ଓଡ଼ିଆଙ୍କର ଆଉ ଏକ ପ୍ରମୁଖ ପର୍ବ ହେଉଛି ଧନୁ ସଂକ୍ରାନ୍ତି। ସନାତନ କାଳରୁ ଏହା ପାଳିତ ହେଉଆସିଛି। ସୂର୍ଯ୍ୟ ଯେତେବେଳେ ଧନୁ ରାଶିରେ ପ୍ରବେଶ କରନ୍ତି, ସେହି ସମୟକୁ ଧନୁ ସଂକ୍ରାନ୍ତି କୁହାଯାଏ। ଏହି ସଂକ୍ରାନ୍ତିରୁ ମକର ସଂକ୍ରାନ୍ତି ପର୍ଯ୍ୟନ୍ତ କଠିନ ଶୀତର ସମୟ। ଏହି ସମୟରେ ଲୋକଙ୍କର ଆଳସ୍ୟ ଆସିବା ଏବଂ ଶଯ୍ୟା ଛାଡିବାରେ ବିଳମ୍ବ ହେବା ସ୍ୱାଭାବିକ।

କିନ୍ତୁ ଆମର ମନ୍ଦିର ପରମ୍ପରାରେ ଏହାର ବିପରୀତ ଚିତ୍ର ଦେଖିବାକୁ ମିଳେ। ଏହି ମାସ ଧରି ରାତି ପାହି ନ ହୋଇଥିବା ବେଳେ ହିଁ ଠାକୁରଙ୍କର ନୀତି କାନ୍ତି, ସୂର୍ଯ୍ୟୋଦୟ ଆଦି ଆରମ୍ଭ ହୋଇଯାଏ। ଯେତେବେଳେ ଲୋକେ ଶୟନ ଛାଡି ଉଠିବାକୁ ଇଚ୍ଛା କରନ୍ତି ନାହିଁ, ସେତେବେଳେ ଠାକୁରଙ୍କର ନୀତିକାନ୍ତି ଆଦି ସମାପ୍ତ ହୋଇ ପ୍ରଥମ ଭୋଗ ଲାଗି ଯାଇଥାଏ। ଏହି ପହିଲି ଭୋଗ ନୀତିକାନ୍ତି ଆମକୁ ଶିକ୍ଷା ଦେଇଥାଏ ଯେ ଶୀତରେ ଆଳସ୍ୟ କରିବା ନୁହେଁ, ସକ୍ରିୟ ରହିବା।

ଏଥି ସତ୍ତ୍ୱେ ଏହି ସମୟ ହେଉଛି ଶସ୍ୟ ଅମଣର ସମୟ। ଏହି ନୀତିକାନ୍ତି ଆମକୁ ଶିଖାଇଥାଏ ଯେ ଏହି ମାସରେ ପରିଶ୍ରମୀ ହୋଇ ଶସ୍ୟ ଅମଣ କାର୍ଯ୍ୟରେ ନିଯୁକ୍ତ ହେବା। ଗୋଟିଏ ମାସର ଶସ୍ୟ ଅମଣ ଏକ ବର୍ଷ ପାଇଁ ଖାଦ୍ୟ ଯୋଗାଇଥାଏ। ଏହି ପରମ୍ପରା ଜୀବନ ଚଳାଇବାର ମୂଳଦୁଆ ସହ ଆମର ଧାର୍ମିକ ଚେତନାକୁ ଅଭିନ୍ନ ଭାବରେ ଯୋଡି ଦେଇଥାଏ।

ଆଜି ବ୍ରହ୍ମପୁରର ଅଧିଷ୍ଠାତ୍ରୀ ଦେବୀ ମା' ବୁଢୀ ଠାକୁରାଣୀଙ୍କ ମନ୍ଦିର ପ୍ରାଙ୍ଗଣରେ ଧନୁ ସଂକ୍ରାନ୍ତି ବିଶେଷ ଉତ୍ସାହ ଉଲ୍ଲାସରେ ପାଳିତ ହୁଏ। ଏଠାରେ ସମସ୍ତେ ଚାଙ୍ଗୁଡିରେ ମୁଆଁ ପୂଜାର ଉତ୍ସବମାନଙ୍କର ସାକ୍ଷୀ ହୋଇଥାନ୍ତି। ସାଧାରଣ ଘରୋଇ କୁଲାର ଚାଙ୍ଗୁଡି ଏହି ଦିନ ପବିତ୍ର ପୂଜାର ପୀଠରେ ପରିଣତ ହୁଏ। ତା ଉପରେ ମୁଆଁ ପୂଜା କରି ସମସ୍ତେ ମା’ଙ୍କର ଆଶୀର୍ବାଦ ପ୍ରାର୍ଥନା କରନ୍ତି।

ଏହି ଅନୁପମ ପରମ୍ପରା ଯେଉଁ ଲୋକପର୍ବର ସୃଷ୍ଟି କରିଛି, ତାହା କେବଳ ଧାର୍ମିକ ନୁହେଁ, ବରଂ ସାମାଜିକ ଏବଂ ସାଂସ୍କୃତିକ ଏକତାର ପ୍ରତୀକ। ଚାଙ୍ଗୁଡିର ମୁଆଁ ପୂଜା ଶିଖାଇଥାଏ ସାଦାସିଦା ଜୀବନଯାପନ, ପରିଶ୍ରମ ପ୍ରତି ଆଦର ଏବଂ ଦେବୀଙ୍କ ପ୍ରତି ଗଭୀର ଭକ୍ତିର ମହତ୍ତ୍ୱ। ଏହି ପର୍ବ ଆମକୁ ପର୍ବ ପର୍ବାଣିର ମୂଳ ଉଦ୍ଦେଶ୍ୟଠାରୁ କେବେ ଦୂରେଇ ଯିବା ଉଚିତ ନୁହେଁ ବୋଲି ସୁଚନା ଦିଏ। ଏହା ଆମ ଲୋକ ଜୀବନର ଉଜ୍ଜ୍ୱଳ ଅଧ୍ୟାୟ ଭାବରେ ସବୁଦିନ ଅଜୟ ଅମର ରହିବ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ସମସ୍ତଙ୍କ ଚାଙ୍ଗୁଡିରେ ମୁଆଁ ପୂଜା: ଏକ ଲୋକପର୍ବର ଅନୁପମ ଉଜ୍ଜ୍ୱଳତା

ସମସ୍ତଙ୍କ ଚାଙ୍ଗୁଡିରେ ମୁଆଁ ପୂଜା: ଏକ ଲୋକପର୍ବର ଅନୁପମ ଉଜ୍ଜ୍ୱଳତା