ସକାଳର ଜଣାଣ

ବାହୁଡ଼ା ରେ ପ୍ରଭୁ

,,,,,,,,,,,,,,,,,,,,,,,,,,,,,,,,,,,,,

ବାହୁଡ଼ାରେ ପ୍ରଭୁ ବାହୁଡ଼ି ଆସନ୍ତି

ଶ୍ରୀମନ୍ଦିର ଶିରି ହୀନ

ପଣ୍ଡା ପଢିଆରି ଭକତ ଗହଳ

ନ ଶୁଭଇ ଘନ ଘନ।

ଆନନ୍ଦ ବଜାର ଜନଶୂନ୍ୟ ହୁଏ

ରତ୍ନ ସିଂହାସନ ଖାଲି

ମାଉସୀ ମାଆର ସେନେହ ଶରଧା

ନ ପାରୁଛି ଜଗା ଭୁଲି।

ହେରା ପଞ୍ଚମୀରେ ଲକ୍ଷ୍ମୀ ସାଆନ୍ତାଣି

ରାଗ ତମ ତମ ହୋଇ

ନନ୍ଦିଘୋଷ ରଥ କାଠ ଭାଙ୍ଗି ଛନ୍ତି

ପ୍ରଭୁଙ୍କୁ ସୂଚନା ଦେଇ।

ବାହୁଡ଼ା ଯାତ୍ରାରେ ବଡ଼ଦେଉଳକୁ

ବାହୁଡିବେ ଶ୍ରୀବିଗ୍ରହ

ରଥ ରହିଅଛି ଦକ୍ଷିଣ ମୋଡରେ

କାହାକୁ ବା ଆଉ ଭୟ।

ବଡ ଏକାଦଶୀ ସୁନାବେଶ ପୁଣି

ଅଧର ପଣାର ପରେ

ଗୋଟି ପହଣ୍ଡିରେ ନିଳାଦ୍ରୀ ବିଜୟ

କରିବେ ସବୁ ଠାକୁରେ।

ହାତ ଠାରି ଡାକେ ନୀଳଚକ୍ର ନେତ

ପଛରେ ଶରଧା ବାଲି

ମହୋଦଧି ଜଳ ଉଛୁଳି ପଡୁଛି

ନଅ ଦିନ ଗଲା ଚାଲି।

ଚଳନ୍ତି ଠାକୁର ସ୍ଵୟଂ ଜଗନ୍ନାଥ

ହୃଦୟ ରଥରେ ବସି

ଭରସା ଦିଅନ୍ତି ଭୟ କର ନାହିଁ

ରହିଛନ୍ତି ଦିବା ନିଶି।

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

ଅବସର ପ୍ରାପ୍ତ ପ୍ରାଧ୍ୟାପକ ବିଜୟ କୁମାର ଜେନା