ଶ୍ରୀ ସତ୍ୟନାରାୟଣ ମନ୍ଦିର

👉 ଏହି ମନ୍ଦିରଟି ପ୍ରାୟ ୨୫ ଫୁଟ ଉଚ୍ଚା ଓ ପଞ୍ଚ ରଥ ବିଶିଷ୍ଟ ଅଟେ। ଏହି ମନ୍ଦିର ସମ୍ମୁଖରେ ଏକ ମୁଖଶlଳା (ମଣ୍ଡପ )ଅଛି ଓ ଏହା ଉତ୍ତରାଭିମୁଖୀ ଅଟେ ।

👉 ଐତିହାସିକମାନେ କୁହନ୍ତି ଏହି ମନ୍ଦିରଟି ଦିବ୍ୟସିଂହ ଦେବଙ୍କ ସାନ ଭାଇ ହରେକୃଷ୍ଣ ଦେବଙ୍କ ପ୍ରଥମ ରାଣୀ “ସତ୍ୟଭାମା ପାଟମହାଦେଈ “ଙ୍କ ଦ୍ୱାରା ନିର୍ମିତ୍ତ ହୋଇଛି। ତେଣୁ ପାଟ ମହାଦେଈଙ୍କ ନାମରେ ନାରାୟଣ ମନ୍ଦିର ନାମିତ ହୋଇ ପ୍ରଭୂ ଶ୍ରୀ ସତ୍ୟନାରାୟଣ ବିଜେ କରିଛନ୍ତି।

👉 ଶ୍ରୀ ସତ୍ୟନାରାୟଣ ବିଗ୍ରହ କଳା ମୁଗୁନି ପଥରରେ ନିର୍ମିତ୍ତ ଚତୃଭୁଜ ମୂର୍ତ୍ତି ଅଟନ୍ତି। ପାଦପୀଠକୁ ମିଶାଇ ଏହା ୫ ଫୁଟ ୧୦ ଇଞ୍ଚ ଅଟନ୍ତି। ଏହି ବିଗ୍ରହଙ୍କ ଦୁଇ ପାର୍ଶ୍ଵରେ ଶ୍ରୀଦେବୀ ଓ ଭୁଦେବୀ ବିଦ୍ୟମାନ। ସୁନ୍ଦର ଭାସ୍କର୍ଯ୍ୟରେ ପୂର୍ଣ୍ଣ ସର୍ବାଙ୍ଗ ଶରୀର ଅତ୍ୟନ୍ତ ମନୋରମ ଅଟେ। ଉପର ଡାହାଣ ହସ୍ତରେ ଚକ୍ର, ଉପର ବାମ ହସ୍ତରେ ଶଙ୍ଖ, ତଳ ଡାହାଣରେ ଅଭୟ ମୁଦ୍ରା ଓ ବାମରେ ଗଦା ଶୋଭା ପାଉଛି। ସତ୍ୟନାରାୟଣଙ୍କ କର୍ଣ୍ଣରେ କୁଣ୍ଡଳ, ଗଳାରେ ହlର ଓ ପ୍ରତ୍ୟେକ ହସ୍ତ ରେ ଦୁଇ ଯୋଡ଼ା ଖଡୁ ଦୃଶ୍ୟମାନ ହେଉଛି। ଏହି ବିଗ୍ରହଙ୍କ ପାଦ ଦେଶରେ ନତଜାନୁ ହୋଇ ଦକ୍ଷିଣ ଦିଗରେ ଗରୁଡ଼ ଉପବେଶନ କରିଛନ୍ତି।

👉 ସମଗ୍ର ପୀଠଟି ଅତ୍ୟନ୍ତ କାରୁକାର୍ଯ୍ୟ ପୂର୍ଣ୍ଣ। ପୀଠର ଉପର ପାର୍ଶ୍ୱରେ ଅପସରା, କିନ୍ନରୀଙ୍କ ମୂର୍ତ୍ତି ଖୋଦିତ ହୋଇଛି।

👉 ଶ୍ରୀ ସତ୍ୟନାରାୟଣଙ୍କ ପାର୍ଶ୍ଵ ଦେବୀ ଭାବରେ ଥିବା ଦୁଇ ଦେବୀ ମୂର୍ତ୍ତିଙ୍କୁ କେହି କେହି ଜୟା -ବିଜୟା ଅବା କେହି କେହି ଲଷ୍ମୀ-ସରସ୍ବତୀ ବୋଲି କହିଥାନ୍ତି। ତେବେ ଶ୍ରୀଜଗନ୍ନାଥଙ୍କ ପାଖରେ ଶ୍ରୀଦେବୀ -ଭୁଦେବୀ ରହୁଥିବାରୁ ତାଙ୍କରି ସ୍ୱରୂପ ସତ୍ୟନାରାୟଣଙ୍କ ପାର୍ଶ୍ଵ ଦେବୀଙ୍କୁ ମଧ୍ୟ ଶ୍ରୀଦେବୀ ଓ ଭୁଦେବୀ ବୋଲି ସ୍ୱୀକାର କରାଯାଇଛି।

ଶ୍ରୀ ସତ୍ୟନାରାୟଣଙ୍କ ସେବା

👉 ଶ୍ରୀମନ୍ଦିର ସତ୍ତ୍ୱଲିପି ଅନୁସାରେ ଶ୍ରୀମନ୍ଦିର ସେବକ ରାମଚନ୍ଦ୍ର ମହାସୁଆର, ମନୋହର ପଣ୍ଡା ଓ ଗଙ୍ଗାଧର ପଣ୍ଡା, ନଟବର ପ୍ରଧାନୀ ଓ କୃଷ୍ଣଚନ୍ଦ୍ର ଦାସ ଏହି ମନ୍ଦିର ସେବା ଅଧିକାର ପାଇଥିଲେ। ପରବର୍ତ୍ତୀ ସମୟରେ ମନୋହର ପଣ୍ଡା ଓ ଗଙ୍ଗାଧର ପଣ୍ଡାଙ୍କ ଅଂଶ ଖରିଦ ସୂତ୍ରରେ ମଙ୍ଗୁଳି ପଣ୍ଡା ଏଥିରେ ସାମିଲ ହେଲେ।

👉 ଏହି ମନ୍ଦିର ପରିଚାଳନା ପାଇଁ କୌଣସି କୋଠ ଖଞ୍ଜା ଶ୍ରୀମନ୍ଦିର ତରଫରୁ ହୋଇ ନାହିଁ। ଉପରୋକ୍ତ ସେବକମାନେ ନିଜ ନିଜ ଖର୍ଚ୍ଚରେ ମନ୍ଦିରର ସେବା ପୂଜା କରୁଛନ୍ତି ।

👉 ସମ୍ପ୍ରତି ଉକ୍ତ ମନ୍ଦିରର ବେଢ଼ପତ୍ର ଅନୁଯାୟୀ ସର୍ବଶ୍ରୀ ଲଷ୍ମୀଧର ମହାସୁଆର, ଜଗନ୍ନାଥ ପଣ୍ଡା, ଦାମୋଦର ଦାସ ଓ ଶ୍ରୀଧର ପ୍ରଧାନୀ ନିୟମିତ ସେବା ପୂଜା କରି ଆସୁଛନ୍ତି। ଶ୍ରୀମନ୍ଦିର ପ୍ରଶାସନ ପକ୍ଷରୁ ଶ୍ରୀ ସତ୍ୟନାରାୟଣଙ୍କ ଦୈନଦିନ ନୀତି ପାଇଁ ଏକ ସରା ବଲ୍ଳଭ ମିଳୁଛି ।

ଶ୍ରୀ ସତ୍ୟନାରାୟଣଙ୍କ ବେଶ ଏବଂ ଭୋଗ

👉 ବିଶେଷ ଉତ୍ସବ ଭାବରେ ଗଜ ଉଦ୍ଧାରଣ ବେଶ ଦିନ ଖିରି ଓ ଅମlଲୁ ମିଳେ। ସାଧାରଣତଃ ପ୍ରତ୍ୟେକ ପୁର୍ଣିମା ଓ ସଂକ୍ରାନ୍ତିରେ ଏହି ମନ୍ଦିରରେ ଭକ୍ତଙ୍କ ଭିଡ଼ ହୁଏ ଓ ସେମାନଙ୍କ ମାନସିକ ଭୋଗ ପୂଜା କରାଯାଏ।

👉 ଏହି ମାନସିକ ଭୋଗ ମଧ୍ୟରେ ବିଶେଷ ଭାବରେ ସିକିରିଣି କ୍ଷୀର (ସିରିଣୀ ଭୋଗ ), ଯାହାକି ଅଟା, ଚିନି, କଦଳୀ, ଭଲଘିଅ, ମହୁ, ଗୋଲମରିଚ, ଅଳେଇଚ, ଖିସିମିସି ଓ ପାଞ୍ଚ ପ୍ରକାର ଫଳ ଇତ୍ୟାଦି କ୍ଷୀର ସହ ମିଶ୍ରଣ କରି ନୂଆ ନାଲି କୁଡୁଆରେ ରଖି ପ୍ରଭୁଙ୍କୁ ସମର୍ପଣ କରାଯାଏ। ଏହି ଭୋଗ ଅତ୍ୟନ୍ତ ସ୍ୱାଦିଷ୍ଠ ଓ ପୃଷ୍ଟିକର ହୋଇଥିବାରୁ ଅନେକ ଭକ୍ତ ଏହି ଭୋଗ ଲଗାଇଥାନ୍ତି।

👉 ଭକ୍ତମାନେ ନିଜ ନିଜ ଛୋଟ ଛୁଆମାନଙ୍କର ମଙ୍ଗଳ ମନାସି ଏହି ଭୋଗ କରିଥାନ୍ତି। ସ୍ଥାନୀୟ ଭକ୍ତଙ୍କ ଛଡା କିଛି କିଛି ତୀର୍ଥ ଯାତ୍ରୀ ମଧ୍ୟ ଏହି ଭୋଗ ଲଗାଇଥାନ୍ତି ।

👉 ସ୍ନାନପୂର୍ଣ୍ଣିମା ଦିନ ଶ୍ରୀଜୀଉଙ୍କ ସ୍ନାନ ଉଦ୍ଦେଶ୍ୟରେ ସୁନା କୂଅରୁ ଆସିଥିବା ଜଳ ଏହି ମନ୍ଦିର ଭିତରେ ହାଣ୍ଡି ଓ କୁଡୁଆରେ ରଖାଯାଏ ।

👉 ଏଠାରେ ଭକ୍ତବୃନ୍ଦ ଶ୍ରୀଜୀଉଙ୍କ ପାଇଁ ପୁଷ୍ପମାଳା ଗୁନ୍ଥିଥା'ନ୍ତି ।

ଶ୍ରୀମନ୍ଦିରରେ ଶ୍ରୀ ସତ୍ୟନାରାୟଣ ମନ୍ଦିର

ଶ୍ରୀମନ୍ଦିରରେ ଶ୍ରୀ ସତ୍ୟନାରାୟଣ ମନ୍ଦିର