ପ୍ରାରମ୍ଭ -

ଏ ହେଉଛି ମଣିଷର କାହାଣୀ । ଶ୍ରେଷ୍ଠ ଜୀବର କାହାଣୀ । ବିଚାରବନ୍ତ ପ୍ରାଣୀର କାହାଣୀ। ଏହି ସେହି ମଣିଷ ଯାହା ପାଖରେ ରହିଛି ଅସୀମ ଜ୍ଞାନ, ଭଲ ମନ୍ଦ ବିଚାର ପାଇଁ ରହିଛି ବିବେକ୍ ଏବଂ ଭୁଲ୍ ,ଠିକ୍ ର ପ୍ରଭେଦ ଜାଣିବା ପାଇଁ ରହିଛି ଶକ୍ତି।ମାଛ ଟିଏ ସାଗର ମଧ୍ୟରେ ଶତ ଶତ ସନ୍ତାନ ଜନ୍ମ କରେ ।ହେଲେ ଚିନ୍ତା ଜନକ ବିଷୟ ଏହି ଯେ ସେ କଣ ପ୍ରତ୍ୟେକ ସନ୍ତାନ କୁ ଲାଳନ ପାଳନ କରେ? ଏତ ଅସମ୍ଭବ ମନେ ହୁଏ।ମାଆ ହୋଇ ନିଜ ସନ୍ତାନ କୁ ଚିହ୍ନିବା ବି ସମ୍ଭବ ପର ନୁହେଁ। ତେଣୁ ଏମାନେ ହେଲେ ନିଚ ଶ୍ରେଣୀର ପ୍ରାଣୀ। ମଣିଷ କିନ୍ତୁ ସଂପୂର୍ଣ୍ଣ ବିପରୀତ ।ଠିକ୍ ଭାବେ ଲାଳନ ପାଳନ କରେ ,ଶିକ୍ଷିତ କରାଏ ,ବାସ୍ତବ ଦୁନିଆ ଦେଖେଇବାରେ ସାହାଯ୍ୟ କରିଥାଏ। ତେଣୁ ମଣିଷ ଟିଏ ହେଲା ଉଚ୍ଚ ଶ୍ରେଣୀର ପ୍ରାଣୀ।

ଏହି ମଣିଷ ଚଢିପାରେ ସୁଉଚ୍ଚ ହିମାଳୟ ଲଙ୍ଘିପାରେ ସୁଦୀର୍ଘ ପାରାବାର। ଜ୍ଞାନ କୌଶଳ ବୁଦ୍ଧି ବିବେକ୍ ଦ୍ବାରା ଏ ମଣିଷ ହୋଇ ପାରିଛି ଶ୍ରେଷ୍ଠ ସମ୍ବଳ।

ପୁଣି ମନକୁ ପ୍ରଶ୍ନ ଆସେ ,ଏ ମଣିଷ କଣ ସତରେ ଶ୍ରେଷ୍ଠ? ସତରେ କଣ ବିଚାରବନ୍ତ? ସତରେ କଣ ବିବେକଶୀଳ?

ବୋଧେ ନା ! ନହେଲେ ସର୍ବ ଜ୍ଞାନର ଅଧିକାରୀ ହୋଇକି ଆଜି ମଣିଷ ସମାଜ ଅସୁରକ୍ଷିତ ହୋଇ ନ ଥାନ୍ତା।

ଯିଏ ମହାବଳ ବାଘ ବେକରେ ଲୁହାର ଜଂଜିରି ଦେଇପାରୁଛି , ତାକୁ ବା କାହାକୁ ଭୟ? ମଣିଷ ର ପୁଣି ଶତ୍ରୁ କିଏ? ଯାହା ପାଇଁ ମଣିଷ ଅସୁରକ୍ଷିତ! ମଣିଷ ର ଶତ୍ରୃ ପୌରାଣିକ କଥା କାବ୍ୟ ର କୈାଣସି ଦୈତ୍ୟ ନୁହନ୍ତି । ମଣିଷ ର ଶତ୍ରୃ ସେ ନିଜେ ।

କାହା ପାଖେ ମୁହିଁ ପଶିବି ଶରଣ,ନିଜେ ହିଁ ନିଜର ବିନାଶ କାରଣ।

ମଣିଷ ର ସ୍ବାସ୍ଥ୍ୟ ଅଧୁନା ଏକ ସମ୍ବେଦନଶୀଳ ବିଷୟବସ୍ତୁ ଅଟେ। ନୂତନ ଧରଣର ଭୟଙ୍କର ରୋଗ ମାନ ମୁଣ୍ଡ ଟେକି ମଣିଷ ଜାତି କୁ ଚାହିଁ ରହିଛନ୍ତି୍। ଏହି ରୋଗ ଗୁଡିକୁ ଶ୍ରଦ୍ଧା ସମ୍ବର୍ଦ୍ଧନା କରି ବୁଦ୍ଧିମାନ୍ ଓ ନିଜ କୁ ଶ୍ରେଷ୍ଠ ବିବେଚିତ କରୁଥିବା ମଣିଷ ଆମନ୍ତ୍ରଣ କରିଥାଏ। ଏହା କେବଳ ସମ୍ଭବ ହୋଇପାରେ ନିଜର କୁ ଅଭ୍ୟାସ ମାଧ୍ୟମରେ। ମଣିଷ ନିଜର ମନ୍ଦ ଅଭ୍ୟାସ ଦ୍ବାରା ରୋଗ ମାନଙ୍କର ପ୍ରବେଶ ପଥ ଖୋଲିଦେଇଥାନ୍ତି।

ମଣିଷ ର ଅନେକ କୁ ଅଭ୍ୟାସ ରହିଛି ଯାହାର ଚିଠା କରିବାକୁ ଗଲେ ବୋଧୁଏ ସ୍ୟାହି ର ଅଭାବ ପଡିବ। ଅଧୁନା ସମାଜ ଉପରେ କୁ ପ୍ରଭାବ ପକାଉଥିବା ଏବଂ ଭବିଷ୍ୟ ପାଇଁ ଭୟଙ୍କର ପରିସ୍ଥିତି ସୃଷ୍ଟି କରିବାର ସମ୍ଭାବ୍ୟ ରଖୁଥିବା କୁ ଅଭ୍ୟାସ ହେଉଛି ତମାଖୁ ସେବନ। ଯାହାକୁ ଉପେକ୍ଷା କରାଯାଇ ପାରିବ ନାହିଁ। ଏହା ଆଜିର ସମାଜ ପାଇଁ, ଯୁବପିଢି ଙ୍କ ପାଇଁ ଆଲୋଚନା ର ବିଷୟ ,ଚିନ୍ତାଜନକର ବିଷୟ ,ଜାଣିବାର ବିଷୟ ଓ ସଚେତନତା ହେବାର ବିଷୟ।

ମୃତ୍ୟୁ ର ଯନ୍ତା - ତମାଖୁ

ତମାଖୁ ଏକ ଭୟଙ୍କର ନିଶା ଦ୍ରବ୍ୟ ଯାହା ହସ ଖୁସି ରୁ ଅଳ୍ପ ଅଳ୍ପ ପରିମାଣରେ ଆରମ୍ଭ ହୁଏ। ମାତ୍ର ପରବର୍ତ୍ତୀ ସମୟରେ ଯନ୍ତ୍ରଣା ଓ ଦୁଃଖ ର କାରଣ ସାଜିଥାଏ। ଏହା ହେଉଛି ସଂସାରର ସର୍ବାଧିକ ମୃତ୍ୟୁ ସଂକଟ ସୃଷ୍ଟି କରୁଥିବା କାରକ। ହୃତପିଣ୍ଡ ଓ ଫୁସଫୁସ ଏହି ତମାଖୁ ସେବନ ଦ୍ବାରା ଆକ୍ରାନ୍ତ ହୋଇ ଜୀବନ ହାନି ର କାରଣ ସାଜିଥାଏ। ଏହି ତମାଖୁ ସେବନ ଦ୍ବାରା ହୃଦଘାତ, ଷ୍ଟ୍ରୋକ, କ୍ରନିକ ଅବ୍‌ସ୍ଟକ୍ଟିଭ୍ ପଲ୍‌ମୋନାରି ଡିଜିଜ, ସ୍ୱର ପେଟିକା, ପାଟି ଓ ଅଗ୍ନାଶୟରେ କର୍କଟ ରୋଗ ହୋଇଥାଏ। ଅବିକଶିତ ଦେଶ ମାନଙ୍କରେ ଏହାର ପ୍ରଭାବ ଅଧିକ ଦେଖିବାକୁ ମିଳିଥାଏ। କାରଣ ଏହି ଦେଶ ମାନଙ୍କରେ ନିମ୍ନମାନର ସିଗାରେଟ୍ ବ୍ୟବହାର କରାଯାଏ। ଏଥିରେ ଫିଲଟର ଲଗାଯାଏ ନାହିଁ।

ଫାଷ୍ଟ ହେଣ୍ଡ ତମାଖୁ ସେବନ ଠାରୁ ସେକେଣ୍ଡ ହେଣ୍ଡ ସେବନ ଅଧିକ କ୍ଷତିକାରକ ହୋଇଥାଏ। କାରଣ ଏଥିରେ ବ୍ୟକ୍ତି ତମାଖୁ ସେବନ ନ କରି ମଧ୍ୟ କର୍କଟ ରୋଗର ଆକ୍ରାନ୍ତ ହୋଇଥାନ୍ତି। ତମାଖୁ ସେଵନ କରୁଥିବା ବ୍ୟକ୍ତି ଠାରୁ ତମାଖୁ ଘ୍ରାଣ କରୁଥିବା ବ୍ୟକ୍ତି ଅଧିକ କ୍ଷତିଗ୍ରସ୍ତ ହୋଇଥାନ୍ତି।

WHO ମତାନୁସାରେ ୨୦୦୪ ମସିହାରେ ୫.୪ ନିୟୁତ ଓ ବିଂଶ ଶତାବ୍ଦିରେ ପ୍ରାୟତଃ ୧୦୦ ନିୟୁତ ମୃତ୍ୟୁ ଏହି ତମାଖୁ ସେବନ ଦ୍ବାରା ହୋଇଥିଲା। ଆମେରିକାର ସେଣ୍ଟର ଫର ଡିଜିଜ କଣ୍ଟ୍ରୋଲ୍ ଆଣ୍ଡ ପ୍ରିଭେନ୍‌ସନ ଆକଳନ ଅନୁସାରେ ତମ୍ବାଖୁ ହେଉଛି ଏକକ ସ୍ୱାସ୍ଥ୍ୟ ସଙ୍କଟ ପ୍ରତିରୋଧକ ଓ ଅକାଳ ମୃତ୍ୟୁର କାରଣ।

ଧୁମ୍ରରେ ଥିବା କର୍କଟ ସୃଷ୍ଟିକାରୀ ପାଇରୋଲାଇଟିକ ପଦାର୍ଥ ଶରୀରରେ ଥିବା ଡି.ଏନ.ଏ. ସହ ଅନୁବନ୍ଧିତ ହୋଇ ଜିନ ମ୍ୟୁଟେସନ କରାଏ । ସିଗାରେଟ ଧୁଆଁରେ ପ୍ରାୟତଃ ୪୫ ପ୍ରକାର କର୍କଟ ସୃଷ୍ଟିକାରୀ ରାସାୟନିକ ପଦାର୍ଥ ଅଛି ।

ଏହା ବ୍ୟବହାର ଦ୍ୱାର ମଣିଷ ଶାରୀରିକ ଓ ମାନସିକ ସ୍ତରରେ ଦୁର୍ଵୂଓ ଅକ୍ଷମ ହୋଇଯାଏ । ଗର୍ଭିଣୀ ଧୁମ୍ରପାନକାରି ମହିଳାଙ୍କର ଗର୍ଭପାତ ହୁଏ,ଗର୍ଭସ୍ଥ ଶିଶୁର ଅକାଳ ମୃତ୍ୟୁ ହୋଇ ଥାଏ ଓ ଶିଶୁ ଟି ସ୍ୱଳ୍ପ ଓଜନ ବିଶିଷ୍ଟ ହୋଇଥାଏ । ଧୁମ୍ରପାନକାରୀ ପୁରୁଷମାନଙ୍କର ନ କରୁଥିବା ପୁରୁଷଙ୍କ ଅପେକ୍ଷା ନପୁଂସକତା ୮୫% ଅଧିକ ଥାଏ। ଲିଙ୍ଗ ଉତ୍ଥାନ ସମସ୍ୟା ମଧ୍ୟ ଦେଖାଦିଏ।

ତମାଖୁ ଦିବସ ଏବଂ ତାର ଗୁରୁତ୍ବ-

ତମାଖୁ ଦିବସ ମେ ମାସ ୩୧ ତାରିଖରେ ପାଳନ କରାଯାଏ। ଏହି ଦିବସ ଟି ବାସ୍ତବରେ ତମାଖୁ ବର୍ଜନ ଦିବସ ଭାବେ ପାଳନ କରାଯାଏ। ଦେଶର ଶତାଧିକ ଲୋକ ତମାଖୁ ସେବନ ଦ୍ବାରା ପ୍ରାଣ ହରାଉଛନ୍ତି। ଏହା ତମାଖୁ ନୁହେଁ ମୃତ୍ୟୁ ର ଯନ୍ତା। ଲୋକ ମାନଙ୍କୁ ତମାଖୁ ର ଭୟଙ୍କାରିତା ଓ କ୍ଷତିକାରିତା ବିଷୟରେ ଧାରଣା ଦେବା ଏହି ଦିବସ ର ମୁଖ୍ୟ ଉଦ୍ଦେଶ୍ୟ। ଭାରତରେ ପ୍ରତି ଘଣ୍ଟା ରେ ପ୍ରାୟତଃ ୯୦ ଏବଂ ପୃଥିବୀରେ ପ୍ରାୟ ୧୦୦୦ ଲୋକ ତମାଖୁ ସେବନ ଦ୍ବାରା ପ୍ରାଣ ହରାଉଛନ୍ତି। ଯେଉଁମାନେ ସେବନ କରୁଛନ୍ତି ବା ସେବନ କରିବା ଆରମ୍ଭ କରିଛନ୍ତି ସେମାନଙ୍କୁ ଅବଗତ କରାଇବା ଏହି ଦିବସର ମୌଳିକ ଉଦ୍ଦେଶ୍ୟ।ଅନେକ ଦେଶମାନଙ୍କରେ ଏହାର ବ୍ୟବହାର ଓ ବିକ୍ରି ଉପରେ ଅଙ୍କୁଶ ଓ ସତର୍କ ବାର୍ତ୍ତା ମାଧ୍ୟମରେ ତମ୍ବାଖୁ ବ୍ୟବହାର ରୋକିବାକୁ ଚେଷ୍ଟା କରାଯାଉଅଛି ।

ନିଶା ସେଵନ ଦ୍ବାରା ମନ ଏବଂ ଶରୀରରେ ଉତ୍ତେଜନା ସୃଷ୍ଟି ହୋଇ ଥାଏ । ନିଶାଗ୍ରସ୍ଥ ପରିବାର ରେ ଆର୍ଥିକ ସଙ୍କଟ ମଧ୍ୟ ଦେଖିବାକୁ ମିଳିଥାଏ। ସ୍କୁଲ୍ ଓ କଲେଜ୍ ରେ ପଢୁଥିବା ଛାତ୍ର ଛାତ୍ରୀ ମାନେ ଏହି ତମାଖୁ ର ମାୟାଜାଲ ରେ ଛନ୍ଦା ଛନ୍ଦି ହୋଇ ନିଜ ର ଭବିଷ୍ୟ କୁ ଅନ୍ଧକାର କୁ ଠେଲି ଦେଉଛନ୍ତି। ଗାଁ ଗଣ୍ଡା ରେ ବିଶେଷ କରି ଏହାର ଉତ୍କଟ ରୂପ ଦେଖିବାକୁ ମିଳିଥାଏ। କ୍ଷଣିକ ପାଇଁ ଖୁସି ଦେଉଥିବା ଏହି ନିଶା ,ଆମ ଜୀବନ କୁ ସଂପୂର୍ଣ୍ଣ ରୂପେ ଶୋଷି ନେଇଥାଏ। ବିଡି ,ସିଗାରେଟ୍ ,ଗୁଟୁଖା ,ଖଇନି କୁ ସାଧାରଣତଃ ଦୁଃଖ ଗ୍ରସ୍ତ ବା ଚିନ୍ତା ଗ୍ରସ୍ଥ ଲୋକ କ୍ଷଣିକ ଖୁସି ପାଇଁ ସେବନ କରିବା ଆରମ୍ଭ କରିଥାନ୍ତି ମାତ୍ର ପରିଣାମରେ ତମାଖୁ ସେମାନଙ୍କ ଜୀବନକୁ ଦୁଃଖମୟ କରିଦେଇଥାଏ।

ନିରାକରଣ ଉପାୟ-

ଏହା ଆମ ମାନଙ୍କର ଅତ୍ୟାବଶ୍ୟକ ଖାଦ୍ୟ ପଦାର୍ଥ ନୁହେଁ।ଏହା ଭାତ ରୁଟି ପରି ଦୈନନ୍ଦିନ ଖାଦ୍ୟ ପଦାର୍ଥ ମଧ୍ୟ ନୁହେଁ। ତମାଖୁ ପ୍ୟାକେଟ୍ ଖୋଲିବା ପୂର୍ବରୁ ସେହି ପ୍ୟାକେଟ୍ ସଚେତନତା ଲେଖା ପ୍ରକାଶ ହୋଇଥାଏ , ଯେଉଁଥିରେ ଲେଖା ଥାଏ ,ଏହି ତମାଖୁ ସେବନ ହୃଦଘାତ, ପକ୍ଷାଘାତ ଓ କର୍କଟ ଭଳି ଭୟଙ୍କର ରୋଗ ସୃଷ୍ଟି କରିଥାଏ ।ମାତ୍ର ଆମେ ତାହାକୁ ଉପେକ୍ଷା କରି ତମାଖୁ ସେବନ କରିଥାନ୍ତି।

ଇତିହାସ ରେ ଏହାର ଭୟଙ୍କାରିତା ରୂପ ଆମେ ଦେଖି ଆସିଛନ୍ତି। ନିଶା ସେବନ ଦ୍ବାରା ଯଦୁବଂଶ ର ପତନ ଘଟିଥିଲା। ନିଶା ସେବନ ଦ୍ବାରା ଭାଇ ଭାଇ ବା ପରିବାର ମଧ୍ୟରେ କନ୍ଦଳ ସୃଷ୍ଟି ହୋଇ ମୋଗଲ୍ ସମ୍ରାଜ୍ୟ ର ବିଲୟ ଘଟିଥିଲା। ଏହି ନିଶା ସେବନ ଦ୍ବାରା ସମାଜ କଳୁଷିତ ହେବାରେ ଲାଗିଛି। ସମାଜରେ ହତ୍ୟା, ଲୁଣ୍ଠନ , ଧର୍ଷଣ ବୃଦ୍ଧି ପାଉଛି। ଦେଶ ପରାଧିନ ଥିବା ସମୟରେ ମହାତ୍ମାଗାନ୍ଧୀ ନିଶାଦ୍ରବ୍ୟ ଦୂରିକରଣ କୁ ନେଇ ଅନେକ ପଦକ୍ଷେପ ଗ୍ରହଣ କରିଥିଲେ। ଭାରତର ସମ୍ବିଧାନ ର ଚତୁର୍ଥ ଭାଗରେ ଥିବା ରାଷ୍ଟ୍ର ନିୟାମକ ନିର୍ଦ୍ଦେଶାବଳୀ ରେ ଥିବା ଗାନ୍ଧୀବାଦୀ ନୀତି ରେ ନିଶାଦ୍ରବ୍ୟ ଦୂରିକରଣ କୁ ଗୁରୁତ୍ବ ଦିଆ ଯାଇଅଛି। ଏହା ପାଇଁ ସରକାର ନାନା ପଦକ୍ଷେପ ମାନ ଗ୍ରହଣ କରୁଛନ୍ତି। ମାତ୍ର ଏ ସମସ୍ୟାର ସଂପୂର୍ଣ୍ଣ ସମାଧାନ ହୋଇପାରିନାହିଁ।

ଗଣମାଧ୍ୟମରେ ଏହା ବିଷୟରେ ପ୍ରଚାର କଲେ ଲୋକ ଙ୍କ ମଧ୍ୟରେ ସଚେତନତା ସୃଷ୍ଟି ହୋଇ ପାରିବ। ସୁସ୍ଥ ଜୀବନ ଓ ସୁସ୍ଥ ପରିବେଶ ଗଠନ ପାଇଁ ଜଣେ ଯଦି ଦୃଢ ସଂକଳ୍ପ ନିଏ ,ତେବେ ସେ ନିଶ୍ଚୟ ନିଶା ମୁକ୍ତ ହୋଇ ପାରିବ। ଟିଭି ,ରେଡିଓ ଓ ଖବରକାଗଜ ରେ ଏହାର ନିରାକରଣ ବିଷୟରେ ବାରମ୍ବାର ପ୍ରକାଶ କଲେ ଲୋକ ମାନଙ୍କ ମଧ୍ୟରେ ସଚେତନତା ବୃଦ୍ଧି ପାରିବ। ଏହାର ବିକ୍ରୟ ଉପରେ ସରକାରଙ୍କ ତରଫରୁ ଯଦି କଟକଣା ଲାଗୁ କରାଯାଏ ତେବେ ନିଶ୍ଚିତ ଭାବରେ ସୁଫଳ ମିଳିପାରିବ ଏହା ସହ ଏହା ପାଇଁ କଟକଣା ଆଇନ୍ ପ୍ରଣୟନ କଲେ ତମାଖୁ ରୂପି ମୃତ୍ୟର ତାଣ୍ଡବଲୀଳା ରେ ପୂର୍ଣ୍ଣଚ୍ଛେଦ ଲଗାଯାଇ ପାରିଵ। ଅନ୍ତିମ ରେ ପ୍ରତ୍ୟେକ ଜନସାଧାରଣ ଏହା ପାଇଁ ଦୃଢ ସଂକଳ୍ପ ନେବା ଏବଂ ଏହାକୁ ସଂପୂର୍ଣ୍ଣ ଭାବେ ବର୍ଜନ କରିବା। ଆମେ ସମସ୍ତେ ମିଳିମିଶି ଏକ ସୁସ୍ଥ ପରିବେଶ ଏବଂ ତମାଖୁ ମୁକ୍ତ ସମାଜ ଗଠନ କରିବା।

ପ୍ରସ୍ତୁତି - ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ତମାଖୁ - ମୃତ୍ୟୁ ର ଯନ୍ତା (Quit Smoking)

ତମାଖୁ ବର୍ଜନ କରି ମୃତ୍ୟୁ ର ମାୟାଜାଲ ରୁ ନିଜକୁ ମୁକ୍ତ କରିବା। | Quitters are Winners