ମସ୍ଥାନ,

ସାରଳା ଉପେନ୍ଦ୍ର କୃଷ୍ଣ ବରସୂତ,

ସ୍ୱଭାବ ସୁଭାଷ ଏଠାରେ ଜନ୍ମିତ।

ଇତିହାସ ଯାର ଗୌରବେ ମଣ୍ଡିତ,

ପ୍ରାଣ ଦେଇ ବୀର କରିଛି ଜୀବନ୍ତ,

ଯେଉଁଠାରେ ହୁଏ ବୀରର ପ୍ରକାଶ,

ଗୌରବ ଶ୍ରେଷ୍ଠ ମୋ ଉତ୍କଳ ପ୍ରଦେଶ।

କଳା ସ୍ଥାପତ୍ୟ ରେ ମହାନ ଉତ୍କଳ,

ଜଗନ୍ନାଥ ଧାମ ପୁଣ୍ୟ ନିଳାଚଳ,

ଉଡ୍ରଜାତି ରହୁ ସର୍ବଦା ଅମର,

ପ୍ରତିଷ୍ଠିତ ହେଉ ଦୁନିଆ ଯାକର।

ଉତ୍କୃଷ୍ଟ କଳା ର ଦେଶ ହେଉଛି ଏ ଉତ୍କଳ ପ୍ରଦେଶ। ଜଗନ୍ନାଥ ଧାମ ପୁଣ୍ୟ ନିଳାଚଳ ହେଉଛି ଏ ଉତ୍କଳ ପ୍ରଦେଶ। ସ୍ବର୍ଗ ର ଶ୍ରୀକ୍ଷେତ୍ର ହେଉଛି ଏ ଉତ୍କଳ ପ୍ରଦେଶ। କାନ୍ତ କବି ଲକ୍ଷ୍ମୀକାନ୍ତ ମହାପାତ୍ର କହିଯାଇଛନ୍ତି -

"ଚାରୁ ହାସମୟୀ ଚାରୁ ଭାଷମୟୀ "। ଏ ଉତ୍କଳ ର ହସ ବି ସୁନ୍ଦର ଏ ଉତ୍କଳ ର ଭାଷା ବି ସୁନ୍ଦର । ଶ୍ରେଷ୍ଠ ଏହାର ସଂସ୍କୃତି ,ମହାନ ଏହାର ପରମ୍ପରା ,ଭିନ୍ନ ଏହାର ଭାଇଚାରା , ସ୍ଵତନ୍ତ୍ର ଏହାର ପରିଚୟ। ଏ ପ୍ରଦେଶ କେବଳ ଭାରତ ବର୍ଷରେ ନୁହେଁ ସମଗ୍ର ବିଶ୍ୱରେ ନିଜ ର ମହାନତା ପ୍ରଦର୍ଶନ କରି ଶ୍ରେଷ୍ଠତ୍ବ ର ମୁକୁଟ ମଣ୍ଡନ କରିପାରିଛି।

ଏ ଉତ୍କଳ ପ୍ରଦେଶ ଏକ ପର୍ବପର୍ବାଣିର ପ୍ରଦେଶ । ଏଠି ବାରମାସର ତେର ପର୍ବ ପାଳିତ ହୋଇଥାଏ । ବାସ୍ତବରେ କଣ ଏଠି ତେରଟି ପର୍ବ ପାଳିତ ହୁଏ। ଏହା ଖାଲି ଉକ୍ତି ରେ ପ୍ରକାଶ କରାଯାଏ ,ପ୍ରକୃତରେ ଏ ଉତ୍କଳ ପ୍ରଦେଶ ହେଉଛି ପର୍ବପର୍ବାଣୀ ର ଗନ୍ତାଘର। ମାନବ ଜୀବନ ଦୁଃଖ ମୟ , ଜଞ୍ଜାଳ ମୟ ଓ ବିଷାଦ ଗ୍ରସ୍ତ। ଏ ମଣିଷ ଜାତି ପ୍ରତି ମୂହୁର୍ତ୍ତରେ ସଂଘର୍ଷ ର ଚାଦର ଘୋଡି ହୋଇ ରହିଥାଏ। ଏହି ପର୍ବ ପର୍ବାଣୀ ମନ ରୁ ନିରସତା ଓ ଦୁଃଖ ବା ନୈରାଶ୍ୟତା ଦୂର କରି ମନରେ ଭରିଦେଇଥାଏ ଉତ୍ସାହ ଆହ୍ଲାଦ ।‌ଅବଶ ଶରୀର କୁ ପୁନର୍ବାର ସକ୍ରିୟ କରିଦେଇଥାଏ। ଓଡ଼ିଶାରେ ଅନେକ ପର୍ବ ପାଳନ କରା ଯାଉଥିବା ବେଳେ ତନ୍ମଧ୍ୟରୁ ରଜ ପର୍ବ ର ସ୍ବତନ୍ତ୍ର ପରିଚୟ ରହିଛି।

ପ୍ରତ୍ୟେକ ପର୍ବପର୍ବାଣିର ଏକ ନିଜସ୍ୱ ସ୍ୱତନ୍ତ୍ରତା ରହିଛି ।

ଉତ୍କଳୀୟ ପର୍ବପର୍ବାଣି ସାଧାରଣତଃ ଧର୍ମ ଓ ପୌରାଣିକ ଉପାଖ୍ୟାନର ଭିତ୍ତି ଉପରେ ପ୍ରତିଷ୍ଠିତ । ଓଡ଼ିଶା ମାଟିରେ ଅଗଣିତ ଦେବୀ ଦେବତାଙ୍କର ଉପାସନା ହୋଇଥାଏ । ପ୍ରତ୍ୟେକ ପଲ୍ଲୀଗ୍ରାମରେ ନିଜର ଗ୍ରାମଦେବତା ବା ଗ୍ରାମଦେବତୀ ରହିଥାନ୍ତି। ଆଉ ଏଇ ଗ୍ରାମଦେବତା ବା ଦେବତୀ ମାଟିର ମଣିଷ ପରି ସାଧାସିଧା, ସରଗର ପରୀ କି ଯକ୍ଷ କିନ୍ନରଙ୍କ ପରି ଅଦ୍ଭୁତ ଆକାର ବା ବେଶଭୂଷାଧାରୀ ହୋଇ ନଥାନ୍ତି । ଆଉ ସମସ୍ତଙ୍କର ଥାଏ ଏକ ନିଆରା କିମ୍ବଦନ୍ତୀ, ଏକ ଅଲଗା ଇତିହାସ, ଭିନ୍ନ ଏକ ପରମ୍ପରା, ଏକ ପରବ, ଏକ ମଉଛବ । ପର୍ବପର୍ବାଣି ଗୁଡ଼ିକରେ ଜନଜୀବନର ସଂସ୍କୃତି, ଜାତୀୟତା ବୋଧ ଓ ଧର୍ମଧାରଣା ଆଦି ସଂଶ୍ଳିଷ୍ଠ । ଉତ୍କଳୀୟ ପର୍ବପର୍ବାଣି ମହାଭାରତୀୟ ସ୍ରୋତରୁ ଭିନ୍ନ ନୁହେଁ । ବିଶେଷତଃ ପର୍ବପର୍ବାଣି, ଓଷାବ୍ରତ ଓ ଯାନିଯାତ୍ରା ଗୁଡ଼ିକ ତିଥି, ବାର, ନକ୍ଷତ୍ର, କୃଷିକର୍ମ, ଦେବଦେବୀ, ଶାସ୍ତ୍ରୀୟ କାହାଣୀ, ଲୋକକଥା, ଆନନ୍ଦମହୋତ୍ସବ ପାଇଁ ପାଳିତ ହୋଇଥାଏ । ଉତ୍କଳୀୟ ପର୍ବପର୍ବାଣି ଗୁଡ଼ିକୁ ଚାରୋଟି ମୁଖ୍ୟ ଭାଗରେ ବିଭକ୍ତ କରାଯାଇପରେ ଯଥା । ଶାସ୍ତ୍ରୀୟ, ଲୌକିକ, ଆଞ୍ଚଳିକ ଓ କୃଷି ଭିତ୍ତିକ ।

ରାଜ୍ୟର ପ୍ରମୁଖ ଗଣପର୍ବ - ରଜପର୍ବ

**************************************

ରଜ ଓଡ଼ିଶାର ଏକ ପ୍ରମୁଖ ପାରମ୍ପାରିକ ପର୍ବ । ଏହା ତିନିଦିନ ଧରି ପାଳନ କରାଯାଇଥାଏ । ରଜ ସଂକ୍ରାନ୍ତିର ପୂର୍ବଦିନ କୁ ପହିଲି ରଜ, ଦ୍ୱିତୀୟ ଦିବସ ହେଉଛି ରଜ ସଂକ୍ରାନ୍ତି, ତୃତୀୟ ଦିବସ କୁ ଭୂମିଦାହ ବା ଭୂମି ଦହନ ଭାବରେ ପାଳନ କରାଯାଏ।ରଜ ର ପର ଦିନ ବା ଚତୁର୍ଥ ତଥା ଅନ୍ତିମ ଦିବସ ରେ ବସୁମତୀ ସ୍ନାନ କରାଯାଇଥାଏ ।

ଏହା ଏକ କୃଷି ଭିତ୍ତିକ ପର୍ବ । ରଜ ପର୍ବ ର ଆରମ୍ଭ କୃଷି କାର୍ଯ୍ୟ ର ଆରମ୍ଭକୁ ସୂଚିତ କରିଥାଏ । ରଜ ଶବ୍ଦର ଆକ୍ଷରିକ ଅର୍ଥ ରଜବତୀ ହେବା।

ଅତିବଡ଼ି ଜଗନ୍ନାଥ ଦାସ ଙ୍କ ଭାଗବତ ର ଉକ୍ତି -

"ପ୍ରାଣୀ ଜୀବନ ଜଳରାଶି ,

କରୁଣା ଚିତ୍ତରେ ବରଷି ।

ପୃଥିବୀ ରବି ତେଜ ଗ୍ରାସେ ,

ତାପିତ ଥିଲା ଅଷ୍ଟ ମାସେ ।

ଜଳ ପାଇଲା ତୋଷଚିତ୍ତେ ,

ତପସ୍ବୀ ଜନଙ୍କର ମତେ।

ତପସ୍ୟା ଫଳ ଯେହ୍ନେ ପାଇ,

ଭୁଞ୍ଜନ୍ତି ଅତି ସୁଖୀ ହୋଇ।"

ପୃଥିବୀ ଆଠ ମାସ ଧରି ଉତ୍ତପ୍ତ ରହିଥିଲା । ଧରଣୀ ମାଆର ଦୁଃଖ ଦେଖି ବର୍ଷା ରାଣୀ ଧରଣୀ ବକ୍ଷରେ ଶୀତଳତା ଭରି ଦେଇଗଲା। ବର୍ଷା କୁ ଦେଖି କୃଷକ ମନ ରେ ସୃଷ୍ଟି ହୋଇଯାଏ କେତେ ମିଠା ମିଠା ସ୍ବପ୍ନ। କୃଷି କାର୍ଯ୍ୟ ଆରମ୍ଭକୁ ,କୃଷକ ର ଆହ୍ଲାଦମୟ ସ୍ବପ୍ନ ର ଆବେଗ କୁ ବହନ କରିଥାଏ ଏହି ରଜପର୍ବ।

ଏହି ଦିନରେ ଚାଷୀମାନେ ଧରଣୀ ମାଆକୁ କୃଷି ଉପକରଣ ଗୁଡିକୁ ପୂଜା କରିବା ସହ ଚାଷ କାମରୁ ତିନି ଦିନ ପାଇଁ ବିରତି ନେଇଥାନ୍ତି । ରଜରେ ପୋଡ଼ ପିଠା ଓ ପାନ ଖିଆ ସହିତ ଝିଅମାନଙ୍କ ରଜ ଦୋଳି ଓ ପୁଚି ଖେଳ ସହ ପୁଅମାନଙ୍କ ଲୁଡୁ, ତାସ, ବାଗୁଡ଼ି ଆଦି ଖେଳି ଏହି ଦିବସଟି ପାଳନ କରାଯାଇଥାଏ ।

ବିଧି ବିଧାନ -‌

*************

ଖାଲିପାଦରେ ଚାଲିବା ମନା -

_______________________

ରଜପର୍ବରେ ବସୁମତୀ ଙ୍କୁ ତିନିଦିନ ବିଶ୍ରାମ ଦିଆ ଯାଇଥାଏ।ରଜ ର ପରିସମାପ୍ତି ରେ ଭୂମିକୁ ଖନନ କରି କୃଷି କାର୍ଯ୍ୟ ଆରମ୍ଭ କରାଯାଏ ।ତେଣୁ ଏହି ରଜରେ ଭୂମି ଉପରେ ଖାଲିପାଦରେ ଚାଲିବାକୁ ମନା କରାଯାଇଥାଏ । ବିଶେଷ କରି କୁମାରୀମାନେ ଖାଲି ପାଦରେ ଚାଲନ୍ତି ନାହିଁଁ । ଆବଶ୍ୟକ ସ୍ଥଳେ ଚପଲ ପିନ୍ଧି ଯାତାୟାତ କରିଥାନ୍ତି୍। ଏବଂ ଅଧିକାଂଶ ସମୟ ଦୋଳି ଝୁଲିବାରେ ବ୍ୟସ୍ତ ରୁହନ୍ତି।

ବସୁମତୀ ସ୍ନାନ-

_____________

ଏହା ରଜ ପର୍ବର ଅନ୍ତିମ ଦିବସ ରେ ପାଳନ କରାଯାଏ ।ଏହି ଦିବସ ବସୁଧାମାତାଙ୍କ ର ଶୁଦ୍ଧ ସ୍ନାନ କରାଯାଇଥିଏ । ବଡ଼ି ସକାଳୁ ଶିଳପୁଆରେ ହଳଦୀ କନା ଗୁଡ଼ାଇ ସିନ୍ଦୂର, କଜଳ ଦେଇ ପିଢ଼ା ଉପରେ ସ୍ଥାପନା କରି କଳସ ଆମ୍ବଡ଼ାଳ ରଖି କ୍ଷୀର ଦେଇ ସ୍ନାନ କରାଯାଏ । ଏହି ଦିନ ଠାରୁ ଲୋକଙ୍କର କର୍ମମୟ ଜୀବନ ଆରମ୍ଭ ହୋଇଥାଏ।

ବିଶେଷ ଖାଦ୍ୟ -

*****************

ରଜପାନ-

_________

ରଜ ପର୍ବର ବିଶେଷତା କୁ ବୃଦ୍ଧି କରାଇଥାଏ ଏହାର ରଜ ପାନ। ରଜରେ ପାନଖିଆ ଏକ ପୁରୁଣା ଓଡ଼ିଆ ପରମ୍ପରା । ପ୍ରୀତିର ବନ୍ଧନ ହେଉଛି ପାନ । ଓଡ଼ିଆଙ୍କ ଠାକୁର ଜଗତର ନା ଜଗନ୍ନାଥ ପ୍ରତିଦିନ ଭୋଜନ ପରେ ପାନର ବ୍ୟବହାର କରିଥାନ୍ତି । ପାନ ବନ୍ଧୁତାର ଡେ଼ାରିକୁ ସୁଦୃଢ କରିଥାଏ ତେଣୁ ରଜରେ ପାନ ଖାଇ ସଂପର୍କ ର ବନ୍ଧନ କୁ ଆହୁରି ମଜଭୂତ କରେଇଥାନ୍ତି। ଏହି ଦିନ ଝିଅମାନେ ସମସ୍ତଙ୍କୁ ପାନ ଦବାନବା କରିଥାନ୍ତି । ରଜପାନର ଚମକ ଓ ମହକ ସାରାବର୍ଷର ପାନକୁ ବଳିଯାଏ, ସାଧାରଣ ଦିବସ ଠାରୁ ରଜ ପାନର ସ୍ବାଦ ସ୍ବତନ୍ତ୍ର ଓ ନିଆରା ହୋଇଥାଏ। ରଜପାନରେ ଗୁଆ, ଅଳେଇଚ, ଗୁଜୁରାତି, ଭଜା ଧଣିଆ, ଚାଉଳ ଓ ନଡିଆ ଖଣ୍ଡ, ଚେରି, ଲବଙ୍ଗ, କବାବଚିନି, ଚୁଆ, ପାନ ମହୁରି, ସୁବାସିତ ଜାଫ୍ରାନ କେଶର, ଖଇର ପରି ୧୦ରୁ ୧୨ ପ୍ରକାର ମସଲା ବ୍ୟବହୃତ ହୁଏ । ଏହାକୁ ବିଭିନ୍ନ ଢଙ୍ଗରେ ତ୍ରିଭଙ୍ଗି, ଚଉଭଙ୍ଗି ଆକୃତି ଦେଇ ଉପରେ ଲବଙ୍ଗ ଖୋସି ଅତି ସୁନ୍ଦର ଭାବେ ଥାଳିରେ ସଜାଇ ଦିଆଯାଏ । ଓଡିଆ ଭାଷାରେ ଢ଼ଗରେ ମଧ୍ୟ ପାନର ବିଶ୍ଲେଷଣ କରାଯାଇଅଛି-

‘ପାନଖିଆ ରସିକ ପାଟି,

ଖୋଜି ବୁଲୁଥିଲା ରାଜାଙ୍କ ହାତୀ,

ଢାଳି ଦେଇଗଲା ଶିରରେ, ରାଜା ହୋଇଗଲା ରଜରେ’ ।

ରଜ ରେ ଧରଣୀ ମାତା ଙ୍କୁ ବିଶ୍ରାମ ଦିଆ ଯାଉଥିବାରୁ ସେହି ଦିନ ଚୁଲିର ବ୍ୟବହାର କରାଯାଏ ନାହିଁ।ତେଣୁ ରଜ ପୂର୍ବଦିନ ପହିଲି ରଜରେ ବହୁ ରକମର ପିଠାପଣା, ବିଶେଷ କରି ପୋଡ଼ ପିଠା ତିଆରି କରାଯାଇଥାଏ,। ଏବଂ ତାକୁ ତା ପରଦିନ ରଜ ସଂକ୍ରାନ୍ତିରେ ଖିଆ ଯାଇଥାଏ ।ରଜରେ ସାଧାରଣ ଦିବସ ରେ ଖାଉଥିବା ଖାଦ୍ୟ ନ ଖାଇ ଫଳମୂଳ ଓ ବିଭିନ୍ନ ପ୍ରକାର ପିଠାପଣା କୁ ଖାଇ ଉଲ୍ଲାସ ମନରେ ଦିବସ ଟିକୁ ଉପଭୋଗ କରାଯାଇଥାଏ।

ଚକୁଳି ପିଠା -

___________

ଚକୁଳି ପିଠା ଓଡ଼ିଶାର ଲୋକାଦୃତ ଖାଦ୍ୟ ଯାହା ଚାଉଳ ଚୂନା ଓ ବିରିରୁ ତିଆରି ବହଳିଆ ମଣ୍ଡକୁ ତାବାରେ ଭାଜି ତିଆରି କରାଯାଏ ।ଏହା ର ଚାହିଦା ବିଶେଷ କରି ରଜ ପର୍ବରେ ସର୍ବାଧିକ ରହିଥାଏ। ଅରୁଆ ଚାଉଳ ଚୂନା, ବିରି ବଟା, ଲୁଣ ଆଦିକୁ ମିଶାଇ କିଛିଘଣ୍ଟା ରଖାଯାଏ । ଏହା ଭଲଭାବେ ଫୁଲିଗଲେ ତାହାକୁ ତାବାରେ ସୋରିଷ ତେଲ ବା ଘିଅରେ ଭାଜି ତିଆରି କରାଯାଏ ।ଏହା ଭିନ୍ନ ଭିନ୍ନ ପ୍ରକାରରେ ପ୍ରସ୍ତୁତ କରାଯାଏ ଯେପରି - ସରୁ ଚକୁଳି ,ବୁଢା ଚକୁଳି ,ଅଟା ଚକୁଳି ।

ପୋଡ ପିଠା-

_____________

ପୋଡ ପିଠା ହେଉଛି ଓଡିଆ ଙ୍କ ଅନ୍ୟ ଏକ ପ୍ରିୟ ଲୋକ ଆଦୃତ ପିଠା , ଯାହାକି ରଜ ପର୍ବରେ ପ୍ରସ୍ତୁତ କରାଯାଇଥାଏ।

ଏହା ଚାଉଳ ଚୁନା ଓ ଗୁଡ଼ ବା ଚିନି ମିଶ୍ରଣ ରେ ତିଆରି ପିଠଉକୁ ଏକ ବଡ଼ କଡ଼ାଇରେ ଚାରିପଟୁ ପୋଡ଼ି ତିଆରିକରାଯାଏ । ଏହା ପ୍ରତ୍ୟେକ ଓଡ଼ିଆ ଘରେ ରଜ ଓ ନାନାଦି ପର୍ବପର୍ବାଣିରେ ତିଆରି କରାଯାଇଥାଏ । ଓଡିଆ ଙ୍କ ବଡ ଠାକୁର ଶ୍ରୀଜଗନ୍ନାଥଙ୍କ ର ପ୍ରସ୍ତୁତ ହେଉଥିବା ଛପନ ଭୋଗ ମଧ୍ୟରୁ ଏହା ମଧ୍ୟ ଅନ୍ୟତମ। ବାହୁଡ଼ା ଦିନ ରଥାରୁଢ଼ ହୋଇ ଠାକୁରମାନେ ଶ୍ରୀମନ୍ଦିରକୁ ବାହୁଡ଼ିବା ସମୟରେ ଶ୍ରୀବଳଭଦ୍ର, ଦେବୀ ସୁଭଦ୍ରା ଓ ଶ୍ରୀଳଗନ୍ନାଥଙ୍କ ରଥରେ ପୋଡ଼ପିଠା ସର୍ବ ପ୍ରଥମେ ଭୋଗ ଲଗା ଯାଇଥାଏ। ଏହା ପରେ ରଥ ଗଡା ଆରମ୍ଭ ହୋଇଥାଏ।

ବିଭିନ୍ନ ଖେଳ-

***************

କବାଡି -

_______

କବାଡି ଭାରତର ବିଭିନ୍ନ ଅଞ୍ଚଳରେ ଖେଳା ଯାଉଥିବା ଏକ ଲୋକପ୍ରିୟ ଖେଳ । ମାତ୍ର ଓଡିଶା ରେ ବିଶେଷ କରି ରଜ ପର୍ବରେ ଏହାର ଚାହିଦା ସର୍ବାଧିକ। ଗାଁ ମାନଙ୍କରେ ପୁଅ ଓ ଝିଅ ମାନେ ମିଳିତ ହୋଇ କବାଡି ଖେଳ ଖେଳିଥାନ୍ତି। ଦୋଳି ଝୁଲା , ପିଠା ଖିଆ ସହ କବାଡି ଖେଳ ରଜର ସ୍ବତନ୍ତ୍ରତା କୁ ଆହୁରି ନିଆରା କରିଦେଇଥାଏ।

ଲୁଡୁ ଏବଂ ତାସ୍-

______________

ରଜ ପର୍ବ ରେ ପୁଅ ଝିଅ ନର ନାରୀ ସମସ୍ତେ ଏହି ଲୁଡୁ ଖେଳ ଓ ତାସ୍ ଖେଳ‌ରେ ନିଜକୁ ବିଭୋର କରି ଦେଇଥାନ୍ତି। ନିଜ ନିଜ କାର୍ଯ୍ୟରୁ ବିରତି ନେଇ ଲୋକମାନେ ଖୁସି ଉଲ୍ଲାସ ରେ ଲୁଡୁ ଏବଂ ତାସ୍ ଖେଳ ମାଧ୍ୟମରେ ସମୟ ଅତିବାହିତ କରିଥାନ୍ତି୍। ଏହି ପର୍ବରେ ଖେଳା ଯାଉଥିବା ଖେଳ‌ ହଜି ଯାଇଥିବା ଭାଇଚାରା କୁ ପୁନଃ ଖୋଜି ଆଣିଦେଇଥାଏ। ବନ୍ଧୁତ୍ବ ର ଡୋରି ଆହୁରି ଶକ୍ତ ହୋଇଯାଏ।

ଶେଷକଥା-

********

ଖୁସି ଉଲ୍ଲାସ ର ଅନ୍ତିମରେ ଆମେ ପୁନର୍ବାର ଆମ କର୍ମମୟ ଜୀବନ କୁ ଫେରିଯିବା। ଏ ଉତ୍କଳୀୟ ସଂସ୍କୃତି ଏ ମହାନ‌ ଭାରତୀୟ ସଂସ୍କୃତି ପାଇଁ ଏ ପ୍ରଦେଶ ଆଜି ବିଶ୍ବ ଦରବାରେ ରେ ନିଜର ମହାନତା କୁ ଦର୍ଶାଇ ପାରୁଛି।ଏ ସଂସ୍କୃତି କୁ ବଞ୍ଚାଇ ରଖିବା ନିଜ କୁ ଗୌରବାନ୍ବିତ ମନେ କରି ଆନନ୍ଦ ଉଲ୍ଲାସ ରେ ନିଜକୁ ବିଭୋର‌ କରିନେବା।

ପ୍ରସ୍ତୁତି - ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ରଜର ଆସର -ରଜପାନ‌,ପୋଡପିଠା ଏବଂ ଖେଳ || Raja Special Poda pitha ,Paan and fun play

ରାଧା ଡାକମାରେ ମିତଣୀ ଚାଲ ଯିବା, ହୋଇବା ସଜ,ପୋଡ ପିଠା ବାସ ଆଣିଲା ,ଆମ ଗାଁ ରେ ରଜ‌ ।।