ଗୋଟିଏ ପରିବାର କିମ୍ବା ସମାଜ କୁ ଚଳେଇବା ପାଇଁ ହଉ ଅଥବା ତାକୁ ଆଗକୁ ବଢେଇବା ପାଇଁ ହଉ ଉଭୟ ନାରୀ ଏବଂ ପୁରୁଷଙ୍କ ମିଳିତ ଅବଦାନ ରହିଥାଏ | ଏହି ଯୋଗଦାନ ଏବଂ ଅବଦାନ ର ପ୍ରକ୍ରିୟା ଯୁଗ ଯୁଗ ଧରି ଚାଲି ଆସିଚି ଏବଂ ସେହି ସନ୍ତୁଳନର ଅଭାବ ହେତୁ ଅନେକ ସଭ୍ୟତା ଗଢି ଉଠିବା ସହ ଭାଙ୍ଗି ଯିବାର ମଧ୍ୟ ଇତିହାସରେ ଲେଖା ହୋଇଛି | ତେବେ ସନ୍ତୁଳନର ଅର୍ଥ କେବଳ ନାରୀ ଓ ପୁରୁଷଙ୍କ ହାର ନୁହେଁ ବରଂ ସେମାନଙ୍କ ମଧ୍ୟରେ ଅଭିଜ୍ଞତା, ସ୍ୱାକ୍ଷରତା, ପରଷ୍ପର ପ୍ରତି ସମ୍ବେଦନଶୀଳତା, ଉଭୟଙ୍କର ସୁରକ୍ଷା ପୁଣି ପ୍ରତ୍ୟେକ କର୍ମକ୍ଷେତ୍ରରେ ଉଭୟଙ୍କର ବିଚାରର ମାନ୍ୟତା ରହିବା ନିହାତି ଜରୁରୀ | ତେବେ ଏକ ସମୟରେ ଆମ ସମାଜର ବିକାଶରେ କିଛିକାଂଶରେ ଅବରୋଧ ହେବାରୁ, ତାହାର କାରଣ ଅନୁସନ୍ଧାନ କରାଗଲା, ତେବେ ଜଣା ପଡ଼ିଲା ଯେ ନାରୀ ମାନଙ୍କୁ ଉଚିତ୍ ପ୍ରୋତ୍ସାହନ ଦିଆ ଯାଉ ନାହିଁ | ତେବେ ପ୍ରୋତ୍ସାହନ ର ଦିଗ ଗୁଡ଼ିକ କଣ ହେଇ ପାରେ ? ଉନ୍ନତି, ଗବେଷଣା, ରାଜନୀତି, ରଚନାତ୍ମକ, କଳା, ବାଣିଜ୍ୟ ଏମିତି ତମାମ୍ ଦିଗ ଯାହାକୁ ଆଧାର କରି ଏଇ ସମାଜ ଦମ୍ଭ ଧରିଛି ଏବଂ ଆଗକୁ ବଢ଼ି ଚାଲିଛି | ସରଳ ଭାଷାରେ ବୁଝିବାକୁ ହେଲେ ଜୀବନ ଜୀବିକା ନିର୍ବାହ ପାଇଁ ହଉ କିମ୍ବା ସମାଜକୁ ଆଗକୁ ବଢ଼ାଇବା ପାଇଁ ହଉ, ଉଭୟ ନାରୀ ଓ ପୁରୁଷଙ୍କର ଅବଦାନ ତଥା ନିଷ୍ପତି, ସୁଚେଷ୍ଟା, ସମର୍ପଣ ର ଆବଶ୍ୟକ |

ତେବେ ପ୍ରତ୍ୟେକ କ୍ଷେତ୍ରରେ ନିଜର ମନ୍ତବ୍ୟ, ଦୃଷ୍ଟିକୋଣ ଏବଂ ନିଷ୍ପତି ରଖିବାର ଅଧିକାର ଯେବେ ଉଭୟ ନାରୀ ଓ ପୁରୁଷଙ୍କୁ ଦିଆଯିବ ତେବେ ହିଁ ଏ ସମାଜ ଉନ୍ନତିର ପଥରେ ଆଗେଇ ଚାଲିବ | ନାରୀ ମାନକୁ ମିଳୁଥିବା ଏହି ଅଧିକାରକୁ ହିଁ କୁହାଯାଉଛି "ମହିଳା ସଶକ୍ତିକରଣ" | ହେଲେ କଥାଟି କେବଳ ନିଷ୍ପତି ନେବାରେ ଶେଷ ହୁଏନି, ବରଂ ଆମେ କହି ପାରିବା ମହିଳା ସଶକ୍ତିକରଣ ଭଳି ଏକ ବିଶାଳ ବୃକ୍ଷର ଏହା ଏକ ଶାଖା ଟିଏ ମାତ୍ର | ଏହାର ମୂଳ ଆଧାର କନ୍ୟା ଜନ୍ମ ଠାରୁ ଆରମ୍ଭ ହୋଇଥାଏ | କାରଣ ଆମ ପୁରୁଷ ପ୍ରାଧାନ୍ୟ ସମାଜର ଅନେକ ମର୍ମଭେଦୀ ନିୟମ ସବୁ ରହି ଆସିଥିଲା | ଯେମିତିକି ସ୍ନେହ ପ୍ରେମ ସହ ପୋଷଣ ଜନିତ ଅଭାବରେ ମଧ୍ୟ ଶିଶୁ କନ୍ୟା ଙ୍କୁ ରଖା ଯାଉଥିଲା | କିଛିକାଂଶ ରେ ତାହା ନହେଲେ ହେଁ ଶିକ୍ଷା ଲାଭ କ୍ଷେତ୍ରରେ ପ୍ରାୟ ସମସ୍ତ ପରିବାରରେ ଶିଶୁ କନ୍ୟାଙ୍କୁ ପଛରେ ରଖା ଯାଉଥିଲା | ଏହି ସବୁକୁ ଆଖି ଆଗରେ ରଖି ଭିନ୍ନ ଭିନ୍ନ ଯୋଜନା ହେଉ କିମ୍ବା ବିଭିନ୍ନ ସରକାରୀ ନିୟମ ଦ୍ଵାରା ହେଉ ପରିବର୍ତ୍ତନ ଆଣିବା ପାଇଁ ଚେଷ୍ଟା ଜାରି ରହିଛି |

ମହିଳା ମାନଙ୍କୁ ଭିନ୍ନ ଭିନ୍ନ କ୍ଷେତ୍ରରେ ଶିକ୍ଷା ପ୍ରଦାନ କରିବା ସହ ସେହି କ୍ଷେତ୍ରରେ ପାରଙ୍ଗମ ବନାଇବାରେ ଚେଷ୍ଟା ଚାଲିଛି | ଯାହା ଦ୍ଵାରା ମହିଳା ମାନେ ନିଜେ ସ୍ୱାବଲମ୍ବୀ ହବା ସଙ୍ଗେ ସଙ୍ଗେ କୌଣସି ନିଷ୍ପତି ନିଜେ ନେବାରେ ଯୋଗ୍ୟ ହୋଇ ପାରିବେ | ଏବଂ ଏହି ଯୋଗ୍ୟତା କିପରି ବ୍ୟକ୍ତିଗତ ହେବା ଠାରୁ ଆରମ୍ଭ କରି ସମାଜର ଉନ୍ନତି ମୂଳକ ହୋଇ ପାରିବ ସେଥି ପ୍ରତି ଧ୍ୟାନ ଦିଆ ଚାଲିଛି |

ମହିଳା ସଶକ୍ତିକରଣ ଅଭିଯାନ ର ଫଳ ସ୍ୱରୂପ ଆଜି ରାଜନୀତି ଠାରୁ ଆରମ୍ଭ କରି ଆୟ କର ବିଭାଗ ଯାଏଁ, ପୁଣି ବ୍ୟବସାୟ ଠାରୁ ଆରମ୍ଭ କରି ବାଣିଜ୍ୟ ଯାଏଁ ସବୁ କ୍ଷେତ୍ରରେ ମହିଳା ମାନଙ୍କର ଦୃଷ୍ଟିକୋଣ କୁ ସମ୍ମାନ ଦିଆ ଯାଉଚି ଯାହା ଦ୍ଵାରା ସମାଜକୁ ଏକ ଭିନ୍ନ ଏବଂ ଉନ୍ନତ ଉପାୟ ବିଷୟରେ ଅବଗତ ହବାର ସୁଯୋଗ ମିଳୁଚି |

ମହିଳା ସଶକ୍ତିକରଣ ଏକ ପ୍ରକାରର ରାଷ୍ଟ୍ରୀୟ ବିଷୟବସ୍ତୁ ପାଲଟି ଯିବା ସଙ୍ଗେ ସଙ୍ଗେ ସମସ୍ତଙ୍କୁ ଏଥିପ୍ରତି ଅଧିକ ଯତ୍ନବାନ ହବା ହେବା ଜରୁରୀ ଅଟେ | କାରଣ ମୂଳଦୁଆ ମଜବୁତ୍ ହେଲା ପରେ ହିଁ ଆଗତ ଉନ୍ନତି ମୂଳକ କାର୍ଯ୍ୟ ସବୁ ସହଜ ହୋଇ ପାରିବ | ତେଣୁ ଉଭୟ ପୁତ୍ର କନ୍ୟା ଙ୍କୁ ଉଚିତ୍ ଶିକ୍ଷା ଦବା ସହ ସେମାନଙ୍କୁ ସ୍ନେହ ଆଦର ତଥା ନିଷ୍ପତି ନେବାରେ ସକ୍ଷମ ବନାଇବା ମଧ୍ୟ ଶିଖାଇବା ଜରୁରୀ | ପୁଣି ସ୍ୱାବଲମ୍ବୀ ବନିବା ସହ ନିଜ ଜୀବନ ନିଜ ଇଚ୍ଛାରେ ବଞ୍ଚିବା ପାଇଁ ପ୍ରୋ୍ସାହିତ କରିବା ଜରୁରୀ | ତେବେ ଏତେ ସବୁ ପରେ ଉଭୟ ପୁରୁଷ ଓ ନାରୀ ଯେବେ ନିଜ ଅଧିକାର ପାଇଁ ଲଢ଼ିବା ଠାରୁ ଊର୍ଦ୍ଧକୁ ଆସିବେ ତେବେ ଯାଇଁ ସମାଜର ଉନ୍ନତି ଦିଗରେ ନିଜର ହାତ ବଢାଇ ପାରିବେ |

"ସଶକ୍ତିକରଣ" ଏହି ଶବ୍ଦ ହିଁ ବୁଝାଇ ଦେଉଚି ଯେ ଉଚିତ୍ ଶକ୍ତି ପ୍ରଦାନ କରିବା | ତେଣୁ ମହିଳା ମାନଙ୍କୁ ତାଙ୍କର ଉଚିତ୍ ଶକ୍ତି ପ୍ରଦାନ କରିଲେ ସେମାନେ ସମାଜ ଗଠନ ନିମନ୍ତେ ନିଜର ପ୍ରକୃତ ଲଢ଼େଇ ଲଢ଼ି ପାରିବେ |

ସୁସ୍ମିତା ଜେନା

ବିଶାଖାପାଟଣା

Women Empowerment and it's necessity

ମହିଳା ସଶକ୍ତିକରଣ ଏବଂ ଏହାର ଆବଶ୍ୟକତା