ଆମ ଭାରତୀୟ ସୀମାକୁ ସୁରକ୍ଷିତ ରଖିବାର ଦାୟିତ୍ୱ ଯେଉଁ ସାହସୀ ସୈନିକମାନଙ୍କ ଉପରେ, ସେମାନେ ହେଉଛନ୍ତି ସୀମା ସୁରକ୍ଷା ବାହିନୀ (BSF) ର ଜୱାନ୍। ପ୍ରତିବର୍ଷ ଡିସେମ୍ବର ୧ ତାରିଖରେ ଆମେ ସେମାନଙ୍କର ପ୍ରତିଷ୍ଠା ଦିବସ ପାଳନ କରିଥାଉ। ଏହି ଦିନଟି ହେଉଛି ଆମ ସମସ୍ତଙ୍କୁ ଆମର ସୀମା ରକ୍ଷକ ମାନଙ୍କ ତ୍ୟାଗ, ସେବା ଓ ସାହସକୁ ସମ୍ମାନ ଜଣାଇବାର ଏକ ସୁଯୋଗ। ସରଳ ଭାଷାରେ କହିବା ହେଲେ, ଏହି ଦିବସଟି ହେଉଛି "ସୀମାର ପ୍ରହରୀ"ଙ୍କୁ ଉତ୍ସର୍ଗିତ।

ସୀମା ସୁରକ୍ଷା ବାହିନୀ କାହିଁକି ଗଠନ

୧୯୬୫ ମସିହାର ଭାରତ-ପାକିସ୍ତାନ ଯୁଦ୍ଧ ପରେ ଦେଶର ସୀମା ସୁରକ୍ଷା ପାଇଁ ଏକ ବିଶେଷ ବାହିନୀର ଆବଶ୍ୟକତା ଅନୁଭୂତ ହେଲା। ଫଳସ୍ୱରୂପ, ୧୯୬୫ ମସିହାର ଡିସେମ୍ବର ୧ ତାରିଖରେ ସୀମା ସୁରକ୍ଷା ବାହିନୀ ଗଠନ କରାଗଲା। ଏହାର ମୁଖ୍ୟ କାମ ହେଉଛି ଭାରତର ଆନ୍ତର୍ଜାତୀୟ ସୀମାକୁ ଶତ୍ରୁମାନଙ୍କ ଆକ୍ରମଣ, ଅବୋଧ ପ୍ରବେଶ ଓ ଅନ୍ୟାନ୍ୟ ବିପଦରୁ ରକ୍ଷା କରିବା। ବର୍ତ୍ତମାନ ଏହା ବିଶ୍ୱର ଏକ ବୃହତ୍ତମ ସୀମା ସୁରକ୍ଷା ବାହିନୀ ଭାବରେ ପରିଚିତ।

ପ୍ରତିଷ୍ଠା ଦିବସ କିଭଳି ପାଳନ ହୁଏ?

ଏହି ଦିନଟି ବିଶେଷ ଭାବରେ ସୀମା ସୁରକ୍ଷା ବାହିନୀର ବିଭିନ୍ନ ଶିବିର ଓ କାର୍ଯ୍ୟାଳୟ ମାନଙ୍କରେ ଉତ୍ସାହ ଓ ଗମ୍ଭୀର୍ଯ୍ୟର ସହିତ ପାଳନ କରାଯାଏ। ଏଥିରେ ମୁଖ୍ୟ ଆକର୍ଷଣ ହେଉଛି ପରେଡ୍, ଶୌର୍ଯ୍ୟ ପ୍ରଦର୍ଶନ, ସାଂସ୍କୃତିକ କାର୍ଯ୍ୟକ୍ରମ ଓ ପୁରସ୍କାର ବିତରଣ ଅନୁଷ୍ଠାନ। ବିଭିନ୍ନ ବୀରତ୍ୱପୂର୍ଣ୍ଣ କାର୍ଯ୍ୟ ପାଇଁ ଜୱାନ୍ ଓ ଅଧିକାରୀମାନଙ୍କୁ ସମ୍ମାନିତ କରାଯାଏ। ଏହିସବୁ ଜରିଆରେ ସେମାନଙ୍କ ମନୋବଳ ଉଚ୍ଚ ରଖାଯାଏ ଓ ସାଧାରଣ ଜନତାଙ୍କୁ ସେମାନଙ୍କ କାର୍ଯ୍ୟ ବିଷୟରେ ଜାଣିବାର ସୁଯୋଗ ମିଳେ।

ଦେଶର ବିଭିନ୍ନ ରାଜ୍ୟରେ ମଧ୍ୟ ଏହି ଦିନ ବିଶେଷ କାର୍ଯ୍ୟକ୍ରମ ଅୟୋଜିତ ହୁଏ। ବିଦ୍ୟାଳୟ ଓ ମହାବିଦ୍ୟାଳୟ ମାନଙ୍କରେ ପ୍ରତିଷ୍ଠା ଦିବସ ଉପଲକ୍ଷେ କାର୍ଯ୍ୟକ୍ରମ ହୋଇଥାଏ, ଯେଉଁଥିରେ ବାଳକ ବାଳିକାମାନେ BSF ର ଗୌରବମୟ ଇତିହାସ ବିଷୟରେ ଜାଣିପାରନ୍ତି। ଟେଲିଭିଜନ ଓ ଖବରକାଗଜରେ ମଧ୍ୟ ବିଶେଷ କାର୍ଯ୍ୟକ୍ରମ ପ୍ରସାରିତ ହୁଏ।

ସୀମା ସୁରକ୍ଷା ବାହିନୀ କେବଳ ଶତ୍ରୁଙ୍କୁ ରୋକିବା ପାଇଁ ନୁହେଁ, ବରଂ ଅନେକ ଗୁରୁତ୍ୱପୂର୍ଣ୍ଣ କାର୍ଯ୍ୟ କରିଥାଏ। ଦେଶର ସ୍ଥଳ ସୀମା ଛଡା, ସମୁଦ୍ର ଉପକୂଳରେ ମଧ୍ୟ ଏହାର କାର୍ଯ୍ୟ ଅଛି। ଅବୋଧ ଚୋରାଚାଳାନି ରୋକିବା, ମାନବ ପଳାୟନ ରୋକିବା, ନଶୀଲା ପଦାର୍ଥ ଆଦି ଅବୈଧ ବ୍ୟବସାୟ ବିରୁଦ୍ଧରେ କାର୍ଯ୍ୟ ଏହାର ମୁଖ୍ୟ ଦାୟିତ୍ୱ। ଏଥି ସହ ପ୍ରାକୃତିକ ବିପର୍ଯ୍ୟୟ ଓ ଅନ୍ୟାନ୍ୟ ଜରୁରୀ ସ୍ଥିତିରେ ସେମାନେ ସାଧାରଣ ଜନତାଙ୍କୁ ସାହାଯ୍ୟ କରିଥାନ୍ତି।

ସୀମାରେ ଥିବା BSF ଜୱାନ୍ମାନେ ଅତ୍ୟଧିକ ଗରମ, ଶୀତ ଓ ବର୍ଷା ଭଳି କଠୋର ପରିବେଶରେ ମଧ୍ୟ ନିଜ କର୍ତ୍ତବ୍ୟ ପାଳନ କରନ୍ତି। ପରିବାର ସହ ଦୂରରେ ରହି, ଦେଶ ସେବା କରନ୍ତି। ସେମାନଙ୍କର ଏହି ତ୍ୟାଗ ଓ ସମର୍ପଣ ଭାବନା ପ୍ରତ୍ୟେକ ଭାରତୀୟର ପାଇଁ ଗର୍ବର ବିଷୟ।

ଏହି ଦିବସ ପାଳନର ମୁଖ୍ୟ ଉଦ୍ଦେଶ୍ୟ ହେଉଛି ଦେଶବାସୀଙ୍କୁ ସୀମା ସୁରକ୍ଷା ବାହିନୀର ଇତିହାସ, କାର୍ଯ୍ୟ ଓ ତ୍ୟାଗ ବିଷୟରେ ସଚେତନ କରାଇବା। ଏହା ଜରିଆରେ ଜନସାଧାରଣଙ୍କ ମଧ୍ୟରେ ଦେଶପ୍ରେମ ଓ ରାଷ୍ଟ୍ର ସେବାର ଭାବନା ଜାଗ୍ରତ ହୁଏ। ଯୁବପିଢୀ ଏଥିରୁ ପ୍ରେରଣା ନେଇ ଦେଶ ସେବାରେ ଆଗେଇ ଆସନ୍ତି।

ଆଜି ସୀମା ସୁରକ୍ଷା ବାହିନୀ କେବଳ ଏକ ସୁରକ୍ଷା ବାହିନୀ ନୁହେଁ, ବରଂ ଏହା ଏକ ବିଶ୍ୱସ୍ତରୀୟ ସଂଗଠନ ଭାବରେ ପରିଚିତ। ଆନ୍ତର୍ଜାତୀୟ ସ୍ତରରେ ମଧ୍ୟ ସଫଳତାର ସହିତ ଶାନ୍ତି ରକ୍ଷା କାର୍ଯ୍ୟରେ ଯୋଗଦାନ ଦେଇଛି। ପ୍ରତିଷ୍ଠା ଦିବସ ଏହି ଗୌରବମୟ ଯାତ୍ରାର ଏକ ମାପଦଣ୍ଡ।

ସୀମା ସୁରକ୍ଷା ବାହିନୀ ପ୍ରତିଷ୍ଠା ଦିବସ ହେଉଛି ଆମ ସମସ୍ତଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଦିନ। ଏହି ଦିନ ଆମେ ଆମର ସୀମା ରକ୍ଷକମାନଙ୍କୁ ସମ୍ମାନ ଜଣାଇବା ଉଚିତ୍। ସେମାନଙ୍କ ପରି ସାହସୀ ସୈନିକମାନଙ୍କ ଯୋଗୁଁ ଆମେ ନିଶ୍ଚିନ୍ତରେ ଘରେ ରହି ପାରୁଛୁ। ତେଣୁ, ଆସନ୍ତୁ ଏହି ପ୍ରତିଷ୍ଠା ଦିବସରେ ଆମେ ସୀମା ସୁରକ୍ଷା ବାହିନୀର ସମସ୍ତ ଜୱାନ୍ ଓ ଅଧିକାରୀମାନଙ୍କୁ ହାର୍ଦ୍ଦିକ ଧନ୍ୟବାଦ ଜଣାଇବା ଓ ସେମାନଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିବା। ଦେଶର ସୁରକ୍ଷା ପାଇଁ ସେମାନଙ୍କର ଅବଦାନ ସବୁଦିନ ଯାଏଁ ସ୍ମରଣୀୟ ରହିବ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ସୀମାରେ ଥିବା ଆମର ପ୍ରହରୀ

ସୀମାରେ ଥିବା ଆମର ପ୍ରହରୀ