ବର୍ଷା ଦିନିଆ କୋହଲା ପାଗ। ଦିନ ସାରା ବର୍ଷା ନିର୍ଦ୍ଧୁମ ଛେଚୁଚି। ଅଫିସ୍ ରେ ଆଜି ଟିକେ ଷ୍ଟାଫ୍ କମ୍। ମ୍ୟାନେଜର୍ ସାର୍ ଆସି ନାହାଁନ୍ତି। ସାର୍ ଟିକେ କଠୋର୍ ଅନୁଶାସନରେ ଚଳିବା ଲୋକ। ବାକି ମଜାଳିଆ ଲୋକ ବି। କିନ୍ତୁ, ଅଫିସ୍ କାମ ସମୟରେ ଟିକେ ଗପ କଲେ ସାର୍ ଙ୍କ ଚିଡ଼ିଚିଡ଼ା ସ୍ବଭାବଟା ବଢ଼ିଯାଏ। ମଧ୍ୟାହ୍ନ ଭୋଜନ ସରିଲାଣି ସମସ୍ତଙ୍କର କାମକୁ ଟିକେ ଅବହେଳା କରିଦେଇ ସମସ୍ତେ ଗପ କରିବାରେ ବ୍ୟସ୍ତ।

ଏତିକି ବେଳେ ସାର୍ ଙ୍କ ହଠାତ୍ ପଦାର୍ପଣ। ଜଙ୍ଗଲରେ ସିଂହକୁ ଦେଖି ଯେମିତି ପଶୁପକ୍ଷୀମାନେ ଛତ୍ରଭଙ୍ଗ ଦିଅନ୍ତି, ଠିକ୍ ସେପରି ଅଫିସ୍ ଷ୍ଟାଫ୍ ମାନେ ଯିଏ ଯୁଆଡ଼େ ଛିନ୍ ଛତର୍। ଯିଏ ଯାହା କାମରେ ଲାଗିଯାଇଛନ୍ତି। ସାର୍ ଏ ପ୍ରକାର ଅଫିସ୍ ଗପ ଦେଖିକି ରାଗିକି ପାଚିଗଲେ। ଗୁଡ଼ାଏ ଏଣୁ ତେଣୁ ବକିଗଲେ। ତା'ପରେ ନିଜ ଅଫିସ୍ ଚେମ୍ବର ଭିତରକୁ ପଶିଗଲେ। ବର୍ଷା ପାଗରେ ଟିକେ ସକାଳୁ ବଜାରରୁ ସଉଦା କଲାବେଳେ ଭିଜି ଯାଇଥିଲେ। ଛିଙ୍କ ଓ ଜ୍ୱର ଧରିଦେଇଥିଲା। ଅଫିସ୍ କୁ ଆସିବାର ନଥିଲା କିନ୍ତୁ ଷ୍ଟାଫ୍ କମ୍ ଯୋଗୁଁ ସେ ପଚାରି ବୁଝିଥିଲେ ଫୋନ୍ ଯୋଗେ ଚପରାସୀକୁ। ଏବେ ଅଫିସ୍ ରେ ଏସି ପବନ ଖାଇ ତାଙ୍କର ଛିଙ୍କ ଓ ଜ୍ୱରଟା ବଢ଼ିଗଲା।

ଦିନ ପାଞ୍ଚଟା ହେଲାଣି। ଅଫିସ୍ କାମ ସାରି ସେ ଘରକୁ କାର୍ ରେ ଫେରିଲେ। କାର୍ ରୁ ବାହାରି ଘରକୁ ଗଲାବେଳକୁ ସେ ଛିଙ୍କି ଛିଙ୍କି ନୟାନ୍ତ ହୋଇଗଲେଣି। ତାଙ୍କ ମୁହଁ ନାଲି ପଡ଼ିଗଲାଣି। ତାଙ୍କର ଘରଣୀ ଏହା ଦେଖି ତାଙ୍କୁ ଶୋଇବା ଘରେ ବିଶ୍ରାମ ନେବା ପାଇଁ କହିଲେ। ପୋଷାକ ବଦଳାଇ ସେ ଚାହା କପେ ପାଇଁ ସ୍ତ୍ରୀକୁ ବରାଦ କଲେ। ବାହାରେ ପ୍ରବଳ ବର୍ଷା ହେଉଥିଲା। ସେ କମଳ ଘୋଡ଼ି ହୋଇ ଶୋଇଗଲେ। ବାରମ୍ବାର ଛିଙ୍କି ଚାଲିଲେ। ତାଙ୍କର ଏହି ଅବସ୍ଥା ଦେଖି ଘରଣୀ ତରବର ହୋଇ ରୋଷେଇ ଘରକୁ ପଶିଲେ ଚାହା ତିଆରି କରିବା ପାଇଁ। କିନ୍ତୁ, ଏ କ'ଣ ଚା' ପତି ନାହିଁ। ଚିନି ବି ନାହିଁ। ଏବେ ସେ କ'ଣ କରିବେ?!... ଉପସ୍ଥିତ ବୁଦ୍ଧି ଖଟାଇ 'ରସୁଣ ଚାହା' ପ୍ରସ୍ତୁତ କଲେ। ଏବେ ଆସନ୍ତୁ ଜାଣିବା ସେ କିପରି ଚାହା ପ୍ରସ୍ତୁତ କଲେ।

ରସୁଣ ଚାହା ପ୍ରସ୍ତୁତ ପାଇଁ ଆବଶ୍ୟକୀୟ ସାମଗ୍ରୀ:-

୧. ଏକ କପ୍ ପାଣି

୨. ଖଣ୍ଡେ ବଡ଼ ଅଦା

୩. ତିନୋଟି ବଡ଼ ଚୋପା ଛଡା ରସୁଣ କୋଲା

୪. ଚାରି ରୁ ପାଞ୍ଚଟି ଗୋଲମରିଚ

୫. ଚଉଠେ ଫଡ଼ା ଲେମ୍ବୁ

୬. ଦୁଇଟି ଗୁଜୁରାତି

୭. ଚାମଚେ ମହୁ

୮. କିଛି ଲବଙ୍ଗ

ପ୍ରସ୍ତୁତି ପ୍ରଣାଳୀ:-

ଗ୍ୟାସ୍ ଚୁଲା ଜଳାଇ ଏକ ପାତ୍ରରେ ଏକ ପାତ୍ରରେ କପେ ପାଣି ଗରମ ହେବାକୁ ଦିଅ। ଏହାପରେ ଖଣ୍ଡେ ଅଦାକୁ ଚୁନା ଚୁନା କଟି ଭଲଭାବରେ କୁଟି ଦେଇ ଏହି ଗରମ ପାଣି ଭିତରେ ପକାଅ। ଏକ ଚାମଚ ରସୁଣକୁ କୁଟି ପେଷ୍ଟ୍ କରି ଏହି ଗରମ ପାଣିରେ ପକାଅ। ଏଥିରେ ଗୋଲ୍ ମରିଚ ଗୁଣ୍ଡ କରି ଏକ ଚାମଚ ଏଥିରେ ମିଶାଅ। କିଛି ଲବଙ୍ଗ କୁଟି କରି ପକାଅ। ପାତ୍ର ଉପରେ ଢାଙ୍କୁଣି ଘୋଡ଼ାଇ ଭଲ ଭାବରେ ଟକରମକର ହୋଇ ଫୁଟିବା ପାଇଁ ପାଞ୍ଚ ମିନିଟ୍ ଛାଡ଼ିଦିଅ।

ଏଥର ଏହାକୁ ଛାଣି କରି ଏକ କପ୍ ରେ ରଖ। ଗୁଜୁରାତିକୁ ଚୋପା ଛଡ଼ାଇ କୁଟି ଦେଇ ଗୁଣ୍ଡକରି ଏଥିରେ ପକାଅ। ଚଉଠେ ଲେମ୍ବୁ ଏ ଭିତରେ ଚିପୁଡ଼ି ଦିଅ। ଏକ ଚାମଚ ମହୁ ଏଥିରେ ମିଶାଇ ଭଲ ଭାବରେ ଘାଣ୍ଟି ଦିଅ। ଆଉ ଗରମା ଗରମ୍ ପରଷି ଦିଅ।

ଶୋଇବା ଘରକୁ ମ୍ୟାଡମ୍ ଯାଇ ସ୍ବାମୀଙ୍କୁ ଉଠାଇ ହାତରେ ଚାହା କପ୍ ଟିକୁ ଧରାଇଦେଲେ। ଚାହାର ସ୍ବାଦ ବଡ଼ ଚମତ୍କାର ଥିଲା। ସେ ଆଶ୍ଚର୍ଯ୍ୟ ହୋଇ କହିଲେ, "ଆରେ ବାଃ... ବଢ଼ିଆ ଲାଗୁଛି ଚାହାଟା! କିନ୍ତୁ, ଆଜିଟିକେ ଅଲଗା ଲାଗୁଛି। କେମିତି ପ୍ରସ୍ତୁତ କଲ, ଏ ଚାହାଟା?" ମ୍ୟାଡମ୍ ହସି ହସି କହିଲେ, "ଘରେ ଚିନି କି ଚା' ପତି ନଥିଲା। ବାହାରେ ବି ବର୍ଷା ହେଉଥିଲା। ଉପସ୍ଥିତ ବୁଦ୍ଧି ଖଟାଇ 'ରସୁଣ ଚାହା' ତିଆରି କରିଛି। ସ୍ବାମୀ ଏହା ଶୁଣି ତାଟକାଟା ହୋଇ ଚାହିଁ ରହିଲେ। ରସୁଣ ଚାହା!... ମୋ କାନ ଉଠିଲା ଦିନୁ ତ ମୁଁ ଏମିତିକା ଚାହାର ନାମ ଜାଣି ନଥିଲି! ମାତ୍ର ଖୁବ୍ ବଢ଼ିଆ ଲାଗୁଛି। ମୋତେ ବି ଟିକେ ଶିଖାଇଦେବ ତ...। ଏହା ଶୁଣି ମ୍ୟାଡମ୍ ହସି ହସି ଗଡ଼ିଗଲେ। ଆଉ କହିଲେ, "ଏବେ ଚାହା ପିଇ ବିଶ୍ରାମ ନିଅ। ପରେ କେତେବେଳେ ମୁଁ ସମୟ ପାଇଲେ ଶିଖାଇଦେବି।" ସାର୍ ମ୍ୟାଡମ୍ ଙ୍କ ମୁହଁକୁ ମୁରୁକା ହସଟିଏ ମାରି ଦେଇ ପ୍ରଶଂସାରେ କହିପକାଇଲେ, "ଆଜି କାଲି ବହୁତ ସ୍ମାର୍ଟ ହୋଇଗଲଣି ଆଉ...।" ମ୍ୟାଡମ୍ ଗାଲକୁ ଚିମୁଟି ଦେଇ ରୋଷେଇ ଘରକୁ ଚାଲିଯିବାକୁ ଉପକ୍ରମ କଲାବେଳେ ସାର୍ ହାତକୁ ଟାଣି ଦେଇ ଗାଲରେ ଚୁମାଟିଏ ଦେଇ ଦେଲେ। ମ୍ୟାଡମ୍ ସେଠାରୁ ଛିଞ୍ଚାଡି ହୋଇ ଲାଜେଇ ରୋଷେଇ ଘରକୁ ଚାଲିଗଲେ।

ଏ ତ ଥିଲା ରସୁଣ ଚାହାର ପ୍ରସ୍ତୁତ ପ୍ରଣାଳୀ। କିନ୍ତୁ ଆପଣମାନେ ଜାଣି ନଥିବେ ଏହାର ଔଷଧୀୟ ଗୁଣ। ଥଣ୍ଡା, ମେଦ (କୋଲେଷ୍ଟ୍ରଲ୍) ହ୍ରାସ କରିବା, ହୃତପିଣ୍ଡ ଓ ଫୁସ୍ ଫୁସ୍ କୁ ସୁସ୍ଥ ରଖିବା, ମଧୁମେହ ରୋଗକୁ (ଡାଇବେଟିସ୍) ସମୂଳେ ନଷ୍ଟ କରିବାରେ ଏହାର ଭୂମିକା ଗୁରୁତ୍ୱପୂର୍ଣ୍ଣ।

ଆପଣମାନେ ବି ଘରେ ପ୍ରସ୍ତୁତ କରି ପିଅନ୍ତୁ। ନିରୋଗ ଓ ସୁସ୍ଥ ରୁହନ୍ତୁ। କେମିତି ଲାଗିଲା ନିଶ୍ଚୟ ଜଣାଇବେ??...

=×=×=×=

ସ୍ମାର୍ଟ୍ ଶ୍ରୀମତିଙ୍କ ରସୁଣ ଚାହା

ଥଣ୍ଡାର ଅବ୍ୟର୍ଥ ଔଷଧ: ରସୁଣ ଚାହା