ଖରା ହେଉ ବା ବର୍ଷା, ଶୀତ ହେଉ ଅବା କାକର; ଭାତ କି ରୁଟି ସଙ୍ଗେ ସନ୍ତୁଳା ଟିକେ ହୋଇଗଲେ ପେଟକୁ କାହିଁ କେତିକି ଚାଲିଯାଏ କିଛି ବି ଜଣା ପଡ଼େନି। ଓଡ଼ିଶାର ପଖାଳ କଂସା ସାଙ୍ଗେ ଯଦି ଏହାକୁ ଯୋଡ଼ି ଦିଆଯାଏ, ତେବେ କିଏ ବା ନାକ ଯାଏଁ ନଭିଡ଼ିକି ଖାଇବ। ପଖାଳ କଂସାରେ ଦରପାଚିଲା ଆମ୍ବ ଡେମ୍ଫି ଛିଣ୍ଡାଇ ପକାଯାଇଥିବ ନଶା, ପାଖରେ ବଡ଼ି ଚୁରା ତାଟିଏ, ଆଳୁ ପୋଡ଼ାରେ ଚୁନା ଚୁନା କଟା ଯାଇଥିବା ପିଆଜ, କଟା କଞ୍ଚାଲଙ୍କା ଓ ସୋରିଷ ତେଲ ପକାଇ ହୋଇଥିବ ଆଳୁ ଚକଟାଟେ, ଆମ୍ବ ସହ ରସୁଣ ପୋଡ଼ା,କଞ୍ଚାଲଙ୍କା-ଲୁଣ ଦଳା ଚାଖଣା ଆଉ ତା' ପାଖକୁ ଥିବ ଭିନ୍ନ ଭିନ୍ନ ପରିବା ମିଶା ଘାଣ୍ଟ ସନ୍ତୁଳାଟାଏ; ୟାକୁ ଦେଖୁ ଦେଖୁ ଭୋକ ନ ହେଉଥିବା ଲୋକଙ୍କୁ ବି ଭୋକ ହୋଇଯିବ।

ସନ୍ତୁଳା ଖାଦ୍ୟକୁ ରନ୍ଧନ କରିବା ଯେତେ ସହଜ ତାହା ଅନ୍ୟ କେଉଁ ଖାଦ୍ୟ ରନ୍ଧନ ସହ ତୁଳନା କରାଯାଇ ନ ପାରେ। ଘରେ ଯେ କୌଣସି ପରିବା ଥାଉ କଡ଼େଇରେ ତେଲ, ଜିରା, ସୋରିଷ, ଚିରା କଞ୍ଚାଲଙ୍କା ଫୁଟଣେ ମାରିଦେଇ କଟା ହୋଇଥିବା କଞ୍ଚା ପନିପରିବା ସହ ଘାଣ୍ଟି ଅଳ୍ପ ଲୁଣ ଛିଞ୍ଚି ଦେଇ ଘୋଡ଼େଇ ଦେଲେ କିଛି ସମୟ ମଧ୍ୟରେ ପ୍ରସ୍ତୁତ ହୋଇଯାଏ ଆପଣଙ୍କ ସୁସ୍ବାଦୁ ବ୍ୟଞ୍ଜନ 'ସନ୍ତୁଳା'। କେହି କେହି ଅଳ୍ପ ପାଣି ଦେଇ ଏହାକୁ ଝୋଳ ଝୋଳିଆ ରଖନ୍ତି ତ ଆଉ କେହି କେହି ଘାଣ୍ଟିଆ ଚକଟା କରି କାଠୁଆ ରଖନ୍ତି। ଏହା ପାଇଁ ନାଁ ଖର୍ଚ୍ଚ ହୁଏ ଅଧିକ ତେଲ, ମସଲା, ହଳଦୀ ଆଉ ନାଁ ନଷ୍ଟ ହୁଏ ଅଧିକ ସମୟ। ଖୁବ୍ ଅଳ୍ପ ସମୟ ମଧ୍ୟରେ ସୁସ୍ବାଦୁ ଓ ପୁଷ୍ଟିକର ବ୍ୟଞ୍ଜନଟିଏ ପ୍ରସ୍ତୁତ ହୋଇଯାଏ। ଆଉ ସବୁଠୁ ବଡ଼ ମଜା କଥା ହେଲା ଧନୀ ହେଉ ଅବା ଗରିବ; ରୋଗୀ ହେଉ ଅବା ନିରୋଗୀ ସମସ୍ତଙ୍କୁ ଯୋଗାଇଦିଏ ଏହି ବ୍ୟଞ୍ଜନଟି ଭରପୂର ଶକ୍ତି। ଆଜି କାଲିର ଅଦ୍ଭୁତ ରୋଗ ପାଇଁ କେଉଁ ଖାଦ୍ୟ ଆପଣଙ୍କୁ ଖାଇବାକୁ ହୁଏତ ଡ଼ାକ୍ତର ମନା କରିଦେଇଥିବ କିନ୍ତୁ ସନ୍ତୁଳାକୁ କେବେ ନୁହଁ। ଘରେ ଆଳୁ-ବାଇଗଣ ପଡ଼ିଛି ସନ୍ତୁଳା କରିଦେଇ ପାରିବ, ଘରେ ଆଳୁ-ଜହ୍ନି ପଡ଼ିଛି ସନ୍ତୁଳା କରିଦେଇ ପାରିବ, ଘରେ ଆଳୁ-ଦେଶୀ ପୋଟଳ ପଡ଼ିଛି ସନ୍ତୁଳା ହୋଇପାରିବ, ଘରେ ଆଳୁ-ବୋଇତିଆଳୁ ପଡ଼ିଛି ସନ୍ତୁଳା ହୋଇପାରିବ, ଘରେ ଆଳୁ-ଅମୃତଭଣ୍ଡା ପଡ଼ିଛି ସନ୍ତୁଳା ହୋଇପାରିବ, ଘରେ ଆଳୁ-ସାରୁ ପଡ଼ିଛି ସନ୍ତୁଳା ହୋଇପାରିବ; ଏମିତି ଅନେକ ପ୍ରକାରର ସନ୍ତୁଳା କରିହେବ। ଚାହିଁଲେ ବିଭିନ୍ନ ପନିପରିବା ମିଶାଇ ସନ୍ତୁଳା କରିପାରିବେ ଅଥବା ଆଳୁ ସହ କିଛି ବି ପନିପରିବା ମିଶାଇ କରି ପାରିବେ ସ୍ବାଦିଷ୍ଟ ସନ୍ତୁଳା। ସନ୍ତୁଳାରେ ବିଭିନ୍ନ କଞ୍ଚା ପନିପରିବା ପଡୁଥିବାରୁ ଏଥିରୁ ଭରପୁର ଭିଟାମିନ୍ ଶରୀରକୁ ମିଳେ। ଏଣୁ ରୋଗୀମାନଙ୍କୁ ଡ଼ାକ୍ତର ସନ୍ତୁଳା ଖାଇବାକୁ ଉପଦେଶ ଦେଇଥାନ୍ତି।

ତେବେ ଆପଣମାନେ ବିଭିନ୍ନ ସନ୍ତୁଳା ଖାଇଛନ୍ତି। କିନ୍ତୁ, କେବେ ବାଉଁଶ କରଡ଼ା ଓ ମିଠା ମକା ମିଶାଇ ସନ୍ତୁଳା କରି ଖାଇଛନ୍ତି କି? ଶୁଣିଲେ ତ ଆପଣମାନଙ୍କୁ ନିଶ୍ଚୟ ଆଶ୍ଚର୍ଯ୍ୟ ଲାଗିବ, ଏହା କି ପ୍ରକାରର ସନ୍ତୁଳା?! ଯଦି ଆପଣମାନେ ଏହି ସନ୍ତୁଳା ପ୍ରସ୍ତୁତ କରି ଖାଇ ନାହାଁନ୍ତି, ତେବେ ଆଜି ହିଁ ପ୍ରସ୍ତୁତ କରି ଖାଆନ୍ତୁ। ଜାଣିପାରିବେ ଏହା କିପରି ସୁସ୍ବାଦୁ। ଥରେ ପ୍ରସ୍ତୁତ କରି ଖାଇଲେ ବାରମ୍ବାର ଖାଇବାକୁ ମନ ହେବ। ତେବେ ଆସନ୍ତୁ ଜାଣିବା ଏହାର ରେସିପି।

ବାଉଁଶ କରିଡ଼ ଓ ମିଠା ମକାର କ୍ଷୀର ପକା ସନ୍ତୁଳା

ଆବଶ୍ୟକୀୟ ସାମଗ୍ରୀ:-

୧. ବାଉଁଶ କରିଡ଼

୨. ମିଠା ମକା

୩. ଗାଈ କ୍ଷୀର

୪. ଅଳ୍ପ ଚାଉଳ ଚୁନା

୫. ଟମାଟ

୬. ପିଆଜ

୭. ଜିରା

୮. ଅଳ୍ପ ମସଲା ଗୁଣ୍ଡ

୯. ସ୍ବାଦ ଅନୁସାରେ ଲୁଣ

୧୦. ସୋରିଷ

୧୧. କଞ୍ଚାଲଙ୍କା

୧୨. ଭୃଷଙ୍ଗ ପତ୍ର

୧୩. ରିଫାଇନ୍ଡ୍ ତେଲ

ପ୍ରସ୍ତୁତି ପ୍ରଣାଳୀ:-

ପ୍ରଥମେ ବାଉଁଶ କରିଡ଼କୁ ଚୁନାଚୁନା କରି ଛୋଟ ଛୋଟ କ୍ୟୁବ୍ ସେପ୍ ର କାଟିଦେବେ। ମକା ମଞ୍ଜି ଛୁରୀ ଦ୍ବାରା କାଟି ଛଡ଼ାଇ ଗୋଟିଏ ପାତ୍ରରେ ଦୁଇଟିଯାକକୁ ପରିସ୍କାରରେ ଧୋଇ ରଖିବେ। ଏବେ ଗ୍ୟାସ୍ ଅନ୍ କରି କଡ଼ାଇରେ ତେଲ ପକାଅ। ତେଲ ଅଳ୍ପ ଗରମ ହୋଇଆସିଲେ ଏଥିରେ ଜିରା, ସୋରିଷ, କଟା ପିଆଜ, ଭୃଷଙ୍ଗ ପତ୍ର ଓ କଟା କଞ୍ଚାଲଙ୍କା ପକାଇ ଅଳ୍ପ ସମୟ ଯାଏଁ ଭାଜନ୍ତୁ। ପିଆଜ ଅଳ୍ପ ଝାଉଁଳି ଆସିଲେ ଚୁନାଚୁନା କଟା ଟମାଟ ପକାନ୍ତୁ। ଭଲ ଭାବରେ ଘାଣ୍ଟି ଘୋଡ଼ାଇ ଦିଅନ୍ତୁ। ଟମାଟ ମିଳି ଆସିଲେ ଏଥିରେ ବାଉଁଶ କରିଡ଼ ଓ ମକା ମଞ୍ଜି ପକାଇ ଭଲସେ ଗୋଳାଇ ଭାଜନ୍ତୁ। ଏଥିରେ ଗୋଟିଏ ଛୋଟ ଟେବୁଲ୍ ଚାମଚ୍ ଗରମ ମସଲା ଓ ଲୁଣ ପକାଇ ଗୋଳାନ୍ତୁ। ଏବେ କିଛି ସମୟ ପାଇଁ ଏହାକୁ ଘୋଡ଼ାଇ ସିଝିବାକୁ ଛାଡ଼ି ଦିଅନ୍ତୁ। ଏବେ ଅନ୍ୟ ଏକ ପାତ୍ରରେ କ୍ଷୀରରେ ଅଳ୍ପ ଚାଉଳ ଚୁନା (୨ ଚାମଚ୍) ମିଶାଇ ଭଲସେ ଫେଣ୍ଟି ଦିଅନ୍ତୁ। କରିଡ଼ ଓ ମକା ସିଝି ଆସିଲେ ଢ଼ାଙ୍କୁଣୀ ବାହାର କରି କ୍ଷୀର ଓ ଚାଉଳ ଚୁନା ମିଶ୍ରଣକୁ ଢ଼ାଳି ଭଲସେ ଘାଣ୍ଟି ଅଳ୍ପ ସମୟ ଫୁଟିବାକୁ ଛାଡ଼ି ଦିଅନ୍ତୁ। ଧ୍ୟାନ ଦିଅନ୍ତୁ ଯେପରିକି କ୍ଷୀର ବାଉଁଶ କରିଡ଼ ଓ ମକାର ଅଳ୍ପ ଉପରକୁ ରହିବ। କିଛି ସମୟପରେ ଗ୍ୟାସ୍ ବନ୍ଦ କରି ଓହ୍ଲାଇ ଦିଅନ୍ତୁ। ଏବେ ପ୍ରସ୍ତୁତ ହୋଇଗଲା ଆପଣମାନଙ୍କ ବାଉଁଶ କରିଡ଼ ଓ ମିଠା ମକାର କ୍ଷୀର ପକା ସନ୍ତୁଳା।

ଏହି ସନ୍ତୁଳା ସହ ଗରମା ଗରମ୍ ରୁଟି, ପାଉଁରୁଟି ଅବା ପରଟାକୁ ଖାଇ ପାରିବେ। ଏହା ଖୁବ୍ ସୁସ୍ବାଦୁକର। ଆଉ ପୁଷ୍ଟିକର ଖାଦ୍ୟ। ଛୋଟ ପିଲାମାନଙ୍କ ପାଇଁ ମାଆମାନେ ଖୁବ୍ ଶୀଘ୍ର ପ୍ରସ୍ତୁତ କରି ଟିଫିନ୍ ବକ୍ସରେ ଦେଇ ପାରିବେ। ଆଜିକାଲିର ଯୁଗରେ ଏମିତିକା ବାଉଁଶ କରିଡ଼ ଓ ମିଠା ମକାର କ୍ଷୀର ପକା ସନ୍ତୁଳା କେଉଁଠି ବି

ଖାଇବାକୁ ପାଇବେନି।

=×=×=×=

ସନ୍ତୁଳା - ଓଡ଼ିଆ ପାରମ୍ପରିକ ଖାଦ୍ୟ

ସନ୍ତୁଳିତ ଆହାର ସନ୍ତୁଳା