ତାମ୍ର ପ୍ରସ୍ତର ଯୁଗ ଠାରୁ ଆରମ୍ଭ କରି ଆଜିର ପ୍ଲାଷ୍ଟିକ ଯୁଗ ପର୍ଯ୍ୟନ୍ତ କିଛି ସମୟ ର ଅନ୍ତର କୁ ନେଇ ଏକ ଯୁଗ ବୋଲି ଆମେ ବର୍ଣ୍ଣନା କରିଥାଉ। ସେହିପରି ଆଜିର ଯୁଗ କୁ ଏହାର ବହୁଳ ବ୍ୟବହାର ହିସାବରେ ଯଦି ସୋସିଆଲ ମିଡ଼ିଆ ଯୁଗ ବୋଲି କୁହାଯାଏ ତେବେ କିଛି ଅତ୍ୟୁକ୍ତି ହେବନାହିଁ।

ସାଂପ୍ରତିକ ସମୟରେ ସୋସିଆଲ ମିଡ଼ିଆ ଏପରି ଏକ ଅସ୍ତ୍ର ଯାହା ମହା ମହାରଥୀ ମାନଙ୍କୁ ବି ଧୂଳି ଚଟେଇ ଦେଇ ପାରେ ଓ ଧୂଳି ରେ ବସିଥିବା ଲୋକକୁ ମୟୂରଚନ୍ଦ୍ରିକା ଖୋସା ସିଂହାସନ ରେ ବସେଇ ଦେଇ ପାରେ। ସୋସିଆଲ ମିଡ଼ିଆ ଦ୍ଵାରା ପୃଥିବୀ ର ସବୁ କୋଣ ଆଜି ଗୋଟିଏ ଅଦୃଶ୍ୟ ଜାଲ ରେ ବାନ୍ଧି ହୋଇ ଯାଇଛି ଯାହାଠୁ ମୁକୁଳିବା କଷ୍ଟ ସାଧ୍ୟ। ବିଷୟ ବସ୍ତୁ ହିସାବରେ କଣ ଭାରତୀୟ ରାଜନୀତି ରେ ସୋସିଆଲ ମିଡ଼ିଆ ର ଭୂମିକା ରହିଛି? ତେବେ ବିନା ଦ୍ବିଧାରେ ମୋର ଉତ୍ତର ହଁ ତେବେ ଆପଣ ପଢ଼ନ୍ତୁ ଓ ବିଚାର କରନ୍ତୁ ଉତ୍ତର ହଁ କି ନା।

ଭାରତୀୟ ରାଜନୀତି ରେ ସୋସିଆଲ ମିଡ଼ିଆ ପୂର୍ବବର୍ତ୍ତୀ ସମୟ ଓ ଆଜିକାର ସମୟ ଦେଖିଲେ ଅନେକ ଫରକ ଦେଖା ଯାଏ। ପ୍ରଥମତଃ ଗୋଟିଏ ଦାବି ବା ଅସନ୍ତୋଷ କୁ ଗୋଟିଏ ରାଜନେତା ବା ଲୋକ ଲୋଚନ କୁ ଆଣିବା ନିମିତ୍ତ ଅନେକ ଥର ଗଙ୍ଗା ସ୍ନାନ କରିବାକୁ ପଡ଼ୁଥିଲା ହେଲେ ଆଜିର ସମୟରେ ଯଦି ଗୋଟିଏ ସୋସିଆଲ ମିଡ଼ିଆ ପୋଷ୍ଟ ଟି ସଠିକ୍ ଭାବରେ ଆଞ୍ଚ ଧରିଲା ତେବେ ସେ ୱାର୍ଡ ମେମ୍ବର ଙ୍କ ଠାରୁ ଦେଶର ପ୍ରଧାନମନ୍ତ୍ରୀ ରାଷ୍ଟ୍ରପତି ଙ୍କୁ ମଧ୍ୟ ଥରେଇଦେବାର ସାମର୍ଥ୍ୟ ରଖୁଛି। ଅନେକ ସମୟରେ ରାଜନେତା ମାନେ ଦୁର୍ବ୍ୟବହାର କରି ଲୋକଙ୍କ ଆଗରୁ ଖସି ଯାଆନ୍ତି ହେଲେ ଏହି ସୋସିଆଲ ମିଡ଼ିଆ ସମୟରେ ଆପଣଙ୍କ ପ୍ରତିଟି କାର୍ଯ୍ୟ କଳାପ ସୋସିଆଲ ମିଡ଼ିଆ ବା ସାମାଜିକ ଗଣମାଧ୍ୟମ ର ଜାଲ ରେ ବାନ୍ଧି ହୋଇ ରହିଛି ଯେଉଁଠି ଗୋଟିଏ ଫୋଟୋ ବା ଭିଡ଼ିଓ ଆପଣଙ୍କୁ ଦୁନିଆଁ ଆଗରେ ଏପଟ ସେପଟ କରି ରଖି ଦେଇପାରେ। ଯାହା କି ପୁର୍ବ ସମୟରେ ହେଉନଥିଲା ମୁଁ ତ କହିବି ଅନେକାଂଶ ରେ କିଛି ରାଜନେତା ଭାଗ୍ୟବାନ ଥିଲେ ନହେଲେ କିଏ ଜାଣେ ଆମେ ରାଜନୀତି ରେ ଆଦର୍ଶ ଭାବୁଥିବା କେତେ ନେତା ମନ୍ତ୍ରୀଙ୍କ ମୁଖା ଖୋଲି ସମସ୍ତଙ୍କ ଆଗରେ ମୁକୁଳା ହୋଇ ଯାଇଥାନ୍ତା। ତେବେ ସେ ଯାହାବି ହେଉ ଏହା ସମ୍ପର୍କ ରେ ଉଭୟ ଭଲ ଖରାପ ତ ନିଶ୍ଚୟ ଅଛି କିନ୍ତୁ ମୋ ହିସାବରେ ବିଶେଷ କରି ଏହି ପୋଷ୍ଟ ର ସବୁ ସ୍ଥାନ ରେ ପହଞ୍ଚିବା ସାମର୍ଥ୍ୟ ଯୋଗୁଁ ଆଜି ରାଜନେତା ମାନେ ଅନେକାଂଶ ରେ ଲୋକ ମାନଙ୍କ ସହ ଭଲ ସମ୍ପର୍କ ରେ ଅଛନ୍ତି ଏହାକୁ ଆଡେ଼ଇ ଦିଆ ଯାଇ ନପାରେ। ଏହା ଭାରତୀୟ ରାଜନୀତି କୁ ନିହାତି ଭାବରେ ପ୍ରଭାବିତ କରିଛି।

ଦ୍ଵିତୀୟ ରେ politician ଅର୍ଥାତ୍ ରାଜନେତା ମାନଙ୍କ campaigning ତଥା ଲୋକ ମାନଙ୍କ ପାଖରେ ରେ ପହଞ୍ଚିବା ରେ ବହୁଳ ଭାବରେ ସାହାଯ୍ୟ କରୁଛି। ସ୍ୱଳ୍ପ ସମୟରେ ଓ ମୁଖ୍ୟ ବିଶେଷତ୍ଵ ଖୁବ୍ କମ୍ ମୂଲ୍ୟ ରେ ଟୁଇଟର Twitter ( ବର୍ତ୍ତମାନ ର ଏକ୍ସ X) , ଫେସ୍ ବୁକ୍ Facebook , Instagram ଇନଷ୍ଟାଗ୍ରାମ , whatsapp ଭଳି ସାମାଜିକ ଗଣମାଧ୍ୟମ ଦ୍ଵାରା ଲୋକଙ୍କ ପାଖରେ ପହଞ୍ଚି ପାରୁଛନ୍ତି। ପୂର୍ବରୁ ଲୋକଙ୍କ ପାଖରେ ନିଜକୁ ନିଜ ବିଚାରଧାରା କୁ ପହଞ୍ଚାଇବା ପାଇଁ ଅନେକ କଷ୍ଟ କରିବାକୁ ପଡ଼ୁଥିଲା କାହିଁକି ନା ଯଦି ତୁମ ପାଖରେ ଖର୍ଚ୍ଚ କରିବା ପାଇଁ ସେତେ ଅର୍ଥ ନାହିଁ ସେମିତି ବହୁତ୍ କିଛି ବଡ଼ ନକଲେ ତାହା ଲୋକଙ୍କ ପାଖରେ ପହଞ୍ଚି ପାରୁନଥିଲା ଏମିତି ଭାବରେ ଅନେକ ଦକ୍ଷ ରାଜନେତା ମାନେ ନିଜ ଭୋଟର ଙ୍କ ପାଖରେ ପହଞ୍ଚି ପାରୁନଥିଲେ। ଏମିତି ବି ଉପଲବ୍ଧ ଟିଭି ମିଡ଼ିଆ ଓ ପ୍ରିଣ୍ଟ ମିଡିଆ biased ହିଁ ରହୁଥିଲେ ଅନେକାଂଶ ରେ । କିନ୍ତୁ ଭଲ କଥା ହେଉଛି ଏବେ ଯଦି ଜଣେ ଲୋକ ନିର୍ବାଚନ ରେ ଛିଡ଼ା ହେଉଛି ଅବା ଭବିଷ୍ୟତ କୁ ଟାର୍ଗେଟ କରୁଛି ସେ ନିଜ ସୋସିଆଲ ମିଡ଼ିଆ କୁ ବ୍ୟବହାର କରି ନିଜ ପାଇଁ ରାସ୍ତା ବନେଇ ପାରିବ। ଆପଣ ଜାଣିଲେ ବିଲକୁଲ ଆଶ୍ଚର୍ଯ୍ୟ ହେବେନି ଏହି ସୋସିଆଲ ମିଡ଼ିଆ ରେ ଲୋକଙ୍କ ପାଖରେ ପହଞ୍ଚିବା ପାଇଁ ଅନେକ ବଡ଼ ବଡ଼ ରାଜନେତା ମାନେ ନିଜର PR agency ରଖିଥାନ୍ତି ଯେଉଁଠି ସେମାନେ ଲୋକଙ୍କ ଆଗରେ ସାମାଜିକ ଗଣମାଧ୍ୟମ ରେ ସେମିତି ନିଜକୁ ପ୍ରସ୍ତୁତ କରନ୍ତି ଯେମିତି ସେମାନେ ଚାହାନ୍ତି ଯାହା ଦ୍ଵାରା ସେମାନେ ଲୋକଙ୍କ ଭରଷା ଜିତି ପାରିବେ। ଆପଣ ଏହାକୁ ଧୋକା କହି ପାରନ୍ତି କିନ୍ତୁ ଏହା ରାଜନେତା ପାଇଁ କିଛି ଭୁଲ ନୁହେଁ। ଉଦାହରଣ ସ୍ୱରୂପ ଆପଣ କଂଗ୍ରେସ ର ସୋସିଆଲ ମିଡ଼ିଆ ପୋଷ୍ଟ ଦେଖିଲେ ବୁଝି ଯାଇପାରିବେ କି ସେମାନେ ଲୋକଙ୍କ ପାଖରେ ରାହୁଲ ଗାନ୍ଧୀ ଙ୍କୁ କେମିତି ପହଞ୍ଚାଇବାକୁ ଚାହାନ୍ତି ସେମାନେ PR ଦ୍ଵାରା ଏମିତି ଦେଖାନ୍ତି କି ରାହୁଲ ଗାନ୍ଧୀ ହିଁ ହେଉଛନ୍ତି ଏକମାତ୍ର ଗରିବ ଲୋକଙ୍କ ପାଇଁ ଦେବଦୂତ ଯିଏ ଦୁନିଆଁ ରେ ଚାଲିଥିବା ଘୃଣା , ଠକାମୀ ଓ ଅସହିଷ୍ଣୁତା ରୁ ତାଙ୍କୁ ବାହାରକୁ ନେଇ ପାରିବେ। ସେମାନେ relatable factor କୁ ରାହୁଲ ଓ ସାଧାରଣ ଜନତା ଙ୍କ ଭିତରେ ଦେଖାଇବାକୁ ବହୁତ୍ ଫୋକସ୍ କରନ୍ତି। ସେମିତି ଭାରତୀୟ ଜନତା ପାର୍ଟି ର ସୋସିଆଲ ମିଡିଆରେ ସେମାନେ ମୋଦୀ ଜି ଙ୍କୁ ବହୁତ ସ୍ଵତନ୍ତ୍ର , ଅସାଧାରଣ ଓ ନିର୍ଭୀକ ଦେଖାଇବାକୁ ଚେଷ୍ଟା କରନ୍ତି । ସେପରି ଓଡ଼ିଶାରେ ବିଜୁ ଜନତା ଦଳର ସୋସିଆଲ ମିଡିଆରେ ସେମାନେ ନବୀନ ପଟ୍ଟନାୟକଙ୍କ ର ନିର୍ମଳ ଭାବମୂର୍ତ୍ତି ଦେଖାଇବାକୁ ଚେଷ୍ଟା କରନ୍ତି। କିନ୍ତୁ ରାଜନୀତି ରେ ଖାଲି କିଛି ବି କଳା ନହେଲେ ଧଳା ନଥାଏ ଏହା କେବଳ ଆପଣଙ୍କ ପାଖରେ କେମିତି ପହଞ୍ଚୁଛି ତାହା ଉପରେ ନିର୍ଭର କରେ। ଯଦି ଆପଣ ଭାବୁଥାନ୍ତି ଉପରୋକ୍ତ ଯେଉଁ ରାଜନେତା ମାନଙ୍କୁ PR ଦ୍ଵାରା ସୋସିଆଲ ମିଡିଆ କଥା କହିଲି ତାହା ପ୍ରଭାବିତ କରେ ନାହିଁ ତେବେ ଏହା ସଂପୂର୍ଣ୍ଣ ଭୁଲ ଏହାର ଅନେକ ପ୍ରଭାବ ରହିଛି ଏହା ଭାରତୀୟ ରାଜନୀତି କୁ ଏବେ ମୁଖ୍ୟ ଭାବରେ ପ୍ରଭାବିତ କରୁଛି।

ତୃତୀୟ ରେ ସୋସିଆଲ ମିଡ଼ିଆ କୁ ବିରୋଧୀ ଦଳ ବିପକ୍ଷ ରେ ବ୍ୟବହାର କରିବା ପାଇଁ ବ୍ରହ୍ମାସ୍ତ୍ର ଭାବରେ କାର୍ଯ୍ୟ କରୁଛି। ରାଜନେତା ଓ ତାଙ୍କ ସମର୍ଥକ ମାନଙ୍କ ଦ୍ଵାରା ବିପକ୍ଷ ଦଳ ଉପରେ ସୋସିଆଲ ମିଡ଼ିଆ ରେ ବିରୋଧ କରାଯାଇ ପାରୁଛି। ଯାହା ପୂର୍ବରୁ ସଭା ସମିତି ରେ ବୁଲି ବୁଲି ଅନେକ ଜାଗା ରେ କରିବାକୁ ପଡୁଥିଲା ଏବେ ଫେସବୁକ୍ କିମ୍ବା ଟୁଇଟର ଯଥେଷ୍ଟ ଆକ୍ରମଣ କରିବାକୁ। ଯଦି ସୋସିଆଲ ମିଡିଆରେ ବିଜେପି ଦ୍ଵାରା ରାହୁଲ ଗାନ୍ଧୀଙ୍କ ବିଭିନ୍ନ ସଭା ରେ ହୋଇଥିବା ଭିଡ଼ିଓ ଭାଇରାଲ ନହୋଇଥାନ୍ତା , କଂଗ୍ରେସ ସମୟର ଦୁର୍ନୀତି ଓ ବିପକ୍ଷ ଙ୍କ ଦୋଷ ଦୁର୍ବଳତା କୁ ଯୁବ ପୀଢ଼ି ଙ୍କ ପାଖରେ ନ ପହଞ୍ଚା ଯାଇଥାନ୍ତା ତେବେ ୨୦୧୪ ରେ ଭାରତୀୟ ଜନତା ପାର୍ଟି ଏତେ ସହଜ ରେ ସରକାର ଗଢ଼ି ନଥାନ୍ତା , କୋଭିଡ ହେଉ କି ମଣିପୁର ଘଟଣା ଏମିତି କିଛି ବିଷୟରେ ଯଦି ବିରୋଧୀ ଦଳ ବିଜେପି ଉପରେ ଆକ୍ରମଣ ନକରି ଥାନ୍ତେ ସୋସିଆଲ ମିଡିଆରେ ହୁଏତ ବିଜେପି ଏତେ ଜନମତ ହରାଇନଥାନ୍ତା ଆଉ ଗୋଟେ ଓଡ଼ିଆ ହିସାବରେ କହିବି ଯଦି ବିପକ୍ଷ ଦଳର ଲୋକ ସୋସିଆଲ ମିଡିଆରେ ବିଜୁ ଜନତା ଦଳ ବିରୋଧ ରେ ବ୍ୟବହାର କରିନଥାନ୍ତେ ତେବେ ବିଜେଡି ର ତୃଣ ମୂଳ ରେ ଯେତେ ଦୃଢ଼ ଥିଲା ନବୀନ ପଟ୍ଟନାୟକ କେବେବି ଗାଦି ଚ୍ୟୁତ ହୋଇ ନଥାନ୍ତେ। ଏଥିରୁ ଆପଣ ବୁଝି ପାରୁଥିବେ ଏବେକା ସମୟରେ ସୋସିଆଲ ମିଡ଼ିଆ କେତେ ଗୁରୁତ୍ଵ ବହନ କରୁଛି।

ଚତୁର୍ଥ ରେ ସୋସିଆଲ ମିଡ଼ିଆ ରେ ରାଜନୀତି ରେ ହେଉଥିବା ସବୁଠାରୁ ଭୟଙ୍କର ବିଷୟ ହେଉଛି ମିଥ୍ୟା ତଥ୍ୟ ଓ ଗୁଜବ ଯାହାକୁ misinformation , rumours ଆଦି କହୁ। ସୋସିଆଲ ମିଡ଼ିଆ ର ଅପବ୍ୟବହାର ବହୁତ୍ ହୁଏ ଏହି ମିଥ୍ୟା ତଥ୍ୟ ଓ ଗୁଜବ ନେଇ ଯାହା ଦ୍ଵାରା ନିଜର ପ୍ରୋପାଗଣ୍ଡା ଚଲାଯାଇଥାଏ ରାଜନୀତି ଦଳର ବିପକ୍ଷ ରେ। ଏତେ ବ୍ୟସ୍ତ ବହୁଳ ଜୀବନରେ କାହା ପାଖରେ ଏତେ ସମୟ ଅଛି ଏହାର ସତ୍ୟାସତ୍ୟ ପରୀକ୍ଷା କରିବାକୁ। କେତେବେଳେ ସଂପୂର୍ଣ୍ଣ ମିଥ୍ୟା ଘଟଣା କୁ ରଞ୍ଜିତ କରି ପରଷା ଯାଏ ତ କେତେବେଳେ ଭିଡ଼ିଓ ର କିଛି ନିର୍ଦ୍ଦିଷ୍ଟ ପାର୍ଟ କୁ କାଟି ଲୋକଙ୍କୁ ଭ୍ରମିତ କରାଯାଏ ଆଉ କେବେ କେବେ ତ ଏବେକାର ଏ ଆଇ ବ୍ୟବହାର କରି ନୂତନ ଭିଡ଼ିଓ ସୃଷ୍ଟି କରି ଲୋକଙ୍କୁ ଭ୍ରମିତ କରାଯାଉଛି ଯାହା ହେଉଛି ସବୁଠାରୁ ନିମ୍ନ ସ୍ତର ର ରାଜନୀତି। ସତ୍ୟାସତ୍ୟ ତ ତଦନ୍ତ ସାପେକ୍ଷ କିନ୍ତୁ କୋଭିଡ ସମୟରେ ସରକାର ଙ୍କ ବିରୋଧରେ ଟୁଲକିଟ ଗ୍ୟାଙ୍ଗ ଚାଲିଥିଲା ବୋଲି ଅନେକ ପ୍ରମାଣ ମିଳିଥିଲା , ରାହୁଲ ଗାନ୍ଧୀଙ୍କ ଆଳୁ ରୁ ସୁନା ଭିଡ଼ିଓ ର ବିଷୟ କୁ ବି ଭୁଲ ଭାବରେ ପରଷା ଯାଇ ଆସୁଅଛି ତାହା ବି ଦୁଃଖ ଲାଗେ। ଓଡ଼ିଶାରେ ନୂତନ ଭାବରେ ଗଢ଼ି ଉଠିଥିବା ବିଜେପି ସରକାର ଙ୍କ ବିପକ୍ଷ ରେ ବି ଅନେକ ଭୁଲ ତଥ୍ୟ ସୋସିଆଲ ମିଡିଆରେ ଘୁରି ବୁଲୁଥିଲା ଯାହାକୁ ଟିଭି ମିଡ଼ିଆ ବି ପ୍ରସାର କରିଦେଇଥିଲେ ଯାହା ପରବର୍ତ୍ତୀ ସମୟରେ ସମାଧାନ ହେଲା। ଏହା ସଂପୂର୍ଣ୍ଣ ରୂପରେ ସୋସିଆଲ ମିଡ଼ିଆ କୁ ରାଜନୀତି ରେ ଦୁରୂପଯୋଗ କୁହାଯିବ।

ପଞ୍ଚମ ରେ ସୋସିଆଲ ମିଡ଼ିଆ ତୃଣ ମୂଳ ସ୍ତରରେ ଅନେକ ଦକ୍ଷ ନେତା ସୃଷ୍ଟି କରୁଛି। ଯେଉଁ ନେତା କେବେ ବଣ ମଲ୍ଲି ହୋଇ ବଣରେ ରହିଯାଉଥିଲେ ତାଙ୍କୁ ରାଜନୀତି ରେ ଏକ ମଞ୍ଚ ପ୍ରଦାନ କରିଛି ସୋସିଆଲ ମିଡ଼ିଆ। ଯାହା ଫଳରେ ନିର୍ଦ୍ଦିଷ୍ଟ ବ୍ୟକ୍ତି ବିଶେଷ ଙ୍କ ମୋନୋପୋଲି monopoly ରହିବ ନାହିଁ ଓ ଏହା ଭାରତୀୟ ରାଜନୀତି ରେ ଏକ ବିଶେଷ ପରିବର୍ତ୍ତନ ଆଣି ପାରୁଛି।

ଷଷ୍ଠ ରେ ସୋସିଆଲ ମିଡ଼ିଆ ଦ୍ଵାରା ଭୋଟର୍ ଜାଗ୍ରତ ହେଉଛନ୍ତି। ଲୋକ ମାନେ ନିଜ ହାତ ପାନ୍ତା ରେ ଯେଉଁ ମୋବାଇଲ ଧରୁଛନ୍ତି ସେଠାରୁ ସହଜ ରେ ରାଜନୀତି, ସରକାର ଓ ନିଜର ଅଧିକାର ସମ୍ପର୍କ ରେ ସଚେତନ ହୋଇପାରୁଛନ୍ତି। ଏହି ସୋସିଆଲ ମିଡିଆରେ ଭାଇରଲ ହେବା ପରେ ପ୍ରଥମ ଥର ପାଇଁ ନଗଡା ରେ ଭୋଟ ବୁଥ କରାଯାଇଥିଲା ଯେତେ ପର୍ଯ୍ୟନ୍ତ ସବୁ ବର୍ଗର ଲୋକଙ୍କ ରାଜନୀତି ରେ ଭାଗିଦାରୀ ନରହିବ ସେବେ ଯାଏଁ ରାଜନୀତି ସଠିକ୍ ଭାବରେ ଉନ୍ନତି କରି ପାରିବ ନାହିଁ।

ସପ୍ତମ ରେ ସୋସିଆଲ ମିଡ଼ିଆ କୁ ଲୋକ ମାନଙ୍କ ବୈଚାରିକ ଡାଟା analysis ରେ ବ୍ୟବହାର କରାଯାଉଛି। ଲୋକ ମାନେ ଏବେ କଣ ଚାହୁଁଛନ୍ତି କଣ ଚାହୁଁ ନାହାନ୍ତି , ଲୋକ ମାନେ ସରକାର ଙ୍କ କେଉଁ ନୀତି କୁ ପସନ୍ଦ କରୁଛନ୍ତି କରୁନାହାନ୍ତି ଅବା ନିର୍ଦ୍ଦିଷ୍ଟ ସ୍ଥାନ ରେ କେଉଁ ବିଶେଷ କୁ ନେଇ ଆଞ୍ଚଳିକ ରାଜନୀତି ହୁଏ ତାହା ବିଶେଷଜ୍ଞ ମାନେ ବିଶ୍ଳେଷଣ କରନ୍ତି ଯାହାକୁ ରାଜନୀତି ରେ ବ୍ୟବହାର କରାଯାଏ। ଉଦାହରଣ ସ୍ୱରୂପ ଓଡ଼ିଶାରେ ଜାତି ଭିତ୍ତିକ general , OBC, SC ,ST ରାଜନୀତି ହୁଏ ନାହିଁ କିନ୍ତୁ ଲୋକ ମାନଙ୍କ ଓଡ଼ିଆ ଅସ୍ମିତାକୁ ଅସ୍ତ୍ର କରି ଭାରତୀୟ ଜନତା ପାର୍ଟି ବହୁମତ ହାସିଲ କରି ପାରିଲା। ସେହି ଭଳି ଉତ୍ତରପ୍ରଦେଶ ଓ ବିହାର ରେ ଜାତି ଭିତ୍ତିକ ରାଜନୀତି ବହୁଳ ଭାବରେ ଦେଖା ଯାଏ ତେଣୁ ସେପଟେ ରାଜନୈତିକ ପ୍ରସଙ୍ଗ ଭିନ୍ନ ଥାଏ ଓ ପଞ୍ଜାବ ହରିୟାଣା ରେ କୃଷକ ମାନଙ୍କୁ ନେଇ ମୁଖ୍ୟ ପ୍ରସଙ୍ଗ ଗଢ଼ା ଯାଇଥାଏ। ହାଇଦ୍ରାବାଦ ରେ କେମିତି ଉଭୟ ହିନ୍ଦୁ ମୁସିଲମ ଗରିବ ହୋଇ ରହିଛନ୍ତି। ଏହି ବୈଚାରିକ ବିଶ୍ଳେଷଣ ଯୋଗୁଁ ଲୋକ ମାନଙ୍କ ଭି କେ ପଣ୍ଡିଆନ ଉପରେ ଅସନ୍ତୋଷ ଯେ ଭାରତୀୟ ଜନତା ପାର୍ଟି କୁ ୨୦୨୪ ନିର୍ବାଚନ ରେ ଓଡ଼ିଶାରେ ସାହାଯ୍ୟ କଲା ଏଥିରେ ଦ୍ଵିମତ ନାହିଁ।

ଅଷ୍ଟମ ରେ ସୋସିଆଲ ମିଡ଼ିଆ ପ୍ରଭାବ ରେ ଭାରତୀୟ ରାଜନୀତି ସଂପୂର୍ଣ୍ଣ ଭାବରେ ବିଶ୍ଵ ରାଜନୀତି ରେ ଉନ୍ମୁକ୍ତ ହୋଇ ଯାଇଛି। ପ୍ରତି ଛୋଟ ବଡ଼ ଘଟଣା ବିଶ୍ଵ ର ପ୍ରତି କୋଣ ରେ ପହଞ୍ଚି ପାରୁଛି ଯେଉଁଥିରେ ଉଭୟ ସକାରାତ୍ମକ ନକାରାତ୍ମକ ପ୍ରଭାବ ରହୁଛି। ଏହି ସୋସିଆଲ ମିଡ଼ିଆ ପାଇଁ ମାଳଦ୍ଵିପ ମନ୍ତ୍ରୀ ଙ୍କ କଟାକ୍ଷ ପାଇଁ ମାଳଦ୍ୱିପ କୁ ସୋସିଆଲ ମିଡ଼ିଆ ଟ୍ରେଣ୍ଡ ଦ୍ଵାରା boycot କରାଗଲା ଯାହା ତାଙ୍କ ଅର୍ଥନୀତି ଉପରେ ବିଶେଷ ପ୍ରଭାବ ପକାଇଲା। ଭାରତ କୁ ବିଶ୍ଵ ରେ ଏବେ ସମ୍ମାନ ମିଳୁଛି ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଙ୍କୁ ବିଶ୍ଵ ର ଶକ୍ତିଶାଳୀ ନେତା ଭାବରେ ଗଣା ଯାଉଛି ତାହା ବି ଏହି ସୋସିଆଲ ମିଡ଼ିଆ ପାଇଁ।

ଶେଷ ରେ ଏତିକି କହିବାକୁ ଚାହିଁବି ସାମାଜିକ ଗଣମାଧ୍ୟମ ଅବା ସୋସିଆଲ ମିଡ଼ିଆ ର ଭାରତୀୟ ରାଜନୀତି ଉପରେ ବିଶେଷ ପ୍ରଭାବ ରହିଛି ଭିନ୍ନ ଅର୍ଥ ରେ ସେ ଏହାକୁ ମୂଖ୍ୟ ଭାବରେ ପରିଚାଳିତ କରୁଛି କହିଲେ ଅତ୍ୟୁକ୍ତି ହେବନାହିଁ। ସୋସିଆଲ ମିଡ଼ିଆ ର ସନ୍ତାନ ଭାବରେ memes ଉଭୟ ବିରୋଧ ଓ ପ୍ରଚାର ରେ ଅନେକ ସାହାଯ୍ୟ କରୁଛି। ରାଜନୀତି ସୋସିଆଲ ମିଡ଼ିଆ ଦ୍ଵାରା ଆହୁରି ମଜବୁତ୍ ହେଉ କିନ୍ତୁ ଏହାର ଦୁରୁପଯୋଗ ନହେଉ ଓ ରାଜନୀତି ର ମାନ ହ୍ରାସ ନହେଉ। ଏହି ସଂପୂର୍ଣ୍ଣ ବ୍ଲଗ୍ ପରେ ମୋତେ ଲାଗୁଛି ଆପଣ ନିଜର ଉତ୍ତର ପାଇ ସାରିଥିବେ।

ପଢ଼ିଥିବା ପାଇଁ ଅନେକ ଅନେକ ଧନ୍ୟବାଦ।

କୈବଲ୍ୟ ନାୟକ

Kaibalya Nayak

All pictures are collected from Google and copyrights are reserved to respective owners only.

ସାଂପ୍ରତିକ ଭାରତୀୟ ରାଜନୀତି ରେ ସୋସିଆଲ ମିଡ଼ିଆ|Social media in Current Indian politics - Analysis

Social media and Indian politics