ଶିଶୁଦିବସ କେବଳ ଏକ ଉତ୍ସବ ନୁହେଁ, ଏହା ଏକ ପ୍ରମୁଖ ଦିବସ, ଯେଉଁଦିନ ଆମେ ଆମର ଭବିଷ୍ୟତ ନିର୍ମାତା ମାନଙ୍କୁ ସଂସ୍କୃତିର ମୂଲ୍ୟବୋଧ ସହିତ ଅଭିଷିକ୍ତ କରିପାରିବା। ଆଧୁନିକତାର ଦ୍ରୁତଗାମୀ ଯୁଗରେ ପିଲାମାନେ ନିଜର ମୂଳ ପରିଚୟ ଓ ସାଂସ୍କୃତିକ ମୂଲ୍ୟବୋଧରୁ ଦୂରେଇ ଯାଉଛନ୍ତି। ତେଣୁ ଶିଶୁ ଦିବସକୁ ଏକ ସାଂସ୍କୃତିକ ଶିକ୍ଷାର ମାଧ୍ୟମ ରୂପେ ବ୍ୟବହାର କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।

ଭାରତର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହାରଲାଲ ନେହରୁ ପିଲାମାନଙ୍କୁ ଅତ୍ୟଧିକ ଭଲ ପାଉଥିଲେ। ତାଙ୍କର ଜନ୍ମ ନଭେମ୍ବର ୧୪ ତାରିଖରେ ହୋଇଥିବାରୁ, ଏହି ଦିନଟି ଭାରତରେ ଶିଶୁ ଦିବସ ରୂପେ ପାଳିତ ହୁଏ। ପିଲାମାନଙ୍କ ପ୍ରତି ତାଙ୍କର ସ୍ନେହ ଓ ଆଦର ଯୋଗୁଁ ପିଲାମାନେ ତାଙ୍କୁ 'ଚାଚା ନେହରୁ' ବୋଲି ଡାକୁଥିଲେ। ନେହରୁଜୀ ବିଶ୍ୱାସ କରୁଥିଲେ ଯେ ପିଲାମାନେ ହିଁ ଦେଶର ଭବିଷ୍ୟତ, ତେଣୁ ସେମାନଙ୍କ ଶିକ୍ଷା, ସ୍ୱାସ୍ଥ୍ୟ ଓ ସର୍ବାଙ୍ଗୀନ ବିକାଶ ଉପରେ ଗୁରୁତ୍ୱ ଦେବା ଜରୁରୀ।

ପଣ୍ଡିତ ଜବାହାରଲାଲ ନେହରୁଙ୍କ ଜନ୍ମ ୧୮୮୯ ମସିହାରେ ଇଲାହାବାଦସ୍ଥିତ ନେହରୁ ପରିବାରରେ ଜନ୍ମଗ୍ରହଣ ହୋଇଥିଲା। ତାଙ୍କ ପିତା ମୋତିଲାଲ ନେହରୁ ଜଣେ ବିଖ୍ୟାତ ଓକିଲ ଥିଲେ। ପ୍ରାରମ୍ଭିକ ଶିକ୍ଷା ସମାପ୍ତ କରି ଜବାହାରଲାଲ ଇଂଲଣ୍ଡର ହ୍ୟାରୋ ସ୍କୁଲ ଓ କେମ୍ବ୍ରିଜ୍ ବିଶ୍ୱବିଦ୍ୟାଳୟରେ ଉଚ୍ଚ ଶିକ୍ଷା ଲାଭ କରିଥିଲେ। ସେ ଆଇନରେ ସମ୍ମାନ ସହିତ ସ୍ନାତକ ହାସଲ କରି ଓକିଲାତି ଆରମ୍ଭ କରିଥିଲେ। ମହାତ୍ମା ଗାନ୍ଧୀଙ୍କ ସଂସ୍ପର୍ଶରେ ଆସି ସେ ଭାରତୀୟ ସ୍ୱାଧୀନତା ଆନ୍ଦୋଳନରେ ସକ୍ରିୟ ଭାବରେ ଯୋଗ ଦେଇଥିଲେ।

ସେହି ସମୟରେ ବ୍ରିଟିଶ ସାମ୍ରାଜ୍ୟ ବାଦୀଙ୍କ ଅତ୍ୟାଚାରକୁ ଦେଖି ଜବାହାରଲାଲ ସହିତ ଅନେକ କ୍ରାନ୍ତିକାରୀ ସ୍ୱାଧୀନତା ସେନାନୀ ଆହ୍ଵାନିତ ହୋଇଥିଲେ। ଭାରତୀୟଙ୍କ ଅହିଂସାର ଅସ୍ତ୍ରକୁ ଆପଣା କରି ସେମାନେ ଜେଲ ଜୀବନକୁ ଚିରନ୍ତନ ଭାବେ ସମାପ୍ତ କରିବା ପାଇଁ ଜୋରଦାର ଆନ୍ଦୋଳନ ଆରମ୍ଭ କରିଥିଲେ। ଏହି ଆନ୍ଦୋଳନରେ ଜବାହାରଲାଲ ସମୁଦାୟ ନଅ ଥର ଜେଲ ଯାଇଥିଲେ ଏବଂ ତିନି ହଜାରରୁ ଅଧିକ ଦିନ କାରାଗାରରେ ଅତିବାହିତ କରିଥିଲେ।

ସ୍ୱାଧୀନତା ପରେ ୧୯୪୭ ମସିହା ଅଗଷ୍ଟ ୧୫ ତାରିଖରୁ ୧୯୬୪ ମସିହା ମଇ ୨୭ ତାରିଖ ଯାଏଁ ସେ ଅବିଚ୍ଛିନ୍ନ ଭାବରେ ଭାରତର ପ୍ରଧାନମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ଦେଶର ଉନ୍ନତି ପାଇଁ ସେ ନିରନ୍ତର ଭାବରେ କାର୍ଯ୍ୟ କରିଥିଲେ। ବିଭିନ୍ନ ଯୋଜନା ଓ ପ୍ରକଳ୍ପରେ ଦୂରଦର୍ଶିତା ପୂର୍ଣ୍ଣ ଯୋଜନା କରି ସେ ଦେଶକୁ ଏକ ନୂତନ ଦିଗଦର୍ଶନ ଦେଇଥିଲେ।

ତାଙ୍କ ଦୃଷ୍ଟିରେ ପିଲାମାନେ ହିଁ ଭବିଷ୍ୟତର ନାଗରିକ, ଏବଂ ସେମାନଙ୍କ ଉନ୍ନତି ମାଧ୍ୟମରେ ହିଁ ଦେଶର ପ୍ରଗତି ସାଧିତ ହୋଇପାରିବ। ତେଣୁ ସେ ପିଲାମାନଙ୍କ ବିକାଶ ପାଇଁ ଏକ ସୁଚିନ୍ତିତ ଶିକ୍ଷା ନୀତି ପ୍ରଣୟନ କରିଥିଲେ ଏବଂ ଦେଶକୁ ଏକ ନୂତନ ଓ ଆଧୁନିକ ଭିତ୍ତିଭୂମିରେ ପ୍ରତିଷ୍ଠିତ କରିଥିଲେ। ପିଲାମାନଙ୍କୁ ପତ୍ର ଲେଖିବା ତାଙ୍କର ଏକ ନିତ୍ୟକର୍ମ ଥିଲା, ଯାହାକି ଇତିହାସ ସାକ୍ଷୀ ରହିଛି। ସେଥିପାଇଁ ପିଲାମାନେ ତାଙ୍କୁ 'ଚାଚା' ବୋଲି ଡାକନ୍ତି ଏବଂ ତାଙ୍କ ଜନ୍ମଦିନକୁ ଶିଶୁ ଦିବସ ଭାବରେ ପାଳନ କରନ୍ତି।

ଓଡ଼ିଆ ହେଉଛି ଏକ ପ୍ରାଚୀନ ଓ ସମୃଦ୍ଧ ଭାଷା, ଯାହା ଆମର ଇତିହାସ, ସଂସ୍କୃତି ଓ ପରମ୍ପରାକୁ ସଂରକ୍ଷିତ ରଖିଛି। ଏହି ଭାଷା ଓ ସଂସ୍କୃତିର ଜ୍ୟୋତି ଆମ ପିଲାମାନଙ୍କ ମଧ୍ୟରେ ଜାଗ୍ରତ ରଖିବା ପାଇଁ ଶିଶୁ ଦିବସ ଏକ ଉତ୍କୃଷ୍ଟ ସୁଯୋଗ। ଓଡ଼ିଆ ଭାଷା ଓ ସାହିତ୍ୟ ଅତ୍ୟନ୍ତ ସମୃଦ୍ଧ। ଚତୁର୍ଦ୍ଦଶ ଶତାବ୍ଦୀର କବି ସାରଳା ଦାସଙ୍କ ବ୍ୟତୀତ ଅନେକ ମହାନ ସାହିତ୍ୟିକ ଏହି ଭାଷାକୁ ସମୃଦ୍ଧ କରିଛନ୍ତି। ଓଡ଼ିଆ ଭାଷାରେ ରଚିତ ସାହିତ୍ୟ, କବିତା, ଉପନ୍ୟାସ ଓ ଗଳ୍ପ ସଂସ୍କୃତିର ଦର୍ପଣ ସଦୃଶ।

ଓଡ଼ିଶାର ସଂସ୍କୃତି ଅତ୍ୟନ୍ଧ ବିସ୍ତୃତ ଓ ବିବିଧତାପୂର୍ଣ୍ଣ। ଏଠାକାର ସଂସ୍କୃତି ମୁଖ୍ୟତଃ କଳା, ସାହିତ୍ୟ, ସଙ୍ଗୀତ, ନୃତ୍ୟ ଓ ପର୍ବପର୍ବାଣି ଦ୍ୱାରା ପ୍ରକାଶିତ। ଓଡ଼ିଶାର ପାରମ୍ପାରିକ ନୃତ୍ୟ 'ଓଡିଶୀ' ବିଶ୍ୱବିଖ୍ୟାତ। ଏହା ଏକ ଆଧ୍ୟାତ୍ମିକ ଓ ଭାବପ୍ରଧାନ ନୃତ୍ୟ ଶୈଳୀ। ଏହା ଛଡ଼ା, ଛଉ, ଘୁମୁରା, ମହାରୀ ନୃତ୍ୟ ଆଦି ଓଡ଼ିଶାର ଲୋକନୃତ୍ୟ ଅନନ୍ୟ ପରିଚୟ ବହନ କରେ।

ଓଡ଼ିଶାର ପର୍ବପର୍ବାଣି ମଧ୍ୟ ସଂସ୍କୃତିର ଅଭିନ୍ନ ଅଂଶ। ରଥଯାତ୍ରା, ଦେବସ୍ନାନ ପୂର୍ଣ୍ଣିମା, କୁମାର ପୂର୍ଣ୍ଣିମା,ଓ ଓଷା ଆଦି ପର୍ବ ଓଡ଼ିଆ ସଂସ୍କୃତିର ଜୀବନ୍ତ ଦୃଶ୍ୟ ପ୍ରଦର୍ଶିତ କରେ। ଏହି ସବୁ ପର୍ବ ପାରମ୍ପାରିକ ରୀତିନୀତି, ଲୋକଗୀତ ଓ ସାମାଜିକ ମେଳ ମିଶାର ପରିବେଶ ସୃଷ୍ଟି କରେ।

ପିଲାଙ୍କୁ ସଂସ୍କୃତି ସହିତ ପରିଚୟ କରାଇବାର ଗୁରୁତ୍ୱ:

ବର୍ତ୍ତମାନର ଯୁଗ ପ୍ରଗତିର ଯୁଗ।ଆଧୁନିକ ଶିକ୍ଷା ଓ ପ୍ରଯୁକ୍ତି ବିଦ୍ୟାର ପ୍ରଭାବରେ ପିଲାମାନେ ଦ୍ରୁତ ଗତିରେ ଆଗୁଆ ହେଉଛନ୍ତି। ମାତ୍ର ଏହି ପ୍ରଗତି ସହିତ ଯଦି ଆମର ସଂସ୍କୃତିକ ପରମ୍ପରା ସଂଯୁକ୍ତ ନ ହେବେ, ତାହା ହେଲେ ପିଲାମାନେ ନିଜର ମୂଳ ପରିଚୟ ହରାଇବାର ସମ୍ଭାବନା ରହିଛି। ତେଣୁ ପିଲାଙ୍କୁ ବାଲ୍ୟାବସ୍ଥାରୁ ନିଜ ଭାଷା, ସଂସ୍କୃତି ଓ ପରମ୍ପରା ସହିତ ପରିଚିତ କରାଇବା ଅତ୍ୟନ୍ତ ଜରୁରୀ।

ଶିଶୁଦିବସ ପିଲାମାନଙ୍କ ପାଇଁ ଉତ୍ସବର ଦିନ। ଏହି ଦିନ ବିଭିନ୍ନ କାର୍ଯ୍ୟକ୍ରମ ଆୟୋଜନ କରି ପିଲାଙ୍କୁ ଓଡ଼ିଆ ସଂସ୍କୃତିର ସହିତ ନିବିଡ଼ ଭାବରେ ଯୋଡ଼ିବା ଯୋଗ୍ୟ।

(୧) ଓଡ଼ିଆ କଥା ଓ କବିତା ପାଠ:

ଶିଶୁ ଦିବସରେ ପିଲାମାନଙ୍କୁ ଓଡ଼ିଆ କଥା ଓ କବିତା ପାଠ ପ୍ରତିଯୋଗିତାର ଆୟୋଜନ କରାଯାଇପାରେ। ଏଥିରେ ପିଲାମାନେ ଓଡ଼ିଆ ଭାଷାର ସୌନ୍ଦର୍ଯ୍ୟ ଓ ମାଧୁର୍ଯ୍ୟ ଅନୁଭବ କରିବେ।

(୨) ପାରମ୍ପାରିକ ପୋଷାକ ପରିଧାନ:

ଏହି ଦିନ ପିଲାମାନଙ୍କୁ ଓଡ଼ିଶାର ପାରମ୍ପାରିକ ପୋଷାକ ଯେପରିକି ଧୋତି, କୁର୍ତ୍ତା ଆଦି ପିନ୍ଧାଇବା ଯୋଗ୍ୟ। ଏହା ଫଳରେ ସେମାନେ ନିଜ ସଂସ୍କୃତି ପ୍ରତି ଆକର୍ଷିତ ହେବେ।

(୩) ଓଡ଼ିଶୀ ନୃତ୍ୟ ଓ ସଙ୍ଗୀତ ଶିକ୍ଷା:

ପିଲାମାନଙ୍କୁ ଓଡ଼ିଶୀ ନୃତ୍ୟର ମୌଳିକ ପଦଚାରଣା ଓ ଓଡ଼ିଆ ସଙ୍ଗୀତ ଶିଖାଇବା ଯୋଗ୍ୟ। ଛୋଟ ଛୋଟ ନାଟ୍ୟ ପ୍ରଦର୍ଶନ ଆୟୋଜନ କରାଯାଇପାରେ।

(୪) ଲୋକକଥା ଓ ଲୋକଗୀତ ର ମଧ୍ୟମରେ ଶିକ୍ଷା: ଓଡ଼ିଶାର ଲୋକକଥା ଓ ଲୋକଗୀତ ମାଧ୍ୟମରେ ପିଲାମାନଙ୍କୁ ନୈତିକ ଶିକ୍ଷା ଦିଆଯାଇପାରେ। ଏହା ପିଲାମାନଙ୍କ ମନୋରଞ୍ଜନ ସହିତ ଶିକ୍ଷା ମଧ୍ୟ ପ୍ରଦାନ କରିବ।

(୫) ଓଡ଼ିଆ ଖାଦ୍ୟର ସ୍ୱାଦ:

ଶିଶୁ ଦିବସରେ ପିଲାମାନଙ୍କୁ ଓଡ଼ିଶାର ପାରମ୍ପାରିକ ଖାଦ୍ୟ ଯେପରିକି ପିଠା, ଖିରି, ଦହିବରା ଆଦିର ସ୍ୱାଦ ଆସ୍ୱାଦନ କରାଇବା ଯୋଗ୍ୟ।

(୬) ସାଂସ୍କୃତିକ ପ୍ରଦର୍ଶନୀ:

ବିଦ୍ୟାଳୟରେ ଓଡ଼ିଆ ସଂସ୍କୃତି ଉପରେ ଏକ ପ୍ରଦର୍ଶନୀ ଆୟୋଜନ କରାଯାଇପାରେ, ଯେଉଁଥିରେ ଓଡ଼ିଶାର ପାରମ୍ପାରିକ ବାଦ୍ୟଯନ୍ତ୍ର, ପୋଷାକ, ଶିଳ୍ପକଳା ଆଦି ପ୍ରଦର୍ଶିତ ହେବ।

ପିଲାମାନେ ହିଁ ଆମ ଦେଶର ଭବିଷ୍ୟତ। ସେମାନଙ୍କ ମଧ୍ୟରେ ନିଜ ଭାଷା, ସଂସ୍କୃତି ଓ ପରମ୍ପରା ପ୍ରତି ଗର୍ବ ଓ ଆଦର ବୋଧ ସୃଷ୍ଟି କରିବା ଆମ ସମସ୍ତଙ୍କର ଦାୟିତ୍ୱ। ଶିଶୁ ଦିବସ ପରି ବିଶେଷ ଦିନଗୁଡ଼ିକ ଏହି କାର୍ଯ୍ୟ ପାଇଁ ଉପଯୁକ୍ତ ସୁଯୋଗ। ଆସନ୍ତୁ, ଆମେ ସମସ୍ତେ ମିଶି ପିଲାମାନଙ୍କୁ ଓଡ଼ିଆ ଭାଷା ଓ ସଂସ୍କୃତିର ସୁଗନ୍ଧରେ ଉତ୍ସାହିତ କରିବା ପାଇଁ ପ୍ରୟାସ କରିବା, ଯାହା ଫଳରେ ସେମାନେ ଏକ ସୁସଂସ୍କୃତ ନାଗରିକ ରୂପେ ବିକଶିତ ହୋଇ ଦେଶ ଓ ସମାଜର ଉନ୍ନତି ସାଧନ କରିପାରିବେ।

ପିଲାମାନଙ୍କ ମଧ୍ୟରେ ସଂସ୍କୃତି ବଣ ହେଉଛି ଏକ ଜୀବନ୍ତ ଫସଲ ପାଇଁ ବୀଜ ବୀପନ ସଦୃଶ, ଯାହା ଭବିଷ୍ୟତରେ ସମୃଦ୍ଧ ଫଳ ପ୍ରଦାନ କରିବ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଶିଶୁ ଦିବସରେ ପିଲାଙ୍କୁ ସଂସ୍କୃତି ସହ ପରିଚୟ

ଶିଶୁ ଦିବସରେ ପିଲାଙ୍କୁ ସଂସ୍କୃତି ସହ ପରିଚୟ