ଆଜିର ସଭ୍ୟ ସମାଜର ଜ୍ଞାନୀ ଗୁଣି ମାନଙ୍କ ମଧ୍ୟରେ ନାରୀ ଓ ପୁରୁଷ ର ସମାନତା କୁ ନେଇ ଅନେକ ତର୍କ ବିତର୍କ ଅହରହ ଲାଗି ରହିଛି | କିଛି ଲୋକ ନାରୀଙ୍କୁ ପୁରୁଷଙ୍କ ଠୁ ପଛରେ, କିଛି ସମାନ ତ କିଛି ଆଗରେ ବୋଲି ତର୍କ କରି ଚାଲିଛନ୍ତି | ନାରିତ୍ଵ ଏବଂ ପୌରୁଷତ୍ବର କାହାଣୀ ଶୁଣି ଆମେ ମାନେ ମଧ୍ୟ କେବେକେବେ ଭାବ ପ୍ରବଣ ହେଇ ଯାଉଛୁ ତ କେବେ ଉତ୍ତେଜିତ ହେଇ ଉଠୁଚୁ | ଆଉ ଏହି ତର୍କ ବିତର୍କ ଆଗାମୀ କାଳରେ ମଧ୍ୟ ଚାଲୁଥିବ | ମାତ୍ର ଗୁରୁତ୍ୱପୂର୍ଣ୍ଣ କଥା ହେଉଛି ଆମେ ଏହି ସବୁ ତର୍କକୁ ଆଗରେ ରଖି ପ୍ରକୃତ ସମସ୍ୟା ଗୁଡ଼ିକୁ ଅଣଦେଖା କରି ଦେଉନୁ ତ ? ସମାଜରେ ଚାଲିବା ପାଇଁ ଯେଉଁସବୁ ଆଧାର ଗୁଡ଼ିକ ଆବଶ୍ୟକ ସେସବୁ ପ୍ରତି ଅବହେଳା ହେଉନି ତା ? ଏହି ଯେପରି ଶିକ୍ଷା, ସୁରକ୍ଷା, ସ୍ୱଚ୍ଛତା, ସ୍ବାସ୍ଥ୍ୟ... ଆହୁରି ଅନେକ କିଛି | ଆଉ ଏହି ସବୁ ମଧ୍ୟରେ ପ୍ରଥମ ସଚେତନଶିଳ ବିଷୟ ହେଉଛି ସ୍ବାସ୍ଥ୍ୟ | ଆଉ କଥା ଯେତେବେଳେ ଗୋଟିଏ ମହିଳାର ସ୍ବାସ୍ଥ୍ୟ ଉପରେ ଆସେ ତେବେ ସମସ୍ତଙ୍କୁ ସେଥିପ୍ରତି ଅଧିକ ଧ୍ୟାନ ଦେବାକୁ ପଡ଼ିବ | ଗୋଟିଏ ନାରୀ ଯିଏ ସ୍ଵୟଂ ସୃଜନ କର୍ତ୍ରି, ତାର ସ୍ବାସ୍ଥ୍ୟ ଏବଂ ସ୍ୱଚ୍ଛତା ପ୍ରତି ଉଭୟ ନାରୀ ଓ ପୁରୁଷ ଯତ୍ନବାନ ହେବା ଆବଶ୍ୟକ |

ଏମିତି ଦେଖିବାକୁ ଗଲେ ମଣିଷ ଶରୀରର ପ୍ରତ୍ୟେକ ଅଙ୍ଗ ଯାହା ମୁଣ୍ଡର କେଶ ଠାରୁ ଗୋଡ଼ ର ନଖ ଯାଏଁ ସ୍ୱଚ୍ଛ ଏବଂ ନୀରୋଗ ହେବା ଆବଶ୍ୟକ, ମାତ୍ର ଗୋଟିଏ ନାରୀକୁ ତାହାର ଗୁପ୍ତାଙ୍ଗ ପ୍ରତି ଅଧିକ ଧ୍ୟାନ ଦେବା ଜରୁରୀ | କାରଣ ତାହା ଗୋଟିଏ ଏପରି ଅଙ୍ଗ ଯେଉଁଥିରେ ଶାରୀରିକ (physical), ଗ୍ରନ୍ଥି ରସ ଜନିତ (hormonal), ରାସାୟନିକ (chemical) ପରିବର୍ତ୍ତନ ଅହରହ ଚାଲିଥାଏ | ତେଣୁ ସେ ଅଙ୍ଗରେ ରୋଗ ସଂକ୍ରମଣର ସମ୍ଭାବନା ଖୁବ୍ ଅଧିକ ଥାଏ | ସର୍ବୋପରି ଋତୁସ୍ରାବ, ଯୌନକ୍ରିୟା ଏବଂ ପ୍ରସବ ପ୍ରକ୍ରିୟା ଦେଇ ଗତି କରୁଥିବାରୁ ମହିଳା ମାନଙ୍କର ରୋଗାକ୍ରାନ୍ତ ଏବଂ ସଂକ୍ରମଣର ସମ୍ଭାବନା ସର୍ବାଧିକ ଥାଏ |

ଯଦି ଆମେ ଋତୁସ୍ରାବ କଥା କହିବା ତେବେ ତାହା ଏକ ମାସିକ ଧର୍ମ ତେଣୁ ସେ ବିଷୟରେ ଅଧିକ ଜ୍ଞାନ ଏବଂ ଅଧିକ ସତର୍କତା ଅବଲମ୍ବନ କରିବାଟା ଉଭୟ ନାରୀ ଓ ପୁରୁଷଙ୍କର କର୍ତ୍ତବ୍ୟ |

ଋତୁସ୍ରାବ ବିଷୟରେ କିଛି ତଥ୍ୟ କିଶୋରୀଙ୍କ ପାଇଁ--

- ଯେତେବେଳେ ଗୋଟିଏ କନ୍ୟା କିଶୋରୀ ଅବସ୍ଥାରେ ପହଞ୍ଚେ ଯାହାକି 13 ରୁ 15 ବର୍ଷ ମଧ୍ୟରେ ହୁଏ, ସେତେବେଳେ ତାର ଶାରୀରିକ ପରିବର୍ତ୍ତନର ପ୍ରକ୍ରିୟା ଆରମ୍ଭ ହୋଇଯାଏ |

- ପ୍ରଥମ ଋତୁସ୍ରାବ, ଯାହାକୁ ଇଂରାଜୀରେ pubarty ମଧ୍ୟ କୁହାଯାଏ, ସେ ସମୟରେ ଶରୀରରେ ଅନ୍ୟ ପରିବର୍ତ୍ତନ ମଧ୍ୟ ଦେଖାଯାଏ ଯେମିତିକି ଶରୀରର କିଛି ଅଙ୍ଗରେ ଲୋମ ଗହଳ ଦେଖାଯିବା, ସ୍ତନର ଆକାର ପରିବର୍ତ୍ତନ, ମୁହଁରେ ବ୍ରଣ ବାହାରିବା ଆଦି ଦେଖା ଦେଇଥାଏ | ଯାହା ଏକ ସାଧାରଣ କଥା ବୋଲି କିଶୋରୀ ମାନଙ୍କୁ ସୂଚାଇ ଦବା ଉଚିତ୍ |

- ଋତୁସ୍ରାବ ପ୍ରାୟ 5 ରୁ 7 ଦିନର ପ୍ରକ୍ରିୟା ଏବଂ ଏହା 28 ରି 30 ଦିନ ମଧ୍ୟରେ ହୋଇଥାଏ | ଏହା ସମସ୍ତ ମହିଳା ମାନଙ୍କ ସହ ହୋଇଥାଏ ଏବଂ ଏହା ପାୟ 50 ବର୍ଷ ବୟସ ପର୍ଯ୍ୟନ୍ତ ହୋଇପାରେ |

- ଏହା ଏକ ପ୍ରାକୃତିକ ପ୍ରକ୍ରିୟା, ଯାହାକି କୌଣସି ପ୍ରକାରର ରୋଗ ନୁହେଁ |ତେଣୁ ଏହାକୁ ଡରିବା ଉଚିତ୍ ନୁହେଁ |

- ଏହି ସମୟରେ ମହିଳା ମାନଙ୍କୁ ଠିକ୍ ଭାବରେ ସ୍ନାନ କରିବା, ଗୁପ୍ତାଙ୍ଗ କୁ ସଫା ରଖିବା, ରକ୍ତସ୍ରାବ ପାଇଁ ସ୍ୱଚ୍ଛ କପଡ଼ା କିମ୍ବା ପ୍ୟାଡ ପିନ୍ଧିବା, ଏହା ଛଡ଼ା ଉଚିତ୍ ସମୟରେ ପ୍ୟାଡ଼ କିମ୍ବା କପଡ଼ା ବଦଳାଇବା ନିହାତି ଆବଶ୍ୟକ |

- ଯଦି କୌଣସି କାରଣ ରୁ ପ୍ୟାଡ ଉପଲବ୍ଧ ହୋଇ ପାରୁନି ତେବେ କପଡ଼ା କୁ ପୁନଃବ୍ୟବହାର ବ୍ୟବହାର କଲାବେଳେ ବହୁତ୍ ସତର୍କତା ଅବଲମ୍ବନ କରିବା ଉଚିତ୍ |

- କପଡ଼ା ଭଲ ଭାବରେ ସଫା ହୋଇଥିବା ଦରକାର, ଖରାରେ ଶୁଖିଥିବା ଦରକାର (ଯାହା ଦ୍ଵାରା ରୋଗ ଜୀବାଣୁ କମ୍ ବ୍ୟାପିବେ) ଏବଂ ତାହା ଅଧିକ ଥର ବ୍ୟବହାର ନହେବା ଉଚିତ୍ |

- ଏହିସମୟ ମାନଙ୍କରେ ନିଜ ଶାରୀରିକ ପରିବର୍ତ୍ତନକୁ ଲକ୍ଷ୍ୟ କରି କାମ କରିବା ଉଚିତ୍ | ଉଚିତ୍ ବିଶ୍ରାମ, ଉଚିତ୍ ଖାଦ୍ୟ ଏବଂ ଉଚିତ୍ ପରିବେଶରେ ରହିବା ଆବଶ୍ୟକ |

ଋତୁସ୍ରାବକୁ ଲକ୍ଷ୍ୟ କରି ଆମ ସମାଜରେ ଅନେକ ପ୍ରଥା ଏବଂ କୁପ୍ରଥା କାହିଁ କେତେ ଦିନରୁ ଚାଲି ଆସୁଛି | ଲୋକମାନେ ଆଜିର ଆଧୁନିକ ଯୁଗରେ ଏସବୁକୁ ମାନୁ ନାହାନ୍ତି | କିନ୍ତୁ ଅନେକ ପ୍ରଥା ପଛରେ କିଛି ବୈଜ୍ଞାନିକ କାରଣ ଏବଂ କିଛି ସକାରାତ୍ମକ ଉଦ୍ଦେଶ୍ୟ ରହିଛି | ଉଦାହରଣ ବଶତଃ ସେହି ଦିନ ମାନଙ୍କରେ ମନ୍ଦିର କିମ୍ବା ରୋଷେଇ ଘରକୁ ଯିବା ବାରଣ କରା ଯାଏ | ତାହାର ପ୍ରମୁଖ କାରଣ ହେଲା ଯେ ଆଗ କାଳରେ ଘରର ପୂଜା ଘରେ ଅନେକ ଦେବାଦେବୀଙ୍କର ମୂର୍ତ୍ତୀ ରଖା ଯାଉଥିଲା, ବହୁ ବଡ଼ ଠାକୁର ଘର ଥିଲା ଯାହାକୁ ପ୍ରତ୍ୟେକ ଦିନ ସଫା କରିବାକୁ ପଡ଼ୁଥିଲା ଏବଂ ଭିନ୍ନ ଦେବଦେବୀଙ୍କର ଭିନ୍ନ ନିୟମରେ ପୂଜାର୍ଚ୍ଚନା ହେଉଥିଲା | ତେଣୁ ରଜସ୍ୱଳା ନାରୀମାନଙ୍କୁ ସେ କଠିନ କାମରୁ ଟିକେ ଆରାମ ଦେବା ପାଇଁ ଏହି ନିୟମ କରା ଯାଇଥିଲା | ଏହା ଛଡ଼ା ଯୌଥ ପରିବାରରେ ଅନେକଙ୍କ ପାଇଁ ରୋଷେଇ କରିବା ମଧ୍ୟ କଷ୍ଟକର କାମ ହୋଇ ପଡୁଥିଲା ଏକ ରଜସ୍ୱଳା ପାଇଁ | ତେଣୁ ତାଙ୍କୁ ସେଠାରୁ ବର୍ଜିତ କରା ଯାଇଥିଲା | ଏହା ବ୍ୟତୀତ ବଡ଼ବଡ଼ କଳସୀ ବା ବାଲଟି ରେ ବହୁ ଦୂରରୁ ପାଣି ଆଣିବାକୁ ପଡୁଥିଲା | ସେଥିପାଇଁ ଏ ସମୟରେ ଜଳ ସ୍ପର୍ଶ ନ କରିବା ମଧ୍ୟ ନିୟମରେ ଥିଲା |

ମାତ୍ର ଯୁଗ ପରିବର୍ତ୍ତନ ହେତୁ ସବୁକିଛି ଆମ ସୁବିଧା ହିସାବରେ ହାତପହନ୍ତାରେ ଅଛି ଏବଂ ଆମେମାନେ ଏସବୁ କୁ ନେଇ ଅଧିକ ସତର୍କ ହେଲୁଣି | ତେଣୁ ପୁରୁଣା ପ୍ରଥାକୁ ଆକ୍ଷେପ ନକରି ନୂଆ ଯୁଗକୁ ଆହୁରି ଉନ୍ନତ କରିବା ଦିଗରେ ଆଗକୁ ବଢିବା ଉଚିତ୍ | ଏକ ଉଚିତ୍ ବୟସ ଯାହାକି କିଶୋର ଅବସ୍ଥାରେ ହିଁ ଉଭୟ ପୁତ୍ର ଏବଂ କନ୍ୟାଙ୍କୁ ଏବିଷୟରେ ସୂଚିତ କରିବା ଦରକାର | ଯାହାଦ୍ଵାରା ଉଚିତ୍ ସମୟରେ ଉଭୟ ଉଭୟଙ୍କ ପ୍ରତି ସମ୍ବେଦନଶୀଳ ହୋଇ ପାରିବେ ଏବଂ ଏକ ଉନ୍ନତ ଓ ଶିକ୍ଷିତ ସମାଜ ଗଢି ପାରିବେ |

ସୁସ୍ମିତା ଜେନା

ବିଶାଖାପାଟଣା

World menstrual hygiene day

ବିଶ୍ଵ ଋତୁସ୍ରାବ ସ୍ୱଚ୍ଛତା ଦିବସ