ଯାହା ଅଛି ତହିଁ ଦେଖ ଶିଖିବାର କଥା

ତହୁଁ ଶିକ୍ଷା ଲଭେ ଜ୍ଞାନୀ ନତ କରି ମଥା

ଯେଦିନୁ ମାନବ ଜାତି ସମ୍ଭୂତ ଜଗତେ

ସେଦିନୁ ଚାଲିଛି ତାର ଶିକ୍ଷା ଅବିରତେ।

ଶିକ୍ଷା ହେଉଛି ମାନବ ଜାତି ର ମେରୁଦଣ୍ଡ। ଶିକ୍ଷା ବିନା ଏହାକୁ କଳ୍ପନା କରାଯାଇ ନପାରେ। ଉତ୍କଳ ମଣି ଗୋପବନ୍ଧୁଙ୍କର ଭାଷା ରେ "ଶିକ୍ଷା ବିନା ମାନବ ଜାତି ପଶୁ ତୁଲ୍ୟ ହୋଇଥାନ୍ତି। କେବେ ପଶୁ ପରି ସହନ୍ତି ତ କେତେବେଳେ ପଶୁ ପରି ମାଡ଼ି ବସନ୍ତି।" ଶିକ୍ଷା ହିଁ ମାନବ ଜାତି କୁ ଏକ ସଭ୍ୟ ସମାଜ ଆଡ଼କୁ ବାଟ କଡ଼ାଇ ଥାଏ। ଆଉ ଏହି ଶିକ୍ଷା ଯେ କେବଳ ତଥାକଥିତ ପାଠ୍ୟ ପୁସ୍ତକ ଶିକ୍ଷା ରେ ସୀମିତ ନୁହେଁ ତାହା କହିବା ଆବଶ୍ୟକ ମନେ କରୁ ନାହିଁ। ଆମର ପାଠ୍ୟ ପୁସ୍ତକର ଶିକ୍ଷା ଠାରୁ , ନୈତିକ , ବୃତ୍ତିଗତ , ବ୍ୟାବହାରିକ ଓ ଜୀବନ ର ଶିକ୍ଷା ଗୁରୁତ୍ୱପୂର୍ଣ୍ଣ।

ପ୍ରଥମେ ଜାଣିବା ଶିକ୍ଷା ର ଅଭାବ ହେଲେ କଣ ହୁଏ ଅର୍ଥାତ୍ ଶିକ୍ଷା ର ଆବଶ୍ୟକତା କଣ ? ଥରେ ଭାବନ୍ତୁ ତ ସେ ଉଡାଜାହାଜ ଚାଳକ ହେଉ ଅବା ଡ଼ାକ୍ତର ସେ ମହାକାଶଚାରୀ ହେଉ ବା ପୋଲିସ ସେ ପ୍ଲମ୍ବର୍ ହେଉ ଅବା କମାର ସେ ଯଦି ତାର ଉପଯୁକ୍ତ ଶିକ୍ଷା ନପାଇଥିବେ ତେବେ କଣ ଆମର ଜୀବନ ସୁରୁଖୁରୁ ରେ ଚାଲି ପାରୁଥାନ୍ତା ତେବେ ଉତ୍ତର ଅବଶ୍ୟ ଆସିବ ନା। ଜୋତା ସିଲେଇ ଠାରୁ ଚଣ୍ଡୀ ପାଠ ପର୍ଯ୍ୟନ୍ତ ବିନା ଶିକ୍ଷା ଲାଭ ରେ ତାହା ହୋଇପାରିବ ନାହିଁ।

ଆମେ ଏକ ଉତ୍ତମ ଉଦାହରଣ ରୁ ବି ବୁଝି ପାରିବା। କେବେ ଭାବିଛନ୍ତି କି ଭାରତ ରେ ବିଶେଷ କରି ଓଡ଼ିଶା ରେ ଚାଷ ଏକ ଲାଭ ଦାୟକ ବୃତ୍ତି କାହିଁକି ନୁହେଁ ? ଏହାର ମୁଖ୍ୟ କାରଣ ହେଉଛି ଚାଷ ସମ୍ପର୍କିତ ଶିକ୍ଷା ର ଅଭାବ ରୁ। ଏଠି ଲୋକମାନେ ଯେତେବେଳେ ପାଠ ପଢ଼ିବା ରେ ବିଫଳ ହୋଇ ଯାଆନ୍ତି ଓ ଅନ୍ୟ ବୃତ୍ତି ସମ୍ଭାଳି ପାରନ୍ତି ନାହିଁ ତେବେ ସେମାନେ ଚାଷ କୁ ନିଜର ବୃତ୍ତି ଭାବରେ ଚୟନ କରି ଦିଅନ୍ତି। ହେଲେ ଉପଯୁକ୍ତ ଚାଷ ସମ୍ପର୍କିତ ଶିକ୍ଷା ଯଦି ସେ ଗ୍ରହଣ କରନ୍ତେ ତେବେ ଏତେ ହଇରାଣ ନ ହୋଇ ସ୍ୱଳ୍ପ ଜମିରୁ ମଧ୍ୟ ଆଧୁନିକ ଓ ଉନ୍ନତ ପ୍ରଣାଳୀ ରେ ଜମିରୁ ଅଧିକ ଉତ୍ପନ୍ନ କରି ପାରନ୍ତେ।

ଏବେ ଦେଖିବା ଶିକ୍ଷା ଏକ ସଫଳ କ୍ୟାରିୟର ଗଠନ ରେ କେମିତି ନିର୍ଣ୍ଣାୟକ ଭୂମିକା ଗ୍ରହଣ କରେ। ପ୍ରଥମତଃ ବାଲ୍ୟ କାଳ ରୁ ଶିକ୍ଷା ଗ୍ରହଣ କରିବା ଦ୍ୱାରା ମସ୍ତିଷ୍କ ର ବିକାଶ ଘଟିଥାଏ ଓ ଶିକ୍ଷାନୁଷ୍ଠାନ ର ଏକ ନିର୍ଦ୍ଦିଷ୍ଟ ବାତାବରଣ ରେ ମନୁଷ୍ୟ ଶୃଙ୍ଖଳିତ ହେବା ସଙ୍ଗେ ସଙ୍ଗେ ଛାତ୍ର ମାନଙ୍କ ସାମଗ୍ରିକ ବିକାଶ ଘଟିଥାଏ ଯାହା ତାଙ୍କୁ ଜୀବନ ର ପ୍ରତିଟି ମୋଡ଼ ରେ ସାହାଯ୍ୟ କରେ। ଏହି ମନୁଷ୍ୟ ଗଢ଼ିବାର ର ବ୍ୟବସ୍ଥା କେବଳ ଗୋଟିଏ ଦିନ ର ନୁହେଁ ଯେମିତି ଏକ ବିରାଟ ବଟ ବୃକ୍ଷ ହେବା ପାଇଁ ଛୋଟ ଗଛ ଠାରୁ ସମୟ ଓ ପରିସ୍ଥିତି ଲାଗେ। ବିଭିନ୍ନ ଖାଲ ଢିପ ଦେଇ ଅତିକ୍ରମ କଲା ପରେ ହିଁ ମଣିଷ ଏକ ପୂର୍ଣ୍ଣାଙ୍ଗ ମଣିଷ ରେ ପରିଣତ ହୁଏ।

ଥରକୁ ଥର ପଡ଼ି ତଳେ

ଚାଲଇ ଅଭ୍ୟାସର ବଳେ।

ଆଉ ଏହି ଶିକ୍ଷା ର ସୋପାନ ତାଙ୍କୁ ପ୍ରତି ପ୍ରତିକୂଳ ପରିସ୍ଥିତି ପାଇଁ ପ୍ରସ୍ତୁତ କରାଇ ଥାଏ।

ଏବେ ଜାଣିବା ଏହି ଶିକ୍ଷା ନିଜର ଜୀବନ ରେ ବା କ୍ୟାରିୟର ରେ କିପରି ସାହାଯ୍ୟ କରେ। ପ୍ରଥମତଃ ଆପଣ ଙ୍କ ସଫଳ ଆନୁଷ୍ଠାନିକ ଯୋଗ୍ୟତା ଆପଣଙ୍କୁ ଆପଣଙ୍କ ପସନ୍ଦ ର ବୃତ୍ତି ନିକଟକୁ ଆହୁରି ନିକଟତର କରିଦିଏ। ଆପଣଙ୍କୁ ଆପଣଙ୍କ ଲକ୍ଷ ସ୍ଥଳ ଆଡ଼କୁ ଅଗ୍ରସର କରାଏ , ଲୋକଙ୍କ ସହ ପରିଚିତ କରାଏ , ଯେଉଁ ବିଷୟରେ ଆପଣଙ୍କୁ ଆଗକୁ ବଢ଼ିବାରେ ଅଛି ସେଥିରେ ଆପଣଙ୍କୁ ଏକ ମଜବୁତ୍ ସ୍ତମ୍ଭ ପ୍ରଦାନ କରେ। ଦଶମ ଶ୍ରେଣୀ ପର୍ଯ୍ୟନ୍ତ ଶିକ୍ଷାନୁଷ୍ଠାନ ଶିକ୍ଷା କୁ ଆନୁଷ୍ଠାନିକ ଶିକ୍ଷା ର ପ୍ରଥମ ସୋପାନ ମନା ଯାଇଥାଏ ତାପରେ ନିଜ ନିଜର ରୁଚି ହିସାବରେ କଳା , ବାଣିଜ୍ୟ ଓ ବିଜ୍ଞାନ ଦେଇ ଧୀରେ ଧୀରେ ଗତି କରନ୍ତି ଓ ଅନ୍ୟାନ୍ୟ ଧନ୍ଦା ମୂଳକ ଶିକ୍ଷା ମଧ୍ୟ ଉପଲବ୍ଧ ଅଛି। ଆପଣ କିଛି ବି ବାଛି ପାରିବେ ନିଜର ରୁଚି ହିସାବରେ ହେଲେ ଏତିକି ଜାଣିବା ଆବଶ୍ୟକ ଶିକ୍ଷା ର ବିକଳ୍ପ ନାହିଁ। ଆନୁଷ୍ଠାନିକ ଶିକ୍ଷା ବ୍ୟତୀତ ଅଣଆନୁଷ୍ଠାନିକ ଶିକ୍ଷା ମଧ୍ୟ ଆପଣଙ୍କୁ ସଫଳ କ୍ୟାରିୟର ପ୍ରଦାନ କରି ପାରିବ ଯେମିତି ସିଙ୍ଗର ହେବା ପାଇଁ ସଙ୍ଗୀତ ତାଲିମ୍ , ନୃତ୍ୟଶିଳ୍ପୀ ପାଇଁ ନୃତ୍ୟ ପ୍ରଶିକ୍ଷଣ ହେଲେ ଯେବେ ଆନୁଷ୍ଠାନିକ ଓ ଅଣ ଆନୁଷ୍ଠାନିକ ଶିକ୍ଷା ମିଶି ଯାଇଥାଏ ତେବେ ଏକ ସଫଳ କ୍ୟାରିୟର ମିଳିବାର ସମ୍ଭାବନା କୁ ଆଡେ଼ଇ ଦିଆ ଯାଇନପାରେ।

ଆମର ଥିଓରୀ ଶିକ୍ଷା ସହ practical ଶିକ୍ଷା ର ମଧ୍ୟ ଆବଶ୍ୟକତା ରହିଛି ଯେମିତି କି ସେହି ଶିକ୍ଷା କରାଯାଇଥିବା ଜ୍ଞାନ କୁ ଆମେ କ୍ୟାରିୟର ଗଠନ ରେ ବ୍ୟବହାର କରି ପାରିବୁ।

ଏହା ବ୍ୟତୀତ ନୈତିକ ଶିକ୍ଷା , ବୌଦ୍ଧିକ ଶିକ୍ଷା , ବ୍ୟାବହାରିକ ଶିକ୍ଷା ର ମଧ୍ୟ ଜୀବନରେ ଅନେକ ଗୁରୁତ୍ଵ ରହିଛି ଯେମିତି କି ଆମେ ଅନ୍ୟ ଶିକ୍ଷା ର ଉଚିତ୍ ଉପଯୋଗ କରି ପାରିବା। ଉଦାହରଣ ସ୍ୱରୂପ ବନ୍ଧୁକ ଶିକ୍ଷା ତ ଉଭୟ ପୋଲିସ ଓ ଡକାୟତ ପାଖରେ ଅଛି ହେଲେ ପୋଲିସ୍ ପାଇଥିବା ଦାୟିତ୍ୱବୋଧ ଶିକ୍ଷା ହିଁ ଉଭୟଙ୍କ କର୍ମ କୁ ଅଲଗା କରୁଛି।

କେବଳ ଯେ ପାଠ୍ୟ ପୁସ୍ତକ ପଢ଼ି ଡ଼ାକ୍ତର , ଇଞ୍ଜିନିୟର , ପ୍ରଫେସର୍ , ଆଇଏ ଏସ୍ ରେ ସୀମିତ ରହିଯିବା ତାହା ନୁହେଁ ଏତେ ବିଶାଳ କ୍ୟାରିୟର ବିକଳ୍ପ କୁ ଶିକ୍ଷା ଦ୍ଵାରା ସନ୍ଧାନ କରିବା ଉଚିତ୍। ସ୍କିଲ୍ଲ ଶିକ୍ଷା କରି ଏକବିଂଶ ଶତାବ୍ଦୀରେ ନିଜ ବୃତ୍ତି କୁ ସୁଦୃଢ଼ କରିବାର ଅଛି। Skills ଶିକ୍ଷା କରିବା ଅତ୍ୟନ୍ତ ଆବଶ୍ୟକ ଯାହା ଆପଣଙ୍କ bills pay କରିବାରେ ସାହାଯ୍ୟ କରିବ।

ପରିଶେଷରେ ଏତିକି କହି ପାରିବି ଶିକ୍ଷା ର ବିକଳ୍ପ ନାହିଁ। କୌଣସି ବି କ୍ୟାରିୟର ହେଉ ଅବା କୌଣସି ବି ବୃତ୍ତି ଶିକ୍ଷା ହିଁ ତୁମର ଜ୍ଞାନ ଉଦୟ କରିବ ଓ ତୁମ ଲକ୍ଷ ସ୍ଥଳ ଆଡ଼କୁ ଅଗ୍ରସର କରାଇବ।

ଧନ୍ୟବାଦ

କୈବଲ୍ୟ ନାୟକ

Kaibalya Nayak

ଶିକ୍ଷାର ମହତ୍ତ୍ୱ: ଏକ ସଫଳ କ୍ୟାରିୟରର ଚାବିକାଠି | Importance of Education: A Key to a Successful Career

ଶିକ୍ଷା ର ବିକଳ୍ପ ନାହିଁ। There's no substitution for education.