॥ ଅଥ ଦେଵ୍ୟାଃ କଵଚମ୍ ॥

ଵିନିଯୋଗ:- ଓଁ ଅସ୍ୟ ଶ୍ରୀଚଣ୍ଡୀକଵଚସ୍ୟ । ବ୍ରହ୍ମା ଋଷିଃ । ଅନୁଷ୍ଟୁପ୍ ଛନ୍ଦଃ । ଚାମୁଣ୍ଡା ଦେଵତା । ଅଙ୍ଗନ୍ୟାସ ଉକ୍ତ ମାତରୋ ବୀଜମ୍ । ଦିଗ୍ ଵନ୍ଧ ଦେଵତାଃ ତତ୍ତ୍ଵମ୍ । ଶ୍ରୀଜଗଦମ୍ବା ପ୍ରୀତ୍ୟର୍ଥେ ସପ୍ତଶତୀ ପାଠାଙ୍ଗ ତ୍ଵେନ ଜପେ ଵିନିଯୋଗଃ ॥

॥ ଓଁ ନମଶ୍ଚଣ୍ଡିକାୟୈ ॥ ମାର୍କଣ୍ଡେୟ ଉଵାଚ ।

ଓଁ ଯଦ୍ ଗୁହ୍ୟଂ ପରମଂ ଲୋକେ ସର୍ଵରକ୍ଷାକରଂ ନୃଣାମ୍ ।

ଯନ୍ନ କସ୍ୟଚିଦାଖ୍ୟାତଂ ତନ୍ମେ ବ୍ରୂହି (ବୃହି) ପିତାମହ ॥ ୧॥

ବ୍ରହ୍ମୋଵାଚ ।

ଅସ୍ତି ଗୁହ୍ୟତମଂ ଵିପ୍ର ସର୍ଵଭୂତୋପକାରକମ୍ ।

ଦେଵ୍ୟାସ୍ତୁ କଵଚଂ ପୁଣ୍ୟଂ ତଚ୍ଛୃଣୁଷ୍ଵ ମହାମୁନେ ॥ ୨॥

ପ୍ରଥମଂ ଶୈଳପୁତ୍ରୀ ଚ ଦ୍ଵିତୀୟଂ ବ୍ରହ୍ମଚାରିଣୀ ।

ତୃତୀୟଂ ଚନ୍ଦ୍ରଘଣ୍ଟେତି କୂଷ୍ମାଣ୍ଡେତି ଚତୁର୍ଥକମ୍ ॥ ୩॥

ପଞ୍ଚମଂ ସ୍କନ୍ଦମାତେତି ଷଷ୍ଠଂ କାତ୍ୟାୟନୀତି ଚ ।

ସପ୍ତମଂ କାଳରାତ୍ରୀତି ମହାଗୌରୀତି ଚାଷ୍ଟମମ୍ ॥ ୪॥

ନଵମଂ ସିଦ୍ଧିଦାତ୍ରୀ ଚ ନଵଦୁର୍ଗାଃ ପ୍ରକୀର୍ତ୍ତିତାଃ ।

ଉକ୍ତାନ୍ୟେତାନି ନାମାନି ବ୍ରହ୍ମଣୈଵ ମହାତ୍ମନା ॥ ୫॥

ଅଗ୍ନିନା ଦହ୍ୟମାନସ୍ତୁ ଶତ୍ରୁମଧ୍ୟେ ଗତୋ ରଣେ ।

ଵିଷମେ ଦୁର୍ଗମେ ଚୈଵ ଭୟାର୍ତ୍ତାଃ ଶରଣଂ ଗତାଃ ॥ ୬॥

ନ ତେଷାଂ ଜାୟତେ କିଞ୍ଚିଦ୍ ଶୁଭଂ ରଣସଙ୍କଟେ ।

ନାପଦଂ ତସ୍ୟ ପଶ୍ୟାମି ଶୋକଦୁଃଖ ଭୟଂ ନ ହି ॥ ୭॥

ଯୈସ୍ତୁ ଭକ୍ତ୍ୟା ସ୍ମୃତା ନୂନଂ ତେଷାଂ ଵୃଦ୍ଧିଃ ପ୍ରଜାୟତେ ।

ଯେ ତ୍ଵାଂ ସ୍ମରନ୍ତି ଦେଵେଶୀ ରକ୍ଷସେ ତାନ୍ନ ସଂଶୟଃ ॥ ୮॥

ପ୍ରେତସଂସ୍ଥା ତୁ ଚାମୁଣ୍ଡା ଵାରାହୀ ମହିଷାସନା ।

ଐନ୍ଦ୍ରୀ ଗଜସମାରୂଢା ଵୈଷ୍ଣଵୀ ଗରୁଡାସନା ॥ ୯॥

ମାହେଶ୍ଵରୀ ଵୃଷାରୂଢା କୌମାରୀ ଶିଖିଵାହନା ।

ଲକ୍ଷ୍ମୀଃ ପଦ୍ମାସନା ଦେଵୀ ପଦ୍ମହସ୍ତା ହରିପ୍ରିୟା ॥ ୧୦॥

ଶ୍ଵେତରୂପଧରା ଦେଵୀ ଈଶ୍ଵରୀ ଵୃଷଵାହନା ।

ବ୍ରାହ୍ମୀ ହଂସ ସମାରୂଢା ସର୍ଵାଭରଣ ଭୂଷିତା ॥ ୧୧॥

ଇତ୍ୟେତା ମାତରଃ ସର୍ଵାଃ ସର୍ଵଯୋଗ ସମନ୍ଵିତାଃ ।

ନାନାଭରଣ ଶୋଭାଢ୍ୟାଂ ନାନାରତ୍ନୋପଶୋଭିତାଃ ॥ ୧୨॥

ଦୃଶ୍ୟନ୍ତେ ରଥଂ ଆରୂଢା ଦେଵ୍ୟଃ କ୍ରୋଧସମାକୁଳାଃ ।

ଶଙ୍ଖଂ ଚକ୍ରଂ ଗଦାଂ ଶକ୍ତିଂ ହଳଂ ଚ ମୁସଳାୟୁଧମ୍ ॥ ୧୩॥

ଖେଟକଂ ତୋମରଂ ଚୈଵ ପରଶୁଂ ପାଶଂ ଅଵ ଚ ।

କୁନ୍ତାୟୁଧଂ ତ୍ରିଶୂଳଂ ଚ ଶାର୍ଙ୍ଗମାୟୁଧଂ ଉତ୍ତମମ୍ ॥ ୧୪॥

ଦୈତ୍ୟାନାଂ ଦେହନାଶାୟ ଭକ୍ତାନାଂ ଅଭୟାୟ ଚ ।

ଧାରୟନ୍ତ୍ୟ ଆୟୁଧାନୀତ୍ଥଂ ଦେଵାନାଂ ଚ ହିତାୟ ଵୈ ॥ ୧୫॥

ନମସ୍ତେଽସ୍ତୁ ମହାରୌଦ୍ରେ ମହାଘୋର ପରାକ୍ରମେ ।

ମହାବଳେ ମହୋତ୍ସାହେ ମହାଭୟ ଵିନାଶିନୀ ॥ ୧୬॥

ତ୍ରାହି ମାଂ ଦେବୀ ଦୁଷ୍ପ୍ରେକ୍ଷ୍ୟେ ଶତ୍ରୁଣାଂ ଭୟଵର୍ଦ୍ଧିନୀ

ପ୍ରାଚ୍ୟାଂ ରକ୍ଷତୁ ମାମୈନ୍ଦ୍ରୀ ଆଗ୍ନେୟ୍ୟାଂ ଅଗ୍ନିଦେଵତା ॥ ୧୭॥

ଦକ୍ଷିଣେଽଵତୁ ଵାରାହୀ ନୈରୃତ୍ୟାଂ ଖଡ୍ଗଧାରିଣୀ ।

ପ୍ରତୀଚ୍ୟାଂ ଵାରୁଣୀ ରକ୍ଷେଦ୍ଵାୟଵ୍ୟାଂ ମୃଗଵାହିନୀ ॥ ୧୮॥

ଉଦୀଚ୍ୟାଂ ପାତୁ କୌମାରୀ ଐଶାନ୍ୟାଂ ଶୂଳଧାରିଣୀ ।

ଊର୍ଧ୍ଵଂ ବ୍ରହ୍ମାଣୀ ମେ ରକ୍ଷେଦଧସ୍ତାଦ୍ଵୈଷ୍ଣଵୀ ତଥା ॥ ୧୯॥

ଏଵଂ ଦଶ ଦିଶୋ ରକ୍ଷେଚ୍ଚାମୁଣ୍ଡା ଶଵଵାହନା ।

ଜୟା ମେ ଚାଗ୍ରତଃ ପାତୁ ଵିଜୟା ପାତୁ ପୃଷ୍ଠତଃ ॥ ୨୦॥

ଅଜିତା ଵାମପାର୍ଶ୍ଵେ ତୁ ଦକ୍ଷିଣେ ଚ ଅପରାଜିତା ।

ଶିଖାଂ ଉଦ୍ୟୋତିନୀ ରକ୍ଷେଦ୍ ଉମା ମୂର୍ଧ୍ନି ଵ୍ୟଵସ୍ଥିତା ॥ ୨୧॥

ମାଳାଧରୀ ଲଲାଟେ ଚ ଭୃଵୌ ରକ୍ଷେଦ୍ ଯଶସ୍ଵିନୀ ।

ତ୍ରିନେତ୍ରା ଚ ଭୃଵୋଃ ମଧ୍ୟେ ଯମଘଣ୍ଟା ଚ ନାସିକେ ॥ ୨୨॥

ଶଙ୍ଖିନୀ ଚକ୍ଷୁଷୋଃ ମଧ୍ୟେ ଶ୍ରୋତ୍ରୟୋଃ ଦ୍ୱାରଵାସିନୀ ।

କପୋଳୌ କାଳିକା ରକ୍ଷେତ୍ କର୍ଣ୍ଣ ମୂଳେ ତୁ ଶାଙ୍କରୀ ॥ ୨୩॥

ନାସିକାୟାଂ ସୁଗନ୍ଧା ଚ ଉତ୍ତରୋଷ୍ଠେ ଚ ଚର୍ଚ୍ଚିକା ।

ଅଧରେ ଚ ଅମୃତକଳା ଜିହ୍ଵାୟାଂ ଚ ସରସ୍ଵତୀ ॥ ୨୪॥

ଦନ୍ତାନ୍ ରକ୍ଷତୁ କୌମାରୀ କଣ୍ଠଦେଶେ ତୁ ଚଣ୍ଡିକା ।

ଘଣ୍ଟିକାଂ ଚିତ୍ରଘଣ୍ଟା ଚ ମହାମାୟା ଚ ତାଲୁକେ ॥ ୨୫॥

କାମାକ୍ଷୀ ଚିବୁକଂ ରକ୍ଷେଦ୍ଵାଚଂ ମେ ସର୍ଵମଙ୍ଗଳା ।

ଗ୍ରୀଵାୟାଂ ଭଦ୍ରକାଳୀ ଚ ପୃଷ୍ଠଵଂଶେ ଧନୁର୍ଧରୀ ॥ ୨୬॥

ନୀଳଗ୍ରୀଵା ବହିଃକଣ୍ଠେ ନଳିକାଂ ନଳକୂବରୀ ।

ସ୍କନ୍ଧୟୋଃ ଖଡ୍ଗିନୀ ରକ୍ଷେଦ୍ ବାହୂ ମେ ଵଜ୍ରଧାରିଣୀ ॥ ୨୭॥

ହସ୍ତୟୋର୍ଦଣ୍ଡିନୀ ରକ୍ଷେଦମ୍ବିକା ଚାଙ୍ଗୁଲୀଷୁ ଚ ।

ନଖାଞ୍ଛୂଳେଶ୍ଵରୀ ରକ୍ଷେତ୍କୁକ୍ଷୌ ରକ୍ଷେତ୍କୁଳେଶ୍ଵରୀ ॥ ୨୮॥

ସ୍ତନୌ ରକ୍ଷେନ୍ ମହାଦେଵୀ ମନଃ ଶୋକଵିନାଶିନୀ ।

ହୃଦୟେ ଲଳିତା ଦେଵୀ ଉଦରେ ଶୂଳଧାରିଣୀ ॥ ୨୯॥

ନାଭୌ ଚ କାମିନୀ ରକ୍ଷେଦ୍ ଗୁହ୍ୟଂ ଗୁହ୍ୟେଶ୍ଵରୀ ତଥା ।

ପୂତନା କାମିକା ମେଢ୍ରଂ ଗୁଦେ ମହିଷଵାହିନୀ ॥ ୩୦॥

କଟ୍ୟାଂ ଭଗଵତୀ ରକ୍ଷେଜ୍ଜାନୁନୀ ଵିନ୍ଧ୍ୟଵାସିନୀ ।

ଜଙ୍ଘେ ମହାବଳା ରକ୍ଷେତ୍ ସର୍ଵକାମ ପ୍ରଦାୟିନୀ ॥ ୩୧॥

ଗୁଲ୍ଫୟୋଃ ନାରସିଂହୀ ଚ ପାଦପୃଷ୍ଠେ ତୁ ତୈଜସୀ ।

ପାଦାଙ୍ଗୁଲୀଷୁ ଶ୍ରୀ ରକ୍ଷେତ୍ ପାଦାଧଃ ତଳଵାସିନୀ ॥ ୩୨॥

ନଖାନ୍ ଦଂଷ୍ଟ୍ରାକରାଳୀ ଚ କେଶାଂଶ୍ଚୈଵୋର୍ଧ୍ଵକେଶିନୀ ।

ରୋମକୂପେଷୁ କୌବେରୀ ତ୍ଵଚଂ ଵାଗୀଶ୍ଵରୀ ତଥା ॥ ୩୩॥

ରକ୍ତଂ ଅଜ୍ଜାଵସା ମାଂସାନ୍ୟସ୍ଥିମେଦାଂସି ପାର୍ଵତୀ ।

ଅନ୍ତ୍ରାଣି କାଳରାତ୍ରିଶ୍ଚ ପିତ୍ତଂ ଚ ମୁକୁଟେଶ୍ଵରୀ ॥ ୩୪॥

ପଦ୍ମାଵତୀ ପଦ୍ମକୋଶେ କଫେ ଚୂଡାମଣିଃ ତଥା ।

ଜ୍ଵାଳାମୁଖୀ ନଖଜ୍ଵାଳାମଭେଦ୍ୟା ସର୍ଵସନ୍ଧିଷୁ ॥ ୩୫॥

ଶୁକ୍ରଂ ବ୍ରହ୍ମାଣୀ ମେ ରକ୍ଷେଚ୍ଛାୟାଂ ଛତ୍ରେଶ୍ଵରୀ ତଥା ।

ଅହଙ୍କାରଂ ମନୋବୁଦ୍ଧିଂ ରକ୍ଷେନ୍ମେ ଧର୍ମଧାରିଣୀ ॥ ୩୬॥

ପ୍ରାଣାପାନୌ ତଥା ଵ୍ୟାନମୁଦାନଂ ଚ ସମାନକମ୍ ।

ଵଜ୍ରହସ୍ତା ଚ ମେ ରକ୍ଷେତ୍ପ୍ରାଣଂ କଲ୍ୟାଣ ଶୋଭନା ॥ ୩୭॥

ରସେ ରୂପେ ଚ ଗନ୍ଧେ ଚ ଶବ୍ଦେ ସ୍ପର୍ଶେ ଚ ଯୋଗିନୀ ।

ସତ୍ତ୍ଵଂ ରଜସ୍ତମଃ ଚୈଵ ରକ୍ଷେନ୍ନାରାୟଣୀ ସଦା ॥ ୩୮॥

ଆୟୂ ରକ୍ଷତୁ ଵାରାହୀ ଧର୍ମଂ ରକ୍ଷତୁ ଵୈଷ୍ଣଵୀ ।

ଯଶଃ କୀର୍ତ୍ତିଂ ଚ ଲକ୍ଷ୍ମୀଂ ଚ ଧନଂ ଵିଦ୍ୟାଂ ଚ ଚକ୍ରିଣୀ ॥ ୩୯॥

ଗୋତ୍ରଂ ଇନ୍ଦ୍ରାଣି ମେ ରକ୍ଷେତ୍ପଶୂନ୍ମେ ରକ୍ଷ ଚଣ୍ଡିକେ ।

ପୁତ୍ରାନ୍ ରକ୍ଷେନ୍ ମହାଲକ୍ଷ୍ମୀଃ ଭାର୍ଯ୍ୟାଂ ରକ୍ଷତୁ ଭୈରଵୀ ॥ ୪୦॥

ପନ୍ଥାନଂ ସୁପଥା ରକ୍ଷେନ୍ମାର୍ଗଂ କ୍ଷେମକରୀ ତଥା ।

ରାଜଦ୍ଵାରେ ମହାଲକ୍ଷ୍ମୀଃ ବିଜୟା ସର୍ଵତଃ ସ୍ଥିତା ॥ ୪୧॥

ରକ୍ଷାହୀନଂ ତୁ ଯତ୍ସ୍ଥାନଂ ଵର୍ଜିତଂ କଵଚେନ ତୁ ।

ତତ୍ସର୍ଵଂ ରକ୍ଷ ମେ ଦେବୀ ଜୟନ୍ତୀ ପାପନାଶିନୀ ॥ ୪୨॥

ପଦଂ ଏକଂ ନ ଗଚ୍ଛେତ୍ତୁ ଯଦୀଚ୍ଛେଚ୍ଛୁଭମାତ୍ମନଃ ।

କଵଚେନ ଆଵୃତୋ ନିତ୍ୟଂ ଯତ୍ର ଯତ୍ରୈଵ ଗଚ୍ଛତି ॥ ୪୩॥

ତତ୍ର ତତ୍ରାର୍ଥ ଲାଭଶ୍ଚ ଵିଜୟଃ ସାର୍ଵକାମିକଃ ।

ଯଂ ଯଂ ଚିନ୍ତୟତେ କାମଂ ତଂ ତଂ ପ୍ରାପ୍ନୋତି ନିଶ୍ଚିତମ୍ ।

ପରମୈଶ୍ଵର୍ଯ୍ୟଂ ଅତୁଳଂ ପ୍ରାପ୍ସ୍ୟତେ ଭୂତଳେ ପୁମାନ୍ ॥ ୪୪॥

ନିର୍ଭୟୋ ଜାୟତେ ମର୍ତ୍ତ୍ୟଃ ସଂଗ୍ରାମେଷ୍ଵପରାଜିତଃ ।

ତ୍ରୈଲୋକ୍ୟେ ତୁ ଭଵେତ୍ପୂଜ୍ୟଃ କଵଚେନାଵୃତଃ ପୁମାନ୍ ॥ ୪୫॥

ଇଦଂ ତୁ ଦେଵ୍ୟାଃ କଵଚଂ ଦେଵାନାଂ ଅପି ଦୁର୍ଲଭମ୍ ।

ୟଃ ପଠେତ୍ପ୍ରୟତୋ ନିତ୍ୟଂ ତ୍ରିସନ୍ଧ୍ୟଂ ଶ୍ରଦ୍ଧଯା ନ୍ଵିତଃ ॥ ୪୬॥

ଦୈଵୀ କଳା ଭଵେତ୍ତସ୍ୟ ତ୍ରୈଲୋକ୍ୟେଷ୍ଵପରାଜିତଃ ।

ଜୀଵେଦ୍ଵର୍ଷଶତଂ ସାଗ୍ରମପମୃତ୍ୟୁଵିଵର୍ଜିତଃ ॥ ୪୭॥

ନଶ୍ୟନ୍ତି ଵ୍ୟାଧୟଃ ସର୍ଵେ ଲୂତାଵିସ୍ଫୋଟକାଦୟଃ ।

ସ୍ଥାଵରଂ ଜଙ୍ଗମଂ ଚୈଵ କୃତ୍ରିମଂ ଚାପି ଯଦ୍ଵିଷମ୍ ॥ ୪୮॥

ଅଭିଚାରାଣି ସର୍ଵାଣି ମନ୍ତ୍ରୟନ୍ତ୍ରାଣି ଭୂତଳେ ।

ଭୂଚରାଃ ଖେଚରାଶ୍ଚୈଵ ଜଲଜାଶ୍ଚୌପଦେଶିକାଃ ॥ ୪୯॥

ସହଜା କୁଲଜା ମାଳା ଡାକିନୀ ଶାକିନୀ ତଥା ।

ଅନ୍ତରୀକ୍ଷ ଚରାଘୋରା ଡାକିନ୍ୟଶ୍ଚ ମହାବଳାଃ ॥ ୫୦॥

ଗ୍ରହଭୂତପିଶାଚାଶ୍ଚ ଯକ୍ଷଗନ୍ଧର୍ଵ ରାକ୍ଷସାଃ ।

ବ୍ରହ୍ମରାକ୍ଷସ ଵେତାଳାଋ କୁଷ୍ମାଣ୍ଡା ଭୈରଵାଦୟଃ ॥ ୫୧॥

ନଶ୍ୟନ୍ତି ଦର୍ଶନାତ୍ ତସ୍ୟ କଵଚେ ହୃଦି ସଂସ୍ଥିତେ ।

ମାନୋନ୍ନତିଃ ଭଵେଦ୍ରାଜ୍ଞଃ ତେଜୋଵୃଦ୍ଧି କରଂ ପରମ୍ ॥ ୫୨॥

ଯଶସା ଵର୍ଧତେ ସୋଽପି କୀର୍ତ୍ତିମଣ୍ଡିତ ଭୂତଳେ ।

ଜପେତ୍ ସପ୍ତଶତୀଂ ଚଣ୍ଡୀଂ କୃତ୍ଵା ତୁ କଵଚଂ ପୁରା ॥ ୫୩॥

ଯାଵଦ୍ଭୂମଣ୍ଡଳଂ ଧତ୍ତେ ସଶୈଳ ଵନକାନନମ୍ ।

ତାଵତ୍ ତିଷ୍ଠତି ମେଦିନ୍ୟାଂ ସନ୍ତତିଃ ପୁତ୍ରପୌତ୍ରିକୀ ॥ ୫୪॥

ଦେହାନ୍ତେ ପରମଂ ସ୍ଥାନଂ ଯତ୍ସୁରୈରପି ଦୁର୍ଲଭମ୍ ।

ପ୍ରାପ୍ନୋତି ପୁରୁଷୋ ନିତ୍ୟଂ ମହାମାୟା ପ୍ରସାଦତଃ ॥ ୫୫॥

ଲଭତେ ପରମଂ ରୂପଂ ଶିଵେନ ସହ ମୋଦତେ ॥ ଓଁ ॥ ୫୬॥

॥ ଇତିଶ୍ରୀ ଦେଵ୍ୟାଃ କଵଚ ସ୍ତୋତ୍ରଂ ସମାପ୍ତମ୍ II

ଶ୍ରୀ ଦୁର୍ଗା ସପ୍ତଶତୀ : ଦେଵୀ କଵଚ ସ୍ତୋତ୍ରମ୍ ଅଥ ଦେବ୍ୟାଃ କବଚମ୍

ଶ୍ରୀ ଦୁର୍ଗା ସପ୍ତଶତୀ : ଦେଵୀ କଵଚ ସ୍ତୋତ୍ରମ୍ ଅଥ ଦେବ୍ୟାଃ କବଚମ୍