ଶ୍ରୀକୃଷ୍ଣ ସଂକୀର୍ତ୍ତନର ଜୟ ହେଉ! ଅନାଦିକାଳର ପୁଞ୍ଜିଭୂତ ଧୂଳିରାଶିକୁ ଦୂରୀଭୂତ କରି ହୃଦୟ-ଦର୍ପଣକୁ ଏହା ଶୁଦ୍ଧପୂତ କରିଦିଏ । ଜନ୍ମ-ମୃତ୍ୟୁର ପରମ୍ପରାଯୁକ୍ତ ଭୌତିକ ସଂସାରର ଘୋର ଦାବାନଳକୁ ଏହା ନିର୍ବାପିତ କରିଦିଏ । ସମଗ୍ର ବିଶ୍ୱ ନିମିତ୍ତ ଏହା ହିଁ ସର୍ବଶ୍ରେଷ୍ଠ ଆଶୀର୍ବାଦ ସ୍ୱରୂପ, କାରଣ ଆଧ୍ୟାତ୍ମିକ କୁମୁଦିନୀକୁ ଉଲ୍ଲସିତ କରିବାକୁ ଏହା କମନୀୟ ଚନ୍ଦ୍ର ସଦୃଶ । ଅଧ୍ୟାତ୍ମରୂପକ ବଧୂର ଏହା ଜୀବନ ସ୍ୱରୂପ । ଏହା ଦିବ୍ୟ ଆଧ୍ୟାତ୍ମିକ ସାଗରରେ ଆନନ୍ଦ ଊର୍ମି ସୃଷ୍ଟି ପୂର୍ବକ ପ୍ରତ୍ୟେକ ପଦରୁ ଆମ୍ଭମାନଙ୍କ ନିମିତ୍ତ ଦିବ୍ୟ ଅମୃତର ସ୍ୱାଦ ଆଣିଦିଏ । ଦିବ୍ୟଶକ୍ତି ଭୂଷିତା ଏହି ନାମର ପବିତ୍ର ଧାରା ଅନନ୍ତ କାଳରୁ ପ୍ରବାହିତା । ଏହା ଦିବ୍ୟଶକ୍ତି ସମନ୍ୱିତ । ଏହି ପବିତ୍ର ନାମ ସ୍ମରଣ ସମସ୍ତ ସମୟ ନିୟମର ସୀମା ବହିର୍ଭୂତ ।

ହେ ପ୍ରଭୁ! ଆପଣ ଦୟାପରବଶ ହୋଇ ପବିତ୍ର ନାମ ସ୍ମରଣ ଦ୍ୱାରା ଆପଣଙ୍କୁ ପାଇବାର ମାର୍ଗ ସୁଗମ କରିଦେଇଛନ୍ତି । ମାତ୍ର ମୋର ଦୁର୍ଭାଗ୍ୟ ଯେ ଆପଣଙ୍କ ଦିବ୍ୟ ନାମ ସ୍ମରଣ ନିମିତ୍ତ ମୋର କୌଣସି ଆଗ୍ରହ ନାହିଁ । ପଥପ୍ରାନ୍ତର ତୃଣଠାରୁ ଯେ ନିଜକୁ ତୁଚ୍ଛ ମଣେ, ବୃକ୍ଷଠାରୁ ଯେ ଅଧିକ ସହିଷ୍ଣୁ, ଯେ ସମ୍ମାନ ଆଶାୟୀ ନୁହେଁ ମାତ୍ର ଅପରପକ୍ଷରେ ସମସ୍ତଙ୍କୁ ସମ୍ମାନ ପ୍ରଦର୍ଶନ କରିଥାଏ, ସେ ହିଁ ସର୍ବଦା ସଚ୍ଚିଦାନନ୍ଦଙ୍କ ସଂକୀର୍ତ୍ତନ କରିପାରେ ।

ହେ ଜଗଦୀଶ ! ଧନଜନ, କାବ୍ୟ-ବିଳାସ ବା ସୁନ୍ଦରୀ ସ୍ତ୍ରୀ, ମୁଁ କିଛି କାମନା କରୁନାହିଁ । ଜନ୍ମଜନ୍ମାନ୍ତରରେ କେବଳ ଆପଣଙ୍କ ଚରଣକମଳରେ ଅହେତୁକୀ ଭକ୍ତି ମୁଁ ପ୍ରାର୍ଥନା କରୁଅଛି । ହେ ପ୍ରେମମୟ । ପ୍ରସନ୍ନ ଚିତ୍ତରେ ଆପଣ ମତେ ନିଃସ୍ୱାର୍ଥ ଭକ୍ତି ତଥା ପ୍ରେମ ପ୍ରଦାନ କରନ୍ତୁ । ହେ ନନ୍ଦନନ୍ଦନ! ମୁଁ ଆପଣଙ୍କର ଚିରନ୍ତନ କିଙ୍କର, ମାତ୍ର କୌଣସି କାରଣବଶତଃ ଜନ୍ମମୃତ୍ୟୁର ଅଥଳ ଗର୍ଭରେ ନିମଜ୍ଜିତ । କୃପାପୂର୍ବକ ମତେ ଏ ଭବସାଗରରୁ ଉଦ୍ଧାର କରି ଆପଣଙ୍କ ପଦ୍ମପାଦର ଏକ ରେଣୁକଣା ହେବାର ସୌଭାଗ୍ୟ ପ୍ରଦାନ କରନ୍ତୁ ।

ହେ ପ୍ରଭୁ! ଆପଣଙ୍କ ଦିବ୍ୟନାମ ସ୍ମରଣ ମାତ୍ରେ କେବେ ମୋର ଚକ୍ଷୁଯୁଗଳ ଲୋତକାପ୍ଳୁତ ହୋଇଉଠିବ? କେବେ ଆନନ୍ଦ ଗଦଗଦ୍ ପ୍ରେମବିଗଳିତ କଣ୍ଠ ମୋର ନାମସ୍ମରଣ ମାତ୍ରେ ବାକ୍ ରୁଦ୍ଧ ହୋଇଯିବ? କେବେ ସମଗ୍ର ଶରୀରରେ ମୋର ରୋମାଞ୍ଚ ଦେଖାଯିବ?

ହେ ଗୋବିନ୍ଦ ! ମୋ ପକ୍ଷରେ ଆପଣଙ୍କ ନିମିଷକ ବିରହ ଅନନ୍ତ ଯୁଗପରି ପ୍ରତୀୟମାନ ହେଉଛି । ଆପଣଙ୍କ ଦର୍ଶନ ବଞ୍ଚିତ ଚକ୍ଷୁରୁ ମୋର ଶ୍ରାବଣର ବାରିଧାରା ପରି ବିରହାଶ୍ରୁ ଝରିପଡ଼ୁଛି । ମୋତେ ସାରା ସଂସାର ନୀରସ ତଥା ଶୂନ୍ୟବୋଧ ହେଉଅଛି । ପ୍ରିୟତମ କୃଷ୍ଣଙ୍କ ବ୍ୟତିରେକ ମୁଁ ଅନ୍ୟ କାହାକୁ ପ୍ରାଣନାଥ ବୋଲି ମାନେ ନାହିଁ । ସେ ମୋତେ ଆଲିଙ୍ଗନ କରନ୍ତୁ, ପଦତଳେ ଦଳି ଦିଅନ୍ତୁ, ସିଧାସଳଖ ପ୍ରାଣରେ ମାରିଦିଅନ୍ତୁ, ତାଙ୍କ କରୁଣା ଦୃଷ୍ଟିରୁ ବଞ୍ଚିତ କରନ୍ତୁ ବା ଅନ୍ୟ ଯେ କୌଣସି ଉପାୟରେ ମୋ ପ୍ରତି ତାଙ୍କର ବଳବତୀ ଇଚ୍ଛାକୁ କାର୍ଯ୍ୟକାରୀ କରନ୍ତୁ । ତଥାପି ସେ, ସେ ହିଁ ମୋର ପ୍ରେମମୟ ପ୍ରାଣନାଥ ହୋଇରହିବେ ।

-ଶ୍ରୀ ଚୈତ୍ୟନାମୃତ-