ବଡ଼ଦେଉଳରେ ମହାପ୍ରଭୁଙ୍କ ଦର୍ଶନ କରିବା ପୂର୍ବରୁ , ପ୍ରଥମେ ସିଂହଦ୍ୱାର ଗୁମୁଟ ମଧ୍ୟରେ ଦକ୍ଷିଣ ଭାଗରେ ଥିବା ୨୨ ଭୂଜ ନୃସିଂହ , ପତିତପାବନ ଦର୍ଶନ କରିବା ସହ ବାମ ଭାଗେ ଥିବା ମହାବୀର ଗଣେଶ ଆଦି ଦର୍ଶନରୁ ଆରମ୍ଭ ହୋଇଥାଏ । ତତ୍ପରେ ୨୨ ପାହାଚ ରେ ଥିବା ଯମ ଶିଳା ଉପରେ ଠିଆ ହୋଇ ନୀଳଚକ୍ର ଦର୍ଶନ କରି ,ବାମ ଭାଗେ ଥିବା କାଶୀ ବିଶ୍ଵନାଥ , ଶ୍ରୀ ରାମ ଚନ୍ଦ୍ର , ନୃସିଂହ ଆଦି ଙ୍କୁ ଦର୍ଶନ କରି ବାଇଶି ପାହାଚ ଅତିକ୍ରମ କରାଯାଇଥାଏ।

କୂର୍ମ ବେଢ଼ା ପ୍ରବେଶ କରିବା ପରେ , ପ୍ରଥମେ ବାମ ଭାଗରୁ ବେଢ଼ା ପରିକ୍ରମା ଆରମ୍ଭ ହୋଇଥାଏ। ଏହି ପରିକ୍ରମା ଆରମ୍ଭ ସତ୍ୟ ନାରାୟଣଙ୍କ ଠୁ ଆରମ୍ଭ ହୋଇ , କଳ୍ପ ବଟ ମୂଳେ ଥିବା ବାଳ ମୁକୁନ୍ଦ , ହରି ସହଦେବ ମନ୍ଦିର, ବଟ ଜଗନ୍ନାଥ , ବଟ , ଗଣେଶ , ପଞ୍ଚ ମହାଦେବ , ବଟ ମଙ୍ଗଳା , କଳ୍ପବଟ , ଇନ୍ଦ୍ରାଣୀ ମନ୍ଦିର , କୁତ୍ତାମ ଚଣ୍ଡୀ , ଅନନ୍ତ ଶୟନ , ମୁକ୍ତି ମଣ୍ଡପ , ମୁକ୍ତି ମଣ୍ଡପ ନିକଟସ୍ଥ ଆଦି ନୃସିଂହ , ରୋହିଣୀ କୁଣ୍ଡ , ବିମଳା ଠାକୁରାଣୀ, ସାକ୍ଷୀ ଗୋପାଳ, କାଞ୍ଚି ଗଣେଶ , ନିଶା ନୃସିଂହ , ନିଶା ବରାହ , ସରସ୍ଵତୀ ମନ୍ଦିର, ଭୁବନେଶ୍ଵରୀ ଠାକୁରାଣୀ , ଷଷ୍ଠୀ ଦେବୀ , ନୀଳମାଧବ , ବେଢ଼ା କାଳୀ , ମହାଲକ୍ଷ୍ମୀ ମନ୍ଦିର , ନବଗ୍ରହ ମନ୍ଦିର , ସୂର୍ଯ୍ୟ ମନ୍ଦିର , ନିଶା ତ୍ରିବିକ୍ରମ , ଶ୍ରୀ ରାମ ଚନ୍ଦ୍ର ମନ୍ଦିର , ହୟଗ୍ରିବ, ପାତାଳେଶ୍ୱର ମହାଦେବଙ୍କ ଦର୍ଶନ କରି ସାତ ପାହାଚ ଦେଇ ବଡ଼ଦେଉଳ ନାଟମଣ୍ଡପ କୁ ପ୍ରବେଶ କରିବା ବିଧି ପାଳନ କରାଯାଏ।

ନାଟମଣ୍ଡପ ପ୍ରବେଶ କରିବା ପରେ ପ୍ରଥମେ ଗରୁଡ଼ ପଛ ଭାଗରୁ , ଶିବ ଓ ବ୍ରହ୍ମା ଙ୍କୁ ଦର୍ଶନ କରି , ମହାପ୍ରଭୁଙ୍କ ଦର୍ଶନ କରିବା ବିଧି ଥାଏ। ଏହାପରେ ଗରୁଡ ଖମ୍ୱ କୁ ଆଲିଙ୍ଗନ କରାଯାଇଥାଏ।

ତତ୍ପରେ , ନାଟମଣ୍ଡପ ମଧ୍ୟରେ ଥିବା ସମସ୍ତ ଦେବତା ଙ୍କୁ ଦର୍ଶନ କରି ଜଗମୋହନ କୁ ପ୍ରବେଶ କରିବା ଉଚିତ୍ । ଜଗମୋହନ ନଣ୍ଡାବର୍ତ୍ତ ନିକଟରେ ଜୟ ବିଜୟ ଙ୍କୁ ନମସ୍କାର କରି ଜଗମୋହନ ମଧ୍ୟରେ କୋଟି କୈବଲ୍ୟ ନାଥ ମହାପ୍ରଭୁଙ୍କୁ ଦର୍ଶନ କରିବା ବିଧି ଅଛି। ଏହାପରେ ବାହାର ଭଣ୍ଡାର ଘରେ ଦେବ ଦେବ ଲୋକନାଥ , ଦେବୀ ଦୁର୍ଗା , ଶୟନ ଦିଅଁ ଆଦି ଙ୍କୁ ଦର୍ଶନ କରି ବେହରଣ ଦ୍ଵାର ଦେଇ ବାହାରକୁ ବାହାରି ଦକ୍ଷିଣ ଘରେ ସମସ୍ତ ଚଳନ୍ତି ବିଗ୍ରହ ବା ଉତ୍ସବ ବିଗ୍ରହ ଙ୍କୁ ଦର୍ଶନ କରି ଆନନ୍ଦ ରେ ଆନନ୍ଦ ବଜାର ରେ ମହାପ୍ରସାଦ ସେବନ କରିବା ବିଧେୟ। ଏହାପରେ ସ୍ନାନ ବେଦୀ , ଉତ୍ତର ଭାଗରେ ଥିବା ଇଶାଣେଶ୍ୱର ମହାଦେବ , ଶୀତଳା ଠାକୁରାଣୀ , ମହାବୀର , କୋଇଲି ବୈକୁଣ୍ଠ ଦର୍ଶନ କରିବା ସହ , ପଶ୍ଚିମ ଭାଗରେ ଥିବା କାନପତା ମହାବୀର , ଚାରି ଧାମ ମନ୍ଦିର , ନିଳାଦ୍ରୀ ଉପବନ ଏବଂ ଦକ୍ଷିଣ ପାର୍ଶ୍ଵ ରେ ଶ୍ରୀ ରାମ ଚନ୍ଦ୍ର ମନ୍ଦିର, ବାର ଭାଇ ହନୁମାନ , ଭାଗବତ ମନ୍ଦିର ଆଦି ଦର୍ଶନ ବିଧେୟ ।

ଏହି ପ୍ରକାର ଦର୍ଶନ କରିବା ଦ୍ୱାରା ମହାପ୍ରଭୁ ଶ୍ରୀ ଜଗନ୍ନାଥଙ୍କ ଦର୍ଶନ କରିବା ର ସମସ୍ତ ଫଳ ପ୍ରାପ୍ତ ହୋଇଥାଏ।

ଶ୍ରୀମନ୍ଦିର ରେ ଦର୍ଶନ କରିବା ବିଧି

ଶ୍ରୀମନ୍ଦିର ରେ ଦର୍ଶନ କରିବା ବିଧି