ସରଳ ଭାଷାରେ କହିଲେ, ୧୮ ବର୍ଷରୁ କମ୍ ବୟସର ପିଲାମାନେ ଯେଉଁ ଅପରାଧମୂଳକ କାର୍ଯ୍ୟ କରନ୍ତି, ତାହାକୁ ବାଳ ଅପରାଧ କୁହାଯାଏ। ଏଥିରେ ଛୋଟ ଛୋଟ ଅପରାଧ ଯେପରିକି ଚୋରି, ଝଗଡା, ମାରାମାରି ଆଦିରୁ ଆରମ୍ଭ କରି ବଡ଼ ଅପରାଧ ଯେପରିକି ଡକାୟତି, ଅପରାଧୀ ପର୍ଯ୍ୟନ୍ତ ଅନ୍ତର୍ଭୁକ୍ତ ହୋଇପାରେ। ଆଜିକାଲି ଖବର କାଗଜ ଖୋଲିଲେ ବା ଟିଭି ଚାଲୁ କରିଲେ, ପିଲାଙ୍କ ଦ୍ୱାରା କରାଯାଇଥିବା ଅପରାଧର ଖବର ଆମକୁ ଦେଖିବାକୁ ମିଳେ। ଏହା ନିଶ୍ଚିତ ଭାବରେ ଏକ ଭୟଭୀତିକର ପରିସ୍ଥିତି।

ପିଲାମାନେ ଅପରାଧୀ ହୋଇଯାଉଛନ୍ତି ଏହାର କେତେକ ମୁଖ୍ୟ କାରଣ ରହିଛି:

୧. ପାରିବାରିକ ପରିବେଶ: ପିଲାଙ୍କ ଜୀବନରେ ପରିବାର ହେଉଛି ପ୍ରଥମ ଶିକ୍ଷାନୁଷ୍ଠାନ। ଯେଉଁ ପରିବାରରେ ମାତା ପିତାଙ୍କ ମଧ୍ୟରେ ଅସମଜସ୍ୟ, କଳହ, ବା ଛଡ଼ାଛଡ଼ି ରହେ, ସେହି ପରିବାରର ପିଲାମାନେ ମାନସିକ ଭାବରେ ଆଘାତ ପାଆନ୍ତି। ମାତାପିତା ଯଦି ପିଲାଙ୍କୁ ସମୟ ଦେଇପାରନ୍ତି ନାହିଁ, ସେମାନଙ୍କ ଭାବନାକୁ ବୁଝିପାରନ୍ତି ନାହିଁ, ତାହାହେଲେ ପିଲାମାନେ ଭୁଲ ପଥ ଅପନେବାର ସମ୍ଭାବନା ବଢିଯାଏ।

୨. ମୋବାଇଲ ଫୋନ ଓ ଇଣ୍ଟରନେଟର କୁପ୍ରଭାବ: ଆଜିକାଲି ପିଲାମାନେ ମୋବାଇଲ ଫୋନ ଓ ଇଣ୍ଟରନେଟରେ ବହୁତ ସମୟ ବିତାନ୍ତି। ଇଣ୍ଟରନେଟରେ ଅନେକ ଭଲ ଜିନିଷ ଥିଲେ ମଧ୍ୟ, ଏଠାରେ ହିଂସା, ଅପରାଧ, ଓ ଅଶ୍ଳୀଳ ଭିଡିଓ ମଧ୍ୟ ବହୁତ ଅଛି। ଏସବୁ ଦେଖି ପିଲାମାନଙ୍କ ମନ ଉପରେ ଖାରାପ ପ୍ରଭାବ ପଡେ ଓ ସେମାନେ ଏହାକୁ ବାସ୍ତବ ଜୀବନରେ ଅନୁକରଣ କରିବାକୁ ଚେଷ୍ଟା କରନ୍ତି।

୩. ଖାରାପ ସାଙ୍ଗସାଥୀ: ସାଙ୍ଗସାଥୀଙ୍କ ଚାପ ବା ଖାରାପ ସାଙ୍ଗଙ୍କ ମିଳାମିଶା ପିଲାମାନଙ୍କୁ ଅପରାଧ ଆଡକୁ ଟାଣି ନେଇପାରେ। ପିଲାମାନେ ନିଜକୁ ସମୂହରେ ଖାପ ଖୁଆଇବାକୁ ଚାହାନ୍ତି, ଫଳରେ ଖାରାପ ସାଙ୍ଗଙ୍କ ପ୍ରଭାବରେ ଅନେକ ସମୟରେ ଭୁଲ କାର୍ଯ୍ୟ କରିବାକୁ ପଡେ।

୪. ମାନସିକ ଚାପ: ପାଠପଢା ଓ ପରୀକ୍ଷାରେ ଭଲ ଫଳ କରିବା ନେଇ ପିଲାମାନଙ୍କ ଉପରେ ଅତ୍ୟଧିକ ଚାପ ରହିଛି। ଯେତେବେଳେ ପିଲାମାନେ ଏହି ଚାପ ସାମ୍ନା କରିପାରନ୍ତି ନାହିଁ, ସେତେବେଳେ ସେମାନେ ହତାଶ ହୁଅନ୍ତି ଓ ମାନସିକ ଅସ୍ଥିରତାର ଶିକାର ହୁଅନ୍ତି। ଏହି ହତାଶା ତାଙ୍କୁ ଅପରାଧ ଆଡକୁ ଠେଲି ଦେଇପାରେ।

୫. ନଶାଦ୍ରବ୍ୟର ଅଭ୍ୟାସ: ନଶାଦ୍ରବ୍ୟ ବହୁତ ଭୟଙ୍କର। ଏହାର ଅଭ୍ୟାସ ପିଲାମାନଙ୍କୁ ଶାରୀରିକ ଓ ମାନସିକ ଭାବରେ ନଷ୍ଟ କରିଦେଇଥାଏ। ନଶା କରିବା ପାଇଁ ଟଙ୍କାର ଆବଶ୍ୟକତା ପଡେ ଓ ଟଙ୍କା ଯୋଗାଡ କରିବା ପାଇଁ ସେମାନେ ଚୋରି, ଡକାୟତି ଭଳି ଅପରାଧ କରିବାକୁ ପଡେ।

ବାଳ ଅପରାଧ କେବଳ ଏକ ପିଲାକୁ ନଷ୍ଟ କରେ ନାହିଁ, ଏହାର ପ୍ରଭାବ ସମ୍ପୁର୍ଣ୍ଣ ସମାଜ ଉପରେ ପଡେ। ଅପରାଧୀ ପିଲାଟିର ଭବିଷ୍ୟତ ଅନ୍ଧକାରମୟ ହୋଇଯାଏ। ସମାଜରେ ଭୟ ଓ ଅସୁରକ୍ଷା ବୃଦ୍ଧି ପାଏ। ଅନ୍ୟ ପିଲାମାନେ ମଧ୍ୟ ଏହାଦ୍ୱାରା ପ୍ରଭାବିତ ହୁଅନ୍ତି।

ଏହି ସମସ୍ୟାର ସମାଧାନ ପାଇଁ ସମସ୍ତଙ୍କୁ ମିଶି କାମ କରିବାକୁ ପଡିବ।

୧. ପରିବାରର ଭୂମିକା: ମାତା ପିତାଙ୍କୁ ପିଲାଙ୍କ ସହିତ ବନ୍ଧୁତ୍ଵପୂର୍ଣ୍ଣ ସମ୍ପର୍କ ରଖିବା ଜରୁରୀ। ପିଲାଙ୍କ ସହିତ କଥା ହେବା, ସେମାନଙ୍କ ଭାବନା ଓ ସମସ୍ୟା ବୁଝିବା ଓ ସେମାନଙ୍କୁ ସଠିକ୍ ମାର୍ଗଦର୍ଶନ ଦେବା ଆବଶ୍ୟକ। ପିଲାଙ୍କୁ ଉତ୍ତମ ସଂସ୍କାର ଦେବା ପରିବାରର ପ୍ରଥମ କର୍ତ୍ତବ୍ୟ।

୨. ଶିକ୍ଷାନୁଷ୍ଠାନର ଦାୟିତ୍ୱ: ବିଦ୍ୟାଳୟଗୁଡିକ କେବଳ ପାଠପଢା ଶିଖାଇବା ନୁହେଁ, ପିଲାମାନଙ୍କୁ ଭଲ ନାଗରିକ ହେବାକୁ ମଧ୍ୟ ଶିଖାଇବା ଉଚିତ। ନୈତିକ ଶିକ୍ଷା, କାଉନସେଲିଂ ଓ ଖେଳଧୁଳା ଉପରେ ଗୁରୁତ୍ୱ ଦେବା ଜରୁରୀ।

୩. ସରକାରୀ ପଦକ୍ଷେପ: ସରକାରଙ୍କୁ ବାଳ ଅପରାଧ ପ୍ରତିରୋଧ କରିବା ପାଇଁ କଡା ଆଇନ କରିବା ଜରୁରୀ। ଏଥିସହ ପିଲାମାନଙ୍କ ପାଇଁ ମନୋରଞ୍ଜନ ଓ ଖେଳ କସରତ ଉନ୍ନତ ବ୍ୟବସ୍ଥା କରିବା ଆବଶ୍ୟକ।

୪. ସାମାଜିକ ସଚେତନତା: ସମାଜର ପ୍ରତ୍ୟେକ ସଦସ୍ୟଙ୍କୁ ଏହି ସମସ୍ୟା ବିରୁଦ୍ଧରେ ସଚେତନ ହେବା ଜରୁରୀ। ଯେକୌଣସି ପିଲାଙ୍କୁ ଭୁଲ ପଥେ ଯାଉଥିବା ଦେଖିଲେ, ତାଙ୍କୁ ସଠିକ୍ ଉପଦେଶ ଦେବା ଆବଶ୍ୟକ।

ବାଳ ଅପରାଧ ଏକ ଜଟିଳ ସମସ୍ୟା, କିନ୍ତୁ ଏହା ଅସମ୍ଭବ ନୁହେଁ। ଯଦି ଆମେ ସମସ୍ତେ ମିଶି ଚେଷ୍ଟା କରିବା, ତାହାହେଲେ ଆମେ ଆମର ପିଲାମାନଙ୍କୁ ଏକ ସୁରକ୍ଷିତ ଓ ସୁନ୍ଦର ଭବିଷ୍ୟତ ଦେଇପାରିବା। ପିଲାମାନେ ତ ଆମର ଭବିଷ୍ୟତ, ସେମାନଙ୍କୁ ସଠିକ୍ ବାଟ ଦେଖାଇବା ଆମ ସମସ୍ତଙ୍କର କର୍ତ୍ତବ୍ୟ। ଆସନ୍ତୁ, ଏକ ଉତ୍ତମ ସମାଜ ଗଠନ ପାଇଁ ଆମେ ସବୁ ମିଳି ମିଶି କାମ କରିବା।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ସମାଜରେ ବଢୁଥିବା ବାଳ ଅପରାଧୀ ଏକ ଚିନ୍ତାନୀୟ

ସମାଜରେ ବଢୁଥିବା ବାଳ ଅପରାଧୀ ଏକ ଚିନ୍ତାନୀୟ