କଣ୍ଠ ବାବୁ - କଣ ଆଜି ବି ସେଇ ସନ୍ତୁଳା ? ଏ ସନ୍ତୁଳା ଖାଇ ଖାଇ ମୋ ଜୀବନ ସନ୍ତୁଳି ଗଲାଣି। ତିରିଶ ବର୍ଷ ହେଲା ଖାଲି ଟିଫିନ୍ ରେ ସନ୍ତୁଳା ନେଇ ମୋ ଚାକିରି ଜୀବନ ସରିବାକୁ ବସିଲାଣି ହେଲେ ଟିଫିନ୍ ରେ ଆଉ କିଛି ପାଟିରେ ବାଜିଲାନି।

ମିନତୀ ଦେବୀ - ଓଃ ହୋ ମୁଁ ତ ଯେମିତି ତିରିଶ ବର୍ଷ ହେଲାଣି ରାଜରାଣୀ ହୋଇ ରହିଛି ଆଉ। କହିଲେ ନା କଣ ସନ୍ତୁଳା କାହିଁକି। ଏତେ କାମିକିଆ ଲୋକ ଯଦି ସକାଳୁ ଉଠିକି ନଅ ତିଅଣ ଛଅ ଭଜା ନିଜେ ବନେଇକି ଖାଇକି ଯାଅ ଏଠି କେହି ଚାକରାଣୀ ନାହାନ୍ତି। ସେହି ସନ୍ତୁଳା ଦଉଛି ବୋଲି ଆଜି ଯାଏଁ ଦୌଡୁଛ। ଛାଡ଼ କାହା ଆଗରେ ମୁଁ କହୁଛି କହି ଦମ୍ ଦମ୍ ହୋଇ ଛାତ କୁ ପଳେଇଲେ।

ବର୍ଷା (ତାଙ୍କ ବୋହୂ) - କଣ ବାପା କାହିଁକି ବୋଉ ଙ୍କୁ ଏମିତି କହୁଛନ୍ତି ସେ କେତେ ମନ ଦୁଃଖ କରୁଥିବେ। ମୁଁ ତ ସକାଳୁ ବନେଇ ଦିଅନ୍ତି ଆପଣଙ୍କ ଟିଫିନ୍ ବୋଉଙ୍କ ଗୋଟେ ଜିଦ୍ ସେହି ହିଁ ବନେଇବେ ଆପଣଙ୍କ ପାଇଁ। କାଲି ଠୁ ମୁଁ ବନେଇଦେବି ଆପଣ ଆଜି ଦିନକ ଚଳେଇ ଦିଅନ୍ତୁ।

କଣ୍ଠ ବାବୁ - ବାପରେ ମୋ ଘରେ ନାରୀ ଶକ୍ତି ର ପ୍ରଭାବ ଅଛି। ନା ଲୋ ମା ତୁ ତ କେଇଟା ଦିନ ହେଲା ଏ ଘରକୁ ବୋହୂ ହେଇ ଆସିଛୁ ତୋ ଶାଶୁ ର ମୋର ଏଟା ନିତି ଦିନିଆ କଥା । ମୋର ବେଙ୍ଗ ରାଶି କୁ ତୋ ଶାଶୁ ର ଚେଙ୍ଗ ରାଶି। ପ୍ରତିଦିନ ଟିକେ ତୋ ଶାଶୁ ଙ୍କ ସହ ନ ଲାଗିଲେ ମୋତେ ଦିନଟା ଠିକ୍ ଲାଗେନି। ମାନୁଛି ନୂଆ ନୂଆ ଭାରି ଖରାପ ସନ୍ତୁଳା କରୁଥିଲା ଯେ ପାଟିରେ ଦେଇ ହୁଏନି ହେଲେ ଆଜି ଯାଏଁ ସେ ସନ୍ତୁଳା କୁ ନଷ୍ଟ କରିନି। ଆଉ ଏବେ ତ ସନ୍ତୁଳା ଅମୃତ ଭଳି ଲାଗୁଛି ଆଉ ସନ୍ତୁଳା ବିନା ବି କୋଉ ମନ ମାନୁଛି ଖାଇବାରେ।

ବର୍ଷା ଏହି ଶାଶୁ ଶଶୁର ଙ୍କ ଏହି ଭଲ ପାଇବା ଦେଖି ଖାଲି ହସୁଥାଏ। ସେପଟରୁ ମିନତୀ ଦେବୀ ଆସିଲେ କହିଲେ ଶଶୁର ବୋହୁ ବୋଧେ ମୋରି ନାଁ ରେ କଥା ହଉଥିଲ। ବର୍ଷା କହି ଆସୁଥିଲା ବାପା ତ...... କଣ୍ଠ ବାବୁ ଅଟକେଇ ଦେଇକି କହିଲେ ମୁଁ ମୋ ମାଆ କୁ କହୁଥିଲି ମୋତେ ଟିକେ ଭଲ ଭଲ ଆଇଟମ ବନେଇବା ଶିଖେଇ ଦେବ। ଶିଖିନି ବୋଲି ସିନା ଏତେ କଥା ଶିଖି ଗଲା ପରେ ଦେଖିବା କିଏ କେତେ ଗରମ ଦେଖେଇବ କହି ଚାଲିଗଲେ।

ବର୍ଷା - ବୋଉ ବାପା ଙ୍କୁ କିନ୍ତୁ ତମେ ମୂଳରୁ ଖାଇବା ଶିଖେଇବାର ଥିଲା ତମ ପୁଅଙ୍କୁ ତ ସବୁ ଶିଖେଇ ଦେବି ।ରାନ୍ଧିବା ଘର କାମ ଖାଲି କଣ ସ୍ତ୍ରୀ ଲୋକ ମାନଙ୍କ ର ଦାୟିତ୍ଵ?

ମିନତୀ ଦେବୀ - ମାନୁଛି ତୋ ବାପା ଙ୍କୁ ରୋଷେଇ ଆସେନି କିନ୍ତୁ ଘର କାମ କରିବାରେ କେବେ ହେଳା କରି ନାହାନ୍ତି। ବାସନ ମାଜିବା ଠୁ ବାକି ଘର କାମ ମୋ ସହ ସବୁ ବାଣ୍ଟି ନେଇଛନ୍ତି ଏହି ତିରିଶ ବର୍ଷ ହେଲା । ରୋଷେଇ ବି ବହୁତ ଚେଷ୍ଟା କରିଛନ୍ତି ହେଲେ ଏମିତି ଖାଇବା କରନ୍ତି ନିଜେ ବି ପାଟିରେ ଦିଅନ୍ତିନି ଆଉ ପ୍ରତିଥର ବାସନ ପୋଡ଼ି ଦେଲେ ଯେ ମୁଁ ତାଙ୍କ ରୋଷେଇ ଉପରେ ରୋକ୍ ଲଗେଇ ଦେଉଛି।

ତାପରେ ଦୁହେଁ ଶାଶୁ ବୋହୂ ହସି ଉଠିଲେ।

ପରଦିନ ସକାଳୁ କଣ୍ଠ ବାବୁ କହିଲେ ଆଜି କଣ ପୁଣି ରୁଟି ସନ୍ତୁଳା। ମୋ କଥା ର ଗୁରୁତ୍ଵ ହିଁ ନାହିଁ। ମିନତୀ ଦେବୀ କହିଲେ ନା ବୋହୂ ଆଜି ପୁରୀ ଆଳୁ କଷା ଵନେଇଛି ସେଇଟା ନେଇଯାଅ । କଣ୍ଠ ବାବୁ ପ୍ରଶ୍ନ କଲେ କାହିଁ ତମେ ଆଜି ସନ୍ତୁଳା ବନେଇନ କି ? ମିନତୀ ଦେବୀ କହିଲେ ବନେଇଛି ଯେ ତମକୁ ତ ମୋ ସନ୍ତୁଳା ପସନ୍ଦ ଲାଗୁନି କାହିଁକି ନେବ ସେଟା ମୋ ପୁଅ କୁ ଦେଇଦେବି। କଣ୍ଠ ବାବୁ କହିଲେ ଛାଡ଼ ଛାଡ଼ ବନେଇଛ ଯଦି ଆଜି ଟା ଦେଇଦିଅ ବୋହୂ ଯାହା ବନେଇଛି ମୋ ପୁଅ କୁ ଦେଇଦବ। ମୁଁ ସିନା ଏହି ସନ୍ତୁଳା ଖାଇ ଖାଇ କି ଜୀବନ ସଂତୁଲି ସାରିଲିଣି ମୋ ପୁଅ ତାକୁ ଖାଇ କଷ୍ଟ ନ ପାଉ ମୋ ପୁଅ ତ ଭଲ ଖାଇବା ଖାଉ। ଏତିକି କହି ସନ୍ତୁଳା ଟିଫିନ୍ ଟାକୁ ନେଇ ଚାଲିଗଲେ।

ଆଜି ମିନତୀ ଦେବୀ ଙ୍କ ରାଗ ଆଉ ଦେଖେ କିଏ। ଏତେ ବର୍ଷ ଯାଏଁ ଭାବୁଥିଲେ ଯେ ସେ ଥଟ୍ଟା କରୁଛନ୍ତି ଆଜି କଥା ଟା କିନ୍ତୁ ସିଧା ବାଧି ଗଲା। ବର୍ଷା ବହୁତ୍ ବୁଝାଇବାକୁ ଚେଷ୍ଟା କଲା ହେଲେ ତାଙ୍କର ଜିଦ୍ ସେ ଆଉ ସନ୍ତୁଳା ବନେଇବେନି।

ତା ପରଦିନ ପୁଣି ଅଫିସ ବାହାରିବା ର ସମୟ। ବର୍ଷା ଆଣି ଥୋଇଦେଇଗଲା ଟିଫିନ୍ ଟି କହିଲା ବାପା ବୋଉ ତ ରାଗିଛନ୍ତି ଆଜି ମୁଁ ଟିଫିନ୍ ବନେଇଛି । କଣ୍ଠ ବାବୁ ହଉ କହିଦେଇ ନେଇଗଲେ। କଣ୍ଠ ବାବୁ କହିଲେ ଅଫିସ୍ ରୁ ଫେରି ମାଆ ତୋ ହାତ ରନ୍ଧା ଭାରି ସୁଆଦିଆ ତୋତେ ସନ୍ତୁଳା ବନେଇ ଆସେ ? ବର୍ଷା କହିଲା ନାହିଁ ବାପା କେତେ ଥର ଭାବିଛି ଶିଖିବି ଆଉ ଶିଖି ପାରିନି। Youtube ରୁ ଦେଖି କରିଥିଲି ହେଲେ ଜମା ଭଲ ଲାଗିଲାନି।

କଣ୍ଠ ବାବୁ ଅନେକ ଉପାୟ ରେ ମନେଇବାକୁ ଚେଷ୍ଟା କଲେଣି ମିନତୀ ଦେବୀ ଙ୍କୁ ହେଲେ ଏଥର ଲାଭ ନାହିଁ। ଦୁଇ ତିନି ଦିନ ଏମିତି ଚାଲିଲା କଣ୍ଠ ବାବୁ ଅଫିସ୍ ଯିବେନି ତାଙ୍କ ଦେହ ଭଲ ନାହିଁ। ପେଟ ଯନ୍ତ୍ରଣା ଆଜି ଚରମ ସୀମା ରେ। ପୁଅ ବୋହୂ ଡାକ୍ତର ଦେଖେଇ ଆଣିଲେ ସେପଟେ ମିନତୀ ଦେବୀ ଅଭିମାନ ରେ ଥିଲେ ମଧ୍ୟ ଭାରି ବ୍ୟସ୍ତ ବିବ୍ରତ ହେଉ ଥାଆନ୍ତି କଣ ହୋଇଗଲା ଭାବି।

କଣ୍ଠ ବାବୁ କହୁଥିଲେ ତମେ ଯାହା କୁହ ମୋର ଯୋଉ ପେଟ ସମସ୍ୟା ଇଏ ବହୁତ୍ ଆଗରୁ ତମ ବୋଉ ର ସନ୍ତୁଳା ହିଁ ମୋତେ ଠିକ୍ କରି ରଖିଥିଲା। ସିଏ ସନ୍ତୁଳା ର କି ଯାଦୁ କରୁଥିଲା କେଜାଣି ମୋ କଲେଜ ବେଳର ପେଟ ସମସ୍ୟା କାହିଁ କେତେ ବର୍ଷ ରୁ ନଥିଲା। ଖାଲି ବୋଉ ର ସନ୍ତୁଳା ନୁହେଁ ତୁମ ବୋଉ ର ଯୋଉ ଝଗଡ଼ା ତା ବିନା ବି ମୋତେ ଭଲ ଲାଗୁନି।

ଆଜି ଦ୍ୱିପ୍ରହର ଖାଇବା ରେ ମିନତୀ ଦେବୀ ଖାଇବା ନେଇ ଆସିଛନ୍ତି ସାଙ୍ଗରେ ସନ୍ତୁଳା ବି ନେଇକି। କଣ୍ଠ ବାବୁ ଶାନ୍ତି ରେ ଆଜି ଖାଇଲେ । ହେଲେ ମିନତୀ ଦେବୀ ଚୁପ୍ ହୋଇ ରହିବା ଦେଖି କଣ୍ଠ ବାବୁ କହିଲେ ସବୁ ତମ ପାଇଁ ଖାଲି ସନ୍ତୁଳା ଦେଇ ଦେଇ ମୋ ପେଟ ତେଲ ମସଲା ଖାଇବା ରେ କାମ କରୁନି। ମିନତୀ ଦେବୀ କହିଲେ ଚୁପ୍ ରୁହ ମ ପେଟ ର ଅବସ୍ଥା ଯାହା ବେଶୀ କଥା ଭଲ ଲାଗୁ କି ନ ଲାଗୁ ୟାକୁ ହିଁ ଖାଇବ। ଏବେ ପୁରୁଣା ସ୍ତ୍ରୀ ଙ୍କୁ ପାଇ କଣ୍ଠ ବାବୁ ବି ଖୁସ୍।

ସେପଟରୁ ବର୍ଷା ତାଙ୍କ ସ୍ବାମୀ ସମୀର ଙ୍କୁ କହୁଥିଲେ କଥା ଦିଅ ଆମ ଭିତରେ ବୟସ ହେଲା ପରେ ଏମିତି ଭଲ ପାଇବା ଥିବ। ସମୀର ଉତ୍ତର ଦେଲା - ହିଁ ଏହି ସନ୍ତୁଳା ରାଣ।

ଦୁହେଁ ଜୋରରେ ହସି ଉଠିଲେ।

ସନ୍ତୁଳା - A love story

କଥା ଦିଅ ବୟସ ହେଲା ପରେ ଆମ ଭିତରେ ଏତେ ଭଲ ପାଇବା ଥିବ। ହଁ ସନ୍ତୁଳା ରାଣ।