ରାଘବ କରୁଣାକରଂ ମୁନିସେବିତଂ ସୁରବନ୍ଦିତଂ ।

ଜାନକୀ ବଦନାରବିନ୍ଦ ଦିବାକରଂ ଗୁଣ ଭାଜନଂ ।।

ବାଳୀ ଶୁଣୁ ହିତୈଶିଣଂ ହନୁମତ୍ ପ୍ରିୟଂ କମଳେକ୍ଷଣଂ ।

ଯାତୁଧାନ ଭୟଙ୍କରଂ ପ୍ରଣମାମି ରାଘବ କୁଞ୍ଜରଂ ।।

ପବିତ୍ର ଚୈତ୍ର ଶୁକ୍ଳ ନବମୀ ଦିନ ଶ୍ରୀମନ୍ଦିରରେ ରାମଜନ୍ମ ନୀତି ଅନୁଷ୍ଠିତ ହୋଇଥାଏ । ଏହି ଦିନ ଶ୍ରୀଜୀଉଙ୍କ ଶ୍ରୀଛାମୁକୁ ମଧ୍ୟାହ୍ନ ଧୂପ ଛେକ ମୁଦୁଲି ଦ୍ୱାର ଓ ବେହରଣ ଦ୍ୱାର ଦେଇ ଆସିଥାଏ । ତତ୍ପରେ ଭିତରକାଠ ନିକଟସ୍ଥ ଭଣ୍ଡାର ଘର ଓ ଖଟଶେଜ ଘର ମଧ୍ୟବର୍ତ୍ତୀ କଂସାପାହାରୀ ଠାରେ ସୁଧସୁଆର ସେବାୟତ ପୋଛା ମାରିବା ପରେ ପୂଜାପଣ୍ଡା ସାମନ୍ତ ଆସି ସେଠାରେ ଜନ୍ମମଣ୍ଡଳ କାଟି ଥାଆନ୍ତି । ଏହାପରେ ତିନିବାଡରେ ଷୋଡଶୋପଚାର ବିଧିରେ ମଧ୍ୟାହ୍ନ ଧୂପ ପୂଜା ବସିଥାଏ । ମଧ୍ୟାହ୍ନ ଧୂପ ବଢିଲେ ଦକ୍ଷିଣୀଘର ଭୋଗ ପୂଜା ଅନୁଷ୍ଠିତ ହୁଏ ।

ଭୋଗ ବଢିଲେ ଶ୍ରୀ ରାମ ମହାଜନ ସେବାୟତଙ୍କ ହାତରେ ଆସି ରତ୍ନସିଂହାସନସ୍ଥ ମହାପ୍ରଭୁଙ୍କ ବାଡ଼ରେ ବିଜେ କରନ୍ତି । ତତ୍ପରେ ମୁଦ୍ରହସ୍ତ (ମୁଦିରସ୍ତ) ସେବାୟତ ଧଣ୍ଡିପ୍ରସାଦ ଲାଗି କରିଥାନ୍ତି । ପୁଣି ଉଲାଗି ହେବାପରେ ଶ୍ରୀ ରାମଙ୍କୁ ଆଜ୍ଞାମାଳ ସ୍ୱରୂପରେ ଦେଇଥାନ୍ତି । ଏହାପରେ ଶ୍ରୀ ରାମ ଜନ୍ମମଣ୍ଡଳରେ ବିରାଜିତ ହୁଅନ୍ତି । ସେଠାରେ ଦୁଇଜଣ ସେବାୟତ ଦଶରଥ ଓ କୌଶଲ୍ୟା ହୋଇ ଖଣ୍ଡୁଆ ଘୋଡେଇ ହୁଅନ୍ତି । ସେଠାରେ ଜନ୍ମ ନୀତି ଅନୁଷ୍ଠିତ ହୋଇଥାଏ । କୌଶଲ୍ୟା ହୋଇଥିବା ସେବାୟତଙ୍କ ମୁଣ୍ଡରେ କଳା ଓ ନାଲି ରଙ୍ଗର ରେଖ ସୁନ୍ଦରୀ ଏବଂ ଦଶରଥ ହୋଇଥିବା ସେବାୟତଙ୍କ ମୁଣ୍ଡରେ ଧଳା ରଙ୍ଗର ରେଖସୁନ୍ଦରୀ ବନ୍ଧାଯାଏ । ଏହା ମହାପ୍ରଭୁଙ୍କ ଆଜ୍ଞାମାଳ ରୂପେ ବିବେଚନା କରାଯାଏ ।

କର୍ପୁର ଆଳତୀ ଓ ଜନ୍ମ ବନ୍ଦାପନା ବଢିବା ପରେ ଠାକୁରଙ୍କର ଗଣ୍ଡୁଷ ମସଲା (ଜନ୍ମ ଵିଧି ନିମନ୍ତେ ଗୋଲମରିଚ , ଜିରା , ଅଦା ଓ ମିଠା ଇତ୍ୟାଦି ମସଲା) ଓ କ୍ଷୀର ଭୋଗ ହୋଇଥାଏ । ଜନ୍ମବିଧି ବଢିଲେ ପୂଜାପଣ୍ଡା ସାମନ୍ତ ପଇତାଲାଗି କରାଇ ଅରନ୍ଧା ଶୀତଳ ଭୋଗ ଯଥା ଖଇ , କୋରା , କଦଳୀ , ପଇଡ଼ ଓ ଲଡୁ ଆଦି ମଣୋହି କରାଇଥାନ୍ତି ।

ଜୟ ବିଜୟ ଦ୍ୱାର ଠାରେ ଚରୁଅନ୍ନ ମଣୋହି ହେବା ପରେ ଶ୍ରୀ ରାମ ଦକ୍ଷିଣୀ ଘରକୁ ବିଜେ କରନ୍ତି । ଏହାପରେ ଶ୍ରୀଜୀଉଙ୍କ ଅନ୍ୟାନ୍ୟ ନୀତିକାନ୍ତି ଅନୁଷ୍ଠିତ ହୁଏ ।

ଜୟ ଜଗନ୍ନାଥ! ।

ଶ୍ରୀମନ୍ଦିରରେ ଶ୍ରୀରାମ ନବମୀ ଓ ରାମ ଜନ୍ମ ନୀତି

ଶ୍ରୀମନ୍ଦିରରେ ଶ୍ରୀରାମ ନବମୀ ଓ ରାମଜନ୍ମ ନୀତି