ବଡ଼ ରସିକିଆ କାଳିଆ ମୋହର
ସାତ ବାରେ ସଜ ତାର,
ସାତ ବାରେ ସାତ ବର୍ଣ୍ଣ ବସ୍ତ୍ର ପିନ୍ଧେ
ରୂପ କରି ମନୋହର ।

ରବିବାର ଅଟେ ମନଲୋଭା ଦିନ
ନାଲି ରଙ୍ଗ ମୋହେ ମନ,
ନାଲି ପାଟବସ୍ତ୍ର ପିନ୍ଧି ଯେ କାଳିଆ
ଶ୍ରୀକ୍ଷେତ୍ରେ ଯାଏ ଶୟନ।

ସୋମବାର ଅଟେ ମନ ମୁଗ୍ଧକର
ଧଳା ବସ୍ତ୍ରେ ମିଳେ ଶାନ୍ତି,
ଧଳାଛିଟ ପାଟ ବସ୍ତ୍ର ପରିଧାନେ
ମନଲୋଭା ରୂପକାନ୍ତି।

ମଙ୍ଗଳବାରରେ ମଙ୍ଗଳ ରଚଇ
ପାଞ୍ଚ ରଙ୍ଗ ଦୃଶ୍ୟାବଳୀ,
ପାଞ୍ଚ ରଙ୍ଗ ବାଲା ବାର ପଟିଆରେ
ଜଗା ହୁଏ ଖିଲିଖିଲି।

ବୁଧବାରେ ବୁଦ୍ଧୀ ଜନ ମୋହ ଯା'ନ୍ତି
ସ୍ୱଚ୍ଛ ଗଗନର ମୋହେ,
ନୀଳ ରଙ୍ଗ ବସ୍ତ୍ର ପିନ୍ଧଇ ତ ଯେବେ
କାଳିଆ ତାହାର ଦେହେ।

ଗୁରୁବାରେ ପରା ବଢ଼ଇ ଗୁରୁତ୍ଵ
ମନ ଉଡ଼େ ବୃନ୍ଦାବନେ,
ହଳଦିଆ ପାଟବସ୍ତ୍ର ଯେ ପିନ୍ଧିଣ
ମୁକ୍ତି ଯାଚେ ତା ଦର୍ଶନେ।

ଶୁକ୍ରବାର ଅଟେ ଶାନ୍ତ ପରିବେଶ
ଶାନ୍ତିର ପ୍ରତୀକ ଯେହ୍ନେ,
ଧଳା ପାଟ ବସ୍ତ୍ର ପିନ୍ଧି କରି ଜଗା
ଶାନ୍ତି ଭରେ ଭକ୍ତ ମନେ।

ଶନିବାରେ କଳା ମୁହଁ ସାଥେ ମିଶେ
କାଳିଆ ବାର ବସନ,
କଳା ମୁଖ ସାଥେ କଳା ପାଟବସ୍ତ୍ର
କେଡ଼େ ଦୃଶ୍ୟ ମନୋରମ।

ରସିକ ଠାକୁର ଭାରି ରସିକିଆ
ସାପ୍ତାହିକ ପରିଧାନ,
ଏତେ ସଜ ଜଗା କାହିଁ ପାଇଁ ହେଉ
ରାଧା ପାଖରେ କି ମନ?

ସାତବାରେ ସାତ ସଜ

ଜଗାର ସାପ୍ତାହିକ ପରିଧାନ