.

*ଆସନ୍ତୁ ପଢିବା ଆଜିର ପୌରାଣିକ କାହାଣୀ*

*ଅଭିଶପ୍ତ ଦ୍ୱାରପାଳ, ଦ୍ଵିତୀୟ ଅଧ୍ୟାୟ*

*!! ଭାଗ - ୩୦ !!*

*ଡା.କୃପାସିନ୍ଧୁ ମିଶ୍ର*

✤●○●○●○✤‼️✤○●○●○●✤

*ସୌଜନ୍ୟ: ଆଧ୍ୟାତ୍ମ ଜଗତ ହ୍ବାଟ୍ସଆପ୍ ଗୃପ୍*

✤●○●○●○✤♾️✤○●○●○●✤

*══━━━━✥◈❤️◈✥━━━━══*

ମିଥିଳା ନରେଶ ରାଜର୍ଷି ଜନକ ଅତ୍ୟନ୍ତ ଧାର୍ମିକ ଓ ପ୍ରଜା ବତ୍ସଳ ଥିଲେ Ι ରାଜ୍ୟ ପରିଚାଳନାରେ ସେ ଯେମିତି ସଶକ୍ତ କ୍ଷତ୍ରୀୟ ଥିଲେ, ଯାଗ, ଯଜ୍ଞ, ଦାନ ଧର୍ମ ଆଦି କରିବାରେ ସେ ସେହିପରି କୌଣସି ଋଷିଙ୍କ ଅପେକ୍ଷା ଉଣା ନ ଥିଲେ Ι ତାଙ୍କ ରାଜତ୍ଵରେ ରାଜ୍ୟର ଲୋକେ ସୁଖ ଶାନ୍ତିରେ କାଳ କାଟୁଥାଆନ୍ତି Ι ସମସ୍ତେ ରାଜାଙ୍କର ଭୁରି ଭୁରି ପ୍ରଶଂସା କରୁଥାନ୍ତି Ι କିନ୍ତୁ ନିଜେ ଜନକ ଦୁଃଖର ଅଥଳ ସାଗରରେ ଭାସିଲା ଭଳି ଅନୁଭବ କରୁଥାନ୍ତି Ι ବୟସ ଅତିକ୍ରାନ୍ତ ହୋଇଯାଉଛି, ଅଥଚ କୋଳରେ ସନ୍ତାନ ସନ୍ତତି କିଛି ନାହିଁ Ι ରାଣୀ ସୁନୟନା ଦିବାରାତ୍ର ଶୋକାକୁଳ ଅବସ୍ଥାରେ ସମୟ ଅତିବାହିତ କରୁଛନ୍ତି Ι କିଏ କାହାକୁ ସାନ୍ତ୍ୱନା ଦେଵ !

ସେ ବର୍ଷ କୃଷିକାର୍ଯ୍ୟ ଅନୁକୂଳ କରିବାର ଦିବସ ଉପଗତ ହେଲା Ι. ବିଧି ଅନୁସାରେ ଯଜ୍ଞ ଅନୁଷ୍ଠାନ ପରେ ପ୍ରଥମେ ରାଜା ଭୂମି କର୍ଷଣ କରନ୍ତି Ι ରାଜାଙ୍କ ନିମନ୍ତ୍ରଣ ପାଇ ଋଷିମାନେ ଉପସ୍ଥିତ ହେଲେ Ι ଯଜ୍ଞ ଅନୁଷ୍ଠାନ ପରେ ବ୍ରାହ୍ମଣ ଓ ଋଷିମାନଙ୍କ ବେଦ ପାଠ ଓ ପ୍ରଜାମାନଙ୍କ ଜୟଧ୍ୱନି ମଧ୍ୟରେ ଜନକ ଭୂମିକର୍ଷଣ ପାଇଁ ଲଙ୍ଗଳ ଧରିଲେ Ι ଲଙ୍ଗଳର ଫାଳ ଭୂମି ସ୍ପର୍ଶ କଲା ମାତ୍ରେ ଧରଣୀରେ ଏକ ଲମ୍ବା ଫାଟ ସୃଷ୍ଟି ହେଲା Ι ସେହି ଫାଟ ମଧ୍ୟରେ ଗୋଟିଏ ମଞ୍ଜୁଷା ଦୃଶ୍ୟମାନ ହେଲା Ι ହଳ ବନ୍ଦ କରି ଦେଇ ରାଜା ଓ ଋଷିଗଣ ହାତରେ ମାଟି ଆଡେଇ ସେହି ବହୁ ରନ୍ଧ୍ର ବିଶିଷ୍ଟ ମଞ୍ଜୁଷାଟିକୁ ଉପରକୁ ଆଣିଲେ Ι ସତେ ଯେମିତି ମା ଧରିତ୍ରୀ ଜନକଙ୍କ ହାତକୁ ବଢ଼ାଇ ଦେଲେ ମଞ୍ଜୁଷା ମଧ୍ୟରେ ତାଙ୍କର ବହୁବର୍ଷ ତପସ୍ୟାର ଫଳ Ι ତାର ଘୋଡ଼ଣୀ ଖୋଲି ସମସ୍ତେ ଆଶ୍ଚର୍ଯ୍ୟ ହୋଇଗଲେ Ι ପ୍ରଥମେ କିଛି ସମୟ ଯାଏଁ ସେମାନେ ତନ୍ମଧ୍ୟରୁ ନିର୍ଗତ ହେଉଥିବା ଉଜ୍ଜ୍ୱଳ ଜ୍ୟୋତି ଯୋଗୁଁ ଚକ୍ଷୁ ମୁଦ୍ରିତ କରିବାକୁ ବାଧ୍ୟ ହେଲେ Ι କିଛି ସମୟ ପରେ ଏକ ଅପୂର୍ବ ରୂପବତୀ କନ୍ୟା ରୂପରେ ତା ମଧ୍ୟରୁ ଆତ୍ମପ୍ରକାଶ କଲେ ‘ଲକ୍ଷ୍ମୀ, ପଦ୍ମାଳୟା, ପଦ୍ମା, କମଳା, ଶ୍ରୀହରିପ୍ରିୟା’ Ι ଜନକଙ୍କ ସ୍ପର୍ଶ ପାଇବା ମାତ୍ରେ ସେ ଶିଶୁଟି କୁଆଁ କୁଆଁ ଶବ୍ଦରେ କ୍ରନ୍ଦନ କରିବା ଆରମ୍ଭ କଲା Ι ଆନନ୍ଦାତିଶଯ୍ୟରେ ଜନକଙ୍କ ଚକ୍ଷୁ ଲୋତକାପ୍ଳୁତ ହୋଇଗଲା Ι ଆତ୍ମବିସ୍ମୃତ ହୋଇ ସେ କେବଳ ଋଷିମାନଙ୍କ ମୁଖକୁ ଚାହିଁରହିଲେ Ι ସମସ୍ତ ଋଷି ସେହିଠାରେ ହିଁ କନ୍ୟାର ନାମକରଣ ଆରମ୍ଭ କରିଦେଲେ Ι କବି ସମ୍ରାଟଙ୍କ ଭାଷାରେ,

“ବହୁ ଋଷି ତାଙ୍କ ସଙ୍ଗତେ ମେଳ ହୋଇ ଯେ ଥିଲେ ।

ବହୁ ସୀତାନାମ ଏ ସୀତା ଯୋଗେ ଜାତ ବୋଇଲେ ।୧୬ ।

ବିଧି ସନମତ ପୃଥିବୀଭବା ପାର୍ଥିବୀ ଏହି ।

ବିଧିରେ ମିଥିଳା ଉତ୍ସବକାରୀ ମୈଥିଳୀ କହି ।୧୭ ।

ବିଦେହଜାୟା କୋଟିଏକ ହେଲେ ସମ କି ଆଉ?

ବିଦେହଦେଶରେ ଉଦ୍ଭବି ବଇଦେହୀ ବୋଲାଉ ।୧୮ ।

ବିଦୁଷ ଜନକ ପାଳନେ ବୋଲାଇବ ଜାନକୀ ।

ବିଦୁଷଣ ଶୋଭା ଜେମାର ଆଉ ସମ ଆନ କି ।

ବାସରେ ଉତ୍ପଳ କି ଲକ୍ଷ ପାରିଜାତକ ତୁଚ୍ଛ ।

ବାସରେ ଚହଟେ ଯୋଜନଗନ୍ଧା ନାମହିଁ ସ୍ଵଚ୍ଛ ।୨୦ ।

ଜଣେ ଋଷି ମତ ଦେଲେ,""ଲଙ୍ଗଳ ଫାଳକୁ ସୀତା କହନ୍ତି Ι ତେଣୁ ୟାର ନାମ ସୀତା ହେବ". ଅନ୍ୟ ଜଣେ ମୁନି କହିଲେ," ପୃଥିବୀରୁ ଜାତ, ତେଣୁ ପାର୍ଥିବୀ ହେଉ “Ι ଏହିଭଳି ଭାବରେ ମିଥିଳାର ରାଜନନ୍ଦିନୀ ହୋଇଥିବାରୁ 'ମୈଥିଳୀ, ଜନକ ଦୁହିତା ହେତୁ ଜାନକୀ, ବିଦେହରେ ଉଦ୍ଭଵା ହେତୁ ବୈଦେହୀ, ଏବଂ ଶରୀରରୁ ଉତ୍ପନ୍ନ ପଦ୍ମର ସୁଗନ୍ଧ ଯୋଜନ ବ୍ୟାପି ହୋଇଥିବାରୁ ତାର ନାମ ଯୋଜନଗନ୍ଧା ହେବ ବୋଲି ବିଭିନ୍ନ ନାମକରଣ କରି ଏବଂଆଶୀର୍ବାଦ ଦେଇ ମୁନିମାନେ ବିଦାୟ ନେଲେ Ι ଜନକ କନ୍ୟାକୁ ନେଇ ରାଣୀଙ୍କ କୋଳରେ ଦେଲେ Ι ରାଣୀ ସୁନୟନାଙ୍କ ହାତରେ ସ୍ୱର୍ଗର ଚନ୍ଦ୍ର ଖସି ପଡିଲା କି ଆଉ ! ଆଶ୍ଚର୍ଯ୍ୟର କଥା, ସୀତାଙ୍କୁ କୋଳକୁ ନେବାକ୍ଷଣି ତାଙ୍କର କ୍ଷୀର ସ୍ରବିଲା Ι ଈଶ୍ୱରଙ୍କ କୃପାରୁ ଏତେଦିନେ ତାଙ୍କର ଅଭୀଷ୍ଟ ପୂରଣ ହେଲା ବୋଲି ସେ ପ୍ରଭୁଙ୍କୁ ବାରମ୍ବାର ପ୍ରଣତି ଜଣାଇଲେ Ι ରାଜ୍ୟରେ ଶିବାଳୟମାନଙ୍କରେ ରୁଦ୍ରାଭିଷେକ କରାଗଲା Ι ସମସ୍ତ ଦେଵ ଦେବୀଙ୍କ ମନ୍ଦିରରେ ଶିଶୁ କନ୍ୟାର ମଙ୍ଗଳ କାମନା କରି ବିଶେଷ ପୂଜା ଅନୁଷ୍ଠାନମାନ କରାଗଲା Ι ସୀତାଙ୍କ ଜନ୍ମ ପରେ ବିଦେହ ରାଜ୍ୟରେ ପ୍ରାଚୁର୍ଯ୍ୟର ସ୍ରୋତ ଛୁଟିଲା Ι ସ୍ୱୟଂ ମହାଲକ୍ଷ୍ମୀ ଯେଉଁ ରାଜ୍ୟରେ ବିରାଜିତା, ସେ ରାଜ୍ୟର ପ୍ରଜାମାନେ ଯେ କିପରି ସୁଖୀ ଓ ସମୃଦ୍ଧିଶାଳୀ ହୋଇଥିବେ, ତାହା ବର୍ଣ୍ଣନା କରିବା ନିଷ୍ପ୍ରୟୋଜନ Ι ନିଃସନ୍ତାନ ପ୍ରଜାମାନେ ସନ୍ତାନ ସନ୍ତତି ଲାଭକଲେ Ι ରାଜା ଜନକ ମଧ୍ୟ ଆହୁରି ଗୋଟିଏ କନ୍ୟା ସନ୍ତାନର ଜନକ ହେବାର ସୌଭାଗ୍ୟ ପ୍ରାପ୍ତ ହେଲେ Ι ସେହି କନ୍ୟାର ନାମ ଦିଆଗଲା ଉର୍ମିଳା Ι ତାଙ୍କର ଅନୁଜ କୁଶଧ୍ୱଜଙ୍କର ମଧ୍ୟ ଦୁଇଟି କନ୍ୟା ଜନ୍ମ ହେଲେ 'ମାଣ୍ଡବୀ ଓ ଶ୍ରୁତକୀର୍ତ୍ତି’.

[କ୍ରମଶଃ]

✿❁❣️༒ *ଜୟ ଶ୍ରୀ ରାମ*༒ ❣️❁✿

*=≠≠=====ଆଜି ପାଇଁ ସମାପ୍ତ==≠====*

🏵️🏵️🙏 *ଶୁଭ ରାତ୍ରି* 🙏🏵️🏵️

ରାମାୟଣ ରେ ମାତା ସୀତା ଙ୍କ ଜନ୍ମ

ରାମାୟଣ ରେ ମାତା ସୀତା ଙ୍କ ଜନ୍ମ