ଆଜି ହରି ଶୟନ ବଡ଼ ଏକାଦଶୀ। ଆଜିଠାରୁ ଚତୁର୍ମାସ ଧରି ଶ୍ରୀ ନାରାୟଣ ଶୟନ କରିଥାନ୍ତି । ଏହି ସମୟରେ ବିବାହ ଆଦି ସମସ୍ତ ଶୁଭକର୍ମ ମାନ ଅନୁଷ୍ଠିତ ହୋଇ ନଥାଏ । ଆଷାଢ଼ ଏକାଦଶୀ ସହ ଭାଦ୍ରବ, କାର୍ତ୍ତିକ ଓ ମାଘ ମାସରେ ଅନୁଷ୍ଠିତ ହେଉଥିବା ଶୁକ୍ଳପକ୍ଷ ଏକାଦଶୀ ମାନ ଚାରି ବଡ଼ ଏକାଦଶୀ ନାମରେ ପରିଚିତ ଅଟେ । ବିଭିନ୍ନ ଦେବାଳୟ ମାନଙ୍କରେ ଏହି ଏକାଦଶୀ ମାନ ଅତ୍ୟନ୍ତ ଭକ୍ତି ଭାବ ସହ ପାଳନ କରାଯାଏ।

ଏକାମ୍ର କ୍ଷେତ୍ରର କ୍ଷେତ୍ରପାଳକ ଶ୍ରୀ ଅନନ୍ତ ପୁରୁଷୋତ୍ତମ ଅଟନ୍ତି। ଏହାଙ୍କ ମଧ୍ଯ ଏହି ଚାରି ବଡ଼ ଏକାଦଶୀ ବହୁ ଆଡମ୍ବର ସହ ପାଳନ କରାଯାଏ । ଶ୍ରୀ ଅନନ୍ତ ବାସୁଦେବଙ୍କ ବିଜେ ପ୍ରତିମା ଶ୍ରୀ ବାସୁଦେବ ଓ ଶ୍ରୀ ଦୋଳଗୋବିନ୍ଦ ଶ୍ରୀ ଲିଙ୍ଗରାଜ ମହାପ୍ରଭୁଙ୍କ କୋଷାଧକ୍ଷ ଭାବେ ମହାପ୍ରଭୁଙ୍କ ବିଜେ ପ୍ରତିମା ମାନଙ୍କ ସହ ରାଜଦେଉଳର ଦକ୍ଷିଣୀ ଘରେ ରହି ପୂଜା ପାଇଥାନ୍ତି। ଉଭୟ ହରି ପ୍ରତିମା ଶ୍ରୀ ଲିଙ୍ଗରାଜ ମହାପ୍ରଭୁଙ୍କ ସହ ବିଭିନ୍ନ ଯାତ୍ରା ଉତ୍ସବ ମାନଙ୍କରେ ସହଯୋଗୀ ଭାବେ ଯୋଗ ଦେଇଥାନ୍ତି ।

ବଡ ଏକାଦଶୀ ବା ଆଷାଢ଼, ଭାଦ୍ରବ, କାର୍ତ୍ତିକ ଏବଂ ମାଘ ଶୁକ୍ଳ ଏକାଦଶୀ ମାନଙ୍କରେ ଶ୍ରୀ ବାସୁଦେବ ସ୍ଵଦେଉଳକୁ ଘଣ୍ଟ ଘଣ୍ଟା ସହ ପାଲିଙ୍କିରେ ବିଜେ ହୁଅନ୍ତି। ଶ୍ରୀ ବାସୁଦେବ ବିଜେ ପ୍ରତିମା ମୂଳ ଦେବତାଙ୍କ ନିକଟରେ ବସି ମୁଆଁଭୋଗ ଗ୍ରହଣ କରନ୍ତି । ଏହାପରେ ଶ୍ରୀ ବାସୁଦେବ ବେଢା ପରିକ୍ରମା କରନ୍ତି । ଏହାପରେ ବିଜେ ପ୍ରତିମା ଶ୍ରୀ ବାସୁଦେବ ଏବଂ ମୂଳ ଦେବତା ମଧ୍ୟରେ ମୁଆଁ ଭୋଗ ଏବଂ ଭେଟ ଆଳତୀ ଅନୁଷ୍ଟିତ ହୁଏ। ଏହାପରେ ଶ୍ରୀ ବାସୁଦେବ ଖଟୁଲିରେ ବସାଇ ସାନ୍ଧ୍ୟଭୋଗ ଅନୁଷ୍ଟିତ ହୋଇଥାଏ ଏବଂ ଆଳତୀ ହୋଇ ଶ୍ରୀ ବାସୁଦେବଙ୍କ ମନ୍ଦିରରେ ମହାଦୀପ ଉଠେ । ଏହାପରେ ଶ୍ରୀ ବାସୁଦେବ ମହାପ୍ରଭୁ ଶ୍ରୀ ଲିଙ୍ଗରାଜଙ୍କ ମନ୍ଦିରକୁ ବାହୁଡି ଆସନ୍ତି । ଏହାପରେ ଶ୍ରୀ ରାଜଦେଉଳରେ ଅନ୍ୟାନ୍ୟ ନୀତିମାନ ବଢେ ।

ଶ୍ରୀ ଲିଙ୍ଗରାଜ ମହାପ୍ରଭୁଙ୍କ ହରିଶୟନ ଏକାଦଶୀ

ଶ୍ରୀ ଲିଙ୍ଗରାଜ ମହାପ୍ରଭୁଙ୍କ ହରିଶୟନ ଏକାଦଶୀ