ପ୍ରାରମ୍ଭ :

ଦେବ ଦେବ ମହାଦେବଙ୍କର କରୁଣା କାହାକୁ ବା ଅଗୋଚର। ଭକ୍ତି ଭାବରେ ତାଙ୍କୁ ଯିଏ ଆବାହନ କରନ୍ତି ସେ ତାଙ୍କର ସମସ୍ତ ଦୁଃଖ ହରି ନେଇଥାନ୍ତି। ସେଥିପାଇଁ ଅନେକେ ଶ୍ରାବଣ ମାସରେ ସୋମବାର ବ୍ରତ ରଖିଥାନ୍ତି। କାରଣ ସବୁ ମାସ ମଧ୍ୟରେ ଶ୍ରାବଣ ମାସଟି ଭଗବାନ ଭୋଳାନାଥଙ୍କର ପ୍ରିୟ ହୋଇଥାଏ ବୋଲି ବିଶ୍ୱାସ ରହିଛି। ତା’ଛଡ଼ା ଏହି ଶ୍ରାବଣ ସୋମବାର ବ୍ରତ କଲେ ଜୀବନରେ ସୁଖ, ଶାନ୍ତି ମିଳିବା ସହ ସ୍ବାସ୍ଥ୍ୟ ଭଲ ରହିଥାଏ ବୋଲି ସାଧୁମାନେ ମତ ମଧ୍ୟ ଦେଇଥାନ୍ତି। ସେହିପରି ନିଷ୍ଠାର ସହ ଏହି ବ୍ରତ କରୁଥିବା ବ୍ୟକ୍ତି ଅକାଳ ମୃତ୍ୟୁ ତଥା ଦୁର୍ଘଟଣାରୁ ବି ବର୍ତ୍ତି ଯାଇଥାନ୍ତି। ଅନ୍ୟପକ୍ଷେ କୁହାଯାଏ, ଶ୍ରାବଣ ମାସର ସୋମବାର ଦିନ ଘରକୁ ଗଙ୍ଗାଜଳ ଆଣିଲେ ତାହା ଶୁଭଫଳ ପ୍ରଦାନ କରିଥାଏ। ଆଉ ଯଦି ସେହି ଗଙ୍ଗାଜଳକୁ ରୋଷେଇ ଘରେ ରଖି ଦିଆଯାଏ, ତା’ହେଲେ ଘରେ ସୁଖ ସମୃଦ୍ଧି ବୃଦ୍ଧି ପାଇଥାଏ। ଏପରିକି ଏହି ସୋମବାର ଦିନ ରୁପାର ତ୍ରିଶୂଳ ଘରକୁ କିଣିକି ଆଣିଲେ ଘରେ ଥିବା ସମସ୍ତ ନକାରାତ୍ମକ ଉର୍ଜା ନଷ୍ଟ ହୋଇଯାଇଥାଏ ବୋଲି ଲୋକମତ ରହିଛି। ସେହିପରି କୁହାଯାଏ, ଶ୍ରାବଣ ମାସର ପ୍ରତି ସୋମବାର ଦିନ ଯେଉଁ ବ୍ୟକ୍ତି ଭଗବାନ ଭୋଳାନାଥଙ୍କୁ ବେଲପତ୍ର, ଚନ୍ଦନ, ଅକ୍ଷତ, କ୍ଷୀର ଓ ଗଙ୍ଗାଜଳ ପ୍ରଦାନ କରି ଭକ୍ତିର ସହ ୧୦୮ଥର ମହାମୃତ୍ୟୁଞ୍ଜୟ ମନ୍ତ୍ର ଜପ କରିଥାନ୍ତି ତାଙ୍କର ସମସ୍ତ ପାପ କ୍ଷୟ ହୋଇଯାଏ ବୋଲି ଲୋକ ବିଶ୍ୱାସ ମଧ୍ୟ ରହିଛି ।

ସୋମବାର ବ୍ରତ କଥା ପୂଜା ବିଧିବିଧାନ:

ଓଡ଼ିଶାର ବିଭିନ୍ନ ଶୈବକ୍ଷେତ୍ରରେ ଏହି ଉତ୍ସବ ପାଳନ କରାଯାଇଥାଏ । ଆଷାଢ଼ ପୂର୍ଣ୍ଣିମାଠାରୁ ଆରମ୍ଭ କରି ଶ୍ରାବଣ ପୂର୍ଣ୍ଣିମା ପର୍ଯ୍ୟନ୍ତ ସମସ୍ତ ସୋମବାରରେ ବିଭିନ୍ନ ଶିବ ମନ୍ଦିରରେ ଭକ୍ତମାନେ ଶିବଙ୍କ ମସ୍ତକରେ ପାଣି ଢାଳନ୍ତି । ବୋଲ ବମ ଯାତ୍ରାରେ ଭାଗନେଉଥିବା ଭକ୍ତମାନଙ୍କୁ 'କାଉଡ଼ିଆ' କହାଯାଏ । ଭକ୍ତମାନେ ଗେରୁଆ ବସ୍ତ୍ର ପରିଧାନ କରି କାନ୍ଧରେ କଳସୀ ଭାର ଧରି ଚାଲି ଚାଲି ସଂପୂର୍ଣ୍ଣ ପଥ ଅତିକ୍ରମ କରିଥାନ୍ତି ।

ସୋମବାର ହେଉଛି ଶିବଙ୍କର ବାର। ପୁଣି, ଶ୍ରାବଣ ମାସର ସୋମବାର ପରମ ପୁଣ୍ୟପ୍ରଦ। ଏହି ଦିନଗୁଡ଼ିକରେ କାବାଡ଼ିଆ (କାଉଡ଼ିଆ)ମାନେ ଭାରରେ ନଦୀ ଜଳ ଆଣି ଶିବଙ୍କୁ ଅଭିଷେକ କରିଥାନ୍ତି। ସେଥିପାଇଁ ଶିବମନ୍ଦିରଗୁଡ଼ିକରେ ବହୁତ ଭିଡ଼ ହୁଏ। ‘ସୋମବାର ବ୍ରତ କଥା ବିଧି’ରେ ସୋମବାରରେ ଶିବପୂଜାର ମହତ୍ତ୍ୱ ବର୍ଣ୍ଣିତ ହୋଇଛି। ପୁତ୍ର ସ୍କନ୍ଦ ବା କାର୍ତ୍ତିକେୟଙ୍କ ପ୍ରଶ୍ନରେ ମହାଦେବ ତାହା କହିଛନ୍ତି। ମହାଦେବ ଏହି ବ୍ରତର ବିଧି କହିବା ବେଳେ, ସେଠାରେ ଉପସ୍ଥିତ ପାର୍ବତୀ ବ୍ରତର ଫଳ ଓ ମାହାତ୍ମ୍ୟ କ’ଣ ବୋଲି ତାଙ୍କୁ ପଚାରିଛନ୍ତି ଏବଂ ଶିବ ତାହାର ଉତ୍ତର ଦେଇଛନ୍ତି। ‘ସୋମବାର ବ୍ରତ’ର ଫଳ ରୂପେ ପାର୍ବତୀଙ୍କୁ ଶିବ କହିଛନ୍ତି- ଯେଉଁମାନେ ସୋମବାରରେ ମହାଦେବଙ୍କୁ ପୂଜା କରନ୍ତି, ଇହଲୋକରେ ସେମାନଙ୍କର ସମସ୍ତ କାର୍ଯ୍ୟ ସିଦ୍ଧ ହୁଏ ଏବଂ ପରଲୋକରେ ସେମାନେ ଶିବଲୋକ ପ୍ରାପ୍ତ ହୁଅନ୍ତି।

ସୋମବାର ବ୍ରତ କଲେ ବାଞ୍ଛିତ ଫଳ ପାଆନ୍ତି ଏବଂ ପରକାଳରେ ଶିବଲୋକକୁ ଯାଆନ୍ତି। ପରିଶେଷରେ ଶିବ କହିଛନ୍ତି- ଆଗୋ ପାର୍ବତି! ହିମାଳୟରେ କୋଟି ସଂଖ୍ୟାରେ ବ୍ରତ ଓ ଦାନ କଲେ, ଏକାଦଶୀ ପାଳନ କଲେ, ସୂର୍ଯ୍ୟଗ୍ରହଣ ଅଦିରେ ଦାନ ଦେଲେ, ଶିବରାତ୍ରି ବ୍ରତ କଲେ ଏବଂ ସବୁ କାଳରେ କୃଷ୍ଣାଷ୍ଣମୀ ବ୍ରତ ପାଳନ କଲେ ଯେଉଁ ସବୁ ଫିଳ ମିଳେ, କେବଳ ସୋମବାର ବ୍ରତ କଲେ ତା’ଠାରୁ ଅଧିକ ଫଳ ମିଳିଥାଏ।

ଶ୍ରାବଣ ମାସକୁ ଏକ ପୂଣ୍ୟର ମାସ ଭାବେ ମନାଯାଏ। ଶିବଙ୍କର ଏହି ମାସର ପ୍ରତ୍ୟେକ ସୋମବାର ବେଶ୍‌ ଗୁରୁତ୍ବପୂର୍ଣ୍ଣ। ବିଶ୍ବାସ ରହିଛି ଯେ ଶ୍ରାବଣ ସୋମବାରରେ ଶିବଙ୍କ ପୂଜାର୍ଚ୍ଚନା କରି ଯାହାବି ମାଗିବେ ଆପଣଙ୍କ ମନସ୍କାମନା ନିଶ୍ଚୟ ପୂରା ହେବ। ତେବେ ଚାଲନ୍ତୁ ଜାଣିବା ଶ୍ରାବଣ ସୋମବାରରେ ଶିବଙ୍କୁ କିପରି ପୂଜା କଲେ ସେ ତୃପ୍ତ ହୋଇଥାନ୍ତି ଆଲୋଚନା କରିବା --

ଶିବଙ୍କୁ ପ୍ରସନ୍ନ କରିବାକୁ ଭକ୍ତମାନେ ବେଲପତ୍ର, ଗଙ୍ଗାଜଳ, ଖିର, ଭାଙ୍ଗ, କର୍ପୂର, ଚାଉଳ ଆଦି ଅର୍ପଣ କରିଥାନ୍ତି। ମାତ୍ର ଏପରି ଏକ ଜିନିଷ ଅଛି ଯାହା ଶିବଙ୍କର ଅତି ପ୍ରିୟ। ଆପଣ ଯଦି ଶିବଙ୍କୁ ରୁଦ୍ରାକ୍ଷ ଅର୍ପଣ କରିବେ ତାହାଲେ ହର ହର ଦେବ ମହାଦେବ ନିଶ୍ଚୟ ପ୍ରସନ୍ନ ହେବେ।

ଏହାକୁ ଆପଣ ମହାଦେବଙ୍କୁ ଅର୍ପଣ କରିପାରନ୍ତି କିମ୍ବା ମହାଦେବଙ୍କ ନିକଟରୁ ପୂଜା କରି ଆଣି ନିଜେ ବି ନିଜ ଶରୀରରେ ଧାରଣ କରିପାରନ୍ତି। ବିଶ୍ବାସ କରାଯାଏ ଯେ ଶରୀରରେ ରୁଦ୍ରାକ୍ଷ ଧାରଣ କଲେ ଅନେକ ସମସ୍ୟା ଦୂର ହୋଇଯାଏ। ଶାରୀରିକ ଅସୁସ୍ଥତାରୁ ନେଇ ଦୁଶ୍ଚିନ୍ତା ଆଦି ଦୂର ହୋଇଥାଏ ।

ଶ୍ରାବଣ ପ୍ରଥମ ସୋମବାରରେ ମହାଦେବଙ୍କୁ ରୁଦ୍ର‌ାକ୍ଷ ଚଢ଼ାଇଲେ ଖୁବ୍‌ ଭଲ ହୋଇଥାଏ। ମାତ୍ର ଆପଣ ଅନ୍ୟ ସୋମବାରରେ ବି ଚଢ଼ାଇ ପାରିବେ। ରୁଦ୍ରାକ୍ଷ ଅର୍ପଣ କରି ଆପଣ କିଛି ମାନସିକ କଲେ ଖୁବ୍ ଶୀଘ୍ର ଆପଣଙ୍କ ମନସ୍କାମନା ପୂର୍ଣ୍ଣ ହେବ ବୋଲି ବିଶ୍ବାସ ରହିିଛି।

ଦେବ ଦେବ ମହାଦେବଙ୍କ ପ୍ରିୟ ଶ୍ରାବଣ ମାସ, ଅତ୍ୟନ୍ତ ପବିତ୍ର ଓ ଶୁଭ ବୋଲି ବିବେଚନା କରାଯାଏ। ମାନ୍ୟତା ରହିଛି ଯେ, ଶ୍ରାବଣ ସୋମବାର ଦିନ ଭଗବାନ ଶିବଙ୍କ ଆରାଧନା ସହିତ ରୁଦ୍ରାଭିଷେକ କରିବା ଦ୍ବାରା ବିଶେଷ କୃପା ପ୍ରାପ୍ତ ହୁଏ। ଶ୍ରାବଣ ମାସ ସୋମବାର ବ୍ରତ କରିବା ଦ୍ବାରା କୁମାରୀମାନଙ୍କୁ ଭଲ ବର ମିଳିଥାଏ ଏବଂ ସଧବାମାନେ ସୌଭାଗ୍ୟବତୀ ହୋଇଥାନ୍ତି ବୋଲି ବିଶ୍ବାସ ରହିଛି। ତେବେ ଶ୍ରାବଣ ସୋମବାରରେ କ’ଣ ସବୁ ପୂଜାବିଧି ରହିଛି, ଆସନ୍ତୁ ଜାଣିବା

୧. ଶ୍ରାବଣ ସୋମବାର ଦିନ ଶିବଙ୍କ ପୂଜା ପାଇଁ ଅକ୍ଷତ, ଅତର, ବେଲପତ୍ର, ଗଙ୍ଗାଜଳ, ଦହି, ଘିଅ, କେସର, ଦୁଦୁରା, କନିଅର ଫୁଲ ଓ ମହୁ ନିଶ୍ଚିତ ଭାବେ ଚଢ଼ାନ୍ତୁ। ଏହିଦିନ ମହାଦେବଙ୍କର ପ୍ରିୟ ବସ୍ତୁ ଅର୍ପଣ କରିବା ଦ୍ବାରା କୃପା ଲାଭ ହୋଇଥାଏ ବୋଲି କୁହାଯାଏ।

୨. ସୋମବାରଦିନ ବ୍ରତ ରଖି ୨୧ଟି ବେଲପତ୍ର ଉପରେ ଚନ୍ଦନରେ ‘ଓଁ ନମଃ ଶିବାୟ’ ଲେଖି ଶିବଲିଙ୍ଗ ଉପରେ ଚଢ଼ାନ୍ତୁ। ଏହାଦ୍ବାରା ସବୁ ମନସ୍କାମନା ପୂର୍ଣ୍ଣ ହୋଇଥାଏ ।

୪. ଏହି ଦିନ ନନ୍ଦୀଙ୍କ ପ୍ରତୀକ ବୃଷଭଙ୍କୁ ସବୁଜ ଚାରା ଦିଅନ୍ତୁ। ଏହାଦ୍ବାରା ସବୁ କଷ୍ଟ ଦୂର ହେବା ସହିତ ସୁଖସମୃଦ୍ଧି ବୃଦ୍ଧି ହୋଇଥାଏ।

୪. ଶ୍ରାବଣ ସୋମବାରରେ ଗରିବଙ୍କୁ ଅନ୍ନ ଭୋଜନ ଦିଅନ୍ତୁ। ଏହାଦ୍ବାରା ଘରେ କେବେ ଅନ୍ନର ଅଭାବ ଦେଖାଯାଏ ନାହିଁ। ଏହା ବ୍ୟତୀତ ପିତୃପୁରୁଷଙ୍କ ଆତ୍ମାକୁ ଶାନ୍ତି ମିଳିଥାଏ।

୫. ଶ୍ରାବଣ ସୋମବାର ଦିନ ମନ୍ଦିରରେ ପୂଜା କରିବା ପରେ କିଛି ସମୟ ‘ଓଁ ନମଃ ଶିବାୟ’ ମନ୍ତ୍ର ଜପ କରନ୍ତୁ। ଏହାଦ୍ବାରା ସବୁ ମନସ୍କାମନା ପୂର୍ଣ୍ଣ ହୁଏ ବୋଲି ବିଶ୍ବାସ ରହିଛି ।

ପୌରାଣିକ ମତ ସମ୍ପାଦନା:

ପୂର୍ବେ ଦେବତା ଓ ଅସୁରମାନଙ୍କଦ୍ୱାରା କରାଯାଇଥିବା ସମୁଦ୍ରମନ୍ଥନ ଯୋଗୁଁ , ଶ୍ରାବଣ ମାସ ଅମାବାସ୍ୟା ଦିନ ସମୁଦ୍ରରୁ ଅମୃତ ଓ ବିଷ ପ୍ରାପ୍ତ ହୋଇଥିଲା । ଦେବତାମାନଙ୍କ ଅନୁରୋଧକ୍ରମେ, ମହାଦେବ ସେହି ବିଷପାନ କରିଥିଲେ । ସେହି ବିଷର ଉତ୍କଟ ଜ୍ୱାଳାରେ ତାଙ୍କ କଣ୍ଠ ନୀଳବର୍ଣ୍ଣ ହୋଇଯାଇଥିଲା । ବିଷପାନ ଯନ୍ତ୍ରଣାକୁ ଲାଘବ କରିବା ପାଇଁ, ଦେବତାଗଣ, ମହାଦେବଙ୍କ ମସ୍ତକରେ ସୁବାସିତ ଜଳ ଢାଲିଥିଲେ । ଏହାକୁ ମନେପକାଇବା ପାଇଁ, ପ୍ରତିବର୍ଷ ଶ୍ରାବଣ ମାସରେ ନୀଳକଣ୍ଠଙ୍କ ଜଳଲାଗି ଉତ୍ସବ ପାଳନ କରାଯାଏ ।

କାଉଡ଼ିଆଙ୍କର ‘ବୋଲ ବମ’ ଉଚ୍ଚାରଣରେ ‘

ଏହି ‘ବମ’ ଶବ୍ଦର ଅର୍ଥ ନିରୂପଣ ସାଧାରଣତଃ ୩ ପ୍ରକାର

ହୋଇଥାଏ ---

(୧) ‘ବମ’ ଶବ୍ଦର ଏକ ଅର୍ଥ ହେଲା ଡ଼ମରୁର ଧ୍ୱନି । ଭଗବାନ ଶିବ ତାଙ୍କ ହସ୍ତରେ ଡ଼ମରୁ ଧାରଣ କରିଥାନ୍ତି ଓ ଏହି ଡ଼ମରୁ ବାଦନ ଫଳରେ ‘ବମ’ ‘ବମ’ ଧ୍ବନି ଉତ୍ପନ୍ନ ହୋଇଥାଏ । ଏହି ଧ୍ୱନି ଶିଵଙ୍କର ଅତି ପ୍ରିୟ । ତେଣୁ କାଉଡ଼ିଆମାନେ ଜଳାଭିଷେକ ନିମନ୍ତେ ଯାତ୍ରା କରୁଥିବା ସମୟରେ ଏହି ‘ବମ’ ଶବ୍ଦ ଉଚ୍ଚାରଣ କରିଥାନ୍ତି (ବୋଲ ବମ, ହର ହର ବମ/ବମ ବମ ଭୋଲେ ଇତ୍ୟାଦି) । ଏହି ‘ବମ’ ଶବ୍ଦର କ୍ରମାଗତ ଉଚ୍ଚାରଣକୁ ‘ମୁଖବାଦ୍ୟ‘ କୁହାଯାଏ । ଅନ୍ୟ ଦେବତା ମାନେ ବିବିଧ ପ୍ରକାରର ବାଦ୍ୟଯନ୍ତ୍ରର ବାଦନ ଦ୍ୱାରା ପ୍ରସନ୍ନ ହେଉଥିବା ସମୟରେ ଭଗବାନ ଶିବ ଅଳ୍ପରେ କେବଳ ‘ମୁଖବାଦ୍ୟ’ ଦ୍ୱାରା ହିଁ ପ୍ରସନ୍ନ ହୋଇଥାନ୍ତି । ତେଣୁ କାଉଡ଼ିଆମାନେ ଜଳାଭିଷେକ ଯାତ୍ରା ସମୟରେ ଶିବଙ୍କୁ ପ୍ରସନ୍ନ କରିବା ନିମିତ୍ତ ଏହି ‘ବମ’ ଶବ୍ଦର କ୍ରମାଗତ ଉଚ୍ଚାରଣ କରିଥାନ୍ତି ।

(୨) ଓଁ କାର ବା ‘ପ୍ରଣବ’ ର ଏକ ସରଳ ରୂପ ହେଉଛି ‘ବମ’ । ଯେହେତୁ ‘ପ୍ରଣବ’ ର ଉଚ୍ଚାରଣ ସମସ୍ତଙ୍କ ପାଇଁ ସୁଲଭ ହୋଇ ନଥାଏ ତଥା ଏହାର ଉଚ୍ଚାରଣ ନିମନ୍ତେ ନିୟମ ପାଳନର ଆବଶ୍ୟକତା ରହିଛି, ତେଣୁ ଏହାକୁ ସରଳରେ ଓ ସୁଲଭରେ ଉଚ୍ଚାରଣ କରିବା ଓ ଲାଭବାନ ହେବା ନିମିତ୍ତ ‘ବମ’ ଶବ୍ଦର ପ୍ରୟୋଗ କରାଯାଇଅଛି । ତେଣୁ “ବୋଲ ବମ, ହର ହର ବମ/ବମ ବମ ଭୋଲେ” ଇତ୍ୟାଦି ଉଚ୍ଚାରଣ ମାନ ହେଉଛନ୍ତି “ଓଁ ନମଃ ଶିବାୟ” ବା ଶିବଙ୍କର ଅତି ପ୍ରିୟ ପଞ୍ଚାକ୍ଷର ମନ୍ତ୍ରର ଏକ ପ୍ରକାର ସରଳୀକୃତ ରୂପ ।

(୩) ‘ବମ’ ହେଉଛି ଆମ ଶରୀରରେ ଥିବା ଷଡ଼ ଚକ୍ର ମଧ୍ୟରୁ ଅନ୍ୟତମ ‘ସ୍ୱାଧିଷ୍ଠାନ ଚକ୍ର’ ର ବୀଜ ମନ୍ତ୍ର । ମୂଳାଧାର, ସ୍ୱାଧିଷ୍ଠାନ ଆଦି ଷଡ଼ ଚକ୍ର ଆମର ସୂକ୍ଷ୍ମ ଶରୀରରେ ଅବସ୍ଥିତ ଯେଉଁମାନେ କି ଆମ ଆଭ୍ୟନ୍ତର ଶରୀରରେ ଥିବା ନାଡୀ ମାନଙ୍କରେ ବାୟୁର ତୀବ୍ର ଗତି ଫଳରେ ଉତ୍ପନ୍ନ ହୋଇଥାନ୍ତି । ସବୁଠାରୁ ନିଚ୍ଚରେ ଅବସ୍ଥିତ ଥିବା ମୂଳାଧାର ଚକ୍ରରେ ସର୍ପାକୃତି ‘କୁଣ୍ଡଳିନୀ’ ଶକ୍ତି ସୁପ୍ତ ଅବସ୍ଥାରେ କୁଣ୍ଡଳାକାରରେ ସ୍ଥିତ । ଏହା ଯେତେବେଳେ ବିବିଧ ଆଧ୍ୟାତ୍ମିକ କ୍ରିୟା ମାନଙ୍କ ଦ୍ଵାରା ଜାଗ୍ରତ ହୁଏ, ତାହା ଉର୍ଦ୍ଧ୍ବଗାମୀ ହୋଇ ପ୍ରଥମେ ସ୍ୱାଧିଷ୍ଠାନ ଓ ପରେ ଅନ୍ୟ ଚକ୍ର ମାନ ଦେଇ ଶେଷରେ ଆଜ୍ଞା ଚକ୍ର ଓ ତଦ୍ ଉର୍ଦ୍ଧ୍ବ ସହସ୍ରାର ଚକ୍ରରେ ପହଞ୍ଚି ସାଧକକୁ ସମାଧି ଅବସ୍ଥାକୁ ନେଇ ଦିବ୍ୟାନନ୍ଦ ପ୍ରଦାନ କରିଥାଏ ଓ ଅତ୍ମୋପଲବ୍ଧିରେ ସାହାଯ୍ୟ କରିଥାଏ ଯାହାକି ଯୋଗ ଶାସ୍ତ୍ରର ଚରମ ଲକ୍ଷ୍ୟ ଅଟେ ।

ପରିଶେଷରେ:

ଭଗବାନ ଶିବ ହେଉଛନ୍ତି ସ୍ୱୟଂ ଆଦି ଯୋଗଗୁରୁ ଓ ସେ ଜଳାଭିଷେକ ଦ୍ୱାରା ସହଜରେ ପ୍ରସନ୍ନ ହୋଇଥାନ୍ତି । ତେଣୁ ତାଙ୍କୁ ଜଳାଭିଷେକ କରି ପ୍ରସନ୍ନ କରିପାରିଲେ ହୁଏତ ଏହା ସାଧକର କୁଣ୍ଡଳିନୀ ଶକ୍ତିକୁ ଜାଗ୍ରତ କରାଇବାରେ ସହାୟକ ହୋଇଥାଏ ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଶ୍ରାବଣ ସୋମବାର କିଛି ଐତିହ୍ୟ (Bol Bam Fastival in Odisha)

ଶ୍ରାବଣ ସୋମବାର କିଛି ଐତିହ୍ୟ (Bol Bam Fastival in Odisha)